¿Iman sutin? Paymi nin: “Jehová Diosmi kani, chaymi sutiyqa”, nispa (Isaías 42:8, Traducción del Nuevo Mundo [NM]). Bibliapiqa Diospa sutinqa yaqa qanchis waranqa kutitan rijurin. Ichaqa askha Bibliakunapin Diospa sutinta “Señor” nispalla churanku. Diosqa amigon kanaykitan munan, chaymi sutinmanta wajakunaykita munan (Romanos 10:13).

Diospa titulonkuna. Dios, Tukuy atiyniyoq, Kamaq, Yaya, Ancha jatun Dios. Payta serviqninkunapas chay jina titulokunawanmi mañakuranku, Jehová sutinmanta iman wajakuranku (Daniel 9:4).

 Diosqa espiritun. Manan paytaqa rikusunmanchu (Juan 4:24). Bibliapin nin: “Diostaqa manan pi runapas jayk’aqpas rikuranchu”, nispa (Juan 1:18). Bibliapin nillantaq Diosqa sienteq kasqanta. Imachus ruwasqanchisqa sonqontan kusichinman otaq llakichinman (Salmos 78:40, 41; Proverbios 27:11).

¿Imaynataq Diosri? Diosqa lliutapas igual-llatan rikuwanchis, may nacionmantaña otaq ima familiamantaña kanchis chaypas (Hechos 10:34, 35). Jehová Diosqa “khuyapayakuq, sumaq sonqo, mana usqhaylla phiñakuq, tukuy tiempo munakuq”, cheqaqtan imatapas willan (Éxodo 34:6, 7). Chaymi kunan tawamanta yachasunchis.

Atiyniyoq Dios. Jehová Diosqa ‘tukuy atiyniyoqmi’. Chaymi tukuy promesankunatapas junt’an (Génesis 17:1).

Yachayniyoq Dios. Manan pipas Dios jina yachayniyoqqa kanchu. Chayraykun Biblia paymanta nin: “Sapallan yachayniyoq Dios”, nispa (Romanos 16:27).

Justicia ruwaq Diosmi. Chaymi Biblia nin: “Junt’asqan ruwasqankunaqa, chaninmi ruwasqankunaqa”, nispa (Deuteronomio 32:4).

Munakuq Dios. Biblian nin: “Diosqa munakuymi”, nispa (1 Juan 4:8). Diosqa manan munakuynillantachu rikuchin, aswanpas paymantan munakuyqa paqarimun. Tukuytapas kamaran munakuq kasqanraykun, chaykunaqa kusichiwanchismi.

Runakunawanmi amigontin kayta munan. Diosqa munakuq papanchismi (Mateo 6:9). Paypi iñisun chayqa amigonmi kasun (Salmos 25:14). Payqa noqanchismantan llakikun, chaymi munan imaynapi tarikusqanchista payman willakunanchista (Santiago 4:8; 1 Pedro 5:7).

Jesusqa manan Dioschu. Diosmi Jesustaqa kamaran. Chaymi Biblia nin: “Diospa Churin”, nispa (Juan 20:31). Jehová Diosmi Jesustaqa ñaupaqta kamaran, chaymantataq ‘paywan llank’aran’. “Paywanmi janaq pachapi tukuy ima kaqkuna, kay pachapi tukuy ima kaqkunapas kamasqa karan” (Proverbios 8:30, 31; Colosenses 1:15, 16).

 Jesusqa manan jayk’aqpas niranchu Diosmi kani nispaqa. Aswanpas niranmi: “[Diospa] sutinpi jamusqayrayku, paymi noqataqa kachamuwan”, nispa (Juan 7:29). María Magdalenawan rimashaspapas Jehová Diosmanta niran: “Noqan wichapushani Yayayman, Yayaykichisman; Diosniyman, Diosniykichisman”, nispa (Juan 20:17). Jesús wañupuqtinqa Jehová Diosmi kausarichipuran janaq pachaman ripunanpaq, jinaspa ‘paña ladonpi tiyaykunanpaq’ (Mateo 28:18; Hechos 2:32, 33).

Jesucriston yanapasunkiman Diosman qayllaykunaykipaq

Jesusmi papanmanta yachachiran. Jehová Diosmi Jesusmanta niran: “Kaymi munakusqay Churiyqa, payta uyariychis”, nispa (Marcos 9:7). Jesusmi Diostaqa allinta reqsin, chaymi niran: ‘Manan pipas yachanchu pichus Yaya kasqantaqa, aswanpas Churillan, pimanchus Churi reqsichiyta munan chayllapiwanmi’, nispa (Lucas 10:22).

Jesusqa papan jinapunin. Jesusqa papanmanmi rijch’akun imayna kasqanpi, chaymi niran: “Pipas noqata rikuwaqqa Yayatapas rikullantaqmi”, nispa (Juan 14:9). Jesusqa runakunatan yanaparan Diosman qayllaykunankupaq, payqa rimasqanwan ruwasqanwan iman rikuchiran papan munakuq kasqanta. Chaymi niran: “Noqan kani ñanpas, cheqaq kaqpas, kausaypas. Noqallantapunin pipas Yayamanqa chayanqa”, nispa (Juan 14:6). Nillarantaqmi: “Cheqaq adoraqkunaqa Yayata adoranqaku espirituwan cheqaq kaywan ima; Yayaqa chhayna kaqkunatapunin maskhan payta adoranankupaq”, nispa (Juan 4:23). Kaypi piensay: Jehová Diosqa qan jina paymanta yachay munaq runakunatan maskhashan.