¿Imaraykun sinchi cheqninakuy kan?
¿Iman jujkunata cheqnikuy? ¿Imaraykun runamasinkuta cheqnikunku? ¿Imaraykun jujkunata cheqnikuy tukuy ladopi kashan? Chay tapuykunamantan kaypi yachasun.
¿Iman jujkunata cheqnikuy?
Runamasinta cheqnikuqqa nishutan cheqnikusqan runata pisichan, manan rikuytapas atinchu. Chaymantapas unaymi chayqa sonqollanpi kashan.
¿IMARAYKUN RUNAMASINKUTA CHEQNIKUNKU?
Imaymanan runakunataqa tanqan jujkunata cheqnikunanpaq. Wakinqa jujkunatan cheqnikunku waj familiamanta waj llaqtamanta kasqankurayku. Chaymantapas wakinqa millay runapaqmi paykunata qhawarinku, otaq ninku: “Chaykunaqa manan cambiankumanchu”, nispa. Wakintaq ninku: “Paykunaq kausanpin imaymana llakipi tarikushanchis”, nispa. Chaymantapas wakinqa jujkunatan cheqnikunku chay runakuna paykunata mana allinkunata ruwasqanrayku.
¿IMARAYKUN CHEQNINAKUY KAN?
Wakinqa mana reqsisqanku runakunatapas cheqnikunkun. Paykunaqa jujkunaq mana allin rimasqanta kasuspan jujkunata cheqnikuyta qallarinku. Chhaynapin runamasita cheqnikuyqa tukuy ladopi mast’arikun.
Rikusqanchis jina, jujkunata cheqnikuyqa ratullan tukuy ladopi mast’arikunman. Ichaqa runamasinchista amaña cheqnikunapaqqa yachananchismi imachus jujkunata cheqnikuyman tanqasqanta. Bibliapin chaymanta rimashan.
¿IMAN RUNAKUNATA TANQAN CHEQNINAKUYMAN?
MANAN RUNACHU CHEQNINAKUYTAQA QALLARICHIRAN. Jujkunata cheqnikuyqa janaq pachapin qallariran, juj angelmi Diospa contranpi jatariran, paytan Satanás sutiwan reqsikun. Diospa contranpi jatarispan runa wañuchiqman tukupuran. Bibliapin willan Satanasqa llullakuspa rimasqanta, paymi jujkunata tanqashallan cheqninakuyman, millaykunata ruwanankupaqpas (Juan 8:44; 1 Juan 3:11, 12). Chaymantapas willanmi millaypuni kasqanta, sinchi phiñasqa kashasqantapas (Job 2:7; Apocalipsis 12:9, 12, 17).
JUCHAYOQ KASPAN JUJKUNATA CHEQNIKUSUNMAN. Ñaupaq taytanchis Adanmi Satanás jina Diospa contranpi sayariran, paypa wawankuna kasqanchisraykun juchayoq kanchis (Romanos 5:12). Adanpa phiwi churin Cainpas wayqen Abeltan wañuchiran payta cheqnikusqanrayku (1 Juan 3:12). Runakunaqa khuyapayanchismi jujkunata, ichaqa juchayoq kasqanchisraykun askha runakuna paykunallapi piensanku, envidiakuspataq jujkunata cheqnikunku (2 Timoteo 3:1-5).
JUJKUNAPAQ PHIÑAKUY. Tukuy ladopin runakunaqa millaykunata ruwashanku. Kay pachaqa Satanaspa makinpin kashan, chaymi runakunaqa jujkunaq imayna kasqanwan phiñakunku, paykunata pisichanku, k’aminku, juj millay ruwaykunatapas ruwanku (1 Juan 5:19).
Bibliapiqa manan cheqninakuy qallarisqallanmantachu willan, willallantaqmi chinkachisqa kanantapas.
Astawan yachanaykipaq
BIBLIAMANTA TAPUYKUNA
¿Dioschu Saqrata kamaran?
¿Maymantan Saqra paqarimuran? ¿Imaraykun Jesús niran ‘Saqraqa cheqaq kaqmantan t’aqakapuran’ nispa?
