Chay watapiqa Diospa llaqtanpiqa imaymana cambiokunan aparikurqan, chhaynapi Biblia estudiaqkuna juj sonqolla Jehová Diosta adoranankupaq. Sapa semananmi juj juñunakuyta aparikunan karqan, chaypin mañakunanku takinanku ima karqan, testimonio nisqatapas willakunanku karqan. Chay juñukuypi estudiakunanpaqmi The Watch Tower nisqa revistapi juj textomanta explicación lloqsimuyta qallarirqan. Chaymantapas juj almanaquen lloqsimuyta qallarirqan, chaypin sapa semanapaq juj texto karqan, karqanmi sapa p’unchaypaq alabanza takikunapas, chhaynapi Bibliata estudiashaspa familiapi estudiashaspapas takinankupaq.

Chay juñunakuykunapiqa Biblia estudiaqkunaqa testimonio nisqata iman willakuqku. Chaypin willakuqku imaynas Diosmanta willasqankupi kamurqanku chayta, Jehová Diosmanpas graciasta qoqku, takiqku, mañakuqku iman. Eva Barney sutiyoq hermanan 1923 watapi bautizakusqa chunka pisqayoq watanpi kashaspa. Paymi nin: “Pipas testimonio nisqata willakuyta munaqqa sayarispan khaynata rimayta qallariq: Señortan gracias nini tukuy imapi khuyapayawasqanmanta. . . ”, nispa. Wakin hermanokunamanqa gustaqmi chayta ruway. Hermananchis Evan nillantaq: “Hermano Godwinqa imaymanamantan Señorta gracias niyta munaq, payqa kuraqchañan karqan. Juñunakuyta umalliq hermanochus mana pacienciakuq jinaña qhawarimushaq chayqa, esposanmi saconmanta chutariq, chhaynapin hermano Godwinqa tiyaykullaq”, nispa.

Sapa killanmi, killapi juj kutita sapanka clase otaq sapanka iñiq t’aqa chay juñunakuyta jujnirayta apariq. ¿Imaynan kanman karqan? 1923 wata 1 abril killapi lloqsimuq The Watch Tower nisqa revistapin chaymanta rimaspa nirqan: “Chay juñunakuypi kuskanmi testimonio nisqata willanapaq kanqa, chaypin willakunqa predicacionta imayna aparinamanta; kallpachakunqan llank’aqkunatapas […]. Llapanchis chaypi participasunchis chayqa, astawanmi amigontin jina jujllachakusunchis”, nispa.

Chaykunaqa allintas yanapasqa hermanonchis Charles Martinta. Payqa Canadapi Vancouver llaqtamantan, payqa clasekunapi llank’aq nisqas kasqa (otaq Diosmanta willaq nisqa), chay tiempopaqqa chunka isqonniyoq watanpis kashasqa. Paymi nin: “Wakinqa imaynatachus wasin-wasinta willaspa runakunawan rimanku chaytan willakuqku. Chaypin allinta yacharqani runakunawan imayna rimayta, mana munaqtinkupas ima niyta”, nispa.

“Diosmanta willana p’unchaykunapas” iñiqkunataqa yanaparqanmi juj sonqolla kanankupaq. 1923 wata 1 abril killapi lloqsimuq The Watch Tower nisqa revistapin nirqan: “Llapanchis jujlla kananchispaqmi […], kay martes ñaupaq p’unchay mayo killapi Diosmanta willaq llapallanchis lloqsisunchis. Clasepi kaqkunaqa sapa killanmi chay killapi ñaupaq martesta chayta ruwasunchis”, nispa.

Bibliata estudiaqkunaqa waynapas sipaspas chay ruwaypiqa participaqkun. Hazel Burford sutiyoq hermanapas chaypiqa participaqsi, 1923 watapaqqa chunka soqtayoq watanpis payqa kashasqa, paymi nin: “Bulletin nisqa qelqapin willakuq imaynatas runakunawan rimasunman chayta, chaytan noqaqa umaypi grabaq kani. a Abueloywan kuskan noqaqa predicacionmanqa riq kani”, nispa. Ichaqa mayninqa wakin hermanokunaqa jark’aqkus paytaqa, paymi nillantaq: “Juj kuraq hermanon mana acuerdopichu kasharqan Diosmanta jujkunaman willasqaywan. Chay tiempopiqa manan allintachu entiendekurqan imaynas waynakuna, doncella sipaskunapas kamaqninchis Diosmantaqa willananku karqan chayta”, nispa (Sal. 148:​12, 13). Chaywanpas chay hermananchisqa Diosmantaqa willashallasqas. Watakunaq pasasqanman jinataqsi Galaad Escuelapi iskay kaq claseman risqa, jinaspa Panamá nacionman misionerata jina kachasqaku. Tiempowanqa hermanokunapas cambiasqakus wayna-sipaskuna predicanankuchus manachus chaymanta imachus piensasqankuta.

Asambleakunapas jatun asambleakunapas astawanmi hermanokunataqa jujllacharqan. Wakin asambleakunapiqa Diosmanta willaq iman lloqsiqku. Canadá nacionpi Winnipeg llaqtapipas chaytan ruwakurqan. Kinsa chunka jujniyoq p’unchay marzo killapin “Winnipeg llaqtapi bomba kachariy” nisqa aparikurqan. ¿Imaninantaq chayri? Chay p’unchaymi asambleaman llapa riqkuna Diosmanta willaq lloqsirqanku. Chay ruwasqankuqa allinpunin karqan. Chay watallapitaqmi pisqa p’unchay agosto killapi kaq llaqtallapitaq juj asamblea aparikullarqantaq, chaymanqa yaqa qanchis waranqan jamusqaku. Chay kutikamaqa Canadá nacionpiqa manaraqmi chhaytukuy runakunaqa asambleapiqa juñukurqankuchu.

1923 watapin agosto killapi chunka pusaqniyoq p’unchaymanta iskay chunka soqtayoq p’unchaykama  California ladopi Los Ángeles nisqa llaqtapi juj jatun asamblea aparikullarqantaq. Ñaupaq semanakunamantapachan chay asambleamantaqa willakurqan periodicokunapi, Biblia estudiaqkunapas 500.000 más invitacionkunatan rakirqanku. Autokunapi pasajero carrokunapi iman chay asambleamanta willakuyta churarqanku.

Sábado iskay chunka pisqayoq p’unchay agosto killapin hermano Rutherford yachachimurqan “Ovejakunawan cabrakunapiwan” nisqamanta. Chaypin willamurqan imaynas “ovejaman” rijch’akuq runakunaqa kay pachapi juj paraisopi kausananku karqan chayta. Chaymantapas “Anyay” nisqamantan rimamullarqantaq. Chaypin willamurqan imaynas Cristota yanqa qatikuqkunaqa imaymana mana allinkunata ruwasharqanku chayta, lliutataqmi kallpachamurqan chay “Jatun Babiloniamanta” lloqsipunankupaq (Apo. 18:​2, 4). Tiempowanmi juj qelqapi orqokamurqan lliu chay willamusqanta, chaytataq Biblia estudiaqkunaqa kay pachapi waranqa-waranqanpi runakunaman rakirqanku.

Chay asambleapi último p’unchaypiqa 30.000 masmi runakunaqa juñukurqanku, chaypin hermano Rutherford yachachimurqan “Llapa nacionkunan Armagedón guerraman rishanku, ichaqa kay tiempopi waranqanpi kausaq runakunan mana jayk’aqpas wañunqakuchu” nisqamanta. Chay p’unchaypaq askha runakuna jamunankuta yachaspan Bibliata estudiaqkunaqa Los Ángeles llaqtapi, chayraq ruwasqa coliseota alquilarqanku. Llapa jamuqkuna allinta uyarinankupaqtaq hermanokunaqa chay coliseopi parlantekunawan yanapachikurqanku, llapa chaykunaqa mosoqkunan karqan. Chaymantapas radiopin runakunaqa aswan askharaq chay asambleata uyarirqanku.

1923 watapiqa África ladopi, Europa ladopi, India ladopi, Sudamérica ladopi iman astawanraq yapakurqan Diosmanta willayqa. India ladopin Adavimannathu Joseph yanapakurqan hindi rimaypi, tamil rimaypi, telugu rimaypi, urdu rimaypi ima qelqakunata ruwakunanpaq. Payqa casarasqan kasharqan, soqtataq wawankunaqa karqanpas.

Sierra Leona ladomantan Alfred Joseph, Leonard Blackman ima Nueva York ladopi Brooklyn llaqtapi central mundial nisqaman cartata apachisqaku yanapayta mañakuspa. Chay hermanokunaq mañakusqanmansi respuesta chayamusqa 1923 watapi chunka tawayoq p’unchay abril killapi. Hermano Alfredmi willakun: “Chay p’unchayqa sábado p’unchaymi karqan, tutañan kasharqan, chayllamanmi qonqaylla telefononta wajamuwarqanku. Juj kunkan nimuwarqan: ¿Personaykichu Sociedad Watch Tower nisqaman cartata apachirqanki yanapayta mañakuspa?, nispa. Jinan noqaqa arí nirqani. Paytaq nimuwarqan: Noqatan kachamushawanku”, nispa. ¿Pin pay kanman karqan? William Brown sutiyoq hermanon. Payqa chay p’unchaymi Caribe nisqa ladoman chayasqa esposan Antoniawan iskaynin ususinkunawan kuska, jujnin ususinpa sutinmi karqan Louise, jujninpataq Lucy. Chay hermanokuna reqsinakunankupaqqa manan unayraqchu pasarqan.

 Hermano Alfredmi nillantaq: “Paqariqtin p’unchaymi imaynan sapa semana ruwallaqpuni kayku jinata esposaywan kuska Bibliata leesharqayku, chayllamanmi juj jatun runa wasi punkuykuman jamurqan: Payqa hermano Brownmi kasqa. Payqa ganaswanmi Diosmanta willaq jamusqa, manachu kay p’unchaykunamanta mayqen p’unchaypas discursota qoyman nispan niwarqan”, nispa. Hermano William Brownqa manaraq killapin llapa apasqan qelqakunata rakipusqa, jinan pisqa waranqa librokunatawan payman apachikusqa. Chaymantaqa astawanraqmi payqa munasharqan qelqakunataqa. Chaywanpas paytaqa manan librokunata vendeqta jinachu reqsisqaku. Payqa Bibliallawanpunitaq imatapas yachachiq chayqa, Bibliamanta yachachiq Brown nispan reqsisqaku.

Chay tiempollapitaqmi Alemania nacionpi Barmen llaqtapi sucursalqa hermanokunaq yapakusqanwan juch’uyña kapusharqan; chaymantapas chay llaqtamanqa Francia soldadokunan phawaykunanña kasharqan. Jinan hermanokunaqa sucursalpaq juj wasita maskharqanku, jinaspa Magdeburgo llaqtapi tarirqanku, chaypiqa kusan kasqa qelqakunata impriminapaqpas. Chunka isqonniyoq p’unchay junio killapin hermanokunaqa llapa imaymanata q’epichaspa, Magdeburgo llaqtapi mosoq Betelman ripurqanku. Chay astakusqankuta central mundial nisqapi hermanokunaman willasqankumanta juj p’unchay kashaqtinmi, periodicokunapi willakuy lloqsimurqan imaynas Barmen llaqtaqa Francia soldadokunaq makinpiña kasharqan chayta. Chayta yachaspan hermanokunaqa allinta repararqanku imaynas Jehová Dios paykunataqa pakaykusharqan chayta.

Brasil nacionpipas imaymanan pasarqan, chaypiqa George Young sutiyoq hermanon lliu llaqtakunaman Diosmanta willakuyta chayachisqa. Chaypin juj sucursalta kichaspa The Watch Tower revistata portugués rimaypi orqomurqan. Payqa pisi killakunallapin 7000 qelqakunata rakisqa. Chay hermanoqa yanapasqan Sarah Ferguson sutiyoq señoratapas. Payqa 1899 watamantapachan leeqllapuni kasqa The Watch Tower nisqa revistata, ichaqa manan jayk’aqpas bautizakusqachu. George Young chay nacionman chayaqtinmi ichaqa, paypas tawantin wawankunapas bautizakapusqaku.

1923 wata tukuytan, 15 diciembre killapi lloqsimuq The Watch Tower revistapi willarqan imakunapis yanapakurqan cambiokuna ruwakusqan chayta. Chaypin nirqan: “Sut’i reparaymi kashan, clasekunaqa otaq iñiq t’aqakunaqa […] allinmi kashanku iñiyninkupi […]. Espiritual armanchiskunawan churakuspa tukuy sonqo servishallasun Diosninchista, watamanpas kusisqalla chaytaqa ruwasunchis”, nispa.

1924 watapas allin watan karqan Bibliata estudiaqkunapaqqa. Brooklyn llaqtapi central mundial nisqapi hermanokunan llank’asharqanku chay qayllapi kaq Staten Island nisqapi. Chaypin jatun wasikunata ruwasharqanku. Chaykunataqa 1924 watapin qallariy killakunallapi tukurqanku. Chay wasikunaqa allinpunin karqan, chaywanmi hermanokunataqa allinta yanapakurqan jujlla kanankupaq, Diosmanta willakuyta lliuman chayachinankupaqpas.