Leeqkunaq tapukusqan
Mosoq pacha Bibliapiqa, Salmos 12:7 textopiqa 5 versiculopi willasqan llakisqa runakunamantan rimashan. Chhaynaqa, ¿imaraykutaq wakin runakunari piensanku 6 versiculopi willasqanmanta rimananpaq?
Chay textopiqa wichaymanta urayman qhawarisqaqa, runakunamantan rimashan.
Salmos 12:1-4 textopin willashan imaynas “junt’aq runaqa mana kanñachu” chaymanta. Ichaqa, ¿ima nishantaq Salmos 12: 5-7 textopiri? Chayta kunan astawan qhawarisun.
Chay textopin nin: “Jehová Diosmi nin:
“Runakunaq ñak’arisqanraykun,
wajchakunaq llakisqa kasqankuraykun jatarimusaq, paykunamanmi atiyniyta rikuchisaq.
Pisichaqninkuq makinmantan librasaq”, nispa.
Jehová Diospa siminqa ch’uyan,
t’uru hornopi ch’uyayachisqa qolqe jinan, qanchis kutita ch’uyayachisqa qolqe jinan.
Diosníy Jehová, qanmi paykunataqa uywanki,
sapankankutan sumaqta qhawarinki, kay wiñay runakunata, jamuq wiñay runakunatapas qanmi qhawarinki”, nispa.
5 versiculopi nisqan jina, ¿imatan ruwanqa Jehová Dios ñak’ariq runakunarayku? Ñak’arisqankumantan libranqa.
6 versiculopitaq nin: “Jehová Diospa siminqa ch’uyan, t’uru hornopi ch’uyayachisqa qolqe jinan”, nispa. Dios sonqo runakunapaqqa chhaynapunin chayqa (Sal. 18:30; 119:140).
Kunanqa qhawasun Salmos 12:7 textopi nisqanta. Chaypin nin: “Diosníy Jehová, qanmi paykunataqa uywanki, sapankankutan sumaqta qhawarinki, kay wiñay runakunata, jamuq wiñay runakunatapas qanmi qhawarinki”, nispa. ¿Imamantan chay textopi rimashanman?
Kaypi qhawarisqanchis jina, 7 versiculoq ñaupan 6 versiculopiqa “Diospa siminmantan” rimashan. Chayraykupaschá wakinqa ninkuman: “7 versiculopipas, Diosqa siminta waqaychasqanmantan rimashan”, nispa. Arí, Jehová Diosqa simintaqa cuidarqanmi, chay siminta cheqnikuq runakunaña prohibiyta munarqanku, chinkachiyta munarqanku chaypas manan Diosqa dejarqanchu (Isa. 40:8; 1 Ped. 1:25).
Chaypi 5 versiculopi nisqanpas cheqaqmi, Jehová Diosqa “librarqanmi” ñak’ariq runakunataqa. Chaytaqa ruwashallanqan payqa (Job 36:15; Sal. 6:4; 31:1, 2; 54:7; 145:20).
Chhaynaqa, ¿imamantan rimashan 7 versiculopi?
Llapanta qhawarikusqanman jinaqa, runakunamantan chaypiqa rimashan.
Salmos 12:1, 2 textopin rimashan Dios sonqo runakunata engañaq mana allin runakunamanta. Chay qhepallamanmi rimashallantaq imaynas Diosqa mana allinkunata rimaqkuna contra jatarinqa chaymanta. Chaymantapas chaypiqa willashanmi imaynas Diosqa simin ch’uya kasqanrayku llaqtanpa favorninpi jatarinqa chayta.
Chhaynaqa 7 versiculopi “qanmi paykunataqa uywanki, sapankankutan sumaqta qhawarinki” nisqanqa, mana allin runakunaq ñak’arichisqan runakunamantan rimashan.
Mosoq Pacha Biblia nisqapi willasqanqa, Diospa qelqachisqan ñaupa tiempo qelqakunaman jinan kashan. Griego rimayman t’ijrasqankupin ichaqa chay 7 versiculopi iskay kutita nishan: “Noqayku”, nispa. Ichaqa chaypipas ñak’ariypi tarikuq runakunamantan rimashan. Chaymantapas chay textopiqa “kay wiñay runakunata” nishanmi. Chaymi rikuchin imaynas Jehová Diosqa chaymantapacha pay sonqo runakunata mana allin millay runakunamanta waqaychanan karqan chayta (Sal. 12:7, 8). Arameo rimaypi Targum nisqa libropipas chay textopiqa khaynatan nin: “SEÑORNILLÁY, qanqa chanin runakunatan waqaychanki, mana allin runakunaq paqarisqanmanta hasta wiñay-wiñaykaman waqaychanki. Millay runakunaqa yawar ch’onqaq ch’uspikuna jinaraqmi lliu runakunata muyupayashanku”, nispa. Chaykuna iman sut’ita rikuchin imaynas Salmos 12:7 textoqa mana Diospa siminmantachu rimashan chayta, aswanpas imaynas runakunamanta rimashan chayta.
Chaymantapas chay texton sut’ita rikuchillantaq imaynas Jehová Diosqa pay sonqo runakunaq favorninpi jatarinqa chayta.
