1. ¿Ima llank’anatan Jehová Dios apóstol Pedroman qorqan manaraq wañupushaqtin?

 APÓSTOL Pedroqa unaymi tukuy sonqowan Jehová Diosta servirqan, Jesustapas lliu maymanchus risqanmanmi compañarqan, askha llaqtakunapin qallarichirqan Diosmanta willaytapas. Chaymantapas payqa umalliq t’aqamanta jujninmi karqan. Wañupunanpaq pisillaña kashaqtinmi Jehová Diosqa juj llank’anatawan payman qorqan, 62-64 watakuna ukhupin qelqachirqan iskay cartakunata: Jujninpa sutinmi “1 Pedro” nisqa, juj kaqpataq “2 Pedro” nisqa. Apóstol Pedroqa wañupunanña karqan chaypas, iñiqkuna chay cartakunawan yanapachikunankutan munasharqan (2 Ped. 1:​12-15).

2. ¿Imaraykun allinpuni karqan apóstol Pedroq qelqasqan cartakuna?

² Apóstol Pedro chay cartata qelqashaqtinqa “imaymana pruebakunaq ñit’isqanmi” iñiqkunaqa kasharqanku (1 Ped. 1:6). Wakin runakunan imaymana pantasqa yachachikuykunata iñiqkuna ukhupi ch’eqerichisharqanku. Chaymantapas mana allin millay ruwaykunamanmi iñiqkunata apayta munasharqanku (2 Ped. 2:​1, 2, 14). Jerusalenpi tiyaq iñiqkunapas pisillamantan “tukuy imaymanaq tukukuyninta” rikunanku karqan; Jerusalén llaqta templo iman Roma ejercitokunaq thunisqan kapunan karqan (1 Ped. 4:7). Chhaynaqa allin tiempopin apóstol Pedroqa chay cartakunata qelqarqan, chaykunaq kallpachasqanmi iñiqkunaqa imaymana pruebakunata aguantananku karqan; imaymana llakipaqmi preparasqa kashananku karqan. b

3. ¿Imaraykun allinta t’aqwirinanchis Pedroq qelqasqan cartakunata?

 ³ Apóstol Pedroqa ñaupa tiempo iñiqkunapaqmi chay cartakunata qelqarqan. Chaywanpas Jehová Diosqa Bibliapin chay cartakunata churachirqan, chhaynapi noqanchispas chaymanta imaymanata yachananchispaq (Rom. 15:4). Kay tiempopipas ñaupa tiempopi jinan runakunaqa sinchi millay kausayta kay pachaman junt’achishanku. Mayninqa noqanchispas imaymana llakikunapin tarikunchis, chaykunaq kasqanwanmi mayninqa mana facilchu kanman Jehová Diospa munayninta ruwayqa. Chaymantapas pisi tiempollamantan sinchi manchay ñak’ariypi tarikusunchis, chayqa Jerusalenpi imachus pasasqanmanta aswanraqmi kanqa. Chhaynaqa apóstol Pedroq qelqasqan cartakunaqa yanapawasunpunin Jehová Diospa p’unchayninta makilla suyakunanchispaq, runakunata ama manchakunanchispaq, iñiqmasinchiskunata tukuy sonqo munakunanchispaq ima. Chay cartakunaqa yanapanqan umalliqkunatapas Jehová Diospa ovejachankunata allinta michinankupaq.

4. ¿Iman iñiyninchispi pisipachiwasunman? (2 Pedro 3:​3, 4).

⁴ Runakunaqa yaqa llapapas manan creenkuchu jamuq tiempomanta Bibliaq imachus willasqantaqa. Chayraykun wakinqa tukukuy tiempomanta willaqtinchis asipayawanchis burlakuwanchis ima. Wakinqa “manan jayk’aqpas chay p’unchayqa chayamunqachu” nispa imapaschá niwasunman (leey 2 Pedro 3:​3, 4). Chhaynapi tarikuspaqa, llank’anapi compañeropas mayqen familiapas chhaynata niwaqtinchisqa, iñiypi imapaschá pisipapusunman. ¿Iman yanapawasunman chhaynapi tarikuqtinchis? Chaypaq apóstol Pedroq imachus nisqanta qhawarisun.

