KAY 2023 watapin 18 enero killapi jw.org paginapi juj willakuy lloqsimurqan. Chaypin willakurqan imaynas hermano Gage Fleegle, jinallataq hermano Jeffrey Winder Umalliq T’aqapi kanankupaq nombrasqa karqanku chayta. Paykunaqa unayñan tukuy sonqonkuwan Jehová Diosta servishanku.

Hermanonchis Gage Fleeglemanta rimasunchis. Payqa Estados Unidos nacionpin, Pensilvania llaqtapi nacesqa. Paymanqa papanwan mamitanpiwanmi yachachisqaku Diospa Siminta. Erqellaraq kashaqtinsi paykunaqa karupi juch’uy llaqtachaman ripusqaku chaypi Diosmanta willaypi yanapakunankupaq. Payqa 1988 watapis 20 noviembre killapi bautizakusqa.

Chay hermanonchistaqa papanwan mamitanpiwansi kallpachaqku tukuy tiemponwan Diosta servinanpaq. Chaymantapas wasinkumansi invitamuqku watukuq umalliqkunata Betelpi llank’aq hermanokunata ima, chhaynapis chay hermanonchisqa reparasqa imaynas tukuy tiemponkuwan Diosta serviq hermanokunaqa kusisqa kanku chayta. Chhaynapis payqa 1989 watapi 1 setiembre killamantapacha precursor regular jina Diosta serviyta qallarisqa, chaytaqa ruwasqa bautizakusqanmanta manaraq unaychu kashaqtinmi. Iskay wata qhepamantaq Betelpi llank’ananpaq invitasqaku. 1991 watapin octubre killamanta payqa Brooklyn llaqtapi kaq Betelpi llank’ayta qallarirqan. 12 watanmantapachas payqa Betelpipuni llank’ayta munasqa.

Chay Betelpiqa librokuna, revistakuna ruwaypin payqa pusaq wata llank’arqan, chaymantataq “predicacionta qhawariq t’aqa” nisqa ukhupi llank’arqan. Chaymantapas chay tiempopiqa ruso simita rimaq iñiq t’aqapin yanapakurqan. Payqa 2006 watapin casarakapurqan Nadia sutiyoq hermanawan, chaymantapachaqa kuskan Betelpi Jehová Diosta servirqanku. Casarakusqankumanta ñaupaq watakunaqa portugués simita rimaq iñiq t’aqapin paykunaqa yanapakurqanku, kunanqa chunka watañan castellano simita rimaq iñiq t’aqapi yanapakushanku. Hermanonchis Gageqqa  unaymi “predicacionta qhawariq t’aqa” nisqa ukhupi llank’arqan, chaymantan ichaqa yachachikuymanta encargakuqkuna nisqaman pasachirqanku, chaymantataq predicacionmanta encargakuqkuna nisqa oficinaman pasachirqanku. 2022 watapitaq marzo killapi nombrarqanku Umalliq T’aqapi kaq predicacionmanta encargakuqkunata yanapaq nisqapi kananpaq.

Kunanqa hermanonchis Jeffrey Windermanta rimasunchis. Payqa California ladopi Murrieta llaqtapis wiñasqa. Paytapas papanwan mamitanpiwansi yachachisqaku Jehová Diosmanta. Jinas payqa 1986 watapi 29 marzo killapi bautizakapusqa. Bautizakusqanmanta juj killallaraq kashaqtinsi precursor auxiliar kapusqa, maytas paymanqa gustasqa chay llank’ay, jinas manapuni saqesqachu. Chay watallapitaqsi 1 octubre killapi precursor regular kapusqa.

Adolescente kashaspas payqa Betelta risqa kuraq hermanonkuna watukuq, jinas payqa nisqa: “Betelpi llank’anaypaq watayman chayaruspaqa junt’asaqpuni solicitudta”, nispa. Chaytas payqa ruwasqa, jinas 1990 watapi mayo killapi Wallkill llaqtapi kaq Betelpi llank’ananpaq invitasqaku.

Chaypi kashaspaqa imaymanapis payqa llank’asqa. Limpieza ruwaypi, hacienda cuidaypi, oficina de Betel nisqapi imas llank’asqa. 1997 watapin payqa Ángela sutiyoq hermanawan casarakapurqan. Chaymantapachan kuska Betelpi Jehová Diosta servishanku. 2014 watapiqa Warwick llaqtamanmi paytaqa kacharqanku, chaypin hermano Jeffreqa oficina central nisqa ruwaypi yanapakurqan. 2016 watapitaq Patterson llaqtapi Centro Educativo de la Watchtower nisqaman ripurqanku. Chaypin audio y video nisqapi llank’arqan, chaymantataq Warwick llaqtaman kutimpurqanku. Chaypin hermano Jeffreqa Betelpi llank’aqkunamanta encargakuqkuna nisqapi llank’arqan. 2022 watapitaq marzo killapi Betelpi llank’aqkunamanta encargakuqkunata yanapaqkuna nisqa ukhupi llank’ayta qallarirqan.

Kay hermanokunaqa Jehová Diospa regalonpunin kanku (Efes. 4:8). Tukuy sonqowan Diosmanta mañakusun paykunata yanapashanallanpaq.