1. ¿Imapaqmi yanapawasun Salmos 15:​1-5 textopi imachus nisqan?

 ÑAUPAQ yachachikuypi yachamusqanchis jina, Dios sonqo runakunaqa atisunmanmi Diospa karpanpi kayta, atisunmanmi paywan allin amigontin kaytapas. Ichaqa, ¿imatan ruwananchis paywan allin amigontin kananchispaq? Chaypaqqa Salmos 15 capitulopi willasqanmi yanapawasun. Chaypin willashan imakunatas ruwananchis Diosman astawan asuykunanchispaq chayta (leey Salmos 15:​1-5).

2. ¿Imamantan rey David rimashanman karqan Diospa karpanmanta rimaspa?

² Salmos 15 capituloq qallariyninpin nishan: “Jehová Diosníy, ¿pin wasiykipi tiyanman? ¿Pin ch’uya orqoykipi tiyanman?”, nispa (Sal. 15:1). Rey Davidqa Diospa “wasinmanta” otaq karpanmanta rimaspaqa, yaqachus jina ñaupa tiempopi Diosta yupaychana karpamanta rimashanman karqan. Chay karpaqa Gabaón ladopin chay tiempopiqa kasharqan. Chaymantapas Diospa “ch’uya orqonmanta” rimaspaqa yaqachus jina Jerusalenpi kaq Sión orqomanta rimashanman karqan. Chaypin Davidqa Diospaq juj karpata prepararqan, chayman Diospa rimanakuynin arcata churanankupaq. Chay karpaqa kasharqan Gabaonpa uray ladonpin (2 Sam. 6:17).

3. ¿Imaraykun nisunman “Salmos 15 capitulopi nisqanta yachayqa ancha allinpunin” nispa? (Qhaway kay parrafopaq dibujota).

³ Arí, Israel runakunaqa manan llapankuchu Diosta serviyta atiqku yupaychana karpapiqa, nitaqmi llapankuchu jaykuqku maypichus Diospa rimanakuynin arca waqaychasqa kasharqan chaymanpas. Ichaqa kay tiempopi Dios sonqo runakunaqa, llapanchispas atisunmanmi Diospa karpanpi kayta. Chaypaqqa paywanmi allin amigontin kananchis. Llapanchispas munashanchischá chaytaqa, chaypaqqa Salmos 15 capitulopi nisqanmi yanapawasun. Chaypin willashan imayna runas kananchis Jehová Dioswan amigollantin kananchispaq chayta.

 “CH’UYATA KAUSASUN, ALLIN KAQTATAQ RUWASUN”

4. ¿Imaraykun nisunman “manan bautizasqallachu kananchis Jehová Dios allinta ch’uyata qhawariwananchispaqqa” nispa? (Isaías 48:1).

⁴ Salmos 15:2 textopi nisqanman jinaqa, Jehová Diosqa “ch’uyata kausaqllawanmi, allin kaqta ruwaqllawanmi” amigota ruwan. Kausaqwan, ruwaqwan nispaqa rimashan tukuy tiempo ch’uyata allinta kausaymantan. Ichaqa, ¿atisunmanchu juchasapa runakuna “ch’uyata kausayta”? Arí atisunmanmi. Sichus kallpachakusun tukuypi Jehová Diosta kasukunanchispaq chayqa, ch’uya runata jinan payqa qhawariwasun. Ichaqa yaqapaschá pipas ninman: “Bautizakuspaqa ñachá ch’uyaña kapunchis”, nispa. Chayqa manan chhaynachu, chaywanqa ch’uya ñanpi puriyllataraqmi qallarisharqanchis. Chaypaq piensasun ñaupa Israel runakunapi, paykunaqa manan Diospa llaqtanpi kasqankuraykullachu paypa karpanpiña kasharqanku. ¿Imarayku? Wakin Israel runakunaqa wajakuqkuña Jehová Diosta chaypas, “manan ch’uya sonqowanchu chanin kaywanchu” wajakuqku (leey Isaías 48:1). Sonqomantapuni Diosta maskhaqkunaqa kamachikuyninkunatan allinta reqsinanku karqan, kasukunankutaqmi karqan. Chhaynallataqmi kunanpas, Jehová Dios allinta qhawariwananchispaqqa manan bautizasqallachu kana, nitaqmi llaqtanpi kayllachu. Aswanpas kallpachakushanallanchismi allin kaqta ruwananchispaq. Ichaqa, ¿imakunan chaykuna kanman? Chaymantan qatiqpi yachasunchis.

5. ¿Iman Jehová Diospaq ch’uyata kausay allin kaqta ruwaypas?

