Papaypas mamitaypas catolicon karqanku. Ichaqa Bibliapin yacharusqaku Diospa sutinqa “Jehová” kasqanta, jinan Testigo kapurqanku. Papayqa manañan Jesusmanta imagenkunata ruwarqanñachu, aswanpas allintataq carpinteriamanta yachaq chayqa wasiykupi pampapi kaq cuartotan allicharqan chaypi juñunakunaykupaq. Chaymi ñaupaq kaq juñunakunayku wasi karqan, chayqa Filipinas nacionpi Manila ladopi kaq San Juan del Monte llaqtachapin kashan.

1952 watapin nacerqani, papaywan mamitaywanqa juch’uychaymantapachan Jehová Diosmanta yachachiwarqanku. Kuraq wayqeykunaqa tawan karqan, panaykunataq kinsa. Paykunamanpas yachachirqankun Jehová Diosmanta. Papayqa wiñasqayman jinan Bibliapi juj capitulota sapa p’unchay leechiwaq, chaymantapas juj qelqakunatan estudiaq kayku. Chaymantapas papayqa wasiykupin alojaq watukuq umalliqkunata, Betelpi llank’aq hermanokunata ima. Paykunaqa munay experienciankutan willawaqku, chayta uyarispan kusisqa kaq kayku. Chaykunan yanapawarqanku Jehová Dios serviyta ñaupaqman churanaykupaq.

Noqapaqqa aswan allin herenciaqa karqan papaywan mamitaywan Jehová Diosta reqsichiwasqankun. Mamitayqa 1971 watapin juj onqoywan wañukapurqan, wañukapusqan qhepamanqa papaywan kuskan precursor kapurqayku. Ichaqa 20 wataypi kashaqtiymi 1973 watapi papaypas wañukapullarqantaq. Chaywanmi noqaqa sapallaypas kapuyman jinapaq qhawarikurqani. Ichaqa “Jehová Diospa promesankunapi” piensaymi yanapawarqan ama nishuta llakikunaypaq, ama iñiyniypipas pisipanaypaq (Heb. 6:19). Papaypa wañupusqan qhepamanqa precursor especial kanaypaqmi niwarqanku, chaymantataq Coron islaman kachawarqanku; chayqa Palawan ladopin kashan.

21 wataypi kashaspan Coron islaman chayarqani. Noqaqa juj jatun llaqtapin wiñarqani, chaymi chay islachaman chayaspaqa anchata admirakurqani. Chaypiqa manan luzpas, unupas, carropas, ni motollapas kasqachu. Chaypi karqanña hermanokuna  chaypas mayninqa sapallaymi predicaq kani. Chay ñaupaq killakunaqa sapallay kashanaypaqmi piensakuq kani, ñishutan familiayta amigoykunatapas extrañaq kani. Chaymi sapa tutan waqaq kani, waqayuspan cielopi ch’askakunata qhawaq kani. Mayninqa wasiyman imaraqmi kutipuyta munaq kani.

Chhayna piensaykuna jamuwaqtinqa Jehová Diosmantan mañakuq kani. Bibliapi kallpachaq textokunapin piensaq kani, juj qelqakunata leesqaypi iman piensaq kani. Juj kaq texton kashan Salmos 19:​14, chaypin nishan: “Diosníy Jehová, simiypa rimarisqankunaqa munayniykiman jinapuni kachun, pakakunay qaqa, rantiwaqniy Dios, sonqoypa yuyaykusqankunaqa qanpaq jinapuni kachun”, nispa. Chay nisqanpin sapa kutilla piensaq kani. Chaymantapas juj La Atalaya revistapin leerani “Usted nunca está solo”, nisqa willakuyta. a Chaytaqa kuti-kutirispan leeq kani. Chayta ruwaymi noqataqa anchata yanapawarqan. Chaykunata estudiaspaqa Jehová Dioswanpas rimashayman jinan karqani. Chay ratupiqa tukuy yuyaymi estudiaq kani, yuyaymanaq iman kani; tukuy sonqomantan mañakuqpas kani.

Coron islaman chayasqay qhepallamanmi umalliq kapurqani. Noqallataq chaypi umalliq kasharqani chayqa, sapallaymi llapa juñunakuyta pusariq kani. Noqallan Qhawaq revistatapas apariq kani, Discursokunatapas sapa semananmi qoq kani. Chaykunapi ocupasqa kaymi yanapawarqan sapallay kasqaypi ama nishutachu piensanaypaq.

