1. ¿Imakunan kashan Jesuspa qowasqanchis regalokuna?

 JESUSQA may sumaq sonqon karqan, manan pipas pay jinaqa karqanchu. Kay pachapi kashaspaqa imaymana milagrokunata ruwaspan runakunata yanapaq (Luc. 9:​12-17). Chaymantapas payqa mana piqpa qowasqanchis regalotan qowarqanchis, noqanchisraykun vidanta entregarqan (Juan 15:13). Kausarimpuspapas chhaynallapunin payqa karqan. Prometesqanman jinan Jehová Diosmanta espirituta mañakurqan chay espirituq yanapayninwan runakunaman yachachinanchispaq kallpata jap’inanchispaq ima (Juan 14:​16, 17; 16:13). Chaymantapas juñunakuykunapin capacitacionta qowanchis, chhaynapi llapa runakunaman Diosmanta yachachinanchispaq (Mat. 28:​18-20).

2. ¿Pikunatan Jesús qowanchis “regalokunata” jina? (Efesios 4:​7, 8).

² Ichaqa manan chaykunallachu Jesuspa regalonqa. Apóstol Pabloq nisqan jina, Jesusqa altoman wichaspan “runakunata regalokunata jina qomurqan” (leey Efesios 4:​7, 8). Chay runakunan Diospa llaqtanpi yanapakushanku imaymana ruwaykunapi (Efes. 1:​22, 23; 4:​11-13). ¿Pikunan kanku chay regalokuna? Paykunaqa kanku yanapakuq qharikuna, umalliqkuna, watukuq umalliqkuna iman. a Ichaqa paykunapas noqanchis jina juchasapa runakunan kanku, mayninqa imapipas pantankumanmi (Sant. 3:2). Chaywanpas ancha jatun regalon paykunaqa kanku. Paykunawanmi Diosqa yanapachiwanchis.

3. ¿Imaynatan rikuchisunman Jesuspa qowasqanchis umalliqkunamanta agradecido kasqanchista? Juj ejemplota willay.

³ Jesuspa qowasqanchis chay regalokunaqa otaq umalliqkunaqa, Diospa llaqtantan kallpachanku (Efes. 4:12). Noqanchispas atisunmanmi paykunaq imachus ruwasqankupi yanapakuytaqa. ¿Imaynata? Chaypaq piensasun juñunakuna wasita ruwaqkunapi. Paykunaqa manan llapankuchu kaq ruwayta ruwanku.  Wakinqa perqaypi cemento tupachiypi iman yanapakunku. Wakintaq llank’aqkunapaq mijuna wayk’uypi, imaymana rantiypi, juj ruwaykunapi ima yanapakunku. Chhaynallataqmi yanapakuq qharikunapas, umalliqkunapas watukuq umalliqkunapas. Sapankankun jujniray ruwaykunata ruwanku. Chaypiqa noqanchispas yanapaytaqa atisunmanmi. Chaypaqqa qhawarikunanchismi imatapas imayna ruwasqanchista, rimasqanchistapas. Kaypin yachasunchis imakunapis chay runakunaq llank’asqan yanapawanchis, imaynatas paykunawan agradecido kasqanchista rikuchisunman chaykunata. Imaynatas Jesusta gracias nisqanchista rikuchisunman chaytapas.

YANAPAKUQ QHARIKUNA

4. ¿Ima ruwaykunapin yanapakuqku ñaupa tiempopi yanapakuq qharikuna?

⁴ Apostolkunaq tiemponpiqa wakin qhari hermanokunatan churaqku yanapakuq kanankupaq (1 Tim. 3:8). 1 Corintios 12:28 textopi apóstol Pabloq nisqan jina, paykunaqa jujkunatachus jina yanapaq kaqku. Chaymantapas paykunaqa imaymana ruwaykunapichus jina yanapakuq kaqku, chhaynapi umalliqkuna yachachiyman jujkunata kallpachayman ima tiempota qonankupaq. Chay hermanokunaqa yaqapaschá yanapakuqku qelqakuna copiaypi, copianapaq imaymana cosaskuna rantiypi ima.

