¿JAYK’AQLLAPAS chhaynata sientekurankichu? Chhayna sientekuranki chayqa entiendenkichá Adrianataqa. Payqa nishu llakisqallan karan, chaymi nishuta desesperakuq. Chaymantan doctorkuna niranku depresión onqoyniyoq kasqanta.

Mauromanta yachasun, payqa Japonmantan kuraj onqosqa tayta-mamankunatan uywaran. Paymi nin: “Manapas atiymanñachu jinan sientekuq kani, trabajoypin nishuta exigiwaqku. Tiempowanmi afectawaran, manañan yarqaypas karanñachu tutakunapas manan puñuyta atiqchu kani. Amaña sufrinaypaqmi wañukapuyta munarani”, nispa.

Nigeriamanta Jorgen nin: “Llakisqallan puriq kani, imamantapas waqallaqmi kani. Manañan kausaytapas munaqñachu kani”, nispa. Jorgewan, Maurowan, Adrianawanqa manan wañuchikurankuchu, ichaqa sapa watanmi yaqa pusaq waranqa runakuna wañuchikunku.

Astawanqa qharikunan wañuchikunku, llakikuyninku willakuyta p’enqakuspa. Jesucriston niran: “Onqosqakunan ichaqa doctorta necesitanku”, nispa (Lucas 5:31). Chhayna tarikunki chayqa ama p’enqakuychu doctorman riyta. Askhan depresión onqoywan kaqkunaqa mejoranku. Jorgewan, Maurowan, Adrianawanpas doctorwanmi yanapachikuranku, kunanqa allinmi kashanku.

Depresión onqoytaqa wakin doctorkunaqa jampikunawan, sumaqta rimapayaspa iman tratanku otaq iskayninwanpas. Chaymantapas depresionwan kaqkunaqa tukuypi yanapanata, entiendenata, pacienciawan familianku amigonkupas tratanankutan necesitanku. Jehová Diosqa amigonchismi paymi Bibliawan yanapawasun.

Depresión onqoywan kaqkunaqa unay tiempotan necesitanku tratamientota, vidankupipas cambianankun. Depresión onqoywan kashanki chayqa ama llakikuychu mejorallankin, jamuq tiempopiqa manañan kanqañachu. Chaytan Jorgepas piensan, ninmi: “‘Manan mayqellanpas: “Onqosqan kani”, ninqachu’ nispa Isaías 33:24 textoq junt’akunantan suyakushani”, nispa. Qantapas consolasonkichá Diospa “mosoq allpa pachata” prometesqanta yachayqa, chaypiqa manan kanqañachu “nanaypas” ni depresión onqoypas (Apocalipsis 21:1, 4). Llakikuykunaqa chinkapunqan. Manan jayk’aqpas llakisqaqa tarikusunñachu, llakikuyninchiskunaqa qonqasqan kapunqa (Isaías 65:17).