Coron islapi runakunaqa allintan uyarikuqku, tiempowanqa wakin estudiachisqay runakunapas bautizakapurqankun. Chaywanpas karanpunin sasachakuykunaqa, mayninqa predicay rinaypaqqa kuskan p’unchaytan puriq kani. Mayninqa kuskan ñanpin tutayachikuqpas kani. Noqaykuqa juj islachakunatawanmi predicaq kayku. Chay islachakunamanqa botepin riq kayku. Mayninqa nishutan mancharikuq kani paranayamuqtin nishuta wayramuqtin ima. Chhaynakunapiña tarikurqani chaypas Jehová Diosqa tukuy tiempon yanapawarqan. Chay qhepamanqa allintan repararqani imaynas Jehová Diosqa chaykunawan preparawasharqan qhepaman juj llank’aykunata chaskinaypaq chayta.

1978 watapin Papúa Nueva Guinea ladoman kachawarqanku. Chayqa Australiaq wichay ladonpin kashan. Chay nacionqa monten, españa sayaytaqmi kanpas. Chaypiqa yaqa 3 millones runakunan tiyaqku, 800 más simikunatataqmi rimaqkupas. Ichaqa yaqa llapankun pidgin simita rimaqku. Chay simitaqa tok pisin nispan nikullantaq.

Ñaupaqtaqa inglés simita rimaq Port Moresby iñiq t’aqamanmi kachawarqanku. Chaypiqa manan unaychu qhepakurqani. Chaymantaqa Tok pisin simita rimaq iñiq t’aqamanmi ripurqani. Chay simitan estudiayta qallarirqani, yachasqayman jinataq chay simipi predicayta qallarirqani. Chayta ruwaymi yanapawarqan chay simita astawan yachanaypaq. Chay qhepamanqa ñan discursokunataña chay simipi qoq kani. Ichaqa chayllamanmi juj munay noticia chayamuwarqan. Manaraq juj wata chaypi kashaqtiymi watukuq umalliq kanaypaq niwarqanku. Chaymi chay simita rimaq askha iñiq t’aqakunata visitaq kani.

Chaypi iñiq t’aqakunaqa karu-karupin kasharqanku. Chaymi askha asambleakunata aparinay karqan, chaymi viajaspalla kaq kani. Qallariypiqa manan chay nacionpi ima costumbrenkutapas yacharqanichu, chaymi mayninqa sapallay kanaypaq piensakuq kani. Chaymantapas chaypi iñiq t’aqakunata visitayqa sasan karqan, chay ladoqa monten karqan.  Chaymi mana chakillapiqa riyta atiqchu kani, chaymi avionpi riq kani. Mayninqa manan pasajero kaqchu, sapallaymi thanta avionpi viajaq kani. Chaypiqa botepi viajay jinan karqan, nishutan mancharikuq kani.

Chay llaqtakunapiqa wakin runakunallan telefonoyoq kaqku. Chaymi juj iñiq t’aqapi hermanokunawanqa cartallanta rimaq kayku. Mayninqa chay apachisqay carta manaraq hermanokunaman chayashaqtinmi noqaraq ñaupaqta chay llaqtachaman chayaq kani. Chaymi mayninqa hermanokunawan tupanaypaqqa tapukachakuspa hermanokunata maskhaq kani. Chay iñiq t’aqapi hermanokunaqa sumaqtan chaskiwaqku. Chaypin repararqani tukuy ima ruwasqaypas mana yanqapaqchu kasqanta. Jehová Diosqa chaykunapipas yanapawarqanmi, chaymi ladollaypipas pay kashanman jina karqani.

Juj kutinmi Bougainville islachapi juñunakuyman rirqani. Chayllamanmi juj warmi-qhari iñiqmasikuna kusisqa asuykamuwarqanku. Paykunan tapuwarqanku: “¿Yuyawashankikuraqchu?”, nispa. Noqataq “arí yuyashaykichismi” nirqani. Paykunamanqa Port Moresby llaqtaman chayaspan Bibliamanta yachachirqani. Chaymanta ripuspan ichaqa juj hermanoman saqepurqani. Paykunaqa ñan bautizakapusqakuña, chayta yachaspan anchata kusikurqani. Chayqa juj sumaq bendicionmi noqapaqqa karqan.

Coron ladomantaqa 1978 watapin ripurqani. Chay iñiq t’aqapin Adel hermanata reqsirqani. Payqa munay hermanan karqan, allin llank’aqmi karqan. Payqa sapallanmi wawankuna Samueltawan Shirleytawan uywaq, mamitantapas cuidaqmi. Chaymantapas payqa precursoran karqan. Paywanmi 1981 watapi mayo killapi Filipinasman kutispa casarakapurqani. Casarakusqayku qhepamanqa precursor jinan Jehová Diosta servirqayku, familiaykutapas munaytan uywarqayku.

