1. ¿Imakunata ruwaspan rikuchisunman Dioswan llank’asqanchista?

JEHOVÁ DIOSQA paywan llank’ananchistan munan, chaypaqmi kamawaranchis. Diosmantaña runakuna t’aqakuranku chaypas, atisunmanmi sapa p’unchay paywan llank’ayta. Chaychá apóstol Pablopas niran: “Diospa llank’aqmasinkunan kayku”, nispa (1 Cor. 3:5-9). Noqanchispas predicaspaqa jujkunaman yachachispapas Dioswanmi llank’ashanchis. ¡¿Ima ruwaymi kanman tukuy imata kamaq Dioswan llank’ay jina?! Manan imapas ¿riki? Ichaqa manan predicaspallachu ni jujkunaman yachachispallachu Dioswanqa llank’ashanchis. Familiata, hermanokunata, jujkunata sumaqta qhawarispapas, iñiq t’aqapi llank’aysikuspapas, Diospaq tukuy tiempo llank’aspapas Dioswanmi llank’ashanchis. Chaykunamantan kaypi astawan yachasun (Col. 3:23).

2. ¿Imaraykun mana jujkunawan comparakuspachu Diospaq llank’ananchis?

² Kay tiempopiqa sapankan imaymanapi tarikushanchis. Wakinqa yaqapaschá kuraqña kashanchis, wakinqa onqosqa imapaschá kashanchis. Chayrayku, kayta estudiaspaqa ama  jujkunawan comparakuspachu estudiasun, aswanpas sapankanchispi piensaspa estudiasun. Apóstol Pablon niran: “Sapanka qhawarikuchun imaynas kashan imapas ruwasqankuna chayta, chhaynapi ama jujwan igualakuspachu kusikunanpaq, aswanpas paypa imachus ruwasqanwan kusikunanpaq”, nispa (Gál. 6:4).

3. ¿Imaraykun nisunman “familiankuta cuidaqkunaqa Dioswanmi llank’ashanku”, nispa?

³ Diosqa familianchista allinta uywananchistan munan. Chaypaqqa yaqapaschá llank’apakuq lloqsinanchis kanqa. Mamakunapas yaqapaschá wawankuta cuidaspa wasipi qhepakunanku kanqa. Wakinqa yaqapaschá kuraq tayta-mamanchista cuidananchis kanqa. Chhaynapi tarikushasunman chayqa, manapaschá Diospaq astawan tiempota qoyta atisunmanchu munashasunmanña chaypas. Ichaqa Bibliaq nisqan jina “pipas cuidanan kaqkunaman mana qonchu imachus necesitasqankuta, astawanqa wasinpi kaqkunaman mana qonchu chayqa, iñiytan negashan, mana iñiqmantapas aswanraqmi kapun” (1 Tim. 5:8). Chhaynataq chayqa, familianchista cuidayqa Diospa munayninman jinan kashan (1 Cor. 10:31).

4. ¿Imaynatan tayta-mamakuna rikuchinkuman Diospa munaynin ruwayta ñaupaqman churasqankuta? ¿Iman kanqa chayta ruwaqtinku?

⁴ Tayta-mamakunaqa Dios serviytan wawankuq yuyayninman churananku. Chhaynapin rikuchinqaku Dioswan llank’asqankuta. Chaytan wakin tayta-mamakunaqa ruwaranku. Chaymi wawankuqa tukuy tiemponkuwan Diosta servishanku. Wakinqa karu llaqtakunapin misionero jina servishanku, wakintaq precursor jina servishanku, jujkunataq Betelpi llank’ashanku. Chay tayta-mamakunaqa yaqapaschá wawankuwan tiempota pasariyta munanku, ichaqa wawankutan kallpachanku maypichus Diosta servishanku chayllapi kanankupaq. Wawanku tukuy tiemponkuwan Diosta servisqanwanmi paykunaqa kusisqa kanku (3 Juan 4). Chay tayta-mamakunaqa Ana jinan kanku. Paymi wawan Samuelta Jehová Diosman entregapuran. Maytachá chay tayta-mamakunaqa kusikunku chhaynata Dioswan llank’aspanku (1 Sam. 1:28).

5. ¿Imaynatan congregacionpi hermanokunata yanapasunman? (21 paginapi fotokunata qhaway.)

