1, 2. ¿Imanaqtinmi mosoqkunata yanapananchis?

JESUSQA tukuy kallpanwanmi Diospa gobiernonmanta willaran. Chaymantapas allintan discipulonkunata prepararan Diospa llaqtanta yachachinankupaq cuidanankupaq ima. Chhaynapin discipulonkunaqa yacharanku Diospa ovejachankuna michiyta (Mat. 10:5-7). Felipepas tukuy tiempo predicasqanmantapas allintan ususinkunata prepararan pay jina predicanankupaq (Hech. 21:8, 9). Kay tiempopipas kallpachakunanchismi jujkunata preparananchispaq.

² Askhan Diospa llaqtanpi kashanku mana bautizasqa predicaqkuna. Paykunatan yanapananchis paykunallamanta Bibliata leenankupaq estudianankupaq ima. Chaymantapas preparananchismi allinta predicanankupaq, yachachinankupaqwan. Chayllaraq bautizakuq hermanokunatapas preparananchismi yanapakuq kamachi (siervo ministerial) kanankupaq, umalliq kanankupaqwan. Chhaynaqa llapanchismi mosoqkunata yanapasunman (Prov. 4:2).

3, 4. a) Pabloq nisqan jina, ¿iman yanapawasunchis allinta predicananchispaq? b) Estudiantekunaman Biblia estudiayta yachachinanchispaq, ¿imatan noqanchispas ruwashananchis?

³ Jehová Diosta serviqkunaqa llapanchismi Bibliata leenanchis estudiananchis ima. Chayta ruwaspallan Diospa munaynintaqa yachasunman. Chaymi apóstol Pablo Colosas llaqtapi kaq cristianokunata niran: “Diosmanta mañakushallaykupuni qankunapaq, chhaynapi tukuy yachaywan [...] paypa munayninmanta allinta yachanaykichispaq”, nispa. Chay cristianokunaqa Diospa siminta estudiaspallan allin yachayta tarinkuman karan, chhaynapi ‘Jehová Diospaq jina kausanankupaq, tukuy allin kaqkunata ruwanankupaq ima’. Chay allin kaqkuna ukhupin kasharan allin willakuykuna willaypas (Col. 1:9, 10). Chhaynaqa Bibliata leey estudiay iman yanapawasunchis Jehová Diosta servinanchispaq, chaytan estudiantekunamanpas allinta entiendechinanchis.

⁴ Chaypaqmi ichaqa noqanchisraq sapa p’unchay Bibliata estudiashananchis, mana chayqa, ¿imaynatan paykunata yanapasunman Bibliata estudianankupaq? Chaymantapas Bibliata sapa p’unchay leesun, chay leesqanchispi allinta piensasunpas chayqa, aswan allintan predicasunchis. Pipas predicacionpi ima sasa tapuytapas tapuwaqtinchispas yachasunmi Bibliawan kutichiyta. Chaymantapas Dios serviq runakunaq mana pisipaspa predicasqankumanta Bibliapi leespaqa anchatan kallpachakusunchis predicayninchispi aguantananchispaq. Bibliapi imatachus yachasqanchismanta, imaynatachus chay yanapawasqanchismanta jujkunaman willaspapas allintan paykunata kallpachashasunchis aswan allinta Bibliata estudianankupaq.

5. ¿Imaynatan estudiantenchisman yachachisunman Biblia estudiayta? Jujllamanta willay.

⁵ ¿Imaynatan estudiantenchista yanapasunman sapa p’unchay Bibliata leenanpaq? Chaypaqmi ñaupaqta yachachisunman estudiachisqanchis qelqata allinta preparakunanpaq. Yachachisunmanmi parrafokunapi textokuna maskhayta. Imatapunin nisqa librowan yachachishanchis chayqa, nisunmanmi apéndice nisqakunata leenanpaq, textokunatapas maskhananpaq. Chaymantataq yachachisunman imaynatachus juñunakuykunapaq preparakunman  chayta, imaynatachus comentanman chaytapas. Chaymantapas kallpachasunmanmi Qhawaq revistata ¡Rijch’ariy! revistatawan sapa lloqsimuqtin leenankupaq. Yachachillasunmantaqmi Watchtower Library nisqa programata otaq Watchtower INTERNETPI QELQANCHISKUNA nisqata imayna utilizaytapas. Chaykunata yachaspaqa estudiantenchiskunaqa astawanchá yachayta munanqaku.

