KAY tiempopi wakin runakunaqa jujkunamanta aswan allinpaq qhawarisqa kaytan munanku. Chaskinkuña imachus mañakusqankuta chaypas astawanraqmi paykunaqa munanku. Bibliapiqa willarqanñan kay tukukuy p’unchaykunapi wakin runakuna chhayna kanankuta, paykunallapaq imatapas munanankuta, mana agradecekuq kanankuta ima (2 Tim. 3:2).

Chayqa manan kay tiempollapichu rikukun, Adanwan Evawanpas chhaynan karqanku. Paykunaqa allin kaqta mana allin kaqta ajllakunankupaq derechoyoq kanankupaq piensaspan ñak’ariyman saqewarqanchis. Rey Uziaspas importantepaq qhawarikuspan mana ruwananta ruwarqan. Manaña paypa ruwananchu karqan chaypas inciensotan Jehová Diospaq q’apachirqan (2 Crón. 26:​18, 19). Jesuspa tiemponpi Fariseokunapas saduceokunapas Abrahanpa mirayninmanta kasqankuraykun Diospaq aswan allin qhawarisqan kayta munarqanku (Mat. 3:9).

Ñaupaqpi nimusqanchis jina kay tiempopi runakunaqa paykunallapaqmi imatapas munanku, manan jujkunapiqa piensankuchu. Chaymantapas llapa runakuna allinpaq qhawarinankutan munanku, ima ruwasqankupas aswan allinpas kanman jinaraqmi qhawarikunku (Gál. 5:26). Chhayna runakunaqa noqanchismanpas samaykuwasunmanmi. Yaqapaschá jujkuna aswan allinpaq qhawariwananchista munasunman. Chaymantapas “noqan Diospa llaqtanpiqa ima llank’anatapas chaskinaypaq jinaqa kani” nispa imapaschá piensasunman. Chhaynaqa, ¿imatan ruwasunman ama chhayna piensaykunawan samaykachikunanchispaq? Piensarinanchismi imaynatas Jehová Dios chhaynata piensaq runakunata qhawarin chaypi. Chaypaq Bibliapi wakin yuyaychaykunata t’aqwirisun.

Jehová Diosllan ninan pis imatapas, ima ruwanatapas chaskinqa chaytaqa. Wakinmanta kaypi yachasun.

•   Familiapi. Jehová Diosqa esposakuna qosankuta respetanankutan munan, munanmi qosakunapas esposankuta munakunankuta (Efes. 5:33). Chaymantapas munanmi esposallanpi piensanankuta, paykunallapaq ñawinku kananta (1 Cor. 7:3). Chaymantapas Jehová Diosqa wawakuna tayta-mamankuta kasukunankuta respetanankuta iman munan, munanmi taytakunapas wawankuta allinta sumaqta cuidanankuta, munakunankuta ima (2 Cor. 12:14; Efes. 6:2).

• Iñiq t’aqapi umalliqkuna. Jehová Diosqa umalliqkunata tukuy sonqo llank’asqankumanta respetananchistan munan (1 Tes. 5:12). Chhaynaña kaqtinpas manan paykunaqa hermanokunaq vidantaqa controlanankuchu (1 Ped. 5:​2, 3).

• Chaymantapas Jehová Diosqa munanmi autoridadkunata respetananchista. Paykunataqa Diosmi maypichus kanankupi churan, impuestotapas pagananchismi (Rom. 13:​1, 6, 7).

Jehová Diosqa munakuq kaspan askhanpi imatapas qowanchis. Runakunaqa juchayoq kasqanchisraykun wañunanchispaq jina kanchis (Rom. 6:23). Chaywanpas Jehová Diosqa may munakuyninpin allin kaqkunata qowanchis (Sal. 103:​10, 11). Munay llank’aytan llaqtanpi qowanchis. Chaytaqa sumaq sonqo kayninpin qowanchis, manan chayta chaskinanchispaq jina kasqanchisraykuchu (Rom. 12:​6-8; Efes. 2:8).

Ama kay pachaq piensayninwan apachikuychu. Mayninqa mana reparakuspan piensasunman: “Noqamanmi imatapas astawanqa qowananku”, nispa. Imaynas chhayna piensayqa mana allinchu chaymanta rimaspan Jesús willarqan uvas chajrayoq runamanta. Payqa tutallamantas chajranpi llank’achinanpaq runakunata contratamusqa. Payqa juj p’unchaymanta juj denario qolqeta pagapunanpaqmi wakin runakunawan rimanakusqa. Chaymantapas tardeyaykuyta jinas juj runakunatawan contratamullasqataq. Ch’isiyaykuytataqsi llapankuman juj denario qolqeta pagapusqa. Tutallamanta jamuqkunamanpas juj horallata llank’aqkunamanpas igualtan pagapusqa. Tutallamanta llank’ayta qallariq runakunaqa ch’isiyaq llank’asqankumanta paykunaman masta pagapunanpaqmi piensasqaku, ichaqa manan chhaynachu karqan (Mat. 20:​1-16). Chay rijch’anachiywanmi Jesusqa yachachirqan imaynas Diospa imachus jayk’achus qowasqanchiswan contento kananchis chayta.

Yachanan agradecido kayta, manataqmi nishutaqa imatapas mañakunachu (1 Tes. 5:18). Apóstol Pabloq ejemplonqa maytan yanapawasunman. Payqa derechonpin kasharqan Corinto iñiqkunamanta ima yanapaytapas mañakunanpaq, chhaynaña kaqtinpas manan imatapas paykunamantaqa mañakurqanchu (1 Cor. 9:​11-14). Noqanchispas pay jinan kananchis,  manan imatapas masta qowananchistaqa suyananchischu. Aswanpas imachus chaskillasqanchiswanmi contento kananchis.

Juch’uyaykukuqmi kananchis. Jatunchakuq runakunaqa jujkunamanta aswan allinpaqmi qhawarikunku, chaymi paykunaqa imatachus chaskisqankumantaqa astawanraq imatapas munanku. Chhaynata piensayqa veneno jinan, juch’uyaykukuq kaymi ichaqa chay venenopaq jampi jina.

Profeta Danielqa allin ejemplon chaypi karqan. Payqa allin familiamantan karqan, allin rijch’ayniyoq, allin yachayniyoq, allin yuyayniyoq iman karqan. Chhaynataq karqan chayqa, yaqapaschá payqa ninman karqan: “Noqataqa aswan allinpaqmi jujkunaqa qhawariwananku. Noqan allin kani ima allin llank’anatapas chaskinaypaqqa”, nispa (Dan. 1:​3, 4, 19, 20). Ichaqa manan chhaynatachu piensarqan, aswanpas payqa humilde sonqon karqan. Chaymi Jehová Diosqa payta anchata munakurqan (Dan. 2:30; 10:​11, 12).

Noqanchispas cuidakunanchismi ama kay pachapi runakunaq imaynachus piensasqankuwan samaykachikunanchispaq. Chaymantapas imatachus Jehová Dios sumaq sonqo kayninpi qowanchis chayllawanmi contento kananchis.