⁵ ¿Manapas chay ruwananchiskuna kashanmanraqchu chayri? Chhayna kaqtinqa yaqapaschá congregacionpi kuraq hermanokunata yanaparisunman. Wakin hermanakunaqa yaqapaschá kuraq tayta-mamankuta cuidashanku, paykunatapas yanaparinanchismi. Chhaynapin tiemponku kanqa ima ruwanankutapas ruwanankupaq. Wakinqa manapaschá atinkuchu juñunakuykunaman jamuyta, wakinqa manapaschá rantikuq riytapas atishankuchu, wakinqa hospitalpi imapaschá kashanku. Paykunata yanaparisun o visitarisun chayqa, Jehová Dioswan kuskapas mañakusqankuman kutichishasunman jinan kanqa (leey 1 Corintios 10:24).

6. ¿Iman jujkunata sumaqta chaskiy?

⁶ Dioswan llank’aqkunaqa sumaqtan jujkunata  qhawarinku. Bibliapin nishan: “Lliutapas sumaqtapuni chaskiychis”, nispa. Griego rimaypiqa “mana reqsisqata sumaqta chaskiy” ninantan nishan (Heb. 13:2). Bibliapiqa askhan sumaq sonqo runakunamanta ejemplokuna kashan (Gén. 18:1-5). Paykuna jinan noqanchispas kallpachakunanchis jujkunata sumaqta chaskinanchispaq. Iñiqmasiña manaña iñiqmasichu kanman chaypas, lliupaqmi “imachus allin kaqta” ruwapunanchis (Gál. 6:10).

7. ¿Imaraykun sumaqta chaskinanchis Diospaq tukuy tiempo llank’aq hermanokunata?

⁷ Visitamuwaqninchis hermanokunata sumaqta chaskispaqa Dioswan llank’asqanchistan rikuchisun (leey 3 Juan 5, 8). Paykunawanpas sumaqtan kallpachanakusun (Rom. 1:11, 12). Chaymi pasasqa Olaf sutiyoq hermanonchiswanpas. Pay waynallaraq kashaqtinsi congregacionninman juj soltero watukuq umalli chayamusqa. Manas pipas alojayta atisqachu, chaysi payqa tayta-mamanta tapusqa atinmanchus wasinpi alojayta icha manachus chayta. Tayta-maman manaña Testigochu karan chaypas munasqas alojayta, ichaqa Olafpa puñunanpis chay hermano puñunan kasqa. May munaysi paypaqqa chay semana kasqa. Paymi nin: “Noqaykuqa sapa p’unchaymi tutallamanta jatariq kayku. Mateta tomashanaykukaman chay hermanoqa imaymanamanta rimapayawaq. Allin kallpachasqapunin karani. Chaymantapachan tukuy tiempoywan Dios serviytapas munarani”, nispa. Olaf hermanoqa 40 watañan askha nacionkunapi misionero jina kashan.

8. ¿Imaraykun manaña agradecekunkuchu chaypas jujkunaman sumaq tratota qonanchis? Juj experienciata willay.

⁸ Mana reqsisqanchiskunamanpas sumaq tratotan qonanchis, manaña agradecekunkumanchu chaypas. Chaypaq yachasun juj experienciata. Españapis juj hermananchis Ecuadormanta Yésica sutiyoq señoraman estudiota qoshasqa. Juj kutinsi chay señoraqa waqayta qallarisqa. Chaysi hermanaqa tapusqa “¿imanarunmi?” nispa. Chay señoraqa, llaqtanpi kashaspaqa sinchi wajchas kasqa. Juj kutinsi mana imanpas kasqanrayku unuta tomarachispalla wawanta puñuchishasqa. Chaypis payqa Diosmanta mañakuyta qallarisqa. Chayllamansi Testigokuna punkunta takaykusqaku. Jinas payqa chay hermanakunata imaymanata k’amirparisqa, qosqanku revistatapas “¡kaytachu wawayman mijuchisaq!” nispas lliuta llik’irparisqa. Chay hermanakunaqa tranquilizachiytas munasqaku ichaqa manas atisqakuchu. Manaraq unaychu pasarushaqtinsi chay hermanakunaqa wasi punkuman juj canasta mijunata saqeyusqaku. Chayta yuyarispas chay señoraqa waqashasqa. Ichaqa, “Diostaqa manan kacharikusaqchu” nispas nisqa. Rikusqanchis  jina, chay hermanakunaq sumaq sonqo kasqankuwanmi chay señoraqa Diosmanta yachasharan (Ecl. 11:1, 6).