6. a) ¿Imaynatan estudiantenchista yanapasunman Biblia estudiayta munananpaq? b) ¿Imatan estudiantenchis ruwanqa Diospa siminta munakuspa?

⁶ Biblian yanapawasunchis Jehová Diosta allinta reqsinanchispaq, chaytan estudiantenchisman allinta entiendechinanchis. Chaypaqmi ichaqa mana mat’ipayashananchischu Bibliata estudiananpaq, aswanpas gustachinanchismi chay ruwayta. Estudiantenchis astawan Bibliamanta yachanqa chayqa, salmo takita qelqaq jinan ninqa: ‘Noqapaq aswan allinqa Diospa qayllanpi kayniymi. Paymi pakakunayqa kanqa’, nispa (Sal. 73:28). Jehová Diosqa santo espiritunwanmi yanapanqa paypa amigon kayta munaq estudianteta.

7. ¿Imaynatan Jesús apostolkunata yachachiran predicayta? (21 paginapi fotota qhaway.)

⁷ ¿Imaynatan Jesús apostolninkunata preparan? Payqa maytapas predicaq rispaqa apostolninkunatan pusarikuq, chhaynapi imayna yachachisqanta rikunankupaq. Chaymantapas allintan yachachiran imaynatachus predicananku karan chayta (Mateo capítulo 10) ^[1] (26 paginapi willakuyta qhaway). Chhaynapin apostolkunaqa pisi tiempollapi yacharanku imayna predicayta (Mat. 11:1). Mosoqkunawan predicashaspaqa iskay ruwaytan yachachisunman. Chaymantan qatimuq parrafokunapi yachasunchis.

8, 9. a) ¿Imaynatan Jesús runakunata parlapayaq? b) ¿Imaynatan mosoqkunata yachachisunman Jesús jina sumaqta runakunawan parlanankupaq?

⁸ Runakunawan sumaqta parlanankupaq yachachisun. Jesusqa askha runakunaman rimaykusqanmantapas askha kutipin sapaqllapi wakin runakunawan parlaran. Paykunawanqa sumaqtan parlata tupachiran. Juj kutinmi parlaran unuman jamuq warmiwan, chaymi pasaran Sicar llaqtaq cercanpi kaq pozopi (Juan 4:5-30). Jesusqa rimallarantaqmi impuesto cobraq Mateowanpas, chaypin discipulon kananpaq niran. Mateotaq Jesuspa discipulon kapuran, jinaspa Jesusta jujkunatawan wasinman mijuqta invitaran. Chaypipas Jesusqa askha runakunawanmi parlaran (Mat. 9:9; Luc. 5:27-39).

⁹ Jesusqa Natanaeltapas sumaqtan parlapayaran, jinaña Natanaelqa mana allinta rimaran Nazaret runakunamanta chaypas. Chhayna sumaqta parlapayasqanraykun Natanaelqa allinpaq Jesusta  qhawariran Nazaret llaqtamantaña kashaqtinpas, jinaspa astawan paymanta yachayta munaran (Juan 1:46-51). Jesús jina sumaqta pitapas parlapayasunchis chayqa, runakunaqa sumaqtan uyariwasunman ^[2] [26 paginapi willakuyta qhaway]. Chhayna rimayta mosoqkunaman yachachisunchis chayqa, paykunamanqa gustanqan predicay.

10-12. a) ¿Imatan Jesús ruwaran allin uyarikuq runakunawan? b) ¿Imaynatan mosoqkunata yanapasunman Bibliamanta allin yachachiq kanankupaq?

