1, 2. a) ¿Imaraykun nisunman “Pabloq tiemponpiqa rimaqkun esclavo kaymanta libre kaymantapas” nispa? b) ¿Mayllapin tarisunman cheqaq libre kayta?

ÑAUPA tiempopi Roma llaqtayoq runakunaqa leykuna orqomusqankuwan, juiciokunata imayna aparisqankuwan, runakuna libre kasqankuwan iman alabakuqku. Ichaqa Roma llaqtaqa esclavokunaq llank’asqanwanmi jatunman tukuran. Juj tiempoqa kinsa runamantas juj esclavo kasqa. Chhaynataq karan chayqa lliuchá esclavokunamanta libre kaymanta ima rimaqku. Cristianokunapas rimaqkupunichá chaymantaqa.

² Apóstol Pablopas askha kutitan qelqaran libre kaymantaqa. Ichaqa manan kay pachapi sasachakuykunata allichayta munaspachu chaykunataqa qelqaran. Aswanmi payqa llapa iñiqmasinkunata kallpacharan Diospa gobiernonmanta Jesuspa sacrificio ruwasqanmantawan llapa runakunaman yachachimunankupaq. Willaranmi maypis  kashan cheqaq libre kay chaytapas. Niranmi: “Jehová Diosqa espiritun; maypichus Jehová Diospa espiritun kashan chaypiqa libren imapas”, nispa (2 Cor. 3:17).

3, 4. a) ¿Imamantan Pablo rimaran manaraq Diospa espiritunwan libre kanamanta qelqashaspa? b) ¿Imatan ruwananchis libre kananchispaq?

³ Manaraq Diospa espiritunwan libre kanamanta qelqashaspan Pabloqa qelqasqa Sinaí orqomanta Moisés uraykamuqtin imachus pasaran chayta. Diospa ñaupanmanta uraykamuqtinsi Moisespa uyanqa k’ancharishasqa. Chayta rikuspas Israel runakunaqa mancharikusqaku. Chaysi Moisesqa juj telawan uyanta tapakusqa (Éx. 34:29, 30, 33; 2 Cor. 3:7, 13). Pablon niran: “Pipas Jehová Diosman kutirikuqtinmi ichaqa chay tapaq tela llat’asqa kapun”, nispa (2 Cor. 3:16). ¿Imatan chaywan nishanman karan?

⁴ Ñaupaq estudiopi yachasqanchis jina, kamaqninchis Diosllan tukuy imapipas libreqa. Chhaynataq chayqa maypichus espiritun kashan chaypiqa libren imapas. Chaymi libre kanapaqqa Diosman kutirikunanchis. Arí, Diospa amigonkunan kananchis. Egiptomanta lloqsimuq Israel runakunaqa manan Dios jinachu imatapas qhawariranku. Chhaynapin paykunaqa yuyayninkupas tapasqa kashanman jina karanku. Chay runakunaqa gustonkuta ruwanankupaqmi libre kayninkuta usaqku (Heb. 3:8-10).

5. a) ¿Imakunamantan librawanchis Diospa espiritun? b) ¿Imaraykun nisunman “Diospa qosqan libre kaywanqa esclavokunapas carcelpi kaqkunapas kusisqan kankuman” nispa? c) ¿Imakunamantan kaypi yachasun?

⁵ Diospa espiritunpa qosqan libre kaymi ima libre kaymantapas aswan allinqa. Diospa espiritunmi runakunata librashan juchamanta, wañuymanta, falso religionkunamanta, mana allin costumbrekunamantawan. Chaykunamanta libre kayqa manan imawanpas comparakunmanchu (Rom. 6:23; 8:2). Ancha allinpunin chay libre kayqa. Chaywanqa esclavo kaqkunapas carcelpi kaqkunapas kusisqan kanku (Gén. 39:20-23). Chaymi pasaran Harold King hermanowanpas. Payqa Diosta servisqanraykun askha wata carcelpi karan. Paypa willakusqanmi kashan JW Broadcasting canalpi (VIDEOKUNA > KAUSAYNINKUMANTA WILLAKUNKU > PRUEBAKUNATA ATIPANKU). ¿Imaynatan rikuchisunman libre kay valorasqanchista? ¿Imaraykun allin yuyaywan libre kayninchista usananchis? Chay iskaynin tapuykunamantan kay estudiopi yachasun.

