1. ¿Imatan mana allintachu yachasunman pipas “perdonaykin” niwaqtinchis?

 PITAPAS phiñachirqanchis k’irirqanchis chayqa “perdonaykin” niwaqtinchisqa thajmi kapunchis ¿riki? Ichaqa, ¿cheqaqpaqpunichu perdonawashasunman? Manan chaytaqa allintaqa yachasunmanchu. ¿Imarayku? Manan lliupas igualtachu qhawarinku perdonaytaqa. Wakinqa “perdonaykin” nispaqa “jujmanta amigontin kapusun” nishankumanpas jinan. Wakinmi ichaqa perdonankuña chaypas manaña ñaupaqpi jinachu qhawarinakunku.

2. ¿Imayna perdonaqmi Jehová Dios? (Willakuyta qhaway).

² Jehová Diosqa manan runakuna jinachu. Pay imayna perdonakuqchus kasqanmanta rimaspan Salmos takita qelqaq runa nirqan: “Qanmi cheqaq perdonaqqa kanki, chaywanmi qanqa may respetasqa kanki”, nispa (Sal. 130:4). a Arí, Jehová Diosqa cheqaqta perdonaq Diosmi, manan mayqen runapas pay jina perdonakuqqa kanmanchu. Pay jina perdonakuq kananchispaqqa paypa ejemplonpin piensananchis. Hebreo rimay qelqakunapiqa wakin partekunapiqa perdonmanta rimaspaqa Jehová Diosmantan rimashan, manan runakunamantachu.

3. ¿Imaraykun nisunman “Jehová Diosqa manan runakuna jinachu pitapas perdonan” nispa? (Isaías 55:​6, 7).

³ Jehová Diosqa pitapas perdonaspaqa llapantan chay runaq juchanta borrapun. Chaymantapas perdonasqan runaqa atinmanmi jujmanta paypa amigon kayta. Payqa mana mich’akuspan pitapas perdonan. ¡May munaymi Diospa chhayna kasqanta yachayqa ¿riki?! (Leey Isaías 55:​6, 7).

4. ¿Imatan Jehová Dios ruwarqan imas cheqaqtapuni perdonay chayta allinta entiendenanchispaq?

 ⁴ Jehová Diosqa runakunamanta jujniraytataq perdonan chayqa, manan noqallanchismantaqa allintaqa entiendesunmanchu chhayna kasqantaqa. Ichaqa chayta entiendenanchispaqmi payqa Bibliapi qelqachisqa imaymana ejemplokunata. Chaymanta wakintan kaypi yachasunchis. Yachasunmi imakunatas Jehová Dios ruwan juchanchista pichapunanpaq chayta, imakunatas ruwan paywan jujmanta amigontin kananchispaq chaytapas. Chaykuna yachasqanchismi yanapawasun may sumaq sonqochus, may perdonakuqchus Jehová Dios chayta allinta entiendenanchispaq, chaytaq yanapawasun payta astawan munakunanchispaq.

JUCHANCHISTAN APAPUN

5. ¿Imatan Jehová Dios ruwan juchanchiskunata perdonawaspanchis?

⁵ Bibliapiqa wakin partekunapin juchata tupanachikun juj jatun llasa q’epiwan. Chayraykun juchanmanta rimaspa rey Davidpas nirqan: “Juchaykunan sinchita ñit’ishawan, nishu llasapunin kashan, sasa apaymi kashan”, nispa (Sal. 38:4). Ichaqa Salmos 25:18; 32:5 textokunapin willashan imaynas Jehová Diosqa juchankumanta arrepientekuqkunata “perdonan” chayta. Hebreo rimaypi “perdonay” nispaqa “oqariy” “apay” ninantan nin. Chaytan Jehová Diosqa ruwan. Imaynan juj kallpasapa jatun runa llasa q’epita oqarinman chhaynatan Diospas juchanchista wasanchismanta oqarispa apapun.

6. ¿Maymanmi Jehová Dios juchanchiskunata apapun?

⁶ ¿Maymanmi Jehová Dios juchanchiskunata apan? Salmos 103:12 textopin chayta willashan. Chaypin nin: “Imaynan inti lloqsimuy ladoqa inti jaykuy ladomanta sinchi karupi kashan, chhayna karumanmi juchanchiskunataqa apapun”, nispa. Arí, kay textopi nisqan jina inti lloqsimuy ladoqa sinchi karupin kashan inti jaykuy ladomantaqa. ¿Imatan chaymanta yachasunman? Jehová Diosqa perdonawaspanchisqa mana piensay sinchi karumanmi juchanchiskunataqa apapun. ¿Manachu chayta yachay ancha kusikunapaq?

