Jehová Dios sumaqta qhawariwananchispaqqa allin iñiyniyoqmi kananchis. Ichaqa Biblian nin: “Manan llapa runakunachu iñiyniyoqqa kanku”, nispa (2 Tes. 3:2). Chaypiqa apóstol Pabloqa qatikachaqninku mana iñiyniyoq “millay runakunamantan” rimasharqan. Ichaqa “manan llapa runakunachu iñiyniyoq kanku” nispaqa, kay tiempopi runakunamantawanmi rimasharqan. Kay tiempopi wakin runakunapas manan Diospi creeyta munankuchu, imaymanataña yachanku chaypas, rikushankuña Diospa kamasqankunata chaypas manan paypi iñinkuchu (Rom. 1:20). Wakinmi ninku: “Kanpunichá pillapas runakunamanta aswan atiyniyoqqa” nispa. Ichaqa Diospaqqa manan valenchu chhayna piensayqa, chayqa manan iñiychu.

Jehová Diospaq sonqonpaq jina kananchispaqqa, tukuy sonqon paypi iñinanchis. Chaymantapas manan iskayananchischu serviqninkunaman premiota qoq kasqanmanta (Heb. 11:6). Iñiyqa santo espirituq ruruchisqanmi, chayraykun allin iñiyniyoq kanapaqqa Jehová Diospa espiritunta mañakunanchis (Luc. 11:​9, 10, 13) Chaymantapas Diospa palabrantan leenanchis, chayqa Jehová Diospa yuyaychasqanmi. Chaymantapas chay leesqanchispin allinta piensarinanchis, chaypi yachasqanchisman jinataq imatapas ruwananchis. Chaykunata ruwasun chayqa, Jehová Diosmi santo espiritunta qowasun allin iñiyniyoq kananchispaq, chhaynapitaq paypa sonqonpaq jina kasunchis.