Familiayoqña kapurqani chaypas 1983 watapin jujmanta precursor especial kanaypaq niwarqanku. Jinaspa Linapacan islaman kachawarqanku, chayqa Palawan provinciapin kashan. Manaña chaypi Testigokuna karqanchu chaypas, llapa familiaywanmi chayman astakapurqayku. Ichaqa manaraq juj wata chaypi kashaqtiykun esposaypa mamitan wañukapurqan. Noqaykutaqa Diosmanta willaypi ocupasqa kasqaykun yanapawarqanku ama nishuta llakikunaykupaq. Chaypiqa askha runakunamanmi yachachiq kayku, chaymi juj juñunakuna wasi necesitakusharqanña. Chaymi noqaykuqa juñukunaykupaq wasita ruwarqayku. ¡May kusisqan chaypiqa kasharqayku! Kinsa watallapin 110 runakuna jamurqanku Jesuspa wañusqanta yuyarinapaq juñunakuyman. Chayman jamuqkunaqa ripusqayku qhepamanqa askhan bautizakapusqaku.

1986 watapin Culion islaman rinaykupaq niwarqanku. Chay llaqtapiqa askha runakunan lepra onqoyniyoq kasqaku. Chaypi kashaqtiykun esposaypas precursor especial kapurqan. Chayman chayaspaqa manchakusharqaykun chay onqoyniyoq runakunaman Diosmanta willayta, “contagiarukusunchu kanpas” nisharqaykun. Paykunaq cuerponqa mancharikunapaq jinaraqmi karqan. Ichaqa chaypi tiyaq iñiqkunan niwarqanku: “Chay runakunaqa tratamientowanmi kashanku, manan contagiakunkichischu”, nispa. Chay onqoyniyoq wakin runakunapas juñunakuykunamanqa jamuqkun. Chay juñunakuykunaqa juj hermanaq wasinpin aparikuq. Noqaykuqa pisi-pisimantan chayman yachakapurqayku. Chaymi  mana manchakuspa Diospa sumaq promesankunamanta paykunaman yachachiq kayku. Chay runakunaqa t’aqasqa pisichasqa iman kaqku. Ichaqa anchatan kusikuqku jamuq tiempopi chay onqoyninkumanta qhaliyachisqa kanankuta yachaspa (Luc. 5:​12, 13).

Wawaykutapas tukuy atisqaykutan iñiyninkupi yanaparqayku. Paykunata yanapanaykupaqmi esposaywan Coron llaqtamanta iskay sipas hermanakunata nirqayku Culion llaqtaman jamunankupaq. Chay sipaskunawan juñukusqankun paykunataqa yanaparqan. Wawaykuqa chay iskaynin hermanakunawanmi kusisqa Diosmanta willaqku. Chaymantapas paykunaqa askha erqechakunamanmi yachachiqku, noqaykutaq chay erqechakunaq tayta-mamanman yachachiq kayku. Chay llaqtapiqa 11 familiakunamanmi yachachiq kayku. Jehová Diospa yanapayninwanqa allintan chay iñiq t’aqaqa wiñarqan. Chaymi tiempowanqa chay iñiq t’aqaqa iskayman t’aqakapurqan.

Chay tiempopiqa sapallaymi chay llaqtapi umalliq karqani. Chaymi sucursalmanta nimuwarqanku Culion llaqtapi juñunakuykunata aparinaypaq. Chaymantapas niwarqankun Marily llaqtachaman rinaypaq. Chaypipas juñunakuykunatan apariq kani. Ichaqa chay llaqtachaman chayanaykupaqqa kinsa horatan botepi viajanayku karqan. Juñunakuy qhepatapas karutan puriq kayku Halsey llaqtakama wakin runakunaman yachachinaykupaq.

Tiempowanqa askha runakunan Marily llaqtapipas Halsey llaqtapipas bautizakapurqanku. Chaymi chay llaqtapipas juñunakuna wasikunata jatarichirqayku. Chaypi tiyaq hermanokunaqa Linapacan llaqtapi hermanokuna jinan imaymana ruwaypi yanapakurqanku. Paykunan chay juñunakuna wasita jatarichinaykupaq materialkunata churarqanku. Paykunan yaqa llapanta ruwarqanku. Marily llaqtapi juñunakuna wasi ruwakusqanqa jatunmi karqan, chaypiqa 200 más runakunan jaykuqku. Chayqa juj asambleata aparinaykupaq jinapunin karqan.

