Mariapaq, Raulpaq, Arnepaq jujkunapaqpas Diosmanta mañakuyqa munay regalon. Mañakuspaqa Dioswanmi rimashanku, chaymi atinku gracias niyta yanapaynin mañakuytapas. Paykunaqa Bibliapi nisqanman jinan yuyaykunku: “Imataña Diospa munayninman jina mañakusunchis chaypas, Diosqa uyariwasunmi, manapunin chaymantaqa iskayananchischu”, nispa (1 Juan 5:14).

Askha runakunan ichaqa ninku: “Diosmanta mañakuyqa yanqapaqmi”, nispa. Stevenmi nin: “Chunka qanchisniyoq wataypi kashaqtiymi kinsa amigoykuna wañupuran, jujnintan carro wañuchiran, iskay amigoykunataq qochapi unuwan jeq’epaspa wañuranku”, nispa. ¿Imatan Steven ruwaran? Paymi nin: “Diostan nirani: ‘¿Imaraykun amigoykuna chhaynata wañupuranku?’, nispa. Diosmi ichaqa mana  uyariwaranchu. Chaymi nirani: ‘Diosmanta mañakuyqa manan imapaqpas servinchu’”, nispa. Askha runakunan Steven jina sientekunku, paykunapas ninkun: “Diosmanta mañakuyqa manan valenchu”, nispa.

Jujkunataqmi kay jinata nillankutaq: “Diosqa yachanñan ima llakipichus tarikusqanchista imachus necesitasqanchistapas; chhaynaqa, ¿imapaqñan willasunman imapas pasawasqanchista?”, nispa.

Wakin runakunataq ninku: “Noqaqa juchasapa runan kani, chaymi Diosqa mana mañakusqayta uyariwanmanchu”, nispa. Jennyn nin: “Noqaqa mana valeqpaqmi qhawarikuni. Ñaupaqpin millay juchakunata ruwarani, chaymi sonqoypi niq kani manan Diosqa mañakusqayta uyariwanmanchu”, nispa.

Qanri, ¿ima ninkitaq? ¿Jayk’aqllapas chay runakuna jina piensarankichu? Chhayna kaqtinqa Bibliapi nisqanmi yanapasunkiman mañakusqanchista Dios uyarimusqanmanta ama iskayanaykipaq. * Chaymantapas yanapasunkin kay tapuykunata kutichinaykipaq:

• ¿Uyarinpunichu Dios mañakusqanchista?

• ¿Imaraykun wakin runaq mañakusqanta mana uyarinchu?

• ¿Imaynatan mañakunanchis uyariwananchispaq?

• ¿Imaynatan Diosmanta mañakuy yanapasunkiman?