BIBLIAPIQA kuti-kutirispan mayninqa imatapas qelqaqku, mayninqa juj palabrallatan iskayta kinsa kutita qelqaqku. ¿Imaraykun chayta ruwankuman karqan? Chaypaq kinsamanta yachasun, yaqapaschá chaykuna razón karqan.

Ima tiempopin qelqakurqan. Ñaupa tiempopi Israel runakunaqa manan sapankankuchu jap’irqanku kamachikuy qelqa k’uyuta. Paykunaqa llapa llaqtantin juñukuspallan chay simikunataqa uyarikuqku (Deut. 31:​10-12). Unaytaq sayaspalla chay kamachikuy leekusqanta uyarikuqku chayqa, manachá facilchu karqan tukuy yuyaywan uyarikuyqa (Neh. 8:​2, 3, 7). Chhaynataq karqan chayqa, wakin palabrakunata sapa ratu uyarispaqa allintachá chaykunataqa yuyaqku. Chaymantapas imatapas kuti-kutirispa niyqa allinpunin karqan, chhaynapi kamachikuykunata leykunatapas allinta yuyarinankupaq (Lev. 18:​4-22; Deut. 5:1).

Imaynatan qelqaqku. Bibliapiqa yaqa chunka partenmi kashan takikuna. Chay takikunan kashan Salmos libropi, Cantares nisqa libropi, Lamentaciones nisqa libropi ima. Wakin takikunaqa kuti-kutirispa takinapaqmi kashan. Chhaynataqa ruwakuq imamantachus chay taki rimashan chayta allinta yuyanapaqmi. Chayta entiendenapaq qhawarisun Salmos 115: 9-11 textopi imachus nisqanta. Chaypin nin: “Yau Israel runakuna, Jehová Diosman jap’ipakuychis. (Paymi yanapaqniykichisqa, paymi pakakunaykichis escudoqa). Aaronpa miraynin runakuna, Jehová Diosman jap’ipakuychis. (Paymi yanapaqniykichisqa, paymi pakakunaykichis escudoqa). Jehová Diosta manchakuqkuna, Jehová Diospi confiaychis. (Paymi yanapaqniykichisqa, paymi pakakunaykichis escudoqa)”, nispa. Pipas chay takita takiqqa manachá jayk’aqpas qonqaqchu chay munay simikunataqa.

Imaraykun qelqankuman karqan. Bibliata wakin qelqaqkunaqa runakuna yuyanankupaqmi imatapas kuti-kutirispa qelqaqku. Yawarmanta kamachishaspapas kuti-kutirispan Jehová Diosqa Israel runakunaman chayta willachirqan. Payqa imaynas yawarpi kausay kashan chaytan allinta yachanankuta munarqan (Lev. 17:​11, 14). Watakunaq pasasqan qhepamanpas Jerusalenpi kaq umalliqkunaqa yapamantan rimarqanku imaynas Diosta kusichinapaqqa yawarmanta allinta waqaychakuna karqan chayta (Hech. 15:​20, 29).

Bibliapi wakin palabrakunata kuti-kutirispaña qelqakurqan chaypas, ¿chayraykuchu nisunman “Jehová Diosqa wakin simikunata kuti-kutirispa rimananchistachá munan” nispa? Manan, manan payqa munanchu costumbreta jina chaykunata ruwananchistaqa. Jesuspunin nirqan: “Mañakushaspaqa aman kaq simikunallatachu yapa-yapamanta rimanki”, nispa (Mat. 6:7). Chaymantapas willarqanmi imakunamantas mañakushaspa rimasunman chaytapas (Mat. 6:​9-13). Dioswan rimashaspa manaña kaq simikunatachu kuti-kutirispa rimasunman chaypas, imatachus mañakushanchis chaytaqa jayk’a kutitapas mañakullasunmanmi (Mat. 7:​7-11).

Allinpunin Bibliapi imatapas kuti-kutirispa otaq yapa-yapamanta willasqanqa. Ancha jatun yachachiqninchis Diospa chay ruwasqanqa allinninchispaqmi (Isa. 48:​17, 18).