¹⁰ Uyarikuqkunata yachachinankupaq yachachisun. Jesusqa imaymana ruwanayoqña karan chaypas, tiempotan jap’iran allin uyarikuq runakunata yachachinanpaq. Juj kutinmi askha runakuna qocha patapi juñurukusqaku Jesusta uyarinankupaq, jinan Jesusqa Pedrowan kuska juj boteman seqaspa chay patamanta runakunata yachachiran. Chaymantataq Pedrota yachachinanpaq juj milagrota ruwaran, arí, askha challwakunata jap’ichiran, jinaspa Pedrota niran: “Kunanmantaqa runakunatan kausashaqta challwanki”, nispa. Jinan Pedroqa paywan kaqkunapiwan “botekunata qocha pataman apamuranku, tukuy imata saqespataq Jesusta qatikapuranku” (Luc. 5:1-11).

¹¹ Jesusqa yachachillarantaqmi Nicodemo sutiyoq runatapas. Chay runaqa jatun juntamanta jujninmi karan, chaymi juj runakuna paymanta mana allinta rimanankuta manchakuspa tutallapi Jesusta visitaran. ¿Imatan Jesús ruwaran? Tiempota jap’ispan payman allin yachachikuykunata yachachiran (Juan 3:1, 2). Chhaynapunin Jesusqa karan. Payqa listopunin kasharan Diosmanta yachachinanpaq, chhaynapitaq iñiyninkuta kallpachananpaq. Noqanchispas liston kashananchis runakunaq niwasqanchis horata visitananchispaq, arí, tiempotan jap’inanchis paykunaman Bibliamanta yachachinanchispaq.

¹² Mosoqkunawan predicaspaqa yachachinanchismi llapa uyariy munaqman kutina kasqanta. Chaypaqmi paykunawan compañachikusunman revisitakuna ruwanapaq estudiokuna qonapaqpas. Chhaynapin paykunapas yachanqaku jujkunata imayna yachachiyta, anchatataq kusikunqaku Jehová Diosmanta yachachispa. Chaykunata rikuspan paykunaqa anchata munanqaku runakunaman kutispa Bibliamanta yachachiyta. Jinaspapas yachanqakun pacienciakuyta, manataqmi pisipanqakuchu runakunata wasinkupi mana tarispa (Gál. 5:22; qhaway “ payqa pacienciakuranmi” nisqa recuadrota).

13, 14. a) ¿Imatan ñaupaq tiempopi Dios serviqkuna ruwaranku jujkunarayku? ¿Imatan chaymanta yachasunman? b) ¿Imaynatan wayna-sipaskunaman mosoqkunamanpas yachachisunman iñiqmasinchiskuna yanapayta?

¹³ Jehová Diosqa munan llapan serviqninkuna wayqe-panantin jina munanakuspa yanapanakunankutan (leey Lucas 22:24-27; 1 Pedro 1:22). Chaymi Jesuspas jujkunata yanapananrayku hasta vidantapas qoran (Mat. 20:28). Dorcas sutiyoq cristianapas ‘imaymana allinkunatan ruwaq, wajchakunatapas yanapaqmi’ (Hech. 9:36, 39). Mariapas “tukuy kallpanwanmi”  Romapi kaq iñiqmasikunata yanapasqa (Rom. 16:6). ¿Imaynatan mosoqkunaman yachachisunman iñiqmasinchiskuna yanapayta?

¹⁴ Chaypaqmi paykunata pusarikusunman edadniyoq iñiqmasinchiskunata onqosqa kaqkunatapas visitananchispaq. Tayta-mamakunapas pusarikunkumanmi wawankuta chhayna iñiqmasinchiskunata visitanankupaq. Umalliqkunaqa wayna-sipaskunawan otaq mosoqkunawanmi yanapachikunkuman wakin hermanokunapaq mijunata apana kaqtin otaq wasinkutapas allichana kaqtin. Chhaynapin paykunapas yachanqaku iñiqmasinchiskuna yanapayta. Juj umalliqmi karu ladopi predicaspaqa waturikuqpuni karan chaypi tiyaq iñiqmasikunata, chaypaqmi payqa juj wayna iñiqmasