Apóstol Pablon Jehová * Diosmanta niran: “Paymi may khuyapayakuq Yayaqa, tukuy ima llakipi kallpachaq Diospas”, nispa (2 Corintios 1:3, 4). Chay simikunawanmi yachanchis Jehová Diosqa lliu runatapas consolay atisqanta, sinchi jatunña problemanchis kanman chaypas.

Ichaqa noqanchismantan dependenqa Diospa consolasqan kananchispaqqa. Ejemplopaq, ¿imaynatan juj doctor yanapawasunman mana hospitalman riqtinchis? Chhaynallatataqmi noqanchispas ruwananchis, Biblian nin: “Diosman achhuykuychis, jinan paypas qankunaman achhuykamusunkichis”, nispa (Santiago 4:8).

¿Imaynapin seguro kasunman Dios noqanchisman qayllaykamunanmanta? Pay kikinmi palabranpi asegurawanchis yanapay munawasqanchista (qatimuq paginapi  recuadrota qhaway). Chaymantapas kashanmi ñaupaqpi kay tiempopipas Diospa consolasqanmanta willakuykuna.

Rey Davidqa kay tiempopi runakuna jinan imaymana problemakunapi tarikuran. Chaymi Diospa yanapayninta maskharan: “Yanapaykuwanaykipaq mañakamusqayta uyariykuway”, nispa. ¿Yanaparanchu Dios? Arí, chaymi David niran: “Paymanmi tukuy sonqo jap’ipaykukuni, jinan payqa yanapaykushawan”, nispa (Salmo 28:2, 7).

Diosqa munaranmi Jesús runakuna consolaypi yanapakunanta. Jehová Diosmi kamachiran ‘llakisqa sonqoyoqkunata kusirichinanpaq’, jinallataq ‘lutopi kaqkunata sonqochananpaq’ (Isaías 61:1, 2). Profetizakusqan jina, Jesusqa anchatan interesakuran ‘llapa sayk’usqakunapi, llasa q’epiyoqkunapi’ ima (Mateo 11:28-30).

Jesusmi runakunata consolaran allin consejokunata qospa, sumaqta trataspa, onqoyninkumanta jampispa ima. Juj kutinpin lepra onqoyniyoq runa valekuran: “Munanki chayqa, atinkin qhaliyachiwayta”, nispa. Jesustaq mayta khuyapayaspa niran: “Arí, munanin, qhali kapuy”, nispa (Marcos 1:40, 41). Jinan qhaliyapuran.

Jesusqa manañan kay pachapiñachu runakunata consolananpaq, ichaqa kunanqa ‘may khuyapayakuq Yaya, tukuy ima llakipi kallpachaq Diosmi’  runakunata yanapashan (2 Corintios 1:3). ¿Imaynatan yanapashan? Tawa formamanta.

• Bibliawan. “Ñaupaqpi qelqasqa kaqkunaqa yachachiwananchispaqmi qelqasqa karan; chaymantapas Diospa simin qelqan kallpachawanchis, aguantananchispaqpas yanapawanchis, chaymi suyakuyniyoqpas kanchis” (Romanos 15:4).

• Santo espiritunwan. Jesuspa wañupusqan qhepatan cristiana iñiq t’aqa consolasqa kayta necesitaran. Biblian willan Dios paykunata santo espiritunwan consolasqanmanta (Hechos 9:31). Diospa santo espiritunqa otaq kallpanqa ancha atiyniyoqmi. Chaytan Diosqa utilizanman pi runatapas consolananpaq imaynapiña tarikuqtinpas.

• Oracionwan. Biblian consejawanchis: “Ama imamantapas llakipakuychischu [...] Diosman willakuychis imachus necesitasqaykichista. Jinan Diosqa runaq mana entiendey atisqan thaj kayta qosunkichis, chhaynapin sonqoykichista yuyayniykichista ima [...] waqaychanqa”, nispa (Filipenses 4:6, 7).

• Cristiano hermanokunawan. Cristianomasinchiskunan cheqaq amigonchiskuna kankuman consolawananchispaq. Apóstol Pablon chay jina amigonkunamanta rimaran “paykunan noqapaqqa ancha jatun consuelo kanku”, ‘llakikuypiña ñak’ariypiña tarikuqtiypas’ nispa (Colosenses 4:11; 1 Tesalonicenses 3:7).

Yaqapaschá tapukunki: “¿Cheqaqtachu chaykuna yanapawanman?”, nispa. Chaypaqqa ñaupaq articulopi rimamusqanchis runakunaq experiencianmanta yachasun, qanpas paykuna jinan rikunki Diosqa kay promesan cumplisqanta, niranmi: “Imaynan mamaqa wawanta sonqochan [otaq consolan], chay jinatan noqaqa qankunata sonqochasqaykichis”, nispa (Isaías 66:13).