⁵ Jehová Diosqa manan juñunakuykunapi sapa semana kallaqtinchischu “ch’uyata kausaqta” jinaqa “allin kaqta ruwaqta” jinaqa qhawariwasun (1 Sam. 15:22). Pay chhaynata qhawariwananchispaqqa tukuy imapin payta kasukunanchis. Sapallanchisña kashaspapas sonqonpaq jinan imatapas ruwananchis (Prov. 3:6; Ecl. 12:​13, 14). Arí, pisillapipas mana reparay jina kaqkunapipas kasukuqmi kananchis. Chhaynapin rikuchisun Diosninchis munakusqanchista, paypas munakuwasunmi (Juan 14:23; 1 Juan 5:3).

6. ¿Imaraykun nisunman “ñaupaqpi kasukuqña karqanchis chaypas manan chayraykuchu Diospa karpallanpiqa kasun” nispa? (Hebreos 6:​10-12).

⁶ Jehová Diosqa anchatan valoran payta kusichinapaq kallpachakusqanchistaqa. Ichaqa  Hebreos 6:​10-12 textopi nisqanman jinaqa, manan ñaupaqpi kasukusqanchisraykuchu ni ñaupaqpi allinkunata ruwasqanchisraykuchu Diospa karpallanpiqa kasun (leey Hebreos 6:​10-12). Arí, Jehová Diosqa manan qonqanchu ñaupaqpi payrayku tukuy ima ruwasqanchistapas. Chaywanpas payqa munan “tukukuykama” tukuy sonqonchiswan tukuy kallpanchiswan payta servinanchistan. “Mana pisipaspa chayta ruwasunchis” chayqa, wiñaypaqmi paywan amigontin kasunchis (Gál. 6:9).

“SONQOPI CHEQAQTA RIMASUN”

7. ¿Iman sonqopi cheqaqta rimay?

⁷ Pikunachus Jehová Diospa karpanman invitasqa kanku chaymanta rimaspan Salmos 15:2 textopi nillantaq: “Sonqonpi cheqaqta rimaqllan”, nispa. Kaypiqa manan llullakuyllamantachu rimashan. Aswanpas Jehová Diosqa munan imatapas cheqaqllata rimananchistan, tukuy imapi honrado kananchistan (Heb. 13:18). Chhaynapunin kananchis, ¿imarayku? “Jehová Diosqa cheqnikunmi millay runakunataqa, chanin runakunawanmi ichaqa sonqota tupachin” (Prov. 3:32).

8. ¿Imatan manapuni ruwananchischu?

⁸ “Sonqonpi cheqaqta rimaqqa” manan runakunaq rikunallanpaqchu Diosta kasukun, sapallanña kaspapas pakapiña kaspapas kasukushallanmi (Isa. 29:13). Pipas sapan kashaspa mana kasukushanmanchu chayqa, mana allintan ruwashanman. Ichaqa, ¿imaynapin pipas chayman urmanman? Ñaupaqtaqa yaqapaschá Diospa ima kamachisqanmantapas iskayayta qallarinman (Sant. 1:​5-8). Yaqapaschá “kayqa manachus jina juchachu kanman” nispa imatapas ruwanman. Chay ruwasqanmanta mana imapas pasaqtintaq pisi-pisimanta aswan mana allinkunataña ruwanman. Chhaynapitaq payqa Diosta servisqanpiqa iskay uyaman tukupunman (Ecl. 8:11). Manan pipas munasunmanchu chayman chayaytaqa ¿riki? Chhaynaqa kallpachakusun sonqonchispi sut’i rimaq kananchispaq, tukuy imapi honrado kananchispaqpas.

9. ¿Imanirqanmi Jesús Natanaelmanta, imatan chaymanta yachasunman? (Qhaway kay parrafopaq dibujota).

⁹ Chaymantapas sonqopi cheqaq rimaq kayqa ancha allinpunin. Chaypaq yachasun Natanaelmanta. Juj kutinmi amigon Felipe payta pusarqan Jesusta reqsinanpaq. Jesusqa manan jayk’aqpas  Natanaeltaqa rikusqaraqchu, ichaqa payta rikuspan nirqan: “Qhawariychis kay Israel runata, paypiqa manapunin engaño kanchu”, nispa (Juan 1:47). Jesusqa yacharqanpunichá juj discipulonkunapas chhayna kasqankutaqa, ichaqa Natanaelpin chhayna kayqa astawanraq reparakurqan. Payqa noqanchis jina juchasapa runaña karqan chaypas, ch’uya sonqon karqan recton karqan. Chaychá Jesusqa admirakurqan payta rikuspaqa, felicitarqan iman. ¡Noqanchispas maytan munasunman Natanaelta jina Jesús qhawariwananchista ¿riki?!

10. ¿Imaraykun qallunchista allinta watakunanchis? (Santiago 1:26).