5. ¿Iman yanapawasun tukukuy p’unchayta pacienciallawan suyakunanchispaq? (2 Pedro 3:​8, 9).

⁵ Wakinqa yaqapaschá ninman: “Mayraqchá Diosqa kay millay kausaytaqa tukuchinqa”, nispa. Chayta entiendenapaq apóstol Pedroq imachus nisqanta yuyarisun. Paypa nisqanman jinaqa Jehová Diosqa manan noqanchis jinachu p’unchaytapas tiempotapas qhawarin (leey 2 Pedro 3:​8, 9). Bibliapi nisqanman jinaqa, Jehová Diospaqqa waranqa wataqa juj p’unchay jinallan. Chaymantapas payqa pacienciakuq Diosmi, manan munanchu pipas wañunanta. Ichaqa paypa p’unchayninqa jamunqapunin, kay millay kausayqa chinkanqapunin. ¿Imatan noqanchis chaykama ruwashananchis? Tukuy atisqanchistan kallpachakunanchis llapa runakunaman willamunanchispaq.

6. ¿Imatan ruwasunman Diospa p’unchayninta makilla suyananchispaq? (2 Pedro 3:​11, 12).

⁶ Chaymantapas Jehová Diospa p’unchaynintaqa “makillan suyashananchis” (leey 2 Pedro 3:​11, 12). ¿Imaynatan chayta ruwasunman? Sapa p’unchaymi piensananchis imaynas Diospa gobiernonpi kausayninchis kanqa chaypi. Kaykunapi piensariy: Chaypiqa senq’asqanchis wayrapas mayukunapas limpion kanqa; mijuyninchiskunapas ch’uyan kanqa, sumaqmi kanqa; chaymantapas wañupuqninchiskunatan chaskisunchis, ñaupa tiempo runakunamanmi Bibliamanta yachachisunchis. Chaykunapichus allinta yuyaymanasun chayqa, mana pisipaspan suyasun Diospa p’unchayninta. Noqanchisqa allintan yachanchis imakunachus qhepaman pasanqa chayta. Chhaynataq chayqa, manapunin falso yachachikuykunawanqa engañachikunanchischu (2 Ped. 3:17).

7. ¿Imaraykun nisunman “runata manchakuyqa manan allinchu kanman” nispa?

⁷ Yachasqanchis jina, Jehová Diospa p’unchayninqa cercapiñan kashan. Chhaynataq chayqa, llapa runakunamanmi willananchis paypa gobiernonmanta allin willakuykunata. Ichaqa yaqapaschá mayninqa mana faciltachu rimasunman piwanpas. ¿Imarayku? Runata manchakusqanchisrayku. Chaymi pasarqan apóstol Pedrotapas;  Jesusta juzgashaqtinkun payqa askha kutita payta negarqan (Mat. 26:​69-75). Ichaqa tiempowanqa manañan runataqa manchakurqanñachu. Chaymi nirqanpas: “Aman manchakunkichischu imatachus runakuna manchakunku chaytaqa”, nispa (1 Ped. 3:14). Chaypi nisqanmi sut’ita rikuchin imaynas pisi-pisimanta manaña runataqa manchakusunmanchu chayta.

8. ¿Iman yanapawasun ama runata manchakunanchispaq? (1 Pedro 3:15).

⁸ ¿Iman yanapawasunman runata ama manchakunanchispaq? Apóstol Pedroq nisqan jina, sonqonchispin ninanchis: “Criston Señorqa, ch’uyan payqa”, nispa (leey 1 Pedro 3:15). ¿Imaynatan chayta ruwasunman? Sonqonchispin piensananchis imaynas Jesusqa Señorninchis reyninchis chaypi. Chayrayku, sichus piwanpas rimayta manchakushanki chayqa, piensay reyninchis Señor Jesuspi. Yaqapaschá chay ratu piensarispayki payta qhawariwaq janaq pachapi gobiernashaqta, waranqa-waranqa angelkuna ukhupi kashaqta. Yachasqanchis jina, payqa “tukuy atiytan [chaskirqan] janaq pachapipas kay pachapipas”, chaymantapas payqa “sapa p’unchaymi qanwan kashanqa kay tiempoq tukukapunankama” (Mat. 28:​18-20). Apóstol Pedroq nisqan jina, noqanchisqa liston kashananchis maypipas iñiyninchismanta rimananchispaq. Chayrayku, ¿munawaqchu llank’anapipas, escuelapipas, maypipas Diosmanta willayta? Chhaynaqa Diospa yanapayninta mañakuy valorwan rimanaykipaq, paypi confiay, payqa yanapasunkipunin ama runata manchakunaykipaq (Hech. 4:29).

