Jesuspas discipulonkunapas manan enemigonkuna jinachu makinkuta maqchikuqku, chaymi chay runakunaqa mana allinta paykunamanta rimaqku. Moisespa chaskisqan kamachikuykunaman jinaqa pipas lepra onqoywan jap’ichikuq, wañusqa cuerpota tupaykuqpas, q’eyata jisp’aqpas, yawar apaywan kaqpas “qhelli” nisqan karan. Chaykunamanta ch’uyanchakunankupaqmi runakunaqa sacrificiokunata jaywananku karan, bañakunanku karan otaq imawanpas ch’aqchukunanku karan (Levítico capítulo 11-15; Números capítulo 19).

Judío umallikunan chay kamachikuykunaman imaymana kamachikuykunata yapaykusqaku. Juj libroq nisqanman jinaqa chay umallikunaqa piensasqankuman jinas nisqaku imakunapiwanraq pipas “qhelli” nisqa kanman chayta, imaynatachus jujkunata qhellichakunman chaytapas. Chaymantapas paykunaqa listapiraqsi churasqaku ima cosaskunas “qhelli” nisqa kanman, imakunas mana qhellichakunmanchu chaytapas. Chaymantapas kamachikusqakus imaynatas pipas ch’uyanchakunman chayta.

Juj kutinmi fariseokuna Jesusta niranku: “¿Imanaqtinmi discipuloykikuna mana ñaupa runakunaq costumbrenman jinachu ruwanku, aswanpas qhelli makintin mijunku?”, nispa (Mar. 7:5). Chay fariseokunaqa manan makita maqchikunamantachu rimasharanku, aswanpas costumbrenkuman jina ch’uyanchakuymantan rimasharanku. Juj libroq nisqanman jinaqa, chay umallikunaqa kamachikuqkus ima clase p’uyñuwanchus, ima unuwanchus ch’uyanchakunanku karan chayta, pichus unutapas jich’anan karan chayta, maykamas makinkutapas maqchikunanku karan chaytapas.

¿Allinpaqchu Jesús qhawariran chay kamachikuykuna churasqankuta? Manan, chaymi chay umallikunata niran: “Iskay uyakuna, sut’illantan profeta Isaiasqa qankunamanta qelqaran: ‘Kay runakunaqa simillankuwanmi “respetaykikun” niwanku, sonqonkutaq ichaqa noqamanta karupi kashan. Yanqapaqmi adorawashanku, paykunaqa runakunaq kamachikusqallantan yachachinku’, nispa. Qankunaqa Diospa kamachikuyninta saqerparispan runakunaq costumbrenman k’askakunkichis”, nispa (Mar. 7:6-8).