Cuerponchistaqa Diosmi kamawaranchis mana jayk’aq tukukuqta jina. Chaymi k’irikuqtiykiqa usqhaylla thanipun, nishuta yawar cuerpomanta phawaqtinpas cuerpo kikinmi venakunata wisq’an, herida ruwakuqtintaq pisi-pisimanta kikillan wisq’akun.

KAYPI PIENSAY: Kamaqninchisqa mana jayk’aq tukukuq cuerpoyoqtan kamawaranchis. Chhaynaqa, ¿iskayananchischu sinchi llakipi tarikuqtinchis Dios yanapawananchismanta? Salmos librota qelqaqqa seguron kasharan Diosninchis tukuy k’irinkunata jampinanmanta (Salmos 147:3). Sinchi llakiq ñit’isqan tarikuqtiykirí, ¿iman garantizasunkiman kay tiempopi jamuq tiempopipas Dios ‘k’iriykikunata wataykunanmanta’?

Diosmi nin: “Ama manchakuychu, qanwanmi noqaqa kashani, ama pisipaychu, noqaqa Diosniykin kani, noqan kallpachasaykipas yanapasaykipas”, nispa (Isaías 41:10). Jehová Dios munakuwasqanchista yachayqa thajtan sientechiwanchis, kallpachawanchismi ima problemakunata atipananchispaqpas. Chaymantan apóstol Pablo niran: “Diosqa runaq mana entiendey atisqan thaj kayta qosunkichis”, nispa. Nillantaq: “Tukuy imapaqmi kallpa qowaqniyqa kallpata qowan”, nispa (Filipenses 4:4-7, 9, 13).

Bibliaqa yanapawanchismi Diospa promesankunapi astawan iñinanchispaq, Apocalipsis 21:4, 5 textopin yachasun imatan Dios ruwanqa, imaraykutaqmi chaypi confiananchis chaymanta.

• Ñawinchismantan “tukuy weqeta pichanqa”. Jehová Diosmi tukuchinqa tukuy ñak’ariykunata llakikuykunata, yaqapaschá wakin runamanqa mana imapas importanchu chaykunaq pasasqanqa.

• “Tukuy atiyniyoq Rey “tronopi tiyaqpas” tukuy atiynintan utilizanqa manaña jayk’aqpas sufrinanchispaq, paymi yanapawasun ima necesitasqanchispipas.

• Jehová Diospa siminqa “confianapaq jinan cheqaqtaqmi kanpas”. Jehová Diosqa payllan cheqaq Dios, manan sutintaqa sarunchanmanchu, cumplinqapunin promesankunataqa.

“‘Paymi ñawinkumanta tukuy weqeta pichanqa, manan wañuypas kanqañachu, manañataqmi llakikuypas, waqaypas, ni nanaypas kanqañachu. Arí, ñaupaq kaqkunaqa manañan kanqachu’, nispa nimuqta. Tronopi tiyaqpas: ‘Tukuy imatan mosoqta ruwasaq’, nispan nimun. Chaymantan nimullantaq: ‘Kaykunata qelqay, kay simikunaqa confianapaq jinan cheqaqtaqmi kanpas’, nispa” (Apocalipsis 21:4, 5)

Diospa kamasqankunaqa mana rimaspallan invitawanchis Dioswan amigontin kananchispaq, Bibliañataqmi kayta niwanchis: “Diosman achhuykuychis, jinan paypas qankunaman achhuykamusunkichis”, nispa (Santiago 4:8). Hechos 17:27 textopas ninmi: “Manan sapankanchismantapas nishu karupichu kashan”, nispa.

Aswan-aswanta Diosta reqsispaqa, astawanmi confianki Diosqa qanta munakusqasuykipi (1 Pedro 5:7). ¿Allinniykipaqchu kanman Jehová Diospi confiasqayki?

Titomanta yachasun, payqa Japonmantan. Paytaqa mamanña Diosmanta yachachiran chaypas, Japonpi estafaq narcotraficante grupomanmi perteneceran. Tito nin: “Diosqa cheqnikuwanmi chaymi wañuqkunata ladoypi rikuni, chaywanmi Diosqa castigawan astawanqa munakusqay runakuna wañusqanwan”, nispa. Titoqa yachanmi millay kausay kasqanwan “millay runaman tukupusqanta”. Payqa ambicioso runas karan, chaymi nin: “Noqaqa waynallaraq kashaspan wañukapuyta munarani, jinaspapas noqamanta aswan atiyniyoqtan wañuchiyta munarani chhaynapi allin reqsisqa kanaypaq”, nispa.

Ichaqa pisi tiempollamantan Biblia estudiayta qallariranku Ana esposanwan, Titoqa cambiaranmi rijch’ayninpi vidanpipas. Ana nin: “Admirakunapaqmi karan esposoypa cambiokuna ruwasqanqa”,  nispa. Tito nin: “Diosqa kanpunin, sapanka jujninchistan munakuwanchis. Payqa manan munanchu pipas wañunanta, pipas sonqomantapuni juchanmanta arrepentikuqtinqa perdonanmi. Diosmanqa willawaqmi mana piman willasqaykita, payqa entiendesunkin. Pisi tiempollamantan Jehová Diosqa tukuchinqa tukuy ñak’ariykunata. Kay tiempopipas Diosqa yanapawanchismi. Sinchi llakiq ñit’isqanña kashanchis chaypas kallpachasunkin”, nispa (Salmos 136:23).

Titotaqa Dios tukuy ñak’ariykunata tukuchinanpaq, sumaq suyakuytapas qowananchispaq atiyniyoq kasqanta yachaymi yanaparan. Noqanchistapas chayta yachayqa yanapawasunmanmi, chaymantapas allin kausaytan yachachiwanchis. Arí, kay mundoqa millayña kashan chaypas Jehová Diosqa munakuwanchismi.