5. ¿Imakunatan ruwanku kay tiempopi yanapakuq qharikuna?

⁵ ¿Ima ruwaykunapin yanapakunku kay tiempopi yanapakuq qharikuna? (1 Ped. 4:10). Paykunamanta wakinqa contabilidad nisqamantan encargakunku, wakintaq territorio nisqamanta; wakintaq qelqakuna chayamunanpaq solicitudta apachinku, wakintaq chaykunata hermanokunaman chayachinku. Wakinqa audio y video nisqapin yanapakunku, wakintaq acomodadores nisqapi. Wakinqa juñunakuna wasi allichaypi iman yanapakunku. Chaykunaqa ruwakunanpunin, chhaynapi llapa imapas allinta aparikunanpaq (1 Cor. 14:40). Wakin yanapakuq qharikunaqa juñunakuykunapi yachachispa iman yanapakunku. Wakinqa juj grupota umalliqpa yanapaqnin iman kanku. Wakinqa umalliqkunata iman compañanku hermanokunata visitanankupaq.

6. ¿Imaraykun yanapakuq hermanokunata “gracias” ninanchis?

⁶ Chay yanapakuq qharikunaq llapa imapas ruwasqankuqa ancha allinpunin. Yachasun wakin hermanakuna imaninkuchus chayta. Bolivia nacionmanta Beberly b sutiyoq hermanan nin: “Noqaqa maytan gracias nini chay hermanokunata. Paykunaq yanapayninwanmi juñunakuyqa allinta aparikun. Paykunaq yanapasqanmi juñunakuypi takikuna uyarikun, juñunakuypi participaytapas atikun. Paykunaq yanapasqanmi discursokunapas uyarikun, videokunapas rikukun, dibujokunapas fotokunapas rikukun. Paykunan yanapakunku wakin hermanokuna videollamada nisqanta juñunakuyta uyarinankupaqpas. Juñunakuy tukuytapas limpieza ruwaypi, donacionkuna churakusqanta orqoypi iman yanapakunku. Paykunaq yanapasqanmi qelqakunapas mana faltay kashallan. Maytan paykunata gracias nini”, nispa. Colombia nacionmanta Leslie sutiyoq hermanapas yaqa kaqllatan nillantaq. Paypa qosanqa umalliqmi. Chay hermanan nin: “Yanapakuq qharikunaqa kusatan qosaytapas yanapanku. Paykuna mana kaqtinkuqa imaymana ruwaypichá qosayqa aswan ocupasqa kashanman. Chaymi noqaqa paykunata gracias nini”, nispa. Sapankapas may agradecesqachá kashanchis paykunawanqa (1 Tim. 3:13).

7. ¿Imaynatan rikuchisunman yanapakuq qhari hermanokunawan agradecido kasqanchista? (Qhaway kay parrafopaq fotota).

⁷ Bibliapi nisqan jina may agradecesqachá kashanchis chay hermanokunawanqa (Col. 3:15). Ichaqa, ¿imaynatan rikuchisunman agradecido  kasqanchista? Chaypaq yachasunchis Finlandia nacionpi David sutiyoq hermanomanta. Paymi nin: “Noqaqa juj papelchapi otaq mensajepin juj textota apachini. Jinaspa willani imakunapis yanapawasqan allin karqan chayta, ima ruwasqanmantas agradecido kashani chayta”, nispa. Nueva Caledonia nisqapi tiyaq Pascalwan Jaelpiwanpas Jehová Diosmanta mañakuspaqa mañakunkus chay yanapakuq hermanokunapaq. Paykunan ninku: “Chay p’unchaykunaqa gracias niykupunin Jehová Diostaqa chay yanapakuq hermanokunata llaqtanpi churasqanmanta. Mañakuykutaqmi paykunata yanapananpaq”, nispa. Jehová Diosqa uyarinpunin chaytaqa; llapa iñiq t’aqatataqmi bendecinpas (2 Cor. 1:11).

UMALLIQKUNA

8. ¿Imaraykun apóstol Pablo umalliqkunamanta rimaspa ninman karqan “tukuy kallpanwan llank’aqkuna” nispa? (1 Tesalonicenses 5:​12, 13).

