1. ¿Imaraykun nisunman “Jehová Diosqa qoykukuq Diosmi” nispa?

JEHOVÁ DIOSQA sapallanmi kausaran. Ichaqa, payllapichus piensanman karan chayqa manapaschá angelkunatapas ni runakunatapas kamanmanchu karan. Imaymanata kamasqanwanmi payqa kusisqa karan (1 Tim. 1:11; Sant. 1:17). Payqa kusisqa kausananchistan munan. Chaypaqmi ichaqa yachananchis pay jina qoykukuq kayta (Rom. 1:20).

2, 3. a) ¿Imaraykun nisunman “qoykukuq sonqo kasun chayqa kusisqan kasun” nispa? b) ¿Imakunamantan kay estudiopi yachasun?

² Diosqa payman rijch’akuqtan runakunata kamaran (Gén. 1:27). ¿Ima ninantaq chayri? Noqanchisqa pay jina sumaq sonqo kananchispaqmi kamasqa karanchis. Chaymi kusisqa thaj kausananchispaqqa yachananchis pay jina qoykukuq sonqo kayta (Filip. 2:3, 4; Sant. 1:5). Juchasapa runakunaña kanchis chaypas atisunpunin Dios jina sumaq sonqo kaytaqa.

 ³ Ichaqa, ¿imaynatan Dios qhawarin qoykukuq sonqo runakunata? ¿Imaynatan qoykukuq sonqo kay yanapawasunman Diospa qosqan llank’anata junt’ananchispaq? ¿Imaynatan qoykukuq sonqo kay apamuwasunman kusi kausayta? ¿Imaraykun tukuy tiempo qoykukuq sonqo kananchis? Chaykunamantan kay estudiopi yachasun.

4, 5. ¿Ima ejemplotan qowaranchis Jehová Diospas Jesuspas?

⁴ Papanchis Jehová Diosqa pay jina kananchistan munan (Efes. 5:1). Chhaynataq chayqa, maytachá payqa kusikun qoykukuq sonqo kasqanchiswan. Chaymantapas payqa kusisqa kausananchistan munan, chaytan rikukun kay pachata may munayta kamasqanpi (Sal. 104:24; 139:13-16). Chhaynatataq Diosninchis imaymanawan kusichiwanchis chayqa, noqanchispas kusichinanchismi runamasinchistaqa.

⁵ Jesuspas imaymanapin rikuchiran qoykukuq sonqo kasqanta. Último p’unchaykunataqa mana piensay ruwaytaraqmi ruwaranpas. Pay kikinmi niran: “Runaq Churinpas manan servichikuqchu jamuran, aswanpas jujkunata servinanpaqmi, vidanwan pagaspa askha runakunata kacharichinanpaqwan”, nispa (Mat. 20:28). Noqanchispas pay jina piensayniyoqmi kananchis. Chaymanta rimashaspan apóstol Pablo niran: “Imaynachus Cristo Jesuspa yuyaynin karan, chhaynallataq qankunaq yuyayniykichispas kachun, [...] payqa imaynachus kasqanta saqemuspa juj kamachi jina karan”, nispa (Filip. 2:5-7). Sapankanchismi tapukunanchis: “¿Atiymanchu Diospaq imachus ruwasqaymanta astawan ruwayta?”, nispa (leey 1 Pedro 2:21).

6. ¿Imatan Jesús yachachisharan samaritano runamanta willasqan willakuywan? (15 paginapi dibujota qhaway.)

⁶ Diosta kusichiyta munanchis chayqa paypa ejemplonta Jesuspa ejemplontawanmi qatikunanchis. ¿Imaynatan chayta ruwasunman? Jujkunaq allinnintan maskhananchis, imapichá yanapanata necesitashanku chaypin yanapananchis. Chaypaq yuyarisun samaritano runamanta Jesuspa willasqan willakuyta. Chaytan Jesusqa willaran, judío runa: “¿Pipunitaq runamasiyri?”, nispa tapukuqtin. Chaypi Jesuspa willasqanman jinaqa sumaqtan chay samaritanoqa runamasinta yanaparan (leey Lucas 10:29-37). Pay jinan noqanchispas tukuy atisqanchista kallpachakunanchis runamasinchista yanapananchispaq. Chayta ruwasun chayqa munakuwasunmi Diosninchisqa.

7. ¿Pitan kasukunanchis kusisqa kausananchispaq?

⁷ Edén huertapi imachus pasasqanraykun noqanchisqa qoykukuq sonqo kanallanchistaq. Chay kutipi Satanaspa nisqanman jinaqa, Adanpas Evapas paykunallamanta kausaspaqa kusisqas kankuman karan. Chayta kasuspan Evaqa Diospa prohibisqanta mijuran. Adantaq Diosta kasukunanmantaqa warminta kasuran (Gén. 3:4-6) Chayta ruwasqankuraykun khayna mana allin kausaypas kashan. ¿Imatan chaymanta yachasunman?  Manan pipas payllapi piensaspaqa kusi kausayta tarinmanchu. Diospa munayninman jina kausaspallan kusikuytaqa tarisun, chaymi yachananchispuni qoykukuq kayta.

