1, 2. ¿Maymanmi, imapaqmi Jehová Dios invitawashanchis?

 SICHUS tapusunkikuman: “¿Pitaq qanpaqri Jehová Dios?”, nispa ¿chayrí? ¿Imaniwaqtaq? Yaqapaschá niwaq: “Jehová Diosqa Taytaymi, Diosniymi, amigoytaqmi kanpas”, nispa. Yaqapaschá niwaq chhayna juj sutikunatapas. Ichaqa, ¿niwaqchu “Jehová Diosqa wasinman karpanman invitawaqniymi”, nispa?

² Rey Davidmi Dios serviqkunata tupanachirqan juj wasipi sumaq chaskisqa runakunawan, invitaqtataq tupanachirqan Jehová Dioswan. Paymi nirqan: “Jehová Diosníy, ¿pin wasiykipi tiyanman? ¿Pin ch’uya orqoykipi tiyanman?”, nispa (Sal. 15:1). ¿Imatan chaywan niyta munashanman karqan rey David? Llapanchispas atisunmanmi Jehová Diospa karpanman invitasqa kayta, paywan amigontin kayta. ¡Chayta yachayqa may munaypunin ¿riki?!

JEHOVÁ DIOSQA MUNASHANMI INVITASQANKUNA KANANCHISTA

3. ¿Pin Jehová Diospa ñaupaq kaq invitasqan karqan, imaynan Jehová Diospas Jesuspas kasharqanku?

³ Jehová Diosqa sapallanmi kasharqan, chaymantan ichaqa juj angelta kamarqan, payqa Jesusmi karqan. Paymi karpanpi Diospa ñaupaq kaq invitasqanqa karqan. Jehová Diosqa ancha kusisqan kasharqan Jesusta karpanman invitaspaqa. Arí, Bibliaq willasqan jina payqa “maytan kusikuq” Jesuswan. Jesuspas ancha “kusisqan kasharqan” Papanpa ladonpi kaspa (Prov. 8:30).

4. ¿Pikunatawanmi Jehová Dios wasinman otaq karpanman invitarqan?

⁴ Tiempowanmi Jehová Diosqa juj angelkunatawan kamarqan, paykunatapas karpanmanmi invitarqan. Bibliaq nisqan jina, paykunapas Diospa wawankunan kanku. Chay angelkunaqa  ancha kusisqan Jehová Diospa ladonpi kasharqanku (Job 38:7; Dan. 7:10). Jehová Diosqa waranqa-waranqa watakunan janaq pachapi angelkunallawan amigontin karqan. Chay qhepamanñan wasinman otaq karpanman wakin runakunata invitarqan. Chay runakunamanta wakinmi karqanku Enoc, Noé, Abrahán, Job ima. Paykunaqa Jehová Diospa amigonmi karqanku, paypa “munayninta ruwaspallapunitaqmi kausarqankupas” (Gén. 5:24; 6:9; Job 29:4; Isa. 41:8).

5. ¿Imatan yachasunman Ezequiel 37:​26, 27 textokunaq nisqanmanta?

⁵ Watakunaq pasasqanman jinapas Jehová Diosqa invitashallarqanmi amigonkunata karpanman. Askha textokunapin invitasqanqa rijurishan, chaykunamanta jujninmi kashan Ezequiel 37:​26, 27 textopi (leey Ezequiel 37:​26, 27). Chay textopi nisqan jina, Jehová Diosqa maytan munashan amigonkunawan kusisqa kayta. Paymi promesata ruwarqan chay amigonkunawan “thaj kay rimanakuyta ruwananpaq”. Chay profeciaqa junt’akunan karqan janaq pachapaq ajllasqa kaqkunawan, kay pachapi tiyanankupaq kaqkunawan “juj t’aqalla” kapuqtinkun (Juan 10:16). Chayqa kay tiempopin junt’akushan.

MAYPIÑA KASUN CHAYPAS JEHOVÁ DIOSQA CUIDAWASUNMI

6. ¿Imatan ruwana Diospa karpanman jaykunapaq, maypin chay karpa kashan?

⁶ Ñaupa tiempopi telamanta ruwasqa karpakunaqa samakunapaq mana allin tiempomanta pakakunapaq iman karqan. Chaymantapas pipas juj runaq karpanman chayaq chayqa, allintan paytaqa chaskiqku, allin atiendesqan kaqpas. Noqanchispas Diosman vidanchista entregaspaqa, chay runa jinan Diospa karpanman jaykurqanchis (Sal. 61:4). Chaypiqa askhan espiritual mijunanchis kashan, kusisqan Jehová Diospa invitasqan runakunawanpas kanchis. Ichaqa, ¿maypitaq chay karpari kashan? Chayqa manan maypipaschu kashan, aswanpas maypichá Diosta servishanku chaytan Diospa karpan nikun. Chaytaqa sut’itan repararqanku jatun asambleakunaman riq hermanokunaqa, chay asambleakunapin hermanokunaqa Diospa karpanpi kaq juj hermanokunata reqsirqanku (Apo. 21:3).

