Noqaqa 1948 watapin nacerqani Nigeria nacionpi kaq juj llaqtachapi. Chay tiempopin papaypa sullk’a wayqen Moustapha, kuraq wayqey Wahabi ima Jehová Diospa testigon jina bautizakapurqanku. Papayqa isqon watachaypi kashaqtiymi wañukapurqan, chayqa sinchi llakin noqapaqqa karqan. Wayqey Wahabin niwarqan: “Papanchisqa kausarimpunqan”, nispa. Chaypin noqaqa piensaq kani, chhaynapin kallpachakurqani Bibliata estudianaypaq. Jinan 1963 watapi bautizakapurqani, wakin kinsantin wayqeykunapas Jehová Diospa testigonmi kapurqanku.

1965 watapin Lagos llaqtaman ripurqani, chaypin kuraq kaq wayqey Wilson tiyarqan. Chaypiqa sumaqtan pasariq kayku iñiq t’aqapi wakin precursorkunawan. Paykunaqa kusisqan kaqku precursor jina Jehová Diosta servispa. Chaymi noqapas 1968 watapi enero killapi precursor kapurqani.

Juj kutinmi Betelpi llank’aq hermano Albert Olugbebi juj juñunakuyta aparirqan llapa waynakunawan, chaypin willawarqanku Nigeria nacionpi wakin llaqtakunapi precursor especialkuna necesitakusqanta. Chay hermanoqa kusisqan niwarqanku: “Qankunaqa waynakunan kashankichis, Jehová Diosman tiempoykichista kallpaykichista qoychis, chay llaqtakunapiqa askhan ruwana kashan”, nispa. Noqaqa profeta Isaías jinan Jehová Diospa maychus kachawasqanman riyta munasharqani, jinan juj solicitudta junt’arqani (Isa. 6:8).

 1968 watapin mayo killapi precursor especialta jina Kano llaqtaman kachawarqanku, chay llaqtaqa Nigeria nacionpi wichay ladopin kasharqan. Chay watakunapin chayneq llaqtakunapi Biafra nisqa guerra aparikurqan, chayqa 1967 watamanta 1970 watakaman karqan. Chaypi llaqtakunataqa khuyaytapunin saqepusqaku. Chaymantaqa chay nacionpi inti lloqsimuy ladopi jinañataqmi chay guerraqa aparikurqan. Chaykuna pasasqanta yachaspan juj hermano niwarqan amaña Kano llaqtaman rinaypaq. Noqan ichaqa nirqani: “Gracias wayqéy noqapi piensasqaykimanta, ichaqa Jehová Diostaq chayman rinayta munashan chayqa, paymi noqataqa yanapawanqa”, nispa.

Kano llaqta imaynachus qhepasqanta rikuyqa mancharikunapaqmi karqan. Predicaq rispan ñankunapi rikuq kayku wañusqakunata. Chay Kano llaqtapiqa askhas iñiq t’aqakuna kasqa, ichaqa guerraq kasqanraykun yaqa llapa hermanokuna ripusqaku. Chaypiqa yaqa chunka pisqayoq hermanokunallañan qhepasqaku, paykunaqa sinchi mancharisqa llakisqan kashasqaku. Noqayku soqtantin precursor especialkunata rikuspan paykunaqa kusirikurqanku. Paykunataqa tukuy imapin kallpacharirqayku, chaywanmi allinyarqanku. Chaymantapas yanaparqaykun jujmanta juñunakuykunata aparinankupaq, Diosmantapas willanankupaq. Kallpacharqaykun informenkutapas sucursalman apachinankupaq, qelqakunatapas mañakunankupaq.

Llapa precursorkunan kallpachakurqayku hausa simita yachanaykupaq, estudiarqayku iman. Chay llaqtapiqa rimasqanku simipitaq Diosmanta willarqayku chayqa, allintan runakunaqa uyarikuqku. Ichaqa chay llaqtapi juj reqsisqa kaq religionmanta wakin runakunaqa manan munaqkuchu Diosmanta willanaykuta, chaymi noqaykuqa qhawa-qhawarikuspalla puriq kayku. Juj kutinmi noqata compañeroytawan juj runa cuchillowan qatikachawarqanku. Allipaqchá noqaykuqa allinta phawarqayku, chhaynallapiñan mana aypamuwarqankuchu. Chhayna sasachakuypiña tarikurqayku chaypas, Salmos 4:8 nisqan jina Jehová Diosmi yanapawarqanku allillan kanaykupaq. Chay qhepakunamanqa chay llaqtapi Diosta serviqkunaqa pisi-pisimantan astawan yapakurqanku. Kunanqa chay Kano llaqtapiqa chunka jujniyoq iñiq t’aqakunan kashan, iñiqkunapas 500 masmi kashan.   

Manaraq unaychu Kano llaqtapi kashaqtiykun 1968 watapi agosto killapi Níger nacionpi kaq Niamey llaqtaman noqata iskay precursorkunatawan kachawarqanku. Chay llaqtaqa nishu q’oñin kasqa, noqaykuqa  chhayna q’oñipi kausaymanmi yachakunayku karqan. Chaymantapas chay llaqtapi rimasqanku francés simitan yachanayku karqan. Chhaynaña karqan chaypas Jehová Diospin confiarqayku, jinaspa predicayta qallarirqayku, chay llaqtapiqa pisillan iñiqkunapas kasqaku. Chaywanpas pisi tiempollapin Niamey llaqtapi yaqa llapa leeyta yachaqkunaman La verdad que lleva a vida eterna nisqa librota rakirqayku, wakin runakunaqa maskhamuwaqkuraqmi chay librota qonaykupaq.

Tiempowanmi ichaqa repararqayku, chay llaqtapi autoridadkunaqa manan allinpaqchu Jehová Diospa testigonkunata qhawariqku. 1969 watapi julio killapin primera vez asamblea de circuito nisqa aparikunan karqan, chaymanqa iskay chunkan runakuna jamusqaku. Chaypiqa kusisqan kasharqayku, iskaymi bautizakunanku karqan. Ñaupaq kaq p’unchaymi policía jamuspa asamblea ruwasqaykuta sayachipuwarqanku. Paykunan watukuq umalliqta, precursor especialkunatawan comisariaman apawarqanku. Imaymanata tapuspan kacharipuwarqanku, niwarqankutaq paqaristin kutimunaykupaq. Manan facilchu kasharqan chay asamblea apariyqa, chaymi bautizakuqkunapaq discursota ruwarqayku juj wasillapiña, bautizakuy munaqkunatataq chayneqpi kaq mayupi mana reparachikuq jinalla bautizarqayku.

Chay semanakuna qhepallamanmi Ministerio del Interior nisqamanta, noqata pisqa precursor especialkunatawan qarqonpuwarqanku. Iskay p’unchayllatan plazota qowarqanku Níger nacionmanta ripunaykupaq, cuentallaykumantan ripunayku karqan. Jinan noqaykuqa chay autoridadkunaq niwasqankuta kasukuspa Nigeriapi sucursalman ripurqayku. Chay sucursalmantan juj llaqtakunaman kachawarqanku.

Noqataqa Nigeria nacionpi Orisunbare nisqa llaqtamanmi kachawarqanku, chaypiqa pisillan iñiqkunaqa kasqaku. Kusisqan Diosmantaqa willasharqani, estudiokunatapas qosharqanin. Ichaqa soqta killa qhepallamanmi niwarqanku Níger nacionman kutinaypaq, chay kutipiqa sapallayñan rinay karqan. Chayta niwaqtinkuqa admirasqa manchasqa iman kasharqani, ichaqa tupaytan munasharqani chay nacionpi hermanokunawan.

Niamey llaqtamanmi kutirqani. Chay llaqtapin paqaristin p’unchay negociokunata ruwaq juj runawan tuparqani, payqa Jehová Diospa testigon kasqayta reparaspan Bibliamanta imaymanakunata tapuwarqan. Paywanmi Biblia estudiayta qallarirqayku, payqa pisi-pisimantan saqepurqan cigarrota, manañan macharqanpaschu, chhaynapin bautizakapurqan. Chaypi kashaspayqa Jehová Diospa yanapayninwanmi askha llaqtachakunaman Diospa siminta chayachirqani. Chaypi runakunaqa allintan uyarikuqku. Chay Níger nacionman chayashaqtiyqa kinsa chunka jujniyoqmi Testigokuna kasqaku; ripunaypaqmi ichaqa soqta chunka isqonniyoqña kasharqanku.

1977 watapin diciembre killapi Nigeriaman kutirqani, chaypin kinsa semana juj capacitacionta chaskirqani. Chay capacitación tukuqtinmi sucursalpi encargakuqkunamanta coordinador hermano Malcolm Vigo juj cartata qowarqan, chay cartaqa Sierra Leona sucursalmantan kasqa. Chay sucursalmanta hermanokunan maskhashasqaku juj soltero precursorta, chay precursorqa allin saludniyoqmi kanan kasqa, inglesta  francesta iman rimananpas kasqa, chhaynapi Guinea nacionpi Conakri llaqtapi watukuq umalli kananpaq. Chay cartata qowaspan hermano Malcolmqa niwarqan: “Chaypaqmi kay capacitacionmanqa jamurqanki”, nispa. Chaymantapas willawarqanmi imaynas chayta ruwayqa mana facilchu kanan karqan chayta. Niwarqantaq: “Manaraq chayta chaskishaspa allintaraq piensariy”, nispa. Noqan ichaqa mana nishuta piensaspa nirqani: “Jehová Diostaq kachashawan chayqa rillasaqmi”, nispa.

Sierra Leona ladomanqa avionpin rirqani, chaypin sucursalmanta hermanokunawan juñukurqani, chay sucursalpi encargakuqkunamanta jujnin hermanon niwarqan: “Manan yachaykuchu imaynachá Guinea ladopi Diosmanta willay kashan chayta”, nispa. Sierra Leona nacionpi kaq sucursalmanta hermanokunan qhawarisharqanku Guinea nacionpi Diosmanta willay aparikusqanta. Guinea nacionpiqa manan facilchu imapas kasharqan, nishun ch’aqwa kasharqan. Chaykunaq pasasqanraykun sucursalmanta hermanokunaqa mana imatapas yachasqakuchu chay Guinea nacionpi hermanokunamanta. Askha kutipis paykunaqa juj hermanota chay ladoman kachayta munasqaku ichaqa manas atisqakuchu. Chaymi niwarqanku Guinea nacionpi capital Conakri llaqtaman viajanaypaq, paykunaqa chay llaqtapi qhepakamunaytan munasharqanku.

Conakri llaqtaman chayaspan noqaqa Nigeria nacionmanta embajada nisqaman rirqani, chaypin rimarqani Nigeria nacionpa churasqan wiraqocha embajadorwan. Paymanmi willarqani imaynas Guinea nacionpi Diosmanta willayta munasharqani chayta, jinan payqa niwarqan: “Ama kaypiqa chaytaqa ruwaychu, carcelmanmi wisq’asunkikuman, wañuyta iman tariwaq. Aswanpas Nigeria ladoman kutiy, chaypi willamuy”, nispa. Noqan ichaqa nirqani: “Kaypipunin runakunaman yachachisaq nishani”, nispa. Jinan chay wiraqocha embajadorqa chay Guinea nacionpi ministro del Interior nisqaman cartata apachirqan yanapawananpaq, chaytataqmi payqa ruwarqanpas.

Chay qhepallamanmi noqaqa Sierra Leona sucursalman kutimurqani, jinaspa chaypi hermanokunaman willarqani imatas chay ministro ruwarqan chayta. Paykunaqa kusikuymantan p’itarqankuraq, Jehová Diospa yanapayninwanmi gobiernoq autorizasqan Guinea nacionpi qhepakunay kasharqan.

Chhaynapin 1978 watamanta 1989 watakama watukuq umalli jina Guinea nacionpi Sierra Leona nacionpi ima yanapakurqani, Liberia nacionpitaq watukuq umalliqpa yanapaqnin karqani. Qallariy killakunaqa nishutan onqoq kani, mayninqa karu llaqtakuna viajasqaypin onqoy jap’iwaq. Chaypi hermanokunaqa tukuy atisqankutan kallpachakuqku hospitalman apawanankupaq.

Juj kutinmi nishu onqosqa kasharqani, malaria onqoymi jap’iruwasqa, chaymantapas wijsaypin k’uykakuna kashasqa. Qhaliyapuqtiymi willawarqanku: Hermanokunaqa p’ampapuwanankupaqñas rimanakushasqaku. Chhayna imaymana llakipiña tarikurqani chaypas, manan jayk’aqpas piensallarqanipaschu Diospa llank’ana qowasqanta saqeypiqa. Noqaqa allintan yachani Jehová Dioslla yanapaq Dios kasqanta, payqa wañusunmanña chaypas jujmantan kausarichimpuwasun.

1988 watapin reqsirqani Dorcas sutiyoq hermanata, payqa munay llamp’u sonqo precursoran karqan, tukuy sonqon Jehová Diostapas munakuq. Paywanmi noqaqa casarakapurqani, casarakuspapas watukuq umalli jinallapunin noqaqa yanapakusharqani. Dorcasqa tukuy atisqantan yanapawarqan chay ruwaypi, paypas imaymanatan ruwaq Diosta servinaykurayku. Mayninqa juj iñiq t’aqamanta juj kaq iñiq t’aqaman rinaykupaqqa 25 kilómetro jina karutan puriq kayku, imaymanayku q’epiykusqan puriq kayku. Aswan karupi iñiq  t’aqakunaman chayanaykupaqqa imawanchá apachikuyta atiykuman chaymanmi seqaq kayku. Wakin purisqayku ñankunaqa t’urullañan kaq, t’oqo-t’oqollañan kaq, chaynintan horas-horasraq puriq kayku.

Munakusqay Dorcasqa valiente warmin. Chhayna viajasqaykupiqa mayninqa mayukunatan chimpanayku karqan, wakin mayukunapiqa askhan cocodrilo kaq. Juj kutinmi karuta viajasharqayku, pisqa p’unchayta jinan viajanayku karqan. Chay kutipin viajashaspa juj mayuta chimpanaykupaq canoaman seqarqayku. Chaypin Dorcasqa canoamanta p’itananña kashaqtin unuman pasaykurqan, unuqa millp’upusharqanñan paytaqa. Manaraqtaqmi mayqenniykupas nadayta yacharqaykuchu. Chaymantapas chay mayupiqa askhan cocodrilokuna kaq. Chayllamanmi jovenkuna jamuspa unuman p’itaykuspa apuraylla orqomurqanku. Chaykuna pasawasqankutaqa mosqopakuqraqmi kayku, sinchitapunin mancharikurqayku, chaywanpas ruwashallarqaykun Diospa imachus kamachiwasqankutaqa.

1992 wata qallarikuyta jinan juj noticia chayamuwarqanku: ¡Dorcasmi onqoq rijurirqan! Noqaykuqa “¿imaynataq kasunri, saqesunchu kay ruwananchista imaynataqri?” nispan nisharqayku. Ichaqa nirqaykun: “Kay wawaqa Jehová Diospa regalonmi”, nispa. Chaymi Jahgift nispa sutiyarqaykupas, chayqa “Jehová Diospa regalon” ninantan nin. Tawa wata qhepamanmi qhari wawaykuñataq nacerqan, paytan sutiyarqayku Eric nispa. Paykunaqa noqaykupaqqa Jehová Diospa regalonpunin. Kuraq wawaykuqa Conakri llaqtapi qelqakunata t’ijrana oficinapin yanapakurqan, sullk’a wawaykuqa siervo ministerialmi kashan.

Esposay manaña precursora especialchu karqan chaypas, precursora regular jinan Jehová Diosta servisharqan, wawayku juch’uyllaraq kashaqtinpas chhaynallapunin kasharqan. Noqan ichaqa Jehová Diospa bendicionninwan tukuy tiempollapuni payta servisharqani. Iskaynin wawayku wiñaruqtinqa Dorcaspas jujmantan precursora especial kapurqan, kunanqa iskayniykun Conakri llaqtapi misionero jina servishayku.

Noqaqa maymanchá Jehová Dios kachashawan chaymanmi riq kani. Askha kutitan Dorcaswan noqawanqa rikuyku Jehová Diosqa pakaykuq Dios, bendicionta qoq Dios kasqanta. Noqaykuqa payllapipunin tukuy sonqo confiayku, paypi confianki chayqa imaymana sasachakuymantan, imaymana llakimantan librasqa kanki. Chaymantapas Dorcaswan noqawanqa allintan yachayku libraqninchis Diosqa imapiña tarikunki chaypas maypiña kashanki chaypas libranasuykita (1 Crón. 16:35). Noqapaqqa sut’in kayqa kashan: Jehová Diosqa “kausay bolsapin kausayniykita allinta waqaychashan”, paypi confiaqkunataqa allintan qhawarin (1 Sam. 25:29).