9. ¿Imaynatan Pedro juj kuti mana judío iñiqkunata qhawarirqan? (Qhaway kay parrafopaq dibujota).

⁹ Apóstol Pedroqa allintan yacharqan imas munakuy chayta. Payqa uyarirqanmi Jesús munakuymanta rimasqantapas. Jesusmi nirqan: “Juj mosoq kamachikuytan qoykichis: Jujkuna-jujkunawanmi munanakunkichis. Imaynan noqapas munakuykichis, chhaynallatataqmi qankunapas jujkuna-jujkunawan munanakunkichis”, nispa (Juan 13:34). Chaywanpas Pedroqa juj kutinmi mana judío iñiqmasinkunamanta t’aqakurqan. Chayta rikuspan apóstol Pabloqa Pedrota reparachirqan iskay uya kashasqanta (Gál. 2:​11-14). Pedroqa sumaqtan chaskikurqan Pabloq yuyaychasqanta. Iskaynin carta qelqasqanpin Pedroqa sut’ita rikuchirqan jujkunataqa mana simillawanchu munakunata, aswanpas rikuchinan iñiqmasinchis munakusqanchistaqa.

10. ¿Iman yanapawasunman iñiqmasikunata “ch’uya sonqowan” munakunanchispaq? (1 Pedro 1:22).

¹⁰ Apóstol Pedron nillarqantaq imaynas “wayqe-panantin jina ch’uya sonqowan kausananchis” chayta (leey 1 Pedro 1:22). Chhayna kausayqa manan kikillanmantachu paqarin, aswanpas cheqaq yachachikuyta kasukusqanchisraykun chhaynataqa kausanchis. Chay cheqaq yachachikuyman jinaqa Diospaqqa “lliupas igual-llan” kanchis (Hech. 10:​34, 35). Sichus wakin hermanokunallaman rikuchisunman munakuyninchista chayqa, manan Jesustaqa kasukushasunmanchu. Arí, yaqapaschá wakin hermanonchiskunawanqa allin amigontin kanchis, Jesuspas wakin discipulonkunawanqa allin amigontinmi karqan (Juan 13:23; 20:2). Ichaqa apóstol Pedroq nisqan jina, llapa iñiqmasikunatan munayta munakunanchis, familianchista jinan sumaqta rikunanchis (1 Ped. 2:17).

11. ¿Iman “tukuy sonqowan munakuy”?

¹¹ Apóstol Pedroqa nillarqantaqmi: “Tukuy sonqowanpuni qankunaqa munanakuychis”, nispa. ¿Imaninantaq chayri? Mayninqa yaqapaschá mana faciltachu wakintaqa munakusun, ichaqa kicharinanchismi sonqonchista, jinaspa tukuy sonqo paykunatapas munakunanchis. Chaypaq kaypi piensasun: ¿Iman pasawanchis mayqen hermanopas ofiendewaqtinchisqa? Mayninqa kaqtan imatapas ruwayta munanchis ¿riki? Manataqmi munakuyqa rijurinchu. Ichaqa chhayna kayqa manan Jehová Diosmanqa gustanchu; chaytaqa allintan Jesusqa Pedromanpas yachachirqan (Juan 18:​10, 11). Chaymi Pedroqa tiempowanqa qelqarqan: “Amapuni mana allinmantaqa mana allinllawantaq kutichiychischu, amallataq k’amisuqniykichistapas k’amiychischu. Aswanpas bendicionta paykunamanqa qoychis”, nispa (1 Ped. 3:9). Tukuy sonqo munakuq kanki chayqa, llapatan sumaqta qhawarinki, k’irisuqniyki iñiqmasitapas munakunkin.