⁸ Apostolkunaq tiemponpi umalliqkunaqa tukuy tiemponkuwanmi iñiq t’aqapi llank’aqku (leey 1 Tesalonicenses 5:​12, 13; 1 Tim. 5:17). Paykunan iñiq t’aqakunata pusariqku, chaypin juñunakuykunata apariqku, imaymana decisionkunatan ruwaqku, iñiqkunata iman yuyaychaqku. Ichaqa munakuywanmi chaykunata ruwaqku (1 Tes. 2:​11, 12; 2 Tim. 4:2). Kallpachakuqkun iñiyninkupi qaqa sayanankupaqpas, familiankuta allinta cuidanankupaqpas (1 Tim. 3:​2, 4; Tito 1:​6-9).

9. ¿Ima ruwaykunapin umalliqkuna yanapakushanku?

⁹ Kay tiempopipas umalliqkunaqa imaymana ruwaypin ocupasqa kashanku. Paykunaqa tukuy sonqon Diosmanta willanku, chaypin ejemplo kanku (2 Tim. 4:5). Paykunan yachachiwanchis imayna predicananchispaq yachachinanchispaqpas. Chaymantapas paykunan organizanku maykunapis predicación aparikunqa chaytapas. Chaymantapas paykunaqa ancha munakuq khuyapayakuq juezkunan kanku. Pipas ima jatun juchamanpas urman chayqa, tukuy atisqankutan kallpachakunku chay runata Dioswan allipunachinankupaq. Chaywanpas kallpachakunkun Diospa llaqtanta limpiota jap’inankupaq (1 Cor. 5:​12, 13; Gál. 6:1). Astawanqa umalliqkunaqa ancha munakuq michiqkunan kanku (1 Ped. 5:​1-3). ¿Imaynatan chayta ruwanku? Juñunakuykunapin yachachinku. Sapanka hermanokunata reqsinankupaqmi kallpachakunku, visitanku iman. Wakin umalliqkunaqa construcción nisqapi, juñunakuna wasi allichaypi iman yanapakunku. Wakintaq asambleakuna ruwakunanpaq yanapakunku. Wakinqa hospitalkunapi rimanankupaqmi ajllasqa kanku. Wakintaq onqosqakunata visitaqkuna kanku. Chhayna imaymana ruwaykunapin paykunaqa yanapakushanku. Chaykuna ruwasqankuqa “gracias” ninapaqmi ¿riki?

10. ¿Imakunan razón kashan umalliqkunata munakunanchispaq?

¹⁰ Jehová Diosmi umalliqkunamanta rimaspa willarqan imaynas paykunaqa ovejankunata allinta qhawananku karqan chayta. Ovejakunamantataq nirqan: “Manan imatapas manchakunqakuñachu”, nispa (Jer. 23:4). Chaypaq yachasun Finlandia nacionpi Johanna sutiyoq hermanamanta. Paypa mamitansi sinchita onqorapusqa, paymi nin: “Noqaqa manan faciltachu piwanpas parlariq kani. Ichaqa juj kutinmi juj mana reqsisqay umalliq visitamuwasqa. Paywan rimashaspan sonqoyta kicharirqani. Payqa pacienciallawanmi uyariwarqan. Noqawan kuskan mañakurqan, willawarqantaqmi imaynas Jehová Diosqa munakuwan chayta. Manan yuyanichu imakunatas niwarqan chaytaqa. Ichaqa paywan parlaspaqa thajmi karqani. Jehová Diospunichá kachamurqan yanapawananpaq nispan nirqani”, nispa. Personaykitarí, ¿mayqen umalliqpas imaynatapas yanaparqasunkichu?

11. ¿Imatan ruwasunman umalliqkunawan agradecido kasqanchista rikuchinanchispaq? (Qhaway kay parrafopaq fotota).