8. ¿Imaraykun nisunman “Adanwan Evapiwanqa manan jujkunapi piensarankuchu” nispa?

⁸ Diosqa Adanpas Evapas wawankunapas sumaqta kausanankutan munaran, kay pachapas munay paraiso kanantan munaran (Gén. 1:28). Chaymantapas paykunan wawankunapiwan kay pachataqa paraisoman tukuchinanku karan. Dios jinachus piensankuman karan chayqa may munaychá kay pacha kashanman karan, manachá ima llakikuypas ni waqaypas kanmanchu karan. Llapa runakunachá allin llank’anayoq munay familiayoq kashasunman karan.

9. ¿Imaraykun nisunman “runakunaqa kusisqachá kay pachata paraisoman tukuchisunman karan” nispa?

⁹ Manachus Adán Eva juchallikunman karan chayqa, llapanchischá mana ima juchayoq kasunman karan. May kusisqachá kay pachatapas huertaman tukuchisunman karan. Dioswan kuskataqchá llank’ashasunmanpas karan, chhaynapitaq llapanchis ‘samanan p’unchayman jaykusunman’ karan (Heb. 4:11). ¡May munaypunichá chayqa kanman karan! Llapanchischá jujkuna-jujkunawan yanapanakuspa llank’ashasunman karan.

10, 11. ¿Imaynatan junt’asunman predicayninchista jujkunaman yachachiytapas?

 ¹⁰ Kunan tiempopas juj jatun llank’aytan Diosqa qowashanchis. ¿Imata? Llapa runakunamanmi siminta willananchis kashan, munaqkunamantaq yachachinanchis kashan. Chayta junt’anapaqmi ichaqa jujkunapi piensananchis. Chaymantapas Diosta runamasinchistawanmi tukuy sonqo munakunanchis.

¹¹ Apostolkunaq tiemponpi cristianokunapas chayta ruwaspan puriranku. Apóstol Pabloq nisqan jina paykunaqa “Diospa llank’aqmasinkunan” karanku. Wakinmi plantaq wakintaq qarpaq (1 Cor. 3:6, 9). Paykuna jinan noqanchispas Diosta llank’aysinanchis. ¿Imaynatan chayta ruwasunman? Tiemponchista, kallpanchista, kaqninchiskunata iman Diosman qonanchis, chhaynapin junt’asun Diospa llank’ana qowasqanchista. ¡Manan ima llank’anapas kanmanchu Diospaq llank’ay jinaqa!

12, 13. Piensasqaykiman jina, ¿imaraykun allinpuni predicay?

¹² May kusikuypunin predicacionman tiempotapas kallpatapas qoyqa. Manan ima ruwaypas chay ruway jinaqa kanmanchu. Hermanokunapas chhaynatapunin ninku. Qanpas yaqapaschá chhaynata piensanki. ¿Imaynan sientekunki yachachisqayki runa Bibliata entiendesqanman jina vidanta cambiaqtin, yachasqantapas jujkunaman willayta qallariqtin? Kusikunkin ¿riki? Jesuspas kusikuranmi 70 discipulonkuna predicasqankumanta ‘kusisqa kutimuqtinku’ (Luc. 10:17-21).

¹³ Lliu mundontinpi hermanokunan Diosmanta willaspa kusisqa purishanku. Chhaynan hermananchis Anapas kashan, payqa sipas kayninta soltera kayninta iman Diosman qoshan. * Paysi Europa ladopi juj llaqtaman astakusqa chaypi predicaqkuna necesitakusqanrayku. Paymi nin: “Kaypiqa askhan Bibliamanta yachayta munashanku. Manan tiempopas aypawanchu. Yuyayniypas estudiantekunallapin kashan; imaynatachus yanapayman yachachiyman chaykunapin masta piensani. Manan noqapi piensanaypaqqa ni tiempoypas kanchu. Jujkunata yanapaspan noqaqa sonqopas sonqo purini. Bibliapin nishan ‘qoypin aswan kusikuyqa kan’ nispa. Cheqaqpunin chayqa”, nispa (Hech. 20:35).

14. Manaña runakuna uyarikuyta munankumanchu chaypas, ¿imatan ruwasunman Diosmanta willaspa kusisqa purinanchispaq?

¹⁴ Runakuna manaña uyarikuyta munanqakuchu chaypas kallpachakunanchismi paykunawan imaynallamantapas rimananchispaq. Profeta Ezequiel jinan ruwananchis, paytan Dios niran: “Qanqa willallankipunin simiyta, uyarichunkupas amapas”, nispa (Ezeq. 2:7; Is. 43:10). Runakuna uyarikunqakuña manaña chaypas, papanchis Jehová Diosqa yachanmi may  tukuytas kallpachakushanchis chayta, valorantaqmi paypaq llank’asqanchistapas (leey Hebreos 6:10). Juj hermanon nin: “Noqaykuqa plantashaykun qarpashaykun, Diosmantataqmi mañakushayku wiñachinanpaq”, nispa (1 Cor. 3:6).