12. a) Iñiqmasikunata tukuy sonqo munakusun chayqa, ¿imatawanmi ruwasun? b) ¿Imata ruwanaykipaqmi yanapasunki Kallpachakusun iñiqmasinchiskunawan juj sonqolla kanapaq nisqa video?

¹² Apóstol Pedroqa ñaupaq kaq carta apachisqanpiqa askha kutitan “tukuy sonqowan munanakuymanta” rimarqan. Chhayna munakuyqa “askha juchakunatan pampachan” (1 Ped. 4:8). Chayta qelqashaspaqa yaqapaschá Pedroqa yuyarirqan perdonaymanta Jesuspa imachus nisqanta. Chay kutipin Pedroqa Jesusta nirqan qanchis kutikama pitapas perdonananpaq. Payqa yaqapaschá sonqonpiqa nirqan: “Qanchis kutikama perdonayqa allinpunimá”, nispa. Jesusmi ichaqa payta nirqan: “Manan qanchis kutikamallachu, aswanpas qanchis chunka qanchisniyoq kutikaman”, nispa (Mat. 18:​21, 22). ¿Imaninantaq chayri? Pedroqa mana yupaytan perdonanan karqan. Jesuspa chay nisqantaqa llapanchismi kasukunanchis. ¿Sasachu qanpaq chayta ruway? Chhayna kaqtinqa ama llakikuychu, kallpachakushallay. Juchasapa kasqanchisraykun mayninqa mana facilchu kanqa pitapas perdonay. Chaywanpas tukuy atisqanchistan kallpachakunanchis iñiqmasinchiskunawan  perdonanakunanchispaq, paykunawan sumaqta kausananchispaq. c

13. ¿Imaraykun umalliqkunapaq sasa kanman iñiqmasinkuta michiy?

¹³ Kausarimpusqan qhepallamanmi Jesusqa apóstol Pedrota nirqan: “Ovejachaykunata michipuway”, nispa (Juan 21:16). Pedroqa manachá jayk’aqpas qonqarqanchu Jesuspa chay nisqantaqa. Umalliq kanki chayqa, allintachá yachanki Jesuspa chay nisqanqa qanpaq ima kasqanta. Ichaqa imaymanataq ruwana kashan chayqa, manapaschá faciltachu tiempo aypawasun Jesuspa nisqanta kasukunapaq. Umalliqkunaqa familiankutan uywananku, Diosmantapas yachachinankun. Chaymantapas Diosmanta willaypin ejemplo kananku, tiempotan orqonanku juñunakuypi yachachinankupaqpas asambleakunapi yachachinankupaqpas. Wakin umalliqkunaqa hospitalkunapi rimanankupaqmi ajllasqa kanku, wakintaq juñunakuna wasikuna jatarichiypi llank’anankupaq churasqa kanku. Chhaynaqa umalliqkunaqa imaymanapin ocupasqa kashanku.

14. ¿Imaraykun umalliqkuna allinta michinanku Diospa ovejankunata, iman paykunata yanapanman? (1 Pedro 5:​1-4).

¹⁴ Tiempowanmi apóstol Pedropas juj umalliqkunata nirqan: “Diospa ovejankunata allinta michiychis”, nispa (leey 1 Pedro 5:​1-4). Umalliq kashanki chayqa, maytachá munakunki iñiqmasikunataqa, paykuna michiytachá munashankipas. Ichaqa mayninqa tiempoq mana kasqanwanpaschá mana atiqpaq jina qhawarikushanki. Chhaynapi tarikushanki chayqa, ¿imatan ruwawaq? Jehová Diosman chayta llapanta willakuy. Apóstol Pedron nillarqantaq: “Pipas jujkunata serviqqa Diospa qosqan kallpawan chayta ruwachun”, nispa (1 Ped. 4:11). Wakin hermanokunaqqa mana allichay atina jinapaschá ima sasachakuyninpas kashan, manapaschá kay kausaypiqa chay sasachakuyqa allichayta atikunmanchu. Ichaqa kaytan allinta yachanayki: Jesucriston “uma kaq michiqqa”, paymi chay hermanotaqa yanapanqa qanmanta mastaraq. Jehová Diosqa mastaqa munashan hermanokuna munakunaykitan, paykunapaq ejemplo kanaykitan.