¹¹ Umalliqkunaqa imaymana ruwaypitaq Jehová  Diospa llaqtanpi llank’ashanku chayqa munakunanchismi paykunata, chaytan Jehová Diosqa munan (1 Tes. 5:​12, 13). Finlandia nacionpi Henrietta sutiyoq hermanan nin: “Umalliqkunaqa yanapashallankun jujkunataqa. Ichaqa manan chayraykuchu nina: Askha tiempoyoqchá kanku kallpasapachá kanku, manachá ima problemankupas kanchu, nispaqa. Chaymi noqaqa mayninqa paykunata nini: Qanqa turacháy allin umalliqmi kanki, nispa”. Turquía nacionmanta Sera sutiyoq hermanan nillantaq: “Umalliqkunapas gasolinatan necesitanku ñaupaqllaman purinankupaq. Chaymi noqaqa papelchakunapi agradecekuspa qelqani, chaytataq paykunaman entregani. Mayninqa mijujta iman pusani. Mayninqa paykunawan iman predicani”, nispa. Qanpas mayqen umalliqmanpas agradecido kasqaykita rikuchiyta munashanki chayqa, ruway chayta (1 Cor. 16:18).

WATUKUQ UMALLIQKUNA

12. ¿Ima regalotawanmi Jesús qorqan iñiq t’aqakunata kallpachananpaq? (1 Tesalonicenses 2:​7, 8).

¹² Jesusqa watukuq umalliqkunatawanmi qorqan Diospa llaqtanmanqa. Apostolkunaq tiemponpiqa Jerusalenmantapachan chay umalliqkunata kachaqku. Jesuspa yanapasqanmi Pablota Bernabeta juj umalliqkunatawan kacharqanku (Hech. 11:22). Paykunaqa yanapakuq qharikuna jina umalliqkuna jinan iñiq t’aqakunata kallpacharqanku (Hech. 15:​40, 41). Chaymantapas chay watukuq umalliqkunaqa imaymanankuta saqespa wañuy pataman churakuspa iman viajaqku, chhaynapi iñiqkunata kallpachanankupaq yachachinankupaq ima (leey 1 Tesalonicenses 2:​7, 8).

13. ¿Imakunatan ruwanku watukuq umalliqkuna?

¹³ Watukuq umalliqkunaqa viajaspallan kashanku. Wakinqa karutan viajanku chaypi iñiqkunata visitanankupaq. Chaymantapas paykunaqa sapa semananmi askha discursokunata qonku. Iñiqkunatan watukunku, precursorkunawanmi juñukunku, umalliqkunawan iman juñukunku. Paykunan Diosmanta willaypipas umallinku. Chaymantapas paykunaqa asambleakuna aparikunanpaqmi imaymanata organizanku. Paykunan organizanku  precursorkunapaq escuelakunata, juj p’unchay asambleapi precursorkunawan juñukuyta ima. Chaymantapas juj urgente ruwaykunapi iman paykunaqa yanapakunku. Mayninqa sucursalmantan imata ruwanankupaqpas kamachinku.

14. ¿Imaraykun nisunman “watukuq umalliqkunaq imapas ruwasqanqa gracias ninapaqmi” nispa?

¹⁴ ¿Imakunapin watukuq umalliqkuna iñiqkunata yanapanku? Chaymanta rimaspan Turquía nacionpi juj hermano nin: “Watukuq hermano jamuqtinqa tukuy atisqaytan kallpachakuni hermanokunawan tiempota pasarinaypaq. Askha watukuq umalliqkunatan reqsini. Manan mayqentapas rikuqchu kani mana tiempoyoqta jinaqa. Llapankupas listollapunin kaqku qanwan rimanankupaq”, nispa. Chunka parrafopi rimamusqanchis Johanna hermanas juj kuti predicaq lloqsisqa watukuq umalliqwan. Ichaqa manas pitapas tarisqakuchu. Paymi nin: “Manaña pitapas tarirqaykuchu chaypas, manapunin qonqasaqchu chay p’unchaytaqa. Iskaynin ñañaykunan karuman astakapurqanku, noqaqa maytan extrañasharqani paykunata. Chay hermanon ichaqa munayllata willawarqan imaynas kunan tiempopi karu-karunka tiyasqanchisqa juj tiempollapaq chayta. Imaynas jamuq tiempopiqa askha tiemponchis kanqa familianchiskunawan tiempota pasarinanchispaq chayta”, nispa. Rikusqanchis jina, watukuq hermanokunaqa askha hermanokunatan kallpachanku. Munaytan paykunawan apanakunku (Hech. 20:37–21:1).

