1. ¿Iman yanapawasun ima llakipiña ñak’ariypiña tarikuspapas Jehová Diosta servishanallanchispaq?

 BIBLIAQ nisqanman jinaqa, runakunaqa “manchakuy sinchi sasa tiempokunapin” kausashanchis (2 Tim. 3:1). Arí, kay tiempopiqa llapa runakunan imaymana llakipi tarikushanku. Diosta serviqkunapas qatikachasqa cheqnisqa iman kashanchis. Chhaynakunapi tarikuspa, ¿iman yanapawasunman Jehová Diosta servishanallanchispaq? Chaypaqqa pay “kausaq Dios” kasqantan tukuy tiempo yuyarinanchis (Jer. 10:10; 2 Tim. 1:12).

2. ¿Imaraykun nisunman “Jehová Diosqa kausaq Diosmi” nispa?

² Jehová Diosqa kausaq Diosmi, chaymi payqa listo kashan ima llakipiña sasachakuypiña tarikuqtinchispas yanapawananchispaq (2 Crón. 16:9; Sal. 23:4). Sichus kausaq Diosta jina payta qhawarinki chayqa facil-llatan ima sasachakuytapas aguantanki. Rey Davidpas chhaynatan Jehová Diostaqa qhawarirqan. Chaymantan kaypi yachasunchis.

3. ¿Imaninantan David nisharqan “¡Jehová Diosqa kausaq Diosmi!” nisqanwan?

³ Davidqa allintan Jehová Diosta reqsirqan, paypitaqmi tukuy sonqo confiaqpas. Chaymi juj kutinpas rey Saúl wañuchinanpaq qatikachashaqtin Jehová Diospa yanapayninta rogakurqan (Sal. 18:6). Diosqa uyarirqanmi paypa mañakusqanta, chaymi Saulpa makinmanta salvarqan. Chayta rikuspan Davidqa nirqan: “¡Jehová Diosqa kausaq Diosmi!”, nispa (Sal. 18:46). Chayta nispaqa manan “Diosqa kanmi” nishallarqanchu, aswanpas Jehová Diospi confiasqantan rikuchisharqan. Juj qelqapi nisqan jina “Jehová Diosqa kausaq Dios kasqanrayku llaqtanta yapa-yapamanta salvananpi” confiasqantan rikuchisharqan. Davidqa tukuy tiempon rikurqan Jehová Diospa yanapayninta, chaymi allinta yacharqan payqa kausaq Dios kasqanta. Chayta yachasqanmi paytaqa yanaparqan Jehová Diosta servishanallanpaq (Sal. 18:​28, 29, 49).

4. ¿Imaraykun Jehová Diosta kausaq Diosta jina qhawarinanchis?

 ⁴ Sichus Jehová Diosta kausaq Diosta jina rikusunchis chayqa, ganaswanmi kusisqan payta servisunchis, ima llakitapas ñak’ariytapas aguantallasunmi. Chaymantapas kausaq Diosta jina qhawarispaqa tukuy sonqomantan paypaq llank’asun, manataqmi jayk’aqpas paymantaqa t’aqakusunchu.

KAUSAQ DIOSMI KALLPATA QOSUNKI

5. ¿Imatan yuyarinanchis ima sasachakuypipas llakipipas tarikuspa? (Filipenses 4:13).

⁵ Jatunña juch’uyña sasachakuyninchis kanman chaypas, yuyarinanchismi Jehová Dios kausaq Dios kasqanta, noqanchiswan kashasqanta ima. Paypaqqa manan ima problemapas mana allichay atinaqa kanmanchu. Payqa tukuy atiyniyoqmi, paymi kallpata qowasun ima llakitapas ñak’ariytapas aguantananchispaq (leey Filipenses 4:13). Chhaynaqa ima llakipiña tarikushanki chaypas ama pisipaychu, Jehová Diospi confiay. Imaynan payqa juch’uy ruwaykunapi yanaparqasunki, chhaynatan jatun llakipi tarikuqtiykipas yanapasunki.

6. ¿Iman Davidta yanaparqan Jehová Diospi astawan confiananpaq?

⁶ Chikuchallaraq kashaspan Davidqa iskay kutipi Jehová Diospa yanapayninta rikurqan, chaymi paytaqa yanaparqan paypi astawan confiananpaq. Juj kutinsi Davidqa taytanpa ovejankunata michishasqa, jinas juj león ovejachanta aparapusqa, juj kutintaq osoñataq aparapusqa. Chaysi Davidqa leonman osoman ayparuspa siminmanta ovejanta qechumusqa. Jehová Diospa yanapayninwanmi payqa chaykunataqa ruwarqan chaymi mana alabakurqanchu chaykunamantaqa (1 Sam. 17:​34-37). Davidqa manan jayk’aqpas qonqarqanchu chay kutikunapi Diospa yanapasqantaqa, aswanmi yuyaymanallaqpuni chaykunapi. Chaymi mana iskayarqanchu jamuq sasachakuykunapi tarikuqtinpas kausaq Dios yanapananmantaqa.