7. ¿Imatan Jehová Dios ruwan juchanchiskunawan? (Miqueas 7:​18, 19).

⁷ ¿Imatan Jehová Dios ruwan chay apasqan juchanchiskunawan? ¿Maypipas juñushanmanchu? Manan. Imatachus Jehová Dios ruwan juchanchiskunawan chaymanta rimaspan rey Ezequías nirqan: “Llapa juchaykunatan qhepaykiman wijch’upurqanki”, nispa. Willakuypin nillantaq: “Ñawiykimantan llapa juchaykunata wijch’upurqanki”, nispa (Isa. 38:​9, 17; willakuy TNM). Arí, juchanchiskunamanta arrepientekuqtinchisqa Jehová Diosqa juchanchiskunata oqarispan mana rikuna karuman wijch’upun. Ezequiaspa nisqantaqa khaynatan t’ijrakullanmantaq: “Llapa juchaykunatan manapas juchallikuymanchu karqan jinaman tukuchirqanki”, nispa. Ezequiaspa nisqanta allinta entiendenanchispaqmi Jehová Diosqa Miqueas 7:​18, 19 textota qelqachirqan (leey Miqueas 7:​18, 19). Chaypin willashan imaynas Jehová Diosqa llapa juchanchiskunata lamar-qochaman wijch’uykun chayta. ¿Imaynataq chayri kanman? Ñaupa tiempopi imatapas lamar-qochaman wijch’uykuqtinkuqa manañan chaytaqa orqoyta atiqkuchu. Chhaynatan Jehová Diospas juchanchiskunawan ruwan.

8. ¿Imatan kaykama yachamurqanchis?

⁸ Kaykama yachamusqanchis jina Jehová Diosqa perdonawaspanchisqa q’episqanchis juchatan chaskipuwanchis, jinaspa chayta karuman apapun. ¡May kusikunapaqmi chayqa ¿riki?! Chaychá Davidpas nirqan: “Kusisqan kanku mana allin ruwasqankumanta perdonasqa kaqkunaqa, juchankupas pampachasqaña kaqkunaqa; may kusisqan Jehová Diospa perdonasqan runaqa”, nispa (Rom. 4:​7, 8). Kaypi yachamusqanchis jina Jehová Diosqa yachanmi perdonayta. Payqa cheqaqpaqpunin pitapas perdonan.

 WIÑAYPAQMI JUCHANCHISKUNATA PICHAPUN

9. ¿Maykaman Jehová Dios juchanchista perdonawanchis, imaynapin chayta yachanchis?

⁹ Yachasqanchis jina Jehová Diosqa wawanpa wañusqanraykun juchanchiskunata pichapun. Chaymantapas Bibliaq nisqanman jinaqa Jehová Diosqa t’aqsan limpian imas runaq juchantaqa, chhaynatas juchapakuq runata limpioman ch’uyaman tukuchin (Sal. 51:7; Isa. 4:4; Jer. 33:8). ¿lmaraykun chay ruwasqan allinpuni? Jehová Dios kikinmi chayta willan. Ninmi: “K’anchaq puka jinaña juchaykichis kanman chaypas, rit’i jinan yuraqllaña kapunqa; rauraq puka jinaña juchaykichis kanman chaypas, yuraq willma jinan kapunqa”, nispa (Isa. 1:18). Ima puka colorpas p’achanchisman sut’uykuqtinqa sasatan chayqa lloqsinman. ¿Imatan Jehová Dios chaywan yachachiyta munawanchis? Payqa perdonawaspanchisqa manapas juchallikusunmanchu karqan jinatan juchanchista pichapun.

10. ¿Ima ejemplowanmi Jehová Dios yachachiwallanchistaq imayna perdonakuqchus chayta allinta entiendenanchispaq?

¹⁰ Ñaupaq yachachikuypi yachamusqanchis jina, juchallikuspaqa Jehová Dioswanmi manupi kapunchis (Mat. 6:12; Luc. 11:4). Chhaynaqa sapa kuti juchallikuspaqa astawanraqmi Jehová Dioswan manupi kapunchis. Ichaqa juchanchista perdonawaspanchisqa llapa chay manunchistapas perdonawashasunman jinan kapun. Chaymi mana chaytaqa pagananchisñachu. ¿Imaynataq chayri? Perdonawasqanchis qhepamanqa manañan Jehová Diosqa juchanchista yuyarinñachu. ¡May kusikunapaqmi chhayna perdonaykuq kasqanqa ¿riki?!