6. ¿Imaynatan Israel llaqta rikuchiran mana agradecekuq kasqanta?

⁶ Pipas ima regalotapas qoykuwaqtinchisqa tukuy sonqomantan agradecekunchis ¿riki? Jehová Diospas juj sumaq regalotan Israel llaqta runakunaman qoran.  Egiptomantan paykunata libramuran. Chay runakunan ichaqa mana agradecekurankuchu. Aswanmi paykunaqa Egiptopi mijunamanta tomanamanta ima rimayta qallariranku. Manan contentochu karanku Diospa qosqan mijunawanpas. Egiptoman kutiytaraqmi munarankupas. Paykunapaqqa challwa, pepino, sandía, poro, cebolla ajos iman aswan allin karan Diosta servinankupaq libre kanankumantaqa. Razonwanchá Diosqa sinchita phiñakuran paykunapaq (Núm. 11:5, 6, 10; 14:3, 4). ¿Imatan chaymanta yachasunman?

7. a) ¿Imaynatan apóstol Pablo 2 Corintios 6:1 textopi nisqanman jina ruwaran? b) ¿Imaynatan Pabloq ejemplonta qatikusunman?

⁷ Noqanchistapas Diosqa librawaranchismi. Arí, Jesuswanmi payqa librawaranchis. Chaymi apóstol Pabloqa llapa cristianokunata kallpacharan Dioswan agradecido kanankupaq (leey 2 Corintios 6:1). Paypas agradecekuranmi Diostaqa. Niranmi: “¡Diostan ‘gracias’ nini Señorninchis Jesucristowan librawasqanmanta!”, nispa. Chaymantataq llapa cristianokunata niran: “Santo espirituq kamachikuyninmi Cristowan jujllachasqa kaqkunaman kausayta qon, chay kamachikuymi librarasunkichis juchaq kamachikuyninmanta, jinallataq wañuypa kamachikuyninmantawan”, nispa (Rom. 7:24, 25; 8:2). Chaymi noqanchispas Dioswanqa agradecido kananchis. Pabloq nisqan jina, paymi librawaranchis juchamanta wañuymantawan. Chayraykun kunanpas ch’uya concienciawan Diosta servishanchis (Sal. 40:8).

8, 9. a) ¿Ima consejotan apóstol Pedro qoran libre kaymanta? b) ¿Ima trampakunatan Saqra churawashanchis?

⁸ Nisqanchis jina agradecekunanchismi Diostaqa librawasqanchismanta. Ichaqa manan libre kasqanchis tumpaqa mana allinkunata ruwananchischu. Chaymanta cuidakunanchispaqmi apóstol Pedropas  kallpachawanchis (leey 1 Pedro 2:16). Yaqapaschá Pedroq nisqanqa ñaupaqpi rimamusqanchis israelitakunata yuyarichiwanchis. Noqanchisqa paykunamantapas astawanraqmi cuidakunanchis. ¿Imarayku? Satanasmi kay mundota astawan cambiashan. Moda nisqatan astawan rijurichimushan, tomanakunatapas imaymana clasetan rijurichimushan, qhawanapaqpas imaymanakunan kan. Propaganda ruwaqkunapas munay rijch’ayniyoq runakunawanmi imaymanata munachinku. Chhaynataq kashan chayqa faciltan ima trampamanpas urmasunman. Libre kayninchistapas mana allintan usasunman.