7. ¿Imaraykun nisunman “ñaupa tiempopi wañupuq runakunapas Diospa karpanpin kashanku” nispa? (Qhaway kay parrafopaq fotota).

⁷ Ichaqa, ¿iman pasan Dios sonqo wañupuq runakunawan? ¿Paykunapas Diospa karpanpichu kashankuman? Arí, chaypin kashanku.  ¿Imaraykun chayta nisunman? Bibliaq nisqan jina, paykunaqa kausashankun Jehová Diospaqqa. Chaymantapas Jesuspa nisqan jina, “wañusqakuna kausarichisqa kananmantaqa Moisesraqmi rimarqan raurashaq sach’amanta qelqasqanpi, chaypin nirqan Jehová Diosqa “Abrahanpa Diosnin, Isaacpa Diosnin, Jacobpa Diosnin” kasqanta. Payqa manan wañusqakunaq Diosninchu, aswanpas kausaqkunaq Diosninmi; paypaqqa llapankupas kausashanmi” (Luc. 20:​37, 38).

¿IMA ALLINKUNAN KARQAN, IMATATAQMI RUWANA?

8. ¿Ima bendicionkunatan chaskisun Jehová Diospa karpanpi kaspa?

⁸ Imaynan juj karpaqa mana allin tiempomanta pakaykuwanchis, chhaynatan Jehová Diospas karpanpi imaymana mana allinkunamanta pakaykuwanchis, suyakuyta iman qowanchis. Jehová Diospa ladollanpi kasun chayqa, manan Satanasqa ni ima ruwaytapas atiwasunchu (Sal. 31:23; 1 Juan 3:8). Mosoq pachapipas Jehová Diosqa cuidawashallasunmi, manan ni wañusunpaschu (Apo. 21:4).

9. ¿Imaynatan portakunanchis Diospa karpanpi kaqkuna?

⁹ May kusikunapaqmi Jehová Diospa karpanpi kayqa ¿riki? Paypa karpallanpi kayta munanchis chayqa, ¿imatan ruwananchis? Chaypaq kaypi piensasun, sichus pipas wasinman invitawasunman chayqa, paypa niwasqanchisman jinan imatapas ruwasunman ¿riki? Yaqapaschá niwasunman zapatonchista ch’utikuspa wasinman jaykunanchispaq otaq imata ruwananchispaqpas. Chay niwasqanchistaqa ruwasunmanmi ¿riki? Noqanchispas Jehová Diospa karpanpitaq kashanchis chayqa, ¿manachu paypa niwasqanchisman jina imatapas ruwayta munasunman? Munakunchistaq chayqa, sonqonta kusichinapaq jinan imatapas ruwasunman ¿riki? (Col. 1:10). Jehová Diosqa amigonchisña chaypas payqa kamaqninchis Diosmi, Taytanchismi, chaymi paytaqa tukuy sonqo respetananchis (Sal. 25:14). Sichus Jehová Diosta tukuy sonqo munakusun respetasuntaq chayqa, manachá ima ruwasqanchiswanpas phiñachiytaqa munasunchu. Chaymantapas paytaqa “k’umuykukuywanchá” servisunchis (Miq. 6:8).

IGUAL-LLATAN LLAPANKUTAPAS QHAWARIRQAN

10, 11. ¿Imaraykun nisunman “Jehová Diosqa llapa serviqninkunatan igual-llata qhawarin” nispa?

¹⁰ Jehová Diosqa igual-llatan llapa invitasqan runakunataqa qhawarin (Rom. 2:11). Chaypaq yachasun imaynatas Israel runakunata qhawarirqan Sinaí orqopi kashaqtinku chayta.

¹¹ Jehová Diosqa Israel runakunata Egipto llaqtamanta librasqan qhepamanmi karpanpi servinankupaq sacerdotekunata ajllarqan. Chaymantapas Leví runakunatan ajllakullarqantaq juj ruwaykunapi yanapakunankupaq. ¿Chaywanchu nisunman “Diospa karpanpi llank’aqkunan aswan allin qhawarisqa karqanku” nispa? Manapunin. Jehová Diosqa llapa Israel llaqtantan allinta cuidarqan.

12. ¿Imaraykun nisunman “Jehová Diosqa igual-llatan Israel runakunata qhawarirqan” nispa? (Éxodo 40:38; qhaway kay parrafopaq dibujokunata).