11. ¿Imaninantan Bibliapi nishan “juchaykichismi pichasqa” kanqa nisqanwan? (Hechos 3:19).

¹¹ Jehová Diosqa manunchistaqa manan perdonallanchu, aswanpas jujpaqkaman borrapun (leey Hechos 3:19). Chayta entiendenapaq kaypi piensasun: Juj runas makinpi jap’ishanman juj documentota. Chaypis willashanman jayk’atachus jujman manurqan chayta. Ichaqa chayta perdonapuspas payqa chay documentota jatun equiswan marcarapunman. Chaytaña ruwan chaypas, jayk’achus debesqan numerokunaqa rikukushallanmi. Jehová Diosqa manan chhaynatachu perdonan. Pay perdonaspaqa llapantan runaq juchanta borrapun. Chaypaq piensallasuntaq ñaupa tiempopi qelqasqanku tintapi. Chay tintaqa carbonwan, gomawan unuwan imallan ruwasqa karqan. Chayraykun ima qelqasqankutapas esponjata apicharuspa chaywan borrapuqku. Chayta ruwaqtinkuqa manan ima qelqasqankupas rikukuqchu. Manukuqkunapas manapas jayk’aqpas manukunkumanchu karqan jinan libre kapuqku. Chhaynatan Jehová Diospas juchanchiskunataqa pichapun. ¡¿Manachu chay ancha kusikunapaq?! (Sal. 51:9).

12. ¿Imatan yachasunman Jehová Dios juchanchiskunata yana phuyuwan pakaykusqanmanta?

¹² Isaías 44:22 textopin Jehová Diosqa willawallanchistaq imatas ruwallantaq juchanchiskunawan chayta. Chaypin nishan: “Juchaykikunatan yana phuyu jina pakasaq, pantasqaykikunatan pacha phuyu jina p’ampasaq”, nispa. Chay textopi nisqan jina, Jehová Dios perdonawaspanchisqa juj yana phuyuwan jinan juchanchiskunata pakapun, chhaynapin manaña pipas chaytaqa rikunchu.

13. ¿Imaynan kanchis Jehová Dios juchanchiskunata perdonapuwaqtinchis?

¹³ ¿Imatan chay ejemplokunamanta yachasunman? Jehová Dios juchanchiskunata perdonasqan qhepamanqa manañan chaykunapiqa piensananchischu, manan ninanchischu: “Chaywan marcasqachá purisaq”, nispaqa. Jesusmi paganña vidanwan chay manunchistaqa, manañan noqanchisqa chaytaqa pagasunchu. Juchanchiskunaqa borrasqañan kapun, manapas jayk’aqpas juchallikusunmanchu karqan jinañan kapun. Juchanchismanta pesapakuqtinchismi Jehová Dios chayta ruwan. Payqa cheqaqpaqpunin perdonawanchis.

 JUJMANTAN AMIGONKUNA KAPUNCHIS

14. ¿Imaraykun confiananchis Jehová Dios perdonakuq kasqanpi? (Qhaway kay parrafopaq fotota).

¹⁴ Jehová Dios perdonawasqanchis qhepamanqa jujmantan paywan amigontin kapunchis. Chhaynaqa manañan juchanchiskunamantaqa llakikushananchischu, nitaqmi piensananchischu pay noqanchiswan phiñasqalla kashananpaqqa ni qhepaman castigawananchispaqpas. Jehová Diosqa manapunin chaytaqa ruwanqachu. ¿Imaraykun chayta ninchis? Pay kikinmi profeta Jeremiasta nirqan: “Noqan juchankuta perdonasaq, manañan yuyarisaqñachu”, nispa (Jer. 31:34). Apóstol Pablopas Diospa nisqanta jinan nillarqantaq: “juchankutapas manañan yuyarisaqñachu”, nispa (Heb. 8:12). ¿Imaninantan nishanman “manañan yuyarisaqñachu” nispa?

15. ¿Imatan Jehová nishawanchis “manañan juchaykichista yuyarisaqñachu” nispa nisqanwan?

¹⁵ Bibliapi yuyariy nispaqa manan ñaupaqpi imachus pasarqan chayta yuyariyllamantachu rimashan. Mayninpiqa yuyarispa imatapas ruwaymantan rimashallantaq. Chayta entiendenapaq piensasun Jesuspa ladonpi warkusqa kaq mana allin runapi. Paymi Jesusta nirqan: “Jesús, yuyarikuwankiyá gobiernoykiman jaykuspaqa”, nispa (Luc. 23:​42, 43). Chay runaqa manan chay ratupi payta yuyarinallantachu munarqan, aswanpas gobiernashaqtin payta yuyarinantan munasharqan. Chayraykun Jesusqa nirqan: “Noqawanmi paraisopi kanki”, nispa. Chhaynaqa, ¿imatan Jehová nishawanchis “manañan juchaykichista yuyarisaqñachu” nisqanwan? Ñataq perdonapuwanchisña chayqa manañan jayk’aqpas juchanchistaqa yuyarichiwasunñachu, manan juchachawasunpasñachu.

16. ¿Imaynan kanchis Jehová Dios juchanchiskunata perdonapuwaqtinchis?

¹⁶ Kunanqa Bibliapi juj ejemplowan yachallasuntaq imaynas pipas Jehová Dios perdonaqtin tarikun chayta. Runakunaqa llapanchismi “juchaq kamachin” kanchis, cadenawanpas watasqa kashasunman jinan kanchis. Ichaqa Jehová Dios perdonawaqtinchisqa chay cadenatapas p’itishanman jinan, chhaynatan “juchamanta kachariwanchis” (Rom. 6:​17, 18; Apo. 1:5). May  kusikunapaqmi Diospa chay ruwasqanqa. Carcelmantapas lloqsishasunman jinaraqmi kusisqa kanchis ¿riki?

17. ¿Imaraykun nisunman “Jehová Dios perdonawaqtinchisqa millay onqoymanta qhaliyapuy jinan” nispa? (Isaías 53:5).

¹⁷ (Leey Isaías 53:5). Kunanqa juj ejemplomantawan yachasun. Bibliaq nisqanman jinaqa juchanchisqa wañuyman apaq juj millay onqoy jinan. Ichaqa Jehová Diosmi Jesuspa wañusqanwan chay onqoymanta qhaliyachipuwanchis. Chayraykun kunanqa atinchis Jehová Dioswan jujmanta amigontin kaytapas (1 Ped. 2:24). Juj runa millay onqoymanta qhaliyapuqtinqa may kusisqan tarikun ¿riki? Chhaynan noqanchispas kanchis Jehová Dios perdonapuwaqtinchisqa, paywan jujmanta amigontin kapuspaqa.

¿IMAYNATAN QHAWARINKI JEHOVÁ DIOS PERDONAKUQ KASQANTA?

18. ¿Imatan kaykama yachamurqanchis Jehová Dios perdonakuq kasqanmanta? (Qhaway “¿Imayna perdonakuqmi Jehová Dios?” nisqa willakuyta).

¹⁸ ¿Imakunatan kaykama yachamurqanchis? Jehová Dios perdonapuwaqtinchisqa llapa juchanchiskunan borrasqa kapun, wiñaypaqmi pichasqa kapun. Chhaynapin Jehová Dioswan amigontin kayta atinchis. Diospa perdonawasqanchisqa juj sumaq regalon, payqa munakuwasqanchisraykun, khuyapayawasqanchisraykun perdonawanchis. Chayraykun chaytaqa mana derechonchispas kanman jinatachu qhawarinanchis. Manan ninchischu: “Jehová Diosqa perdonawanqachá”, nispaqa (Rom. 3:24).

19. a) ¿Imaraykun Jehová Diosta gracias ninanchis? (Romanos 4:8). b) ¿Imamantan qatimuq yachachikuypi yachasunchis?

¹⁹ (Leey Romanos 4:8). ¡May kusikunapaqmi Jehová Diospa perdonasqan kayqa ¿riki?! Salmos 130:4 nisqan jina, Jehová Diosqa “cheqaqta perdonaq Diosmi”. Ichaqa pay perdonawananchispaqqa Jesuspa nisqantan kasukunanchis. Paymi nirqan: “Runakunaq mana allin ruwasqasuykichista mana perdonankichischu chayqa, Taytaykichispas manallataqmi juchaykichista perdonasunkichischu”, nispa (Mat. 6:​14, 15). Chaypi nisqan jina perdonasqa kananchispaqqa, Jehová Dios jinan jujkunata perdonananchis. Qatimuq yachachikuypin yachasunchis imas Dios jina perdonaq kananchispaq yanapasunman chayta.