¡Wiñaypaqmi chinkapunqa!
Cambiasunmanña chaypas, manan llapa runata cambiasunmanchu amaña cheqnikuq kananpaqqa. Chaymi askha runakuna cheqninakuspa kausashanku. Chhaynaqa, ¿pitaq kay pachantinmanta cheqninakuyta chinkachinman?
Jehová Diosllan chinkachiyta atinman, Bibliapitaqmi willashan chayta ruwananta (Proverbios 20:22).
CHEQNIKUYMAN APAQ KAQKUNATAN CHINKACHIPUNQA
-
1. SATANASTA. Satanasmi astawanqa runakunata tanqashan jujkunata cheqnikunankupaq. Diosmi ichaqa Satanasta pay jina cheqnikuqkunatapas wiñaypaq wañuchipunqa (Salmos 37:38; Romanos 16:20).
-
2. SATANASPA KAMACHISQAN PACHATA. Mana allin kamachiqkunapas, religionkunapi umalliqkunapas runakunatan kallpachanku jujkunata cheqnikunankupaq. Chaymantapas jatun negocioyoqkunan runamasinkumanta suwanku. Diosmi ichaqa tukuy chaykunata chinkachipunqa (2 Pedro 3:13).
-
3. JUCHAYOQ KASQANCHISTA. Bibliapi nisqanman jina, llapa runan juchayoq kanchis, chaymi sonqonchis aysawanchis mana allinkunata piensananchispaq ruwananchispaqpas (Romanos 5:12). Chaymi facil-llata jujkunatapas cheqnikusunman. Jamuq tiempopin ichaqa Diospa yanapayninwan manaña sonqonchis aysawasunchu runamasinchista cheqnikunanchispaq (Isaías 54:13).
JAMUQ TIEMPOPIQA MANAÑAN CHEQNINAKUY KANQACHU
-
1. MANA CHANIN RUWAYKUNA CHINKAPUNQA. Diospa gobiernonmi janaq pachamanta kay pachantinta kamachimunqa, chaymi llapa runa chanillanta ruwanqa (Daniel 2:44). Manañan runamasi pisichaypas cheqnikuypas kanqañachu (Lucas 18:7).
-
2. LLAPANCHISMI THAJPI KAUSASUN. Manañan pipas sufrinqachu guerrakuna wañuchinakuykuna kasqanwan (Salmos 46:9). Kay pachapiqa llapa runakunan munanakuspa thajpi kausanqaku (Salmos 72:7).
-
3. TUKUY IMAPAS SUMAQMI KAPUNQA. Llapa runakunan cheqaqta munanakuspa kausanqaku (Mateo 22:39). Manan imapas llakichiwasunñachu, nitaqmi mana allin piensaykunapas umanchisman jamunqachu (Isaías 65:17). Manaña cheqninakuy kaqtinmi llapa runakuna “thaj nisqa tiyanqaku” (Salmos 37:11).
¿Munawaqchu chhaynapi kausayta? Kay tiempopipas Jehová Diospa testigonkunaqa pachantinpin mana cheqninakuspa kausashanku. Bibliapi kamachisqanta kasukuspan chhaynata kausashanku (Salmos 37:8). May llaqtayoqña kanku chaypas, paykunaqa juj familia jinallan munanakuspa kausanku (Isaías 2:2-4).
Jehová Diospa testigonkunaqa yanapasunkikumanmi mana allin ruwaykunata pacienciawan aguantanaykipaq. Bibliata paykunawan estudiaspan pisi-pisimanta manaña jujkunata cheqnikunkichu. Aswanpas runamasiykitan munakunki, cheqnikuqniykikunatapas sumaqtan qhawarinki. Chayta ruwaspaqa kusisqan kausanki, jujkunawanpas sumaqtan kausanki. Chaymantapas allintan yachanki Diospa gobiernon kamachimuqtin chaypi tiyanaykipaq imachus ruwanaykita (Salmos 37:29).
Astawan yachanaykipaq
QHAWAQ
¿Imatan Diospa gobiernon ruwanqa?
Jesusqa yacharanmi Diospa gobiernollan kay pachapi llakikuykunata allichananta. ¿Imakunatan chay gobierno kay pachapi ruwanña?