7. ¿Imapin David masta piensaq, imaynatan chay yanaparqan Goliatwan maqanakunanpaq?

⁷ Chaymantapas Davidqa waynachaña kashaspan Israel soldadokunaq kasqanman rirqan. Chaypi soldadokunaqa sinchi manchasqan kashasqaku Goliatpa imachus nisqanta uyarispa. Paymi nishasqa: “¡Israel runakuna, ¿qharichu kankichis icha manachu?! ¡Juj soldadotayá kachamuwaychis noqawan maqanakunanpaq!”, nispa (1 Sam. 17:​10, 11). Chay soldadokunaqa Goliatpa rimasqallanpin piensasharqanku, manan Jehová Diospichu. Chaymi manchakuymanta khatatatasharqankuraq (1 Sam. 17:​24, 25). Davidmi ichaqa mana mancharikurqanchu. Payqa repararqanmi chay runaqa mana Israel soldadokunallatachu k’amishasqanta, aswanpas kikin Jehová Diosmanta burlakushasqanta (1 Sam. 17:26). Davidqa Jehová Diospa sutinpin mastaqa piensaq, paypitaqmi confiaqpas. Payqa yacharqanmi ñaupaqpi jina chay kutipipas yanapananta. Chaymi Diospa sutinpi maqanakuq rirqan, jinaspa chay jatunkaray runata atiparqan (1 Sam. 17:​45-51).

8. ¿Imakunata ruwaymi yanapawasunman sasachakuykunapi tarikuspa Jehová Diospi confiananchispaq? (Qhaway kay parrafopaq fotota).

⁸ Ima sasachakuytapas aguantanaykipaqqa David jina yuyaymanay imaynas kausaq Diosqa qanwan kashan chaypi, imaynas payqa listo kashan yanapanasuykipaq chaypipas (Sal. 118:6). Chaymantapas paypi astawan confianaykipaqqa yuyariy imaynatas ñaupaqkunapi yanaparqasunki chayta. Chaymantapas Bibliapi leey imaynatas Jehová Dios ñaupaqpi pay sonqo runakunata yanaparqan chaymanta (Isa. 37:​17, 33-37). Chaymantapas jw.org nisqa paginapin estudiawaq imaynatas Jehová Dios kay tiempopi serviqninkunata yanapashan chaymanta. Yuyariy imaynatas Jehová Dios sasachakuykunapi tarikushaqtiyki yanaparqasunki  chayta. Manaña Davidta jinachu yanaparqasunki juj osota otaq leonta wañuchinaykipaq chaypas Jehová Diosqa imaymanatan qanpaq ruwarqan (Juan 6:44). Chaymantapas paypa yanapaynillanwanmi kunankama llaqtanpi kashanki. Chayrayku paypa yanapayninta mañakuy imaynatachus ñaupaqkunapi mañakusqaykita uyarimurqan chayta yuyarinaykipaq, sasachakuykunapi tarikushaqtiyki imaynatachus yanaparasunki chaykunata yuyarinaykipaq ima. Chaykunapi yuyaymananki chayqa manan iskayankichu Jehová Diospa yanapayninmantaqa.

9. ¿Imaynatan ima sasachakuytapas qhawarinanchis? (Proverbios 27:11).

⁹ Jehová Diosqa kausaq Diosmi, chaytachus sonqonchispi allinta jap’ikusun chayqa, allin yuyaywanmi ima sasachakuytapas qhawarisun. Satanaspa nisqanman jinaqa sasachakuykunapi tarikuspaqa saqepusunsi Jehová Diosta. Chhaynatan chay enemigo noqanchismanta piensan. Chaypin allinta piensananchis (Job 1:​10, 11; leey Proverbios 27:11). Sichus ima sasachakuypiña llakipiña tarikuspapas Jehová Diospaq junt’aq sonqo kasun chayqa, payta munakusqanchistan rikuchisun; Satanás llulla kasqantataq sut’iman orqosun. Yaqapaschá tiyasqayki llaqtapi gobierno Dios servinaykita jark’ashasunki, manapaschá qolqe aypashasunkichu, manapaschá runakunapas Diosmanta willasqaykita uyarikuyta munankuchu, chhayna ima sasachakuypipaschá tarikushanki. Sichus chhaynapi tarikushanki chayqa kallpachakuy chaykunata aguantanaykipaq, chayta ruwaspan Jehová Diosta kusichinki. Payqa manan munanqachu mana atinaykikama ima pruebapipas tarikunaykitaqa (1 Cor. 10:13). Paymi kallpata qosunki chaykunata aguantanaykipaq.