15. ¿Runakuna sumaqta chaskikullaqtinchu qoykukuq kananchis? Explicay chayta.

¹⁵ Jehová Diospas Jesuspas kusisqa kausananchistan munanku. Chaychá Jesusqa niran: “Qoshallaychis jujkunaman, chhaynapin qankunamanpas qosunkichis. Qhasqoykichis bolsillopin jich’aykusunkichis llasaqta, allin ñit’isqata, chhafchisqata, junt’ay-junt’ata. Imaynatachus jujkunata ruwankichis chhaynallataqmi qankunapas ruwasqa kankichis”, nispa (Luc. 6:38). Ichaqa, manapaschá llapa runachu ima qoyusqanchistapas sumaqta chaskiwasun. Chaywanpas manan makinchisqa wisq’arikunanchu. Qoyushanallanchismi runamasinchismanqa, chhaynapin jujkunapas qoykukuq kayta yachanqaku. Chaymantapas qoykukuq kayqa kicharinqapunin runamasinchispa sonqonta.

16. ¿Pikunawanmi qoykukuq kananchis? ¿Imarayku?

¹⁶ Qoykukuq sonqo runaqa manan chaskinanraykullachu imatapas qon. Chaymanta rimashaspan Jesusqa niran: “Jatun mijuyta wayk’uchispaqa invitamuy wajchakunata, ñuk’ukunata, such’ukunata, wist’ukunata, ñausakunatawan, paykunaqa manan imankuwanpas pagapuyta atisunkikumanchu, chaymi kusisqa kanki”, nispa (Luc. 14:13, 14). Chaymantapas Bibliaq nisqan jina, ‘jujkunata sumaqta rikuqqa bendecisqan kanqa’ ‘pisi kallpayoq wajchata  yuyariqpas’ kusisqan kanqa (Prov. 22:9; Sal. 41:1). Chhaynaqa, jujkunata yanapasun chhaynapin kusisqa kausasun.

17. ¿Imakunatan ruwananchis kusisqa kananchispaq?

¹⁷ Jesuspa siminkunata jap’ikuspan apóstol Pabloqa nillarantaq: “Qoypin aswan kusikuyqa kan, manan chaskiypichu”, nispa. Chayta nispaqa manan mijuytapas imatapas qoyllamantachu rimasharan, aswanmi kallpachaymanta juj ruwaykunapi yanapakuymantawan rimasharan (Hech. 20:31-35). Chaymi noqanchisqa Pablo jina kallpanchista, tiemponchista, yuyayninchistapas Diosta serviyman qonanchis.

18. ¿Ima ninkun runakunaq imayna portakusqanta estudiaq runakuna?

¹⁸ Runakunaq imayna portakusqanta estudiaq runakunapas “qoypin kusikuyqa kashan” nispan ninku. Chaymantapas, jujkunata yanapaspas runakunaqa kusikunku, chaywansi thaj kanku. Chaykunamanta rimaq revistan nillantaq “runakunaqa jujkunapaq imatapas ruwaspan kusisqa kanku”, nispa. Chaychá wakin doctorkunaqa runakunata kamachinku jujkunata yanapamunankupaq chhaynapi kusisqa sano kausanankupaq. Runakunaq chaykuna tarisqanqa manan admirakunapaqchu, Diospa siminpiqa unayñan chaykunaqa kasharan. Chaymi kusisqa kausanapaqqa yachanapuni qoykukuq kayta (2 Tim. 3:16, 17).

19, 20. ¿Imaraykun qoykukuq sonqo kananchis?

¹⁹ Kay pachapiqa yaqa llapa runapas paykunallapitaq piensanku chayqa, manapaschá facilchu kanqa qoykukuq sonqo kay. Ichaqa Jesuspa nisqan jina, noqanchisqa Jehová Diostan munakunanchis tukuy sonqonchiswan, tukuy almanchiswan, tukuy yuyayninchiswan, tukuy kallpanchiswan ima. Runamasinchistapas noqanchis kikinchista jinan munakunanchis (Mar. 12:28-31). Kaypi yachasqanchis jina Diosta munakuqkunaqa pay jinan kananku. Yachasqanchis jinapas, Diosqa qoykukuq Diosmi, Jesuspas chhaynallataqmi. Chaymi paykunaq ejemplonta qatikunanchis, chhaynapin kusisqa kausasun. Chaymantapas qoykukuq kasun chayqa Diosninchismi jatunchasqa kanqa.

²⁰ Yaqapaschá yanapashanchisña runamasinchiskunata hermanonchiskunatapas (Gál. 6:10). Ichaqa chhaynalla kashasun, amapuni munakuyninchisqa pisiyachunchu. Jujkunata sumaqta yanapasun chayqa munakuwasunmi paykunaqa, noqanchispas kusisqan kasun. Proverbios 11:25 textopin nishan: “Qoykukuq runaqa t’ikarinqan, jujman sajsata ujyachiqqa sajsachisqallataqmi kanqa”, nispa. ¿Imakunata ruwaspan qoykukuq sonqo kasqanchista rikuchisunman? Imaymana formapin. Chaykunamantan qatimuq estudiopi yachasun.