1993 watapin Filipinas nacionpi watukuq umalliq kanaypaq niwarqanku. Chay kutipaqqa ñan wawaykupas kuraqña kapurqanku. Chaymantapas 2000 watapin invitawarqanku qharikunapaq escuelaman. Chaypin capacitawarqanku chay escuelapi yachachinaypaq. Noqaqa mana atinaypaqmi piensasharqani, esposaymi ichaqa kallpachawarqan. Paymi niwarqan: “Jehová Diospa yanapayninwanqa atillankin chay ruwayta”, nispa (Filip. 4:13). Esposayqa razonwanmi chayta niwasharqan, Jehová Diosqa pay kikintapas yanapasharqanmi onqosqaña kasharqan chaypas.

 2006 watapaqqa qharikunapaq escuelallapin yachachisharqani. Chay watallapitaqmi llakikunapaq noticia chayamuwarqanku. Doctormi niwarqanku esposay párkinson onqoyniyoq kashasqanta. Chayta uyarispaqa manan imanakuytapas atirqaykuchu. Esposaytan nirqani: “Kay llank’aytachu juj tiempo saqepusunpas qhaliyanaykikama”, nispa. Paymi ichaqa niwarqan: “Ama chaytaqa ruwasunchu, aswanpas juj doctorllata maskharapuway kay onqoypi yanapawananpaq. Jehová Diosqa yanapawallasunmi qowasqanchis llank’ayta junt’ananchispaq”, nispa. Esposayqa soqta watan mana quejakuspalla Jehová Diosta servirqan. Chaymantan ichaqa manaña puriyta atipurqanñachu, silla de ruedasllapiñan puriq. Chaywanpas payqa predicashallarqanmi. Qhepamanqa manañan rimayta atipurqanñachu, chaywanpas kallpachakushallarqanmi iskay kinsa simillapipas juñunakuypi comentananpaq. Hermanokunaqa maytan esposaytaqa kallpachaqku. Esposayqa 2013 watapin wañukapurqan. 30 wata masmi paywan kuskaqa Jehová Diosta servirqayku. Wañukapusqan qhepamanqa nishutan llakikuq kani. Jujmantan sapallay rikukapurqani.

Chaywanpas tukuy tiempoywanmi Jehová Diostaqa servishallarqani. Esposayqa maytachá kusikunqa chayta yachaspaqa. Noqataqa Diosta serviypi ocupasqa kasqaymi yanapawarqan ama nishuta llakikunaypaq. 2014 watamanta 2017 watakaman tagalo simita rimaq iñiq t’aqakunata visitarqani. Chaymantapas Taiwán, Estados Unidos, Canadá nacionkunapi chay simita rimaq iñiq t’aqakunatan visitallarqanitaq. 2019 watapitaq India Tailandia nacionkunapi Diospa gobiernonmanta willaqkunapaq escuelapi yachachirqani. Chay escuelaqa inglés simipin aparikurqan. Chaykunapi yanapakuspaqa may kusisqan karqani.

Maymanchus kachawasqanku iñiq t’aqapiqa ratullan hermanokunaman yachakuq kani. Chaymi noqapaqqa sasa karqan paykunata saqepuy. Ichaqa imaymanapi tarikuspan astawanraq Jehová Diospi confiayta yacharqani. Chaymi yanapawarqan Diospa llaqtanpi ima cambiotapas kusisqa kasukunaypaq. Kunanqa Filipinas ladopin precursor especial jina yanapakushani. Chaypiqa may kusisqan kashani. Chaypi hermanokunaqa munaytan cuidawanku. Chaymantapas may kusisqan kashani wawaykuna Samuelwan Shirleywan mamitanpa ejemplonta qatikusqankuta rikuspa (3 Juan 4).

Qallariypi willakusqay jina, noqaqa imaymana sasachakuykunapin tarikurqani. May sonqo nanaymi noqapaqqa karqan esposay nishuta onqospa wañupusqanta rikuyqa. Chaymantapas imaymana cambiomanmi yachakunay karqan. Chaykunapiña tarikurqani chaypas Jehová Diosqa noqawanpunin kasharqan (Hech. 17:27). Jehová Diosqa imaymanapin yanapawarqan, mañakusqaytapas uyarimurqanmi (Isa. 59:1). Chayraykun Jehová Diosta “gracias” nini pakakunay qaqa jina kasqanmanta. Mayninpi sapallay kanaypaqña piensakuq kani chaypas, manan sapallaypunichu karqani, Jehová Diosmi noqawan tukuy tiempo kasharqan. Manapunin jayk’aqpas saqerpariwarqanchu.