⁹ ¿Imaynatan qhawarishanchis educacionta llank’anatapas? Chaypipas apóstol Pedroq consejonqa yanapawallasunmantaqmi. Kay tiempopiqa nishutan wayna-sipaskunata tanqanku colegionkuta tukuruspa allin reqsisqa universidadkunaman jaykunankupaq. Paykunatan ninku: “Universidadpi estudiaspaqa allin llank’anayoqmi kanki askhatan qolqetapas gananki”, nispa. Mayninpiqa: “Universidadta tukuqkunan allinta gananku”, nispan ninku. Chaykunata uyarispaqa yaqapaschá wayna-sipaskunaqa chaykunata munapayayta qallarinkuman, chhaynapitaq mana allin decisionkunata ruwankuman. ¿Iman yanapanman paykunatapas tayta-mamankutapas allinta imatapas ruwanankupaq?

10. ¿Imapin piensananchis imatapas ruwananchispaq?

¹⁰ Yaqapaschá wakinqa ninkuman: “Chaykunamantaqa pitaq ima niwanmanpas, noqachá yachakuni, sapankamantan chayqa”, nispa. Yaqapaschá ninqaku: “¿Imaynataq noqaq libre-kayniyri jujpa conciencian jawa juzgasqa kanman?”, nispa. Arí, llapanchispas libren kashanchis imata estudiananchispaqpas imapi llank’ananchispaqpas. Ichaqa, yachasqanchis jina manan noqanchisqa tukuy imapichu libre kanchis. Imataña ruwasun chaypas kanqapunin chay ruwasqanchismanta imapas. Pablopunin niran: “Tukuy imapas ruwakullanmanmi, ichaqa manan lliuchu allin kanman; tukuy imapas ruwakullanmanmi, ichaqa manan lliuchu runata kallpachan”, nispa (1 Cor. 10:23). Chhaynaqa manan gustonchischu primero kanan. Aswanmi allinta qhawarikunanchis ima ruwasqanchispas yanapawasunchus icha manachus chayta.

11. ¿Imapaqmi Dios librawaranchis?

¹¹ Libre kayninchista cuidanamanta rimashaspan apóstol Pedroqa nillarantaq: “Aswanpas Diospa kamachinkuna jinapuni kausaychis”, nispa. Chhaynaqa Diospa munayninta ruwaspan kausananchis. Chaypaqmi Diosqa Jesuswan juchamanta wañuymantawan librachiwaranchis.

12. ¿Imatan yachasunman Noemanta familianmantawan?

¹² Noqanchisqa Diosmanmi qonanchis tiemponchista, kallpanchista, libre kayninchista ima. Chayta ruwasun chayqa manan gustonchistachu ñaupaqta maskhasun, manataqmi kay mundo runakuna jinachu imatapas ruwasun (Gál. 5:16). Noemanta familianmantawan yachasun.  Paykunaq tiemponpiqa qhelli ruwaykunata ruwaspa maqanakuspa iman runakunaqa kausaqku. Noewan familianwanmi ichaqa mana chhaynachu karanku. ¿Iman paykunata yanapanman karan? Diospa kamachisqanta kasukusqankun. Arí, arcata ruwaypi, chay arcaman mijuykuna waqaychaypi, runakunaman willaypi iman paykunaqa ocupasqa kasharanku. Bibliapin nin: “Noetaq Diospa tukuy kamachisqanman jina ruwaran”, nispa (Gén. 6:22). Chayta ruwasqankuraykun paykunaqa librasqa karanku (Heb. 11:7).

13. ¿Ima ruwananchistan Jehová Dios munashan?

¹³ ¿Ima ruwananchistan Jehová Dios munashan? Payqa munashan siminta jujkunaman willamunanchistan (leey Lucas 4:18, 19). Yachasqanchis jina kay tiempopiqa yaqa llapa runakunaq yuyayninmi tutayachisqa kashan. Satanasmi falso religionkunawan, qolqewan, imaymana ruwaykunawan ima lliu runaq yuyayninta tutayachishan (2 Cor. 4:4). Paykunamanmi noqanchisqa Jesús jina libraq Diosmanta willamunanchis (Mat. 28:19, 20). Ichaqa millaymantaq runakuna tukupushanku, manañataq uyarikuytapas munankuchu chayqa manapaschá facilchu kanqa chayta ruway. Chaywanpas ruwananchispunin Diospa munayninta. Chaymi tapukunanchis: “¿Imakunatawanmi ruwayman Diospa munayninta ruwanaypaq?”, nispa.