KAUSAQ DIOSMI BENDECISUNKI

10. ¿Imatan kausaq Dios ruwanqa tukuy sonqo serviqninkunapaq?

¹⁰ Jehová Diosqa bendecinpunin pay sonqo serviqninkunataqa (Heb. 11:6). Chaymi kay tiempopipas thaj kayta kusikuyta ima qowanchis, jamuq tiempopitaq wiñay kausayta qowasunchis. Payqa atiyniyoqmi chaykunata ruwananpaq, chaymi paymantaqa manapuni iskayananchischu. Paypi confiasun chayqa, ñaupa  tiempopi Dios sonqo runakuna jinachá tukuy atisqanchista ruwasun paypa munayninta ruwananchispaq. Chaytan Timoteopas ruwarqan (Heb. 6:​10-12).

11. ¿Imapi piensaymi Timoteota yanaparqan iñiq t’aqapi tukuy atisqanta llank’ananpaq? (1 Timoteo 4:10).

¹¹ (Leey 1 Timoteo 4:10). Timoteoqa Jehová Diospin confiarqan, allintan yacharqan payta servisqanmanta premionta chaskinantapas. Chaymi payqa Diosta tukuy sonqonwan servirqan, iñiqmasikunatapas tukuy atisqantan yanaparqan. ¿Imakunatawanmi ruwanman karqan? Apóstol Pabloq nisqan jina kallpachakurqanmi allin yachachiq kananpaq, kuraqkunapaqpas waynakunapaqpas allin ejemplo kananpaq ima. Chaymantapas paymanqa sasa llank’aykunatan encargarqanku. Payqa iñiqkunatan yuyaychanan karqan, chayta ruwayqa manan facilchu karqan (1 Tim. 4:​11-16; 2 Tim. 4:​1-5). Manaña jujkuna valorarqankuchu Timoteoq ruwasqanta chaypas, payqa yacharqanmi Jehová Dios rikumushasqanta, yacharqanmi chaykunamanta bendicionta chaskinantapas (Rom. 2:​6, 7).

12. ¿Imapi piensaymi umalliqkunata yanapanqa iñiq t’aqapi tukuy sonqowan llank’anankupaq? (Qhaway kay parrafopaq fotota).

¹² Kay tiempopipas Jehová Diosqa rikumushanmi imaynatachus umalliqkuna llaqtanpi llank’ashanku chayta, payqa anchatan kusikun chaywan. Yachasqanchis jina, umalliqkunaqa iñiq t’aqapi hermanokunatan visitanku, Diosmanta willaq yachachiq iman rinku. Wakinqa juñunakuna wasi jatarichiypi, llakipi tarikuq hermanokuna visitaypi, hospitalpi kaq hermanokunata visitaypi iman yanapakushanku. Umalliqkunaqa yachankun iñiq t’aqapi hermanokunaqa Diospa ovejachankuna kasqankuta, chaymi paykunaqa Diospa kamachisqanman jina sumaqta paykunata qhawarinku, manataqmi iskayankuchu chaykuna ruwasqankumanta premiota chaskinankumantaqa (Col. 3:​23, 24).

13. ¿Imaynatan Jehová Dios qhawarin payta servinanchispaq tukuy kallpachakusqanchista?

¹³ Manapaschá umalliq kaytaqa llapanchischu atisun, chaywanpas atisunmanmi imallatapas Jehová Diosman qoytaqa. Payqa anchatan  kusikun payrayku imaymana ruwasqanchista rikuspa. Kusikunmi qolqechanchiswan yanapakusqanchista rikuspapas. Chaymantapas payqa anchatan kusikun juñunakuykunapi comentanaykipaq makiykita oqariqtiyki. Kusikunmi jujkunata perdonasqaykita rikuspapas. Pisipaqña qhawarinki Diospaq llank’asqaykita chaypas payqa anchatan valoran llapa ima ruwasqaykita. Chaymantapas payqa anchatan munakusunki, premioykitaqa qosunkipunin (Luc. 21:​1-4).

KAUSAQ DIOSPA LADOLLANPI KAY

14. ¿Imaraykun nisunman “Jehová Dioswan allin amigo kaymi yanapawasun ama ima juchamanpas urmananchispaq” nispa? (Qhaway kay parrafopaq fotota).