¹⁰ Salmos 15 capitulopiqa yaqa llapanpin rimashan imaynatas jujkunata qhawarinanchis chaymanta. Salmos 15:3 textopin willashallantaq imaynas Jehová Diospa chaskisqan runakuna kanku chayta. Chaypin nishan: “Paypa qallunqa manan pitapas tumpanchu, manan runamasintaqa ima mana allintapas ruwanchu, manan amigonkunamantapas mana allintaqa rimanchu”, nispa. Qallunchischus pimantapas mana allinta rimanman chayqa, llakita ñak’ariyta iman qoshasunman chay runamasinchisman; chaymantapas manañan atisunmanchu Diospa karpanpi kaytaqa (leey Santiago 1:26).

11. ¿Iman jujkunata tumpay, imatan ruwakun pipas chhayna kasqanmanta mana arrepientekuqtin?

¹¹ Chaymantapas Salmos 15:3 textopiqa sut’itan nishan: “Manan pitapas tumpanchu”, nispa. ¿Imataq tumpayri? Wakinqa pitapas mana allinta rikuchiyta munaspa, p’enqaypi qhepachiyta munaspan chay runamanta mana kaqta imatapas rimanku, yanqan imamantapas tumpanku. Pipas chayta ruwanman manataq arrepientekunmanchu chayqa, qarqosqan kanman Diospa llaqtanmanta (Jer. 17:10).

12, 13. ¿Imakuna pasaqtinmi mana reparakuspalla amigonchiskunamanta mana allinta rimayta qallarisunman? (Qhaway kay parrafokunapaq fotota).

¹² Chaymantapas Salmos 15:3 textopiqa “manan runamasintaqa ima mana allintapas ruwanchu, manan amigonkunamantapas mana allintaqa rimanchu” nispan nillantaq. Arí, Diospa karpanpi kaq runaqa manapunin chaykunataqa ruwanmanchu. Ichaqa, ¿imaynapin pipas amigonmanta mana allinta rimanman?

 ¹³ Mayninqa yaqapaschá mana reparakuspalla pimantapas mana allinta rimayta qallarisunman. ¿Imaynapin chay pasanman? Chaypaq piensasun kay kinsa ruwaykunapi: 1) yaqapaschá juj hermana precursora kanman, jinaspa chayta saqepunman, 2) yaqapaschá juj casarasqa warmi-qhari Betelmanta lloqsipunman, 3) yaqapaschá willakamunman imaynas juj hermano manaña umalliqchu otaq siervo ministerial nisqachu chayta. Chaykuna pasaqtin, ¿nisunmanchu “kaypaschá jaqaypaschá pasarun” nispa? ¿Allintachu ruwashasunman sonqonchispi paqarichispa imatapas rimaspa? Manataq allintachu yachasunman imaynapis chaykuna pasan chayta chayqa, manan chaykuna ruwayqa allinchu kanman. Kaypi yachasqanchis jina, Diospa karpanpi kaqkunaqa “manan runamasintaqa ima mana allintapas ruwanchu, manan amigonkunamantapas mana allintaqa rimanchu”.

RESPETASUN JEHOVÁ DIOSTA KASUKUQKUNATA

14. ¿Imaynapin yachasunman pipas Diospa mana allin qhawarisqan kasqanta, chhaynapi paymanta t’aqakunanchispaq?

¹⁴ Salmos 15:4 nisqanman jinaqa, Jehová Diospa amigonkunaqa “manan mana allin ruwaqkunawanqa juñukunchu”. Ichaqa, ¿imaynatataq yachasunman pikunas mana allin kanku chaytari? Juchasapa runakunataq kanchis chayqa noqanchispaqqa manan facilchu chayta reparayqa. Chayraykun noqanchisqa pikunatachus Jehová Dios mana allinpaq qhawarin paykunallata chhaynata qhawarinanchis (1 Cor. 5:11). Chhaynaqa, ¿pikunatan Jehová Dios mana allinpaq qhawarin? Mana allinta ruwaqkunata, mana pesapakuq runakunata, paypi mana iñiqkunata, cheqnikuwaqninchis runakunata iman (Prov. 13:20).

15. ¿Imaynatan “Jehová Diosta manchakuqkunata respetasqanchista” rikuchisunman?

¹⁵ Chaymantapas Salmos 15:4 nisqanman jinaqa, “Jehová Diosta manchakuqkunatan respetananchis”. Paykunapas Jehová Diospa amigonkunataq kanku chayqa, imataña ruwaspapas paykunata respetasqanchistan rikuchinanchis, sumaq sonqotaqmi paykunawanqa kananchispas (Rom. 12:10). ¿Imaynatan chayta ruwasunman? Salmos 15:4 textoq tukuyninpi nisqantan kasukunanchis. Chaypi nisqanman jinaqa, Diospa karpanpi kaqqa “sasaña kaqtinpas promesa ruwasqantaqa junt’anmi”. Promesa ruwasqanchista mana junt’asunmanchu chayqa, jujkunatan k’irisunman (Mat. 5:37). Jehová Diosqa munanmi casarasqakunapas promesa ruwasqankuta junt’anankuta. Chaymantapas munanmi tayta-mamakuna wawankuman imachus prometesqankuta junt’anankuta. Diostapas runamasinchistapas munakunchistaq chayqa, tukuy atisqanchistan kallpachakunanchis rimasqanchista junt’ananchispaq.