15. ¿Imatan ruwan William sutiyoq umalliq iñiqmasikunata michinanpaq? (Qhaway kay parrafopaq fotota).

¹⁵ William sutiyoq experienciayoq umalliqmanta rimasun, paypaqqa allinpunin jujkunata  munayta michiyqa. Coronavirus onqoy qallarishaqtinsi payqa iñiq t’aqanpi juj umalliqkunapiwan rimanakusqaku sapa semana iñiqmasikunata wajanankupaq. ¿Imaraykun chayta ruwankuman karqan? Paymi nin: “Askha hermanokunan sapallanku wasinkupi kasharqanku, manan pipas compañaqninku karqanchu, piensaynillankun paykunawan kasharqan. Chhaynapi tarikuqtiykiqa faciltan mana allin piensaykuna, llaki piensaykuna umaykiman jamun”, nispa. Mayqen hermanopas ima llakipipas tarikuqtinqa tukuy yuyaywansi hermano Williamqa uyarin, chhaynapi imapunichus pasashan chayta entiendenanpaq. Chaymantapas payqa chay hermanopaq jinas yanapaykunata maskhan, mayninqa jw.org paginapi videokunata imas apachin. Chay hermanon nillantaq: “Kay tiempokunapiqa astawanraqmi kallpata churana iñiqmasikunata yanapanapaq. Runamasikunaman Diosmanta willanapaqpas anchatan kallpachakunchis; chhaynatan kallpachakunanchis Jehová Diospa ovejankunata michinapaqpas, llapankutan yanapananchis Diospa ñannillanpi purinankupaq”, nispa.

16. ¿Imakunata ruwaspan Pedroq nisqanta kasukusqanchista rikuchisunman?

¹⁶ Kaypiqa wakillantan yacharqanchis apóstol Pedroq qelqasqan cartakunamantaqa, ichaqa yaqapaschá reparakurqanki imakunapis allinyawaq chayta. Kaykunapi piensay: ¿Munawaqchu mosoq kausaypi astawan yuyaymanayta? ¿Munawaqchu llank’anapipas, escuelapipas, maypipas juj chhikantawan Diosmanta willariyta? ¿Munawaqchu iñiqmasikunatapas astawan munakuyta, munakusqaykitapas rikuchiyta? Umalliq kanki chayqa, ¿munawaqchu Diospa ovejankunata allinta michiyta, tukuy sonqowan michiyta? Mayqenpipas allinyanaykiraq kashan chayqa, ama llakikuychu. Amataq qonqaychu “may sumaq sonqochus Señorqa kasqanta”, paymi yanapasunki (1 Ped. 2:3). Chaymantapas Pedroqa nirqanmi: “Diosqa pay kikinmi entrenayta tukusunkichis. Paymi qaqata sayachisunkichis, paymi kallpasapaman tukuchisunkichis, payllataqmi allintapas tajyachisunkichis”, nispa (1 Ped. 5:10).

17. Pedro jina kallpachakusun, Jehová Dioswanpas entrenachikusun chayqa, ¿imatan chaskisun?

¹⁷ Juj kutinmi Pedroqa Jesusta nirqan: “Ayqeriy noqamanta, juchasapa runan kani”, nispa (Luc. 5:8). Ichaqa Jehová Diospa yanapasqanwan Jesuspa yanapasqanwan iman Pedroqa Diospaq junt’aq sonqo karqan; chhaynapitaq “salvawaqninchis Señor Jesucristoq wiñay-wiñaypaq gobiernonman jaykurqan” (2 Ped. 1:11). May jatunmi chay chaskisqan premioqa ¿riki? Sichus qanpas Pedro jina kallpachakunki chayqa, Jehová Dioswantaq entrenachikunki chayqa, wiñay kausaytan chaskinki. Arí, “iñiyninchisrayku salvasqa kananchistan” chaskisun (1 Ped. 1:9).