43 YACHACHIKUY
90 TAKI “Kallpachanakusunchis”
Iskayashanchis chayqa, ¿imatan ruwananchis?
“Allinta t’aqwiychis tukuy imapas allinchus kashan icha manachus chayta” (1 TES. 5:21).
¿IMAMANTAN YACHASUN?
¿Imatan ruwasunman Diosta servisqanchispi imamantapas iskayaspanchis? Chaytan kaypi yachasunchis.
1, 2. a) ¿Imakunamantan iskayayta qallarisunman? b) ¿Imakunamantan kaypi yachasunchis?
LLIUPAS mayninqa iskayanchismi. a Chaypaq juj waynapi piensasun. Yaqapaschá payqa mana allintachu yachan Jehová Dios munakunchus icha manachus chayta. Manataq allintachu yachan chayqa, manapaschá payqa bautizakuypi piensanqachu. Kunanqa juj hermanopi piensasun. Yaqapaschá payqa wayna kashaspa qolqe maskhayman tiempota qonanmantaqa Jehová Diosta ñaupaqman churarqan. Kunantaq ichaqa familiayoq kapun, manapaschá qolqenpas aypanchu. Chhaynapi tarikuspaqa yaqapaschá ninqa: “¿Allintachu ruwarqani icha manachu kanpas?”, nispa. Kunanqa juj kuraq hermanapi piensasun. Payqa yaqapaschá kallpan pisiyasqanrayku manaña ñaupaqpi jinañachu imatapas ruwan. Chhaynapi tarikuspaqa yaqapaschá mana valeqpaq jina qhawarikunman. Yaqapaschá qanpas jayk’aqllapas tapukurqanki: ¿Jehová Dios noqata cuentapaq churawanmanchu? ¿Sutinrayku llapa ima ruwasqaytapas cuentapaq churanmanchu? ¿Valeshaymanraqchu paypaq, icha manañachu kanpas?”, nispa.
2 Chaykunapi nishuta piensasunman chayqa pisiyapunmanpaschá iñiyninchis, Diosmanta imapaschá t’aqakusunman. Nimusqanchis jina mayninqa yaqapaschá piensasunman Jehová Dios noqanchispi mana interesta churananpaq. Ñaupaqpi Diosta serviyllaman tiempota qosqanchistapas yanqapaq jinapaschá qhawarishanchis. Jehová Diospaqqa manapas valesunmanñachu jinatapaschá piensashanchis. ¿Imatan ruwasunman chhaynapi tarikuspa? Chaymantan kaypi yachasunchis.
¿IMATAN RUWANA IMAMANTAPAS ISKAYASPA?
3. ¿Imatan ruwananchis imamantapas iskayaspanchis?
3 Imamantapas iskayashanchis chayqa, Jehová Diospa siminmi chaypi yanapawasun. Chay yanapaywanqa astawanmi Jehová Diospi iñisun, allin amigontintaqmi paywanqa kasun, “iñiypipas qaqatan sayasunchis” (1 Cor. 16:13).
4. ¿Imatan ruwananchis tukuy imapas allinchus kashan icha manachus chayta yachananchispaq? (1 Tesalonicenses 5:21).
4 (Leey 1 Tesalonicenses 5:21). Bibliaq nisqan jina, “allintan t’aqwinanchis tukuy imapas allinchus kashan icha manachus chayta”. Ichaqa, ¿imaynatan chayta ruwasunman? Imachus piensasqanchistan Bibliawan tupanachinanchis. Chaypaq piensasun juj waynapi. ¿Imatan pay ruwanan Jehová Dios munakunchus icha manachus chaypi piensaspa? ¿Jinallachu chaypi piensanan mana imata t’aqwirispa? Manan. Aswanpas Bibliaq yanapayninwanmi qhawarinan imaynatas Jehová Dios payta qhawarin chayta.
5. ¿Imaynatan uyarisunman Jehová Diosta?
5 Diospa simin qelqata leesun chayqa, pay kikinpas rimapayawashasunman jinan kanqa. Ichaqa payta allinta uyarinapaqqa manan leeyllachu leenanchis. Imakunachá llakichiwashanchis imakunapichá piensashanchis chaymanta rimaq textokunatan maskhananchis. Chay textokunatataq allinta estudiananchis Diospa llaqtanpi qowasqanchis qelqakunaq yanapayninwan (Prov. 2:3-6). Chaymantapas Diospa yanapaynintan mañakunanchis, chay estudiasqanchista allinta entiendenanchispaq. Chaykunata estudiaspaqa allintan reparananchis ima yuyaychaykunas Bibliapi kashan imakunas noqanchispaq jina kanman chayta. Chaymantapas Bibliaq willasqan runakunamantan yachananchis. Pikunachá noqanchis jina tarikurqanku paykunamantan yachananchis.
6. ¿Imakunapin juñunakuykuna yanapawasunman?
6 Juñunakuykunapipas Jehová Diostaqa uyarisunmi. Chay juñunakuykunaman mana faltakusunchu chayqa mayninqa noqanchispaq jinan ima yachachikuytapas yuyaychaytapas uyarisunchis (Prov. 27:17). ¿Imakunamantan mayninpi iskayasunman? Qatiqpi wakinmanta yachasunchis.
“¿JEHOVÁ DIOS NOQAPI PIENSANMANCHU?”
7. ¿Imatan mayninpi piensasunman?
7 Yaqapaschá nishanki: “¿Jehová Dios noqapi piensanmanchu?”, nispa. Chaytaqa yaqapaschá nisunman pisipaq qhawarikusqanchisrayku otaq Dioswan amigontin kayta sasapaq qhawarisqanchisrayku. Davidpas chhaynatapaschá piensarqan. Ichaqa Jehová Dios runakunapi piensasqanta yachaspaqa maytachá kusikurqan, chaypaschá nirqan: “Diosníy Jehová, ¿imataq runari paymanta llakikunaykipaq? ¿Imataq runaq churinri payta qhawarinaykipaq?”, nispa (Sal. 144:3). Kunan yachasun Jehová Dios piensanchus noqanchispi icha manachus chaymanta.
8. 1 Samuel 16:6, 7, 10-12 nisqan jina, ¿imatan Jehová Dios masta runakunapi qhawan?
8 Bibliaq nisqanman jinaqa Jehová Diosqa pisipaq qhawarisqa kaqkunatan sumaqta qhawarin. Juj kutinmi payqa Samuelta Jesepa wasinman kacharqan, chhaynapi juj kaq churinta rey kananpaq ajllamunanpaq. Jeseqa qanchis churinkunatan Samuelpa ñaupanman pusarqan, sullk’a kaqtan ichaqa mana pusarqanchu. b Jehová Diosmi ichaqa sullk’a kaqta ajllakurqan rey kananpaq. Payqa Davidmi karqan (leey 1 Samuel 16:6, 7, 10-12). ¿Imaraykun Jehová Dios Davidta ajllakunman karqan? Diosqa paypa sonqontan qhawarqan, Davidqa Dios sonqon karqan.
9. ¿Imaynapin yachanki Jehová Dios munakusqasuykita? (Qhaway kay parrafopaq fotota).
9 Jehová Diosqa qanpipas piensanmi munakusunkin. Chaymi tiempollanpi necesitasqayki consejokunata qosunki (Sal. 32:8). Chay consejokunataqa qosunki qanta reqsisqasuykiraykun (Sal. 139:1). Sichus yuyaychayninkunata kasukunki chayqa allinmi kanki. Chaypin reparanki Jehová Dios munakusqasuykita (1 Crón. 28:9; Hech. 17:26, 27). Jehová Diosqa rikumushanmi payrayku tukuy ima ruwasqaykita, rikumushanmi pay sonqo kasqaykitapas (Jer. 17:10). Payqa munashanmi payman asuykunaykita (1 Juan 4:19).
“Sichus Diosta maskhanki chayqa tarinkin” (1 Crón. 28:9). (9 qhaway). c
“¿ALLINTACHU RUWARQANI DIOSTA ÑAUPAQMAN CHURASPAY?”
10. Jujkunaq allin kausasqankuta rikuspa, ¿imatan tapukusunman?
10 Yaqapaschá tiempowanqa tapukusunman: “¿Allintachu ruwarqani Diosta ñaupaqman churaspay?”, nispa. Yaqapaschá ñaupaqpiqa allin llank’anaykita saqespa, allin negociota saqesparaq Jehová Diosta servirqanki. Chaymantaqa yaqapaschá unayña pasarun, yaqapaschá reqsisqayki runakunata rikunki qolqeyoqta imaymanayoqta. Qhawarisqaykiman jinaqa mana imamanta llakikuspapaschá kausashanku. Chaykunata rikuspapaschá tapukushanki: “¿Allintachu ruwarqani Jehová Diosta ñaupaqman churaspay, icha jujkunata ruwaspaychu allin kashayman karqan?”, nispa.
11. ¿Imaraykun Salmos 73 capitulota qelqaq llakisqa kasharqan?
11 Chhaynata qanpas piensashanki chayqa, yuyariy Salmos 73 qelqaq runata. Paypa qhawarisqanman jinaqa Diosta mana serviq runakunaqa allintan mana imamanta llakikuspan kausasharqanku, qhapaqtaqmi karqankupas (Sal. 73:3-5, 12). Chaykunata rikuspan yanqapaqpas Diosta servishanman jinata qhawarikurqan, chaymi payqa “sapa p’unchay llakisqalla kaq” (Sal. 73:13, 14). ¿Iman payta yanapanman karqan?
12. Salmos 73:16-18 nisqan jina, ¿iman chay textota qelqaq runata yanaparqan allin kaqta reparananpaq?
12 (Leey Salmos 73:16-18). Chay runaqa Diospa ch’uya wasinmanmi rirqan chaypi piensariq. Chaypi kashaspan repararqan Diosta mana serviq runakuna allintaña kausasharqanku chaypas mana allinpi tukunankuta. Chaymantapas repararqanmi Jehová Diosta serviy aswan allin kasqanta. Chaykunapi piensasqan qhepamanqa thajmi kapurqan, kusisqan Jehová Diostapas servirqan (Sal. 73:23-28).
13. ¿Imakunapi piensaymi yanapawasun kusisqa kananchispaq? (Qhaway kay parrafopaq fotokunata).
13 Qanpas atiwaqmi chay runa jina kusisqa kaytaqa. ¿Imatan chaypaq ruwawaq? Kaypi piensariy: Jehová Diosta servisqaykiraykun askhataña janaq pachapi allin kaqkunata juñushanki. Jehová Diosta mana serviqkunaqa kay pachapi kaqkunallatan juñushanku, chaykunaqa juj ratullapaqmi, pisillamantan chinkapunqa. Chay juñusqankuqa manan paykunataqa imapipas yanapanqachu jamuq tiempopiqa. Jehová Diosta serviqkunan ichaqa mana piensasqanchistaraq chaskisunchis (Sal. 145:16). Chaymantapas Jehová Diosta mana servispaqa ima llakikunapipasraqchá tarikusunman karqan. Pipas Jehová Diosta ñaupaqman churanqa chayqa manan paymanqa imapas faltanqachu.
Jehová Diospa promesankunapi piensay. (13 parrafota qhaway). d
“¿VALESHAYMANRAQCHU JEHOVÁ DIOSPAQ?”
14. ¿Imapin wakin hermanonchiskuna tarikushanku, imatan chhaynapi tarikuspa ninkuman?
14 Wakinninchisqa astawanraqchá Jehová Diospaq ruwayta munashanchis. Ichaqa yaqapaschá kuraqña kapunchis, onqosqa imapaschá kashanchis, imapipaschá tarikushanchis. Chhaynapi tarikuspaqa pisipaqmi mayninpi qhawarikusunman jinaspa nisunman: “¿Valeshaymanraqchu Jehová Diospaq?”, nispa.
15. ¿Imatan allinta yacharqan Salmos 71 capitulota qelqaq?
15 Salmos 71 capitulota qelqaqpas noqanchis jinan tarikurqan chaymi Jehová Diosta nirqan: “Amayá kallpay pisiyapuqtinpas wijch’uwankichu”, nispa (Sal. 71:9, 18). Chhaynaña tarikusharqan chaypas payqa yacharqanmi Jehová Diosqa tukuy sonqowan serviqninkunata yanapasqanta. Yacharqanmi tukuy atisqankuta kallpachakuq serviqninkunata valorasqanta (Sal. 37:23-25).
16. ¿Imaynatan Jehová Dios qhawarin kuraq hermanokunata? (Salmos 92:12-15).
16 Kuraqña kashanki chayqa, imaynatachus Jehová Dios qhawarisunki chhaynata qanpas qhawarikuy. Manaña ñaupaqpi jinachu ruwanki chaypas atiwaqmi jujkuna yanapayta. Jehová Diosmi chayta ruwanaykipaq yanapasunki (leey Salmos 92:12-15). Ama nishutaqa piensaychu mana ruway atisqaykipiqa, aswanpas imachus ruway atisqallaykita ruway. ¿Imakunatan ruwawaq? Jujkunata iñiyninkupi yanapariy. Willariwaqmi imaynatachus Jehová Dios yanaparqasunki payta servinaykipaq chayta. Chaymantapas willariwaqmi ima promesankuna junt’akunantas munashankiña chaytapas. Chaymantapas paykunapaqmi mañakuwaq. Mañakusqaykiqa anchatan hermanokunata yanapanqa (1 Ped. 3:12). Kuraqña, waynaña, sipasña kashanchis chaypas atisunmanmi Jehová Dios serviyta, jujkuna yanapaytapas.
17. ¿Imaraykun mana jujkunawan comparakunanchischu?
17 Manaña ñaupaqpi jinachu Jehová Diosta servishanki chayqa ama llakikuychu Diospaqqa ancha valorniyoqmi kanki. Chaymantapas ama jujkunawanqa comparakuychu. ¿Imarayku? Jehová Diosqa manan piwanpas comparawanchischu (Gál. 6:4). Juj kutinmi María Jesuspa chakinman allin q’apaq jawinata jich’aykurqan. Chay jawinaqa askhatan valerqan (Juan 12:3-5). Juj viuda warmin ichaqa Diospa templonpi iskay pisi valorniyoq qolqechata churaykurqan (Luc. 21:1-4). Jesusqa chay iskay warmikunaq ruwasqantan ancha allinpaq qhawarirqan. Jehová Diospas valoranmi payrayku ima ruwasqaykitapas. Pisillaña kanman chaypas munakuywan ruwasqaykin aswan allinqa.
18. ¿Imatan ruwanayki imamantapas iskayaspa? (Qhaway “ Jehová Diospa palabranta estudiaymi yanapasunki amaña iskayanaykipaq” nisqa willakuyta).
18 Llapapas iskayanchismi mayninqa imallamantapas. Ichaqa yachamusqanchis jina Bibliata estudiaymi yanapawasun amaña iskayanapaq. Chhaynaqa, kallpachakuy imamantachus iskayashanki imapichus piensashanki chaymanta Bibliapi t’aqwirinaykipaq. Chayta ruwanki chayqa manañan iskayankichu, tukuy sonqon Diospipas confianki. Jehová Diosqa piensanmi qanpi, valoranmi payrayku tukuy ima ruwasqaykitapas. Chaymi payqa jamuq tiempopi premioykita qosunki. Ama qonqaychu, Jehová Diosqa munakusunkin. Payta tukuy sonqo servinki chayqa yanapasunkipunin.
111 TAKI Jehová Dioswan kusikusun
a YACHANAPAQ WILLAKUY. Kaypiqa iskayay nispaqa nishanchis manan Jehová Diosmanta ni promesa ruwasqanmanta iskayaymantachu. Aswanpas juj clase iskayaymantan. Wakinqa Diospa mana munakunanpaqmi piensanku. Wakintaq ninku: “¿Allintachu ruwayman karqan Diosta serviyllaman tiempota qospay?”, nispa. Chay clase iskayaymantan kaypiqa rimashanchis.
b Bibliapiqa manan willanchu jayk’a watachanpis David kasharqan Jehová Dios rey kananpaq ajllakushaqtin chaytaqa. Ichaqa yaqachus jina waynachallaraq karqan. (Qhaway 2011 watamanta, 1 setiembre killamanta Qhawaq revistapi 29 paginata, 2 parrafota).