16. ¿Imata ruwaspan rikuchillasunmantaq Jehová Diospa amigonkunata munakusqanchista?

¹⁶ ¿Imaynatan Jehová Diospa amigonkunata munakusqanchista respetasqanchista rikuchillasunmantaq? Sumaqta chaskispa yanaparispa iman (Rom. 12:13). Sichus iñiqmasinchiskunata invitasun juj ratu noqanchiswan kusirikunankupaq pujllarinankupaq chayqa, allin amigontinmi paykunawan kasun. Chhayna sumaqta munayta paykunata chaskispaqa Jehová Diostan qatikushanchis.

AMA QOLQE SONQOCHU KASUN

17. ¿Imaraykun Salmos 15 capitulopi rimashanman qolqemanta?

¹⁷ Salmos 15 capitulopin Diospa karpanpi tiyaqmanta nishallantaq: “Qolqetapas mana interesllayoqtan mañan. Manan chanin runa contrapi ima lluk’iykuytapas chaskinchu”, nispa (Sal. 15:5). ¿Imaraykutaq chaypiri qolqemanta rimashanman? Runakunapaqqa facilmi kanman qolqe sonqoman tukupuy. Ichaqa qolqe sonqoman tukuspaqa jujkunatan llakiman churasunman, Dioswanpas manañan amigontinchu kasunman (1 Tim. 6:10). Chaymi ñaupa Israel runakunaq tiemponpipas pasarqan. Wakin runakunaqa  wayqenkuman imachus manusqankutan interesniyoqta mañakapuqku. Wakin juezkunapas qolqeraykun mana juchayoq runakunata juchachaqku. Jehová Diosqa cheqnikunmi chay ruwaykunataqa (Ezeq. 22:12).

18. ¿Ima tapuykunapin sapankanchis piensarinanchis? (Hebreos 13:5).

¹⁸ ¿Imaynatan qolqeta qhawarinki? Chaypaqqa sapankanchismi tapukunanchis: “¿Qolqellapiñachu imaymanata rantiyllapiñachu piensani? Pipas qolqeta manuwaqtin, ¿“manapaschá necesitanchu” nispachu jap’ikapullani? ¿Qolqeyoq kasqayraykuchu jujkunamanta aswan allinpaq qhawarikuni? ¿Sasachu noqapaq pimanpas imatapas qoykuy? ¿Llapa qolqeyoq hermanokunamantachu “payqa qolqe sonqon” nispa nini? ¿Qolqeyoq qhapaq hermanokunallawanchu amigontin kani, mana qolqeyoqmantataqchu t’aqakuni?”, nispa. Jehová Diospa karpanpi kayqa ancha allinpunin, amapuni chaymantaqa lloqsisunchu, chaypaqqa manan qolqe sonqomanqa tukunanchischu. Chaykunamanta cuidakusun chayqa, Jehová Diosqa munakuwallasunpunin (leey Hebreos 13:5).

JEHOVÁ DIOSQA MUNAKUNMI AMIGONKUNATAQA

19. ¿Imaraykun Jehová Dios Salmos 15 capitulopi yuyaychaykunata qowasunman karqan?

¹⁹ Salmos 15 capituloq tukuyninpin nishan: “Chhayna kausaq runaqa manan jayk’aqpas urmanqachu”, nispa (Sal. 15:5). ¿Imatan chaywan chay Salmos 15 capitulota qelqaq nishanman karqan? Jehová Diosqa kusisqa kausananchistan munan. Chaymi chay yuyaychaykunata qowanchis, chhaynapi paypa bendecisqan yanapasqan ima kananchispaq (Isa. 48:17).

20. ¿Ima bendiciontan chaskinqaku Diospa karpallanpi kaqkuna?

²⁰ Diospa karpanpi kasukuq junt’aq sonqo runakunaqa, sumaq kausaytan chaskinqaku. Janaq pachapaq ajllasqa kaqkunapaqqa ñan “maypichus tiyanankuqa” preparasqaña kashan. Paykunataqa Jesús kikinmi chaskinqa (Juan 14:2). Wakin Diosta serviqkunataq Apocalipsis 21:3 textopi nisqan bendicionkunata chaskinqaku. ¡May munaymi may kusikunapaqmi Jehová Diospa amigon kanapaq invitasqa kayqa ¿riki?! Llapanchispas atisunmanmi paypa karpanpi wiñaypaq tiyaytaqa.