15. a) 3 Juan 5-8 nisqanman jina, ¿imaynatan rikuchisunman watukuq umalliqkuna valorasqanchista? (Qhaway kay parrafopaq fotota). b) ¿Imaraykun umalliqkunaq esposankutapas sumaqta qhawarinanchis, imaynatan chayta ruwasunman? (Qhawariy “ Esposankutapas qhawariy” nisqa willakuyta).

¹⁵ Apóstol Juanmi Gayo sutiyoq hermanota kallpacharqan iñiq t’aqakunata visitaq hermanokunata sumaqta chaskinanpaq. Nirqanmi: “Ripuqtinkuqa qoykunkiyá imallatapas ñaninkupaq, Diospa sonqonpaq jinayá chaytaqa ruwanki”, nispa (leey 3 Juan 5-8). ¿Imaynatan noqanchispas  chayta ruwasunman? Chay watukuq umalliqkunatan mijunankupaq invitarinanchis, visitamusqanku semanapas tukuy atisqanchistan yanapakunanchis Diosmanta willaypi. Soqta parrafopi rimamusqanchis Leslie hermananchis imatachus ruwan chayta qhawarisun. Paymi nin: “Jehová Diosmantan mañakuni imachus necesitasqankuta paykunaman qonanpaq. Mayninqa qosaywan kuskan cartata qelqayku, chaypin willayku imaynatachus yanapawarqanku chayta”, nispa. Chay watukuq umalliqkunaqa manan rumi jina mana imanakuqchu kanku. Mayninqa paykunapas onqonkun llakikunku iman. Sichus paykunata kallpacharinki imallatapas qoykunki chayqa, Diospas qankunawan paykunata yanapashanman jinan kanqa (Prov. 12:25).

ASTAWANRAQMI NECESITAKUN REGALO JINA HERMANOKUNATAQA

16. ¿Ima tapuykunapin piensananku bautizasqa qhari hermanokuna? (Proverbios 3:27).

¹⁶ Diospa llaqtanqa astawanmi askhayashan. Chaymi astawanraq necesitakun regalo jina hermanokunata. Sichus bautizasqa kashanki chayqa, ¿atiwaqchu qanpas yanapakuyta? (leey Proverbios 3:27). ¿Kallpachakushankichu yanapakuq qhari kanaykipaq? Chaypiña yanapakushanki chayqa, ¿kallpachakushankichu umalliq kanaykipaq? c ¿Kallpachakushankichu Diospa gobiernonmanta willaqkunapaq escuelaman rinaykipaq? Chay escuelaman rinki chayqa, Jesusqa imaymana ruwaykunamanmi churasunki. Mana atinaykipaq jina qhawarikushanki chayqa, willakuy chayta Jehová Diosman. Mañakuytaq ima ruwanaykipaqchá nisunkiku chayta tukuy sonqowan ruwanaykipaq (Luc. 11:13; Hech. 20:28).

17. Jesuspa qosqan regalo jina hermanokunaqa tukuy atisqankutan llank’ashanku, ¿imatan chay rikuchiwanchis?

¹⁷ Jesuspa regalo jina qosqan hermanokunaqa imaymanapin tukuy atisqankuta llank’ashanku. Chaywanmi Jesusqa rikuchin paypuni pusawashasqanchista (Mat. 28:20). Chay reyninchisqa munakuwanchismi, sumaq sonqon; payqa allintan yachan imakunas faltawashanchis chayta. Chayman jinan hermanokunatapas churawanchis yanapawananchispaq. ¡May kusikunapaqmi paypa chay ruwasqanqa ¿riki?! Chhaynaqa tukuy atisqanchista kallpachakusun chay hermanokunawan agradecido kasqanchista rikuchinanchispaq. Jehová Diostapas “gracias” nisun. Paymantan jamun “tukuy allin kaqkunapas tukuy junt’asqa kaqkunapas” (Sant. 1:17).