¹² Israel runakunaqa llapankupas atirqankun Jehová Dioswan amigontin kaytaqa. Karpanpi servinankupaq ajllasqaña karqanku manaña chaypas llapankun atirqanku paywan amigontin kayta. Llapankun rikuqku karpaq jawanpi sayashaq phuyutapas (leey Éxodo 40:38). May karupiña kasharqanku chaypas paykunaqa rikuqkun chay  phuyutaqa, chaymi chay phuyu puririqtin paykunapas imaymanankuta alistakuspa puririllaqkutaq (Núm. 9:​15-23). Chaymantapas llapankun uyariqku ima ratuchus puririnanku karqan chaypaq willakuytapas; chaytaqa trompetakunata tocaspan willaqku (Núm. 10:2). Chhaynaqa, Diospa amigon kanapaqqa manan Diospa karpan qayllapi kaymantachu nitaq karupi kaymantachu karqan; aswanpas llapa Israel runakunan Diospa invitasqan runakuna karqanku, llapallankutaqmi allin cuidasqa karqanku. Kay tiempopipas kaqllataqmi kashan, maypiña tiyanchis chaypas Jehová Diosqa munakuwanchismi, llapanchistataqmi cuidawanchispas.

KUNANPAS DIOSQA IGUAL-LLATAN QHAWARIWANCHIS

13. ¿Imaraykun nisunman “Jehová Diosqa kunanpas llapa serviqninkunatan igual-llata qhawarin” nispa?

¹³ Wakin hermanonchiskunaqa Oficina Mundial qayllapi sucursalkuna qayllapi iman tiyanku; wakinqa chaykunapin llank’ankupas. Chaypitaq llank’anku chayqa imaymana ruwaypin yanapakushanku; Diospa llaqtanta pusariq hermanokunawan iman llank’anku. Wakin hermanokunaqa watukuq umalli jinan Diospa llaqtanpi yanapakushanku, wakintaq imaymana juj ruwaykunapi tukuy tiemponkuwan yanapakushanku. Ichaqa manapaschá wakinninchisqa chay ruwaykunapi yanapakuyta atinchischu. Yaqa llapa hermanokunan chay ruwaykunapiqa mana yanapakuyta atinkuchu. Chhaynaña kaqtinpas Jehová Diosqa anchatan munakusunki, sumaqtan karpanpipas chaskisunki, allintataqmi cuidasunkipas (1 Ped. 5:7). Arí, Jehová Diosqa llapa serviqninkunata jinan qantapas munakusunki, chaymi tiempollanpi espiritual mijunata qosunki, paymi cuidashasunki pusashasunkipas.

14. ¿Imaynatan Jehová Dios rikuchillantaq llapa invitasqan runakunata igual-llata qhawarisqanta?

¹⁴ ¿Imaynatan Jehová Dios rikuchillantaq llapa invitasqan runakunata igual-llata qhawarisqanta? Llapa runakunaman rimasqanku  simipi Bibliata qospan. Diospa siminqa hebreo, arameo, griego rimaykunapin qelqasqa karqan. Chhaynataq chayqa, yaqapaschá pipas ninman: “Chay simikunapi leeqkunallachá Dioswanqa allin amigontin kanku”, nispa. ¿Chhaynachu chay kanman? Manapunin (Mat. 11:25).

15. ¿Imaynatan Jehová Dios rikuchillantaq llapa runatapas igual-llata qhawarisqanta? (Qhaway kay parrafopaq fotokunata).

¹⁵ Jehová Diospa allin qhawarisqan kanapaqqa, sonqonpaq jina kanapaqqa, manan allin estudioyoqraqchu kananchis, manataqmi chay hebreo, arameo, griego rimaykunataraqchu yachana. Jehová Diosqa llapa runamanmi estudioyoqña mana estudioyoqña kanman chaypas yachayninta qon. Chaymi simin qelqapas waranqa-waranqa simikunapi lloqsimushan. Chhaynataq chayqa, llapa runakunapas atillankumanmi Diospa siminta leeytaqa, paypa amigon kaytapas (2 Tim. 3:​16, 17).

JEHOVÁ DIOSPA KARPALLANPI KASUN

16. ¿Pikunatan Jehová Dios chaskin karpanpi? (Hechos 10:​34, 35).

¹⁶ ¡May munaypunin Jehová Diospa karpanpi kayqa ¿riki?! Jehová Diosqa may sumaq sonqon, sumaqtan munaytan karpanpi kaqkunata cuidawanchis; manan pipas pay jinaqa qhawariwasunmanchu. Payqa llapatapas igual-llatan qhawariwanchis, maymantaña, ima costumbreyoqña, ima educacionniyoqña, ima colorniyoqña, qhariña warmiña kasunman chaypas igual-llatan munakuwanchispas. Ichaqa payqa munan kamachikusqanta kasukunanchistan (leey Hechos 10:​34, 35).

17. ¿Imamantan qatimuq yachachikuypi yachasun?

¹⁷ Salmos 15:1 textopi nisqan jina, Davidmi Jehová Diosta tapurqan: “Jehová Diosníy, ¿pin wasiykipi tiyanman? ¿Pin ch’uya orqoykipi tiyanman?”, nispa. Jehová Diospa yuyaychasqan kaspanmi Davidqa payllataq chaymanta rimarqan. Qatiq yachachikuypin yachasun imatas ruwana Diospa karpallanpi kanapaq chayta.