¹⁴ Sichus Jehová Diosta kausaq Diosta jina qhawarisunchis chayqa, manan ima juchamanpas faciltachu urmasun. Josepas chhaynatan Jehová Diosta rikurqan, chaymi payqa mana ima qhelli juchatapas ruwayta munarqanchu, manapunin Diospa sonqonta k’iriyta munarqanchu (Gén. 39:9). ¿Imatan ruwananchis José jina Jehová Diosta rikunanchispaq? Tiempotan t’aqananchis paywan parlananchispaq, simin qelqata allinta estudiananchispaq ima. Chayta ruwasun chayqa astawanmi payta munakusun. Sichus José jina Jehová Dioswan allin amigontin kasun chayqa, manan paypa sonqontaqa imaraykupas k’iriyta munasunchu (Sant. 4:8).

15. ¿Imatan yachasunman Israel runakunaq mana allin ruwasqankumanta? (Hebreos 3:12).

¹⁵ Jehová Dios kausaq Dios kasqanta qonqapuqkunaqa faciltan paymanta t’aqakapunku. Chaymi Israel runakunatapas pasarqan. Paykunaqa yacharqankun Jehová Dios kausaq Dios kasqanta, ichaqa iskayarqankun paypa yanapayninmanta. Chaymi juj kutinpas nirqanku: “¿Noqanchiswanchu Jehová Dios kashan icha manachu?”, nispa (Éx. 17:​2, 7). Chaymantaqa Dios contran Israel runakunaqa jataripurqanku. ¡Noqanchisqa manachá munasunmanchu paykuna jina kaytaqa! (leey Hebreos 3:12).

16. ¿Imakunata rikuspan Diospa yanapayninmanta iskayayta qallarisunman?

¹⁶ Kay pachaqa faciltan Jehová Diosmanta t’aqawasunman. ¿Imarayku? Wakin runakunaqa manan Diospi creenkuchu, chaymantapas chay runakunaqa Diosta mana kasukuspa  allintapas kausashankuman jinataraqmi qhawarichikunku. Chaykunata rikuspaqa yaqapaschá Jehová Dios serviyta yanqapaq jina qhawaripusunman. Manaña Jehová Dios kausaq Dios kasqanmanta iskayasunmanchu chaypas, yaqapaschá paypa yanapayninmanta iskayapusunman. Chaymi pasarqan Salmos 73 capitulota qelqaq runawanpas. Paypa qhawarinanpaqqa mana allin runakunaqa, Diosta mana kasukuq runakunaqa thajmi kausasharqanku, mana imamanta llakikuspan kausasharqanku. Chayta rikuspan payqa Diosta servisqanmanta iskayarqan (Sal. 73:​11-13).

17. ¿Imakunapi yuyaymanaymi yanapawasun ama Diosmanta t’aqakunanchispaq?

¹⁷ ¿Iman chay runata yanapanman karqan Jehová Diosmanta ama t’aqakunanpaq? Payqa yuyaymanarqanmi imaynas Diosmanta t’aqakuqkunaqa mana allinpi tukunku chaypi (Sal. 73:​18, 19, 27). Chaymantapas piensarqanmi ima bendicionkunatas Diosta servispa chaskinan karqan chaypi (Sal. 73:24). Noqanchispas chaykunapin yuyaymanananchis. Piensananchismi ima bendicionkunatas Jehová Dios qowarqanchisña chaypi, ima llakikunapis tarikushasunman karqan Diosta mana servispa chaypipas. Chaykunapichus yuyaymanasun chayqa manan jayk’aqpas Jehová Diosmantaqa t’aqakuyta munasunchu, aswanpas Salmos 73 capitulota qelqaq jinan nisunchis: “Noqapaqqa may allinpunin Diosman qayllaykuyqa”, nispa (Sal. 73:28).

18. ¿Imaraykun imakunachus pisillamanta pasanqa chayta mana manchakunanchischu?

¹⁸ Noqanchisqa “kausaq cheqaq Diostan” servishanchis, paypa kamachintaqmi kanchispas. Paypa yanapayninwanqa aguantallasunmi ima sasachakuytapas ima llakitapas (1 Tes. 1:9). Kaypi yachasqanchis jina Jehová Diosqa kausaq Diosmi, payqa llakikunmi noqanchismanta chaymi listo kashan yanapawananchispaq. Payqa yanaparqanmi ñaupa tiempopi pay sonqo runakunata, chhaynatan kunanpas yanapawasunchis. Pisi tiempollamantan manchay ñak’ariy tiempo chayamunqa, ichaqa manan sapallanchischu kashanchis, chay tiempopipas Jehová Diosmi yanapawasun (Isa. 41:10). Chhaynaqa confianzawan nisun: “Jehová Diosmi yanapawaqniyqa, manan manchakusaqchu”, nispa (Heb. 13:​5, 6).