TUKUKUY tiempopi kausasqanchisraykun aswan sasaraq kausayqa kashan. Chaymi astawanraq pacienciakuq kayta necesitanchis (2 Tim. 3:1-5). Kay tiempopi runakunaqa paykunallapin piensanku, manan acuerdoman jaykuyta munankuchu nitaq controlakuytapas yachankuchu. Chhayna clase runakunaqa mana pacienciakuqmi kanku. Chaymi llapa cristianokuna tapukunanchis: “¿Chay runakuna jinachu mana pacienciakuq kashani? ¿Imataq pacienciakuq kayri? ¿Imatan ruwayman pacienciakuq kanaypaq?”, nispa.

Bibliaq nisqan jina, pacienciakuq kayqa manan ñak’ariykunata aguantayllachu, aswanpas pacienciakuyqa kusisqa sonqowan ñak’ariykunata aguantaymi. Pacienciakuq kaspaqa manan noqallanchispichu piensananchis, aswanpas jujkunaq allinninpin piensanallanchistaq, jujkunaña millayta tratawaqtinchispas. Chaymantapas Bibliaq nisqan jina pacienciaqa munakuymantan paqarin (1 Cor. 13:4). * Chaymantapas pacienciaqa santo espirituq rurunmi (Gál. 5:22, 23). Chhaynaqa, ¿imatan ruwananchis pacienciakuq kanapaq?

Pacienciakuq kanapaqqa Diosmantan chayta mañakuna, paymi espiritunwan yanapawasun (Luc. 11:13). Diosninchisña yanapawasun chaypas, noqanchis kikinchismi kallpachakunanchis pacienciakuq llamp’u sonqo kananchispaq. Mañakusqanchisman jinataqmi ruwananchis (Sal. 86:10, 11). Sapa p’unchaymi kallpachakunanchis pacienciakuq kananchispaq, chhaynapin sonqonchispi saphichakunqa pacienciakuq kay. ¿Imatawanmi ruwasunman?

Jesuspa ejemplontan qatikunallanchistaq, payqa may pacienciakuqmi karan. Apóstol Pablopas “mosoq runa” kaymanta rimashaspan niran: “Cristoq thaj kaynin sonqoykichispi kamachikuchun”, nispa (Col. 3:10, 12, 15). Chay “thaj kay” sonqonchispi kamachikunanpaqqa Jesús jinan tukuy sonqo Diospi confiananchis. Sichus Jesús jina pacienciakuq kasun chayqa, manan imapas phiñachiwasunchu ima millaykunaña pasanqa chaypas (Juan 14:27; 16:33).

Maytachá munashanchis kay pacha paraisoman tukupunanta, ichaqa pacienciawanmi chayta suyakunanchis. Jehová Diospas pacienciakunmi noqanchiswanqa. Bibliapin nishan: “Wakinña piensanku Jehová Dios unaymanta promesanta junt’ananpaq chaypas, manan payqa unaymantachu junt’anqa, aswanmi payqa qankunawan pacienciakushan; chaymantapas payqa manan munanchu pipas wañunantaqa, aswanmi munan lliupas juchankumanta pesapakunanta”, nispa (2 Ped. 3:9). Chay textopi nisqan jina, Diosninchis jinan noqanchispas jujkunawan pacienciakunanchis (Rom. 2:4). Chhaynaqa, ¿imakunapin pacienciakuq kasunman?

Imaymanapin rikuchinanchis pacienciakuq kasqanchista. Ejemplopaq, yaqapaschá jujkuna rimashaqtinku ima importante willakuytapas rimayta munashanchis, ichaqa pacienciakuq kasun chayqa paykunaq rimay tukunankutaraqmi suyasun (Sant. 1:19). Wakin hermanonchiskunaqa jujniray costumbrekunayoqmi kanku yaqapaschá chaykuna mayninpiqa phiñachiwasunman. Chaykunapi tarikuspan pacienciakuq kasqanchista rikuchinallanchistaq kanqa. Jinaspapas Jehová Diospa Jesuspa ejemplonta iman yuyarinanchis. Paykunaqa manan qhawashallankuchu imapipas pantasqanchista, aswanpas imakunatachus allinkunata ruwashanchis chaytan astawanqa qhawashanku (1 Tim. 1:16; 1 Ped. 3:12).

¿Imapin rikuchillasunmantaq pacienciakuq kasqanchista? Pipas ima ruwasqanchismantapas corregiwaqtinchisqa yaqapaschá usqhaylla phiñakusunman, otaq nisunman “allinmi chay ruwasqayqa”, nispa. Phiñakunamantaqa Diospa nisqantan kasukunanchis, paymi niwanchis: “Aswan allinmi muchukuq sonqo kay, jatunchakuq sonqo kaymantaqa. Ama sonqoykipi usqhaylla phiñakuychu, phiñakuyqa mana yuyayniyoqkunaqmi”, nispa (Ecl. 7:8, 9). Chhaynaqa pacienciakuqmi kana jujkunaña llullakuspa noqanchismanta rimaqtinkupas. Chaytan Jesuspas ruwaran jujkuna paymanta llullakuspa rimaqtinku (Mat. 11:19).

Tayta-mamakunaqa pacienciakuqmi kananku, astawanqa wawankuta imamantapas corregina kaqtin. Chaymi pasaran Mattiaspa tayta-mamanwanpas. Mattiasqa Escandinavia ladopi kaq Betelpin llank’ashan. Mattias waynallaraq kashaqtinsi escuelapi compañeronkuna paymanta nishuta burlakusqaku. Tayta-mamanqa manas imatapas yachasqakuchu, ichaqa reparasqakus imaynatas Mattias pisi-pisimanta iskayasharan chayta. Mattiaspa papanmi nin: “Mattiaswanqa maytan pacienciakunayku karan. Paymi niwaqku: ‘¿Pitaq Diosri? ¿Bibliari Diospa palabranpunichu? ¿Paychu kay kamachikuykunata qonman karan?’, nispa. Chaymantapas ‘¿imaraykutaq mana qankuna jina iñisqaymantari juzgawanaykichis?’ nispan niwaqku”, nispa.

Mattiaspa papanmi nillantaq: “Mayninpiqa nishu phiñasqan Mattiasqa rimaq ichaqa manan  noqa contrachu ni mamitan contrachu, aswanpas Bibliamanta yachasqanmantan”, nispa. ¿Imatan Mattiaspa papan ruwanman karan? Paymi nillantaq: “Askha kutitan wawaywan rimaq kani. Jinaspapas tukuy atencionwanmi rimasqanta uyariq kani, imaymanatan tapuq kani sonqonpi imakunachus kashan chayta yachanaypaq. Mayninpiqa juj p’unchay mastan qoq kani imachus rimasqaykupi piensananpaq, chay tiempo pasaqtintaq wajmanta rimaq kayku. Juj kutikunapiqa noqañataqmi niq kani: ‘Tiempota qoway niwasqaykipi piensanaypaq’, nispa. Chhayna rimasqaykuwanmi pisi-pisimanta entiendeyta qallariran imaraykus Jesús kay pachaman jamuran, imaraykus Jehová Diospas derechonpi kashan gobiernananpaq chayta, maykamas Diospa munakuynin chayan chaytawan. Chaykunata entiendenanpaqqa manan juj ratollachu karan, aswanpas tiempopaqmi karan. Ichaqa pisi-pisimantan Jehová Diosta munakuyta qallariran. Señoraypas noqapas kusisqan kashayku Mattiaswan pacienciakusqaykumanta, kunanqa allinmi kashan”, nispa.

Mattiaspa tayta-mamanqa anchatan Diospa yanapayninpi confiaranku, chaymi wawankuta pacienciawan yanaparanku. Mattiaspa papanmi nillantaq: “Askha kutitan Mattiasta niq kayku: ‘Mattias noqapas mamitaykipas anchatan munakuykiku, chaymi tukuy kallpaykuwan Jehová Diosmanta mañakushayku tapukusqaykikunata entiendenaykipaq’”, nispa. Maytan chay tayta-mamakuna kusikunku pacienciakuq kasqankumanta.

¿Pikunan pacienciakuq kanallankutaq? Onqosqa familiankuta, amigonkuta ima cuidaq cristianokunan. Chaymi kunan yachasun hermananchis Elenamanta, * payqa Escandianavia ladopin tiyan.

Chay hermananchispa qosansi umanmanta onqosqa, chay pasasqanmantaqa ñas pusaq wataña pasarun. Chay pasasqanmantapachas qosanqa mana khuyapayakuq kapun, manas imamantapas kusikunchu ni sientenpaschu. Qosanta chhaynata rikuspan Elenaqa khuyayta llakikun. Paymi nin: “Tukuy atisqaytan kallpachakuni pacienciayoq kanaypaq, Diosmantapas sapa kutillanmi mañakuni kallpata qowananpaq. Filipenses 4:13 texton allinta kallpachawan, chaypin nin: ‘Tukuy imapaqmi kallpa qowaqniyqa kallpata qowan’”, nispa. Chay kallpan Elenata kallpachashan pacienciayoq kananpaq, ñaupaqllaman purinanpaq, Diospa yanapayninta pacienciawan suyakunanpaqwan (Sal. 62:5, 6).

Manan pipas Jehová Dios jina pacienciakuqqa kanmanchu (2 Ped. 3:15). Askha kutitan Bibliapi willashan imaynatas Jehová Dios rikuchiran pacienciakuq kasqanta (Neh. 9:30; Is. 30:18). Jujmi kay: Diosmi Sodoma llaqtapi tiyaq runakunata wañunankupaq sentenciaran. Chaymantan Abrahanqa imaymanata Diosta tapuran. Diosmi ichaqa pacienciawan chayta uyariran. Ultimotataq niran: “Manan wañuchisaqchu chunka kaqtinqa”, nispa (Gén. 18:22-33). ¡May sumaq ejemplon Jehová Diosninchisqa ¿riki?!

Kaypi yachasqanchis jina may allinpunin pacienciayoq kayqa. Chaymi yanapawasun mosoq runa kananchispaq. Sichus kallpachakusun pacienciayoq kanapaq chayqa, papanchis Jehová Diosta respetasqanchistan rikuchisun. Chhaynapitaq ‘iñiywan pacienciawan ima promesata chaskiqkunawan’ kuska kasunchis (Heb. 6:10-12).