14, 15. ¿Imatan ruwashanku askha hermanokuna? (9 paginapi fotokunata qhaway.)

¹⁴ Lliu mundopin askha hermanokuna imaymanata ruwashanku Diosta astawan servinankupaq (1 Cor. 9:19, 23). Wakinqa congregacionllankupin servishanku, wakintaq maypichus predicaqkuna necesitakushan chayman astakushanku. Kay pisqa watallapin 250.000 hermanokuna precursor regular kapuranku. Llapankupiqa 1.100.000 masñan kashanku. May kusikunapaqmi hermanokunaq chay ruwasqankuqa ¿riki? (Sal. 110:3.)

¹⁵ ¿Iman chay hermanokunata yanapanman karan chayta ruwanankupaq? Chaypaq yachasun hermanonchis Johnmanta Judithmantawan. Paykunaqa 30 watata jinan serviranku askha nacionkunapi. Paykunaq willakusqankuman jinaqa 1977 watapis precursorkunapaq escuelapi kallpachasqaku maypichus predicaqkuna faltashan chayman yanapakuq rinankupaq. Llaqtallankupiraq kashaspaqa askha kutitas Johnqa llank’ananta cambianan kasqa Dios serviyllapi yuyayta churananpaq. Tiempowansi ichaqa juj nacionman ripusqaku yanapakuq. Ichaqa, ¿iman paykunata yanapanman karan juj simita yachanankupaq jujniray costumbrekunaman yachakunankupaqpas? Jehová Dios-si yanapasqa. ¿Imaynan paykuna kashanku Diosta chhaynata servisqankuwan? Johnmi nin: “Manan kay llank’ana jinaqa ima llank’anapas kanmanchu. Jehová  Diosqa papaymi kapun. Kunanqa allintan entiendeni Santiago 4:8 textotapas, chaypin nishan: ‘Diosman achhuykuychis, jinan paypas qankunaman achhuykamusunkichis’, nispa. Noqaqa kusi kausaytan maskhasharani. Kunanqa tariniñan chayta”, nispa.

16. ¿Imatan wakin hermanokuna ruwaranku libre kayninkuwan?

¹⁶ Wakin hermanokunaqa manapaschá unaychu precursor kanqaku. Chaywanpas paykunaqa imaymanapin yanapakushanku. Warwick llaqtapi sucursal ruwakushaqtinpas yaqa 27.000 hermanokunan chaypi llank’aranku. Wakinqa tiemponkuq kasqanman jinan iskay semana yanapakuranku. Wakintaq askha killa chaypi karanku. Wakintaq wata masraq karanku. Chhaynapin paykunaqa libreña kanku chaypas, chay libre kayninkuta Diosman qoranku. Arí, libre kayninkuwanmi paykunaqa Diosta jatuncharanku alabaranku ima. ¡May allin ejemplon chay hermanokunaqa!

17. ¿Iman pasanqa Diosta serviq runakunawan?

¹⁷ Kaypi yachasqanchis jina Diosta servispallan cheqaq libre kaytaqa tarisun. Chaymi Diosta agradecekunanchis siminta reqsichiwasqanchismanta. Ichaqa, ¿imaynatan rikuchisunman agradecido kasqanchista? Imakunachus ruwasqanchiswanmi. Chayrayku libreña kanchis chaypas, ama munayninchistachu ruwasun aswanpas Diospa munayninta ruwasun. Serviqninkunawan imachus pasananmantan Dios niran: “Kamasqakunaqa ismusqa kayman watasqa kasqankumantan kacharichisqa kanqaku, jinaspa Diospa wawankuna jina libre kapunqaku”, nispa (Rom. 8:21).