Manan saqerparirqankuchu, mañana chay 70 discipulonkuna Jesuswan kuskachu chay ratu kasharqanku chaypas paykunaqa manan saqerparirqankuchu nitaqmi Jesuspas paykunataqa saqerparirqanchu. Aswanpas Jesusqa apostolkunallawanmi chay kutipiqa kayta munasharqan.

Chay 12 discipulonkunatapas, 70 discipulonkunatapas Jesusqa munakurqanmi. Llapa discipulonkunamantan Jesusqa 12 qharikunata ajllarqan apostolninkuna kanankupaq (Luc. 6:​12-16). Galilea llaqtapi kashaspan payqa chay “chunka iskayniyoq apostolkunata juñurqan” jinaspa “kacharqan Diospa gobiernonmanta willamunankupaq, onqosqakunata qhaliyachimunankupaqwan” (Luc. 9:​1-6). Chay qhepamantaq Judeaq uray ladonpi kashaspa, “discipulonkuna ukhumanta qanchis chunkatawan ajllaspa iskay-iskaymanta ñaupachirqan” (Luc. 9:51; 10:1). Chhaynaqa may llaqtakunapichus Diosmanta willakuq chaykunapiqa karqanmi Jesuspa discipulonkunaqa.

Jesuspa qatikuqnin judiokunaqa sapa watanmi Pascua fiestataqa familiankuwan kuska ruwaqku (Éx. 12:​6-11, 17-20). Manaraq wañuchishaqtinkun Jesusqa apostolninkunapiwan Jerusalén llaqtaman viajarqan. Ichaqa manan Judeamanta, Galileamanta, Pereamanta llapa discipulonkunatachu nirqan paywan kuska Pascua fiestata ruwanankupaqqa. Chay kutipiqa Jesusqa yaqachus jina apostolninkunallawan kayta munashanman karqan. Chaychá paykunata nirqan: “Maytapunin munasharqani manaraq ñak’arishaspay kay Pascua Fiesta mijunata qankunawan kuska mijuyta”, nispa (Luc. 22:15).

¿Imaraykun paykunallawan kayta munashanman karqan? Pisillamantan “kay pachamanta juchata chinkachiq” Diospa corderon jina wañunan karqan (Juan 1:29). Jesusqa Jerusalenpin wañunan karqan, chay llaqtapin runakunaqa unayña Jehová Diosman sacrificiokunata jaywasharqanku. Jesuspa wañusqanqa Israel runakuna Egipto llaqtapi mikhusqanku corderomanta aswan allinmi karqan (1 Cor. 5:​7, 8). Jesuspa sacrificio ruwasqanraykun 12 apostolkunaqa cimentación jina karqanku chay tiempopi iñiq t’aqapaq (Efes. 2:​20-22). Bibliaq nisqanman jinaqa, janaq pachapi kaq Jerusalenpipas “cimentacionninpin kasqa chunka iskayniyoq cimentación rumikuna”, chaykunapin “qelqasqa kasqa corderoq chunka iskayniyoq apostolninkunaq sutin” (Apo. 21:​10-14). ¿Imatan chaykunamanta yachasunman? 12 apostolkunaqa yanapakunankun karqan Jehová Diospa munaynin junt’akunanpaq. Chaychá Jesusqa paykunallawan chay kutipiqa Pascua fiestata ruwayta munasharqan, chay qhepamanqa wañusqanta yuyarinankupaqmi juj cenata ruwarqan.

70 discipulonkunaqa juj discipulonkunapas manan chay kutipiqa Jesuswanchu kasharqanku. Chaywanpas Dios sonqo discipulonkunaqa llapankun bendicionta chaskinanku karqan. Chay kutipin Jesusqa apostolninkunawan rimanakurqan juj gobiernopi kamachikunankupaq, chay bendiciontaqa qhepa tiempoman ajllasqa iñiqkunapas chaskinankun karqan (Luc. 22:​29, 30).