Marymanta Johnmantawan rimasun, a paykunaqa casarasqan kanku. Paykunaq tiyasqan llaqtamanqa askha runakunas Filipinas ladomanta astakamunku llank’anata maskhaspa. Marywan Johnwanqa chay runakunamansi predicanku. Coronavirus nisqa millay onqoy tiempopipas Maryqa askha runakunamansi Bibliamanta yachachiyta qallarisqa. Payqa manas chay tiyasqan llaqtapi tiyaq runakunallamanchu yachachisqa, juj nacionkunapi tiyaq runakunaman imas yachachiyta qallarisqa. ¿Imaynapin chay runakunaman yachachiyta qallarinman karqan? Chayta kaypi yachasun.

Maryqa Bibliamanta yachachisqan runakunatas tapuq: “¿Pi reqsisqayki runapas Bibliata estudiayta munanmanchu?”, nispa. “Arí” niqtinkutaqsi payqa niq: “¿Reqsichiwankimanchu?”, nispa. Chhaynata tapurispallas Maryqa askha runakunata tarisqa. ¿Imarayku? Diospa siminta anchata valoraq runakunaqa munankun Bibliamanta yachashasqankuta familiankupas amigonkunapas yachanankuta. Marypa yachachisqan runakunawanpas chaysi pasasqa, chaymantan kunan yachasunchis.

Juj kaq estudiantensi Jasmin sutiyoq kasqa. Payqa Bibliata estudiayta munaq tawa runakunatas Maryman reqsichisqa. Chay tawamanta juj kaqpaq sutinsi kasqa Kristine. Paymanqa maytapunis Bibliata estudiay gustasqa, chaysi iskay kutita semanapi estudiasqaku. Maryqa tapusqas pi reqsisqanpas Bibliata estudiayta munanmanchu chayta, Kristinetaq nisqa: “Arí, amigaykunata reqsichisayki”, nispa. Chay semanakuna qhepallamansi Kristineqa tawa amigankunata Maryman reqsichisqa, paykunaqa yachaytas munashasqaku Bibliamanta. Chaymantapas Kristineqa juj runakunatawansi Maryman reqsichisqa, chay runakunapas juj runakunatawansi Maryman reqsichisqaku.

Maryman amigankunata reqsichisqan qhepamansi Kristineqa munasqa Filipinas nacionpi tiyaq familianpas Bibliamanta yachanankuta. Chaysi ususin Andreawan rimasqaku. Andreaqa Testigokuna juj secta kanankupaq, mana Jesuspipas creenankupaq, ñaupa Testamentollata utilizanankupaq imas piensasqa. Ichaqa Bibliata juj kuti estudiaspas reparasqa mana chhaynachu kasqanta. Bibliata sapa estudiaspataqsi kallpawan niq: “Bibliapitaq chayta nishan chayqa, ¡cheqaqpunin chayqa!”, nispa.

Chay qhepamansi Andreaqa iskay amigankunata, llank’ananmanta juj compañerantawan Maryman reqsichisqa, paykunapas qallarisqakus Biblia estudiayta. Chaymantapas Andreaqqa Angela sutiyoq juj tiansi kasqa, payqa ñausan kasqa. Paysi uyarishasqa Mary Andreawan Bibliata estudiasqankuta, Maryqa manas chayta yachasqachu. Juj p’unchaysi Angelaqa Andreata nisqa Maryta reqsichinanpaq, chhaynapi paypas Bibliata estudiananpaq.  Angelataqa maytapunis kusichisqa Bibliamanta yachasqan. Manaraq killapis askha textokunata umanpi jap’isqa, chaymantapas ¡tawa kutitas semanapi estudiayta munasqa! Andreas yanapasqa juñunakuykunata internetninta uyarinanpaq.

Kristine Bibliata estudiashaqtinsi qosan Joshua chayllapi kashasqa estudiasqanta uyarikuspa. Chayta reparaspas Maryqa tapusqa: “¿Munawaqchu noqaykuwan Bibliata estudiayta?”, nispa. Joshuataq nisqa: “Ya, ichaqa uyarikullasaq. Aman imatapas tapuwankichu, mana chayqa ripusaqmi”, nispa. Manaraq ni pisqa minutopas pasashaqtinsi Kristinemantapas mastaraq Joshuaqa imaymanata tapukusqa, jinaspa astawan Bibliamanta yachayta munasqa.

Mary juj tapuyllata ruwasqanwanmi askha runakuna Bibliata estudiayta qallarisqaku. Maryqa juj hermanokunata hermanakunata imas nisqa tarisqan wakin runakunata Bibliamanta yachachinankupaq. ¡Llapanpiqa 28 runakunas Marywan Bibliata estudiayta qallarisqaku, tawa nacionkunamantas kasqakupas!

Ñaupaq kaq estudianten Jasminsi bautizakapusqa 2021 watapi abril killapi. Kristinetaq bautizakapusqa 2022 watapi mayo killapi. Kunanqa Kristineqa familianwan kuskas Filipinas nacionpi tiyapun. Maryman Kristineq reqsichisqan iskay estudiantekunapas bautizakapusqakus. Angelapas chay killakuna qhepallamansi bautizakapusqa, kunanqa precursora regularsi payqa kapun. Kristineq qosan Joshua, ususin Andrea juj estudiantekunapas astawansi iñiyninkupi wiñarishanku.

Jesuspa discipulonkunaq tiemponpipas allin willakuykunaqa familiakuna, amigokuna ukhupipas ratullan mast’arikurqan (Juan 1:​41, 42a; Hech. 10:​24, 27, 48; 16:​25-33). ¿Manachu qanpas chayta tapuriwaq Bibliamanta yachachisqayki runakunata, juj runakunatapas? Qanpas tapuriy: “¿Pi reqsisqayki runapas munanmanchu Bibliata estudiayta?”, nispa. Chhaynata tapurispaqa yaqapaschá Bibliamanta yachayta munaq runakunata tarinki.