9, 10. a) ¿Imakunapin ñaupa tiempo israelitakuna yanapakuqku? b) ¿Ima ruwanakunan congregacionpi kan?

⁹ Israelitakunaq tiemponpiqa necesitallaqkupunin llank’aqkunata (Éx. 36:2; 1 Crón. 29:5; Neh. 11:2). Chhaynallataqmi kunan tiempopas kashan. Chaymi Diosman qonanchis tiemponchista, kallpanchista, kaqninchiskunata ima. Chayta ruwasun chayqa, kusisqan kasun; imaymana bendicionkunatan chaskisunpas.

¹⁰ Bibliaq willasqan jina qharikunapaqqa imaymanan ruwana kashan, paykunaqa atinkumanmi yanapakuq kamachi kayta, umalliq kayta ima (1 Tim. 3:1, 8, 9; 1 Ped. 5:2, 3). Chaykunaman chayayta munaq hermanokunan ichaqa yachananku jujkuna yanapayta kallpachayta ima (Hech. 6:1-4). ¿Jayk’aqllapas umalliqkuna nirasunkichu “literatura” nisqapi, “acomodadores” nisqapi, juñunakuna wasi allichaypipas yanapakunaykipaq? Chaykunapi yanapakunki chayqa kusisqan kanki. Chaykunapi yanapakuspan jujkunata servinki.

11. ¿Imaynatan juj hermanata yanaparanku salonkuna ruwaypi reqsinakusqan hermanakuna?

¹¹ Diospa llaqtanpi llank’aqkunaqa askha runakunawanmi amigota ruwanku. Margie sutiyoq hermanamanta yachasun. Payqa 18 watatan salonkuna ruwaypi yanapakuran. Chay watakunas payqa askha sipas hermanakunata capacitasqa salonkuna ruwaypi. Chay ratokunas payqa chay hermanakunawan allinta kallpachanakuq kasqa (Rom. 1:12). Llakipi tarikuqtinqa  chay amigankunas yanapasqaku kallpachasqaku ima. Paykuna jinan noqanchispas Diospa llaqtanpi construcción aparikuqtin yanapakunanchis, ¿jayk’aqllapas chayta ruwarankichu?

12. ¿Imaynatan yanapakusunman ima desgraciapas kaqtin?

¹² Desgraciakuna pasaqtinpas kusan kallanmantaq hermanonchiskuna munakusqanchista rikuchinanchispaq. Yaqapaschá tiemponchista qolqenchista ima qosunman (Juan 13:34, 35; Hech. 11:27-30). Yanapakusunmanmi hermanokunaq wasinta allichaypipas limpiaypipas. Polonia nacionpin juj hermananchispa wasinman lliuta unu junt’arapusqa. Ichaqa chay qayllapi tiyaq hermanokunan payta yanapaq jamusqaku. Paymi nin: “Manan rimaymanchu imakunachus chinkachisqaymantaqa, aswanpas rimasaq hermanoykunamanta. Diospa llaqtanpi kayqa manan imawanpas comparakunmanchu. May kusikunapaqpunin chay llaqtapi kayqa”, nispa. Yaqa chhaynatan nillankutaq juj yanapasqa hermanokunapas. Desgraciakunapi tarikuq hermanokunata yanapaq hermanokunapas kusisqan tarikunku (leey Hechos 20:35; 2 Corintios 9:6, 7).

13. ¿Imaynatan Diosta munakuyninchis wiñanman jujkunata yanapaqtinchis? Juj experienciata willay.

¹³ Llaqtankupi guerra kasqanraykun wakin hermanokuna ayqekamusqaku Estados Unidosman, chay hermanokunata atiendeypin yanapakusqa Stephanie hermananchis. Chay hermanokuna alojakunanpaqsi wasikunata maskhasqaku allichasqaku ima. Paymi nin: “Paykunaqa anchatan agradecekuwanku. Kusisqan kasharanku Diospa llaqtanpiqa jujlla kasqanchismantapas. Paykunaqa yanapanaykupaqpaschá piensaranku, ichaqa paykunan noqaykuta yanaparuwanku. Paykunapin rikuyku munakuyta iñiyta ima. Dios munakuyninkupas confianzankupas mana igualaymi kasqa. Chaykunan noqaykutaqa allinta kallpacharuwanku Diosta tukuy sonqo servishanallaykupaq”, nispa.

14, 15. a) ¿Ima ejemplotan qowanchis profeta Isaías? b) ¿Imaynatan qatikusunman chay ejemplonta?

¹⁴ ¿Munawaqchu Diospa llaqtanpi astawan llank’ayta? May ladopipas astawan yanapanata munashankuman chayri, ¿riwaqchu? Diosta munakusqanchista rikuchinanchispaqqa manapaschá juj ladokunataraqchu rinanchis. Chaywanpas  wakin hermanokunaqa atisqankuman jinan chayta ruwanku. Paykunaqa profeta Isaías jinan kanku. Juj kutinmi Diosqa tapukuran: “¿Pitataq kachasaq? ¿Pitaq noqanchismanta willaq rinqa?”, nispa. Jinan Isaiasqa niran: “Noqan kaypi kashani, noqata kachaway”, nispa (Is. 6:8). ¿Pay jinachu noqanchispas kanchis Diospa llaqtanpi ima ruwanapaqpas llank’aqkuna necesitakuqtin? ¿Imakunapin yanapakusunman?

¹⁵ Jujkunata yachachiymanta rimashaspan Jesusqa niran: “Cosechanaqa askhapunin kashan, llank’aqkunan ichaqa pisilla [...] cosecha oqarichiq dueñota rogakuychis cosechanman llank’aqkunata kachamunanpaq”, nispa (Mat. 9:37, 38). Chhaynaqa, ¿atisunmanchu maypichus predicaqkuna necesitakushan chayman riyta? Manachus atisunman chayqa, ¿atisunmanchu jujkuna chayta ruwanankupaq yanapayta? Wakinqa juj ladokunata predicaq rispan rikuchinku Diostapas runamasinkutapas munakusqankuta. Ichaqa, kashanmi juj ruwaykunapas, sichus chaykunapi ocupasqa kasun chayqa kusisqan kausasun.

16, 17. ¿Ima ruwaykunan kashan astawan Diospaq llank’ayta munaqkunapaq?

¹⁶ ¿Munawaqchu Betelpi o salonkuna ruwaypi yanapakuyta? Diospa llaqtanpiqa kashallanpunin ima ruwanapas. Ichaqa manapaschá imachus ruway yachasqanchisman jinachu llank’anata qowasun, aswanpas ima ruwanachus necesitakushan chayman jinapaschá. Diosqa maypichus maki faltashan chaypi yanapakunanchistan munan, chaywanmi payqa kusikun (Sal. 110:3).

¹⁷ Wakinqa yaqapaschá munasunman capacitasqa kayta. Chhayna kaqtinqa yaqapaschá junt’asunman “Diospa gobiernonmanta willaqkunapaq escuela” nisqa escuelapaq solicitudta. Chay escuelapin capacitakun tukuy tiemponkuwan Diosta serviq hermanokunata hermanakunata ima. Chay solicitudta junt’aqkunaqa liston kashananku maymanpas kachasqa kanankupaq. ¿Munawaqchu chay escuelaman jaykuspa astawan Diospaq llank’ayta? (1 Cor. 9:23.)

18. ¿Imakunan kanqa Diosninchiswan sapa p’unchay llank’aqtinchis?

¹⁸ Kaypi yachasqanchis jina, Diosta serviqkunaqa qoykukuq sonqon kananchis. Sapa p’unchaymi jujkunapipas piensananchis, chhaynapin munakuq kasqanchistapas rikuchisun. Chhaynapitaqmi kusisqa kasun, thajmi sonqonchispas kanqa (Gál. 5:22, 23). Chhaynaqa kallpachakusun Diosninchis jina sumaq sonqo kananchispaq, paywan kuska llank’ananchispaqpas. ¡Chayta ruwasun chayqa sonqopas sonqon kausasun! (Prov. 3:9, 10.)