1. Salmos 18:46 nisqan jina, ¿imawanmi David Jehová Diosta tupanachirqan?

 KAY pachapiqa imaymanakunan pasashan, qonqaymi imapas cambiarunman. Chaykunapi tarikuspaqa atisunmanmi Jehová Diospa yanapaynin mañakuyta. ¡May allinpunin chayta yachayqa ¿riki?! Ñaupaq yachachikuypin yachamurqanchis imaynas “Jehová Diosqa kausaq Dios” chayta, payqa liston kashan imapipas yanapawananchispaq. Paypa yanapasqanta rikuspaqa astawanraqmi reparanchis Davidpa nisqan jina, Jehová Dios kausaq Dios kasqanta ¿riki? (Leey Salmos 18:46). Ichaqa chayta nisqan qhepallamanmi Davidqa nillarqantaq: “Pakakunay qaqa”, nispa. ¿Imaraykun David kausaq Diosta juj mana vidayoq qaqawan tupanachinman karqan?

2. ¿Imakunamantan kaypi yachasunchis?

² Kaypin yachasunchis imaraykus Bibliapi Jehová Diosta juj qaqawan tupanachikun chayta, imatas chay tupanachisqanmanta yachasunman chaytapas. Yachallasuntaqmi imatas ruwasunman Jehová Dios pakakunanchis qaqa kananpaq chaytapas. Yachasunmi imaynatas noqanchispas Jehová Dios jina kananchis chaytapas.

¿IMARAYKUN JEHOVÁ DIOSTA TUPANACHIKUN QAQAWAN?

3. ¿Imaninmi Biblia qaqamanta rimaspa? (Qhaway tapanpi kaq fotota).

³ Bibliapiqa Jehová Dios imaynachus kasqanta yachananchispaqmi qaqawan tupanachikun. Askha textokunapin Diosta serviqkunaqa payta jatunchanankupaq qaqawan tupanachirqanku. Ñaupaqtaqa Deuteronomio 32:4 textopin chayqa rijurishan. Chaypin nin: “Jatun qaqa jinan Diosqa”, nispa. Anapas Diosmanta mañakushaspan nirqan: “Manan pipas qan jina qaqaqa kanchu”, nispa (1 Sam. 2:2). Habacucpas “pakakunay qaqalláy” nispan nirqan (Hab. 1:12). Salmos 73 capitulota qelqaqpas “paymi pakakunay qaqaqa” nispan nirqan (Sal. 73:26). Dios kikinpas paymanta rimashaspan nirqan: “Manan noqa jina pakaqniyki qaqaqa kanchu”, nispa (Isa. 44:8). ¿Imaraykupunin Jehová Diosta qaqawan tupanachikunman? Chaypaq kinsa razonmanta yachasun. Yachallasuntaq imaynatas noqanchisqa payta “jatun qaqanchista” jina rikunanchis chaytapas (Deut. 32:31).

4. ¿Imaraykun nisunman “Jehová Diosqa pakakunanchismi” nispa? (Salmos 94:22).

 ⁴ Jehová Diosqa pakakunan. Parapas chijchipas chayamuqtinqa qaqa k’uchukunapin mach’akunchis otaq pakakunchis ¿riki? Chaytan Jehová Dioswanpas ruwananchis. Ima llakipas ñak’ariypas chayamuwaqtinchisqa paymanmi pakakuq phawananchis (leey Salmos 94:22). Paymi noqanchistaqa pakawasun, manan munanqachu imapipas nishuta ñak’arinanchistaqa. Manan chayllapaschu, jamuq tiempopiqa llapa mana allinkunatan payqa chinkachipunqa, chhaynapitaq thaj kausayta qowasun (Ezeq. 34:​25, 26).

5. ¿Imatan ruwananchis Jehová Dios imamantapas pakawananchispaq?

⁵ Ichaqa, ¿imaynatan Jehová Diospi pakakusunman? Imaymana formapin, jujninmi kanman paymanta mañakuspa. Tukuy ima llakinchistapas payman willakusun chayqa, “runakunaq mana entiendey atisqan thaj kaytan qowasun, chhaynapin sonqonchispas yuyayninchispas” allin waqaychasqa kanqa (Filip. 4:​6, 7). Chaypaq yachasun Artiom sutiyoq hermanonchismanta. Paytaqa Diosta servisqanraykun presota apasqaku, chaypis imaymanata tapupayasqaku. Millaytas k’amisqaku pisichasqaku ima. Paymi nin: “Sapa tapuwaqtinkun mana imanakuyta atiqchu kani. Noqaqa mañakullaqmi kani Diosmantaqa thaj kayta yachayta ima qowananpaq. Imaynamantaña tapuwarqanku chaypas, manapunin Diostaqa saqerqanichu. Jehová Diosqa noqapaqqa ancha allin perqasqa perqa jinan karqan”, nispa.

6. ¿Imaraykun confiananchispuni Jehová Diospi? (Isaías 26:​3, 4).

⁶ Jehová Diosqa confianapaq jinan. Imaynan juj jatun qaqaqa mana mayman kuyurispa chayllapi kashan, chhaynan Jehová Diospas. Payqa qaqa jinan chaypi sayashan, liston kashan imapipas yanapawananchispaq. “Diosninchisqa wiñay-wiñaypaq qaqan” (leey Isaías 26:​3, 4). Arí payqa wiñaypaq kausaq Diosmi. Payqa junt’anqapunin ima promesantapas, uyarinqapunin mañakusqanchistapas, yanapawasunpunin imapipas. Chaymantapas paypaq junt’aq sonqokunawanqa junt’aqllataqmi paypas (2 Sam. 22:26). Payqa manapunin qonqanqachu payrayku ima ruwasqanchistapas, premionchistapas qowasunpunin (Heb. 6:10; 11:6).

7. ¿Imaraykun allinpuni Jehová Diospi confiay? (Qhaway kay parrafopaq fotota).

⁷ ¿Imatan ruwallasunmantaq Jehová Diosta pakakunanchis qaqata jina rikunanchispaq? Tukuy sonqon paypi confiananchis. Paypichus confiasun chayqa ima ñak’ariypiña tarikuspapas kasukullasunmi paytaqa (Isa. 48:​17, 18). Chaykunapi yanapawasqanchista rikuspataq astawanraq paypiqa confiasun, chhaynapin allin preparasqa kasun ima sasachakuypaqpas. Mayninqa yaqapaschá sapanchis tarikusun, manapaschá ni pipas ni imaynata yanapayta atiwasunchu. Ichaqa Jehová Diosqa chaypin kashan, payqa tukuy atiyniyoqmi. Vladímir sutiyoq hermanon nirqan: “Noqaqa presota apawaqtinkuñan allinta repararqani imaynas Diosqa noqawan kasharqan chayta. Chaypin yacharqani tukuy sonqoywan paypi confiayta. Chaypiqa sapallaymi kasharqani, manan ima ruwayta atisharqanichu”, nispa.

8. a) ¿Imaraykun nisunman “Jehová Diosqa mana kuyuriqmi” nispa? b) ¿Imaraykun allinpuni payta juj qaqata jina rikuy? (Salmos 62:​6, 7).

⁸ Jehová Diosqa mana kuyuriqmi. Imaynan juj jatun qaqaqa mana kuyurispa chayllapi  sayashan, chhaynan Jehová Diospas. Payqa manan cambianchu, imatachus munashan chaypas manan cambianchu (Mal. 3:6). Adanwan Evawan manaña kasukurqankuchu chaypas, Jehová Diosqa manan cambiarqanchu runakunapaq imachus munasqantaqa. Apóstol Pablopas Jehová Dios chhayna kasqanmanta rimashaspan nirqan: “Manapunin imatapas pay kikinpa contranpiqa ruwanmanchu”, nispa (2 Tim. 2:13). ¿Imaninantaq chayri? Imataña jujkuna ruwanqaku chaypas Diosqa manan cambianqachu imayna kasqantapas, imachus munasqantapas, ni kamachikuyninkunatapas. Chhaynataq chayqa, payqa yanapawasunpunin ima llakipi tarikuqtinchispas, junt’anqan llapa ima promesantapas (leey Salmos 62:​6, 7).

9. ¿Imatan yachawaq Tatianata imachus pasasqanmanta?

⁹ ¿Imatan ruwallasunmantaq Jehová Diosta jatun qaqata jina rikunanchispaq? Allintan piensananchis imayna Diossi chaypi, imatas munashan kay pachapaq runakunapaqpas chaypipas. Chaykunapi piensasun chayqa, ima llakipipas sasachakuypipas tarikuspaqa pacienciakullasunmi (Sal. 16:8). Chaytan ruwasqa Tatiana sutiyoq hermanapas. Paytaqa wasillanpitaqmi autoridadkuna wisq’apusqaku. Paymi nin: “Manan pipas asuykamuwananta munarqankuchu”, nispa. Nillantaqmi: “Ñaupaq p’unchaykunaqa sasan noqapaqqa chayqa karqan. Mayninqa sinchi llakisqan kaq kani”, nispa. Ichaqa yuyarisqas imaynas chaykuna pasasqanqa Jehová Diospa kay pachapaq imachus munasqanwan tupashan chayta. Chaypi piensasqansi yanapasqa kallpata jap’inanpaq. Paymi nillantaq: “Jehová Diosta munakusqayrayku, payta kusichiyta munasqayraykun chhaynapi tarikusharqani, chaypin allinta piensarqani. Chaypi piensasqaymi yanapawarqan ama noqallapichu piensanaypaq”, nispa.

10. ¿Imatan ruwawaq Jehová Diosta qanpa pakakunayki qaqata jina rikunaykipaq?

¹⁰ Pisi tiempollamantan imaymana ñak’ariykunapi tarikusunchis, chhaynapi tarikuspaqa Jehová Diospin tukuy sonqo confiananchis kanqa. Chhaynaqa, kunanmantapacha kallpachakusun payllapi confiananchispaq, kallpanpi yanapayninpi confiananchispaq. ¿Imatan chaypaq ruwasunman? Bibliata leey, leey hermanokunaq willakusqan experienciakunatapas. Chaymantapas chaykunapi piensay, qhawariy imaynatas Jehová Dios sapankankuta yanaparqan chaytapas. Chayta ruwanki chayqa qanpa pakakunayki qaqata jinan Jehová Diostaqa rikunki.

JEHOVÁ DIOSTA QATIKUSUN

11. ¿Imaraykun Jehová Diosta qatikunanchis? (Qhaway “ Wayna hermanokunapaq” nisqa willakuyta).

¹¹ Kaykaman yacharamunchis imaraykus Jehová Diosta qaqawan tupanachikun chayta. Kunanqa yachasunchis imaynatas sapankanchispas payta qatikusunman chayta. Kallpachakusun pay jina kananchispaq chayqa, allintan yanapasun hermanokunataqa. Juj kutinmi Jesús Simonta nirqan: “Kunanmantan sutiyki Cefas kanqa”, nispa. Chay sutiqa Pedro ninantan nin, Pedro sutitaq “qaqamanta ch’eqtasqa” ninanta nin (Juan 1:42). Chayta nispan Jesusqa rikuchisharqan imaynas Pedroqa hermanokunata kallpachaq kanan karqan chayta, imaynas iñiqkunata qaqata sayachinan karqan chaytapas. Chaymantapas  Bibliapiqa umalliqkunamanta rimaspan nin: “Ch’aki pampapi jatun qaqaq llanthun jinan kanqaku”, nispa (Isa. 32:2). Ichaqa manan umalliqkunallachu Jehová Diostaqa qatikuyta atinkuman, llapanchispas atisunmanmi jujkunapaq qaqa jina kayta (Efes. 5:1).

12. ¿Imatan ruwasunman iñiqmasikunapaq pakakuna jina kananchispaq?

¹² Pakakunapaq jina kay. Sichus hermanokuna ima desgraciapipas tarikunku, runakunaq jatarisqan llaqtapi kashanku, guerraq kasqanpi ima kashanku chayqa, yaqapaschá wasinchispi paykunata chaskisunman. Yachasqanchis jinapas kay “tukukuy p’unchaykunapiqa” astawanraqmi imaymana mana allinkuna yapakamushan (2 Tim. 3:1). Chaymantapas hermanonchiskunataqa kallpacharinanchismi, iñiyninkupipas yanaparinanchismi. Chaypaqqa yaqapaschá juñunakuykunaman jamuqtinku sumaqta chaypi chaskisunman. Sapankatan sumaqta munayta qhawarinanchis. Yachasqanchis jinapas, kay tiempopi runakunaqa chiri sonqon kapunku, millaymi kapunku. Chhaynaqa, kallpachakusun hermanonchiskunata hermananchiskunatapas sumaqta munayta chaskinanchispaq. Diospa wasinpiqa kusisqan paykunaqa kananku, munasqan kananku.

13. ¿Imaynapin umalliqkuna hermanokunaq hermanakunaq pakakunan jina kankuman? (Qhaway kay parrafopaq fotota).

¹³ Umalliqkunapas pakakuna jinan kananku iñiqmasinchiskunapaqqa. Ima desgraciapas, accidentepas, onqoypas kaqtinmi paykunaqa apuraylla hermanokunata yanapananku; iñiyninkupi iman yanaparinanku. Juj umalliq kanqa munakuq, khuyapayakuq, sumaq sonqo chayqa, hermanokunaqa paymanmi rinqaku yanapay maskhaq. Chhayna umalliqkunataqa faciltan hermanokunaqa, ima yanapay qosqantapas ima yuyaychay qosqantapas kasukunku (1 Tes. 2:​7, 8, 11).

14. ¿Imaynatan rikuchisunman confianapaq jina kasqanchista?

¹⁴ Confianapaq jina kay. Lliupas munasunmanmi jujkuna noqanchispi confianankuta ¿riki? Ima  llakipiña tarikushaqtinchispas wajarimuwananchista ¿riki? (Prov. 17:17). Ichaqa, ¿imatan ruwananchis jujkuna noqanchispi confianankupaq? Chaypaqqa Jehová Diostan qatikunanchis, imatachus rimanchis chayqa, junt’ananchismi chayta, horallanpin maymanpas chayananchis (Mat. 5:37). Chaymantapas pipas yanapanata necesitashan chayqa, ninanchismi yanaparinanchispaq. Pipas imata ruwananchispaqpas kamachiwanchis chayqa, chaymanta willaq kamachikuykunaman jinan chayta junt’ananchis.

15. ¿Imaynan juj iñiq t’aqa kanqa umalliqkuna confianapaq jina kaqtinku?

¹⁵ Umalliqkunapas confianapaq jina kanqaku chayqa, allinmi iñiq t’aqaqa kanqa. Juj umalliqchus qhawarisqan grupopi hermanokunaman confianzata qonqa chayqa, gustowanmi paykunaqa imata tapurikunankupaqpas wajanqaku, chhaynapitaqmi allin cuidasqa tarikunqaku. Chaymantapas umalliqkuna hermanokunata yanapanankupaq listo kashanqaku chayqa, munasqan paykunaqa tarikunqaku. Yuyaychaspapas Bibliaq nisqanman jina, allin yuyayniyoq junt’aq kamachiq apachimusqan qelqakunaq nisqanman jina yuyaychanqaku chayqa, astawanraqmi hermanokunaqa paykunapi confianqaku. Pipas imatapas willakun chayqa, manan jujkunamanchu chayta willarunanku, junt’anankun ima rimasqankutapas.

16. ¿Imapin yanapawasun qaqata sayay, imaynatan jujkunatapas yanapanman qaqata sayasqanchis?

¹⁶ Qaqata sayay. Sichus qaqata sayasun chayqa,  allin ejemplon kasun jujkunapaq. Chaytan rikuchisun Diospa siminta kasukuspa, Bibliapi nisqanman jina ima decisiontapas ruwaspa. Chaypaqqa Diospa simintan allinta estudiananchis, chhaynapin tukuy sonqo Jehová Diospi iñisun, qaqatataqmi siminpi sayasunpas. Chaymantapas manan imamantapas iskayasunchu, manataqmi imatapas yanqa-yanqatachu ruwasunchis, manan kay pacha yachachikuykunawanpas apachikusunchu (Efes. 4:14; Sant. 1:​6-8). Chaymantapas Diospi tukuy sonqo confiasun promesankunapipas confiasun chayqa, ima mana allin willakuyña chayamuwasun chaypas qaqa sayasqallan kasun (Sal. 112:​7, 8). Yanapasunmi sasachakuypi tarikuq hermanokunatapas (1 Tes. 3:​2, 3).

17. ¿Imaynatan umalliqkuna yanapakunkuman iñiq t’aqa qaqa sayasqa kananpaq?

¹⁷ Umalliqkunapas yanapakunankun iñiq t’aqa qaqa sayananpaq fuerte kananpaq, chaypaqqa yachanankun cuerponku kamachiyta. Allin yuyaywanmi imatapas ruwananku, chaymantapas llamp’u sonqon kananku, respetanapaq jinataqmi kanankupas (Tito 1:9; 1 Tim. 3:​1-3). Allin ejemplochus kanqaku, munaytachus Diospa ovejachankunatapas michinqaku chayqa, llapankutan yanapanqaku juñunakuykunaman predicacionmanpas ama faltakunankupaq; yanapanqakun Diospa siminta estudianankupaqpas. Chaymantapas umalliqkunaqa, mayqen hermanopas ima llakipipas sasachakuypipas tarikushan chayqa, yanapankun Jehová Dios imatachus kay pachapaq munan chaypi piensanankupaq.

18. ¿Imaraykun Jehová Diosta jatunchananchis, imaraykun payman astawan asuykuyta munawaq? (Qhaway “ Jehová Diosman qayllaykunapaq” nisqa willakuyta).

¹⁸ ¡May munaypunin Jehová Dios imaynachus kasqanta yachayqa ¿riki?! Kunanqa David jinachá qanpas ninki: “Jatunchasqa kachun pakakunay qaqa Jehová Diosqa”, nispa (Sal. 144:1). Jehová Diospiqa tukuy sonqon confiananchis, payqa noqanchiswanpunin kashan. Payqa yanapawasunpunin qayllallanpi kananchispaq, machuyapushanchisña chaypas payqa yanapawasunmi. Chhaynaqa tukuy sonqomanta llapanchis nisun: “Payqa pakakunay qaqan”, nispa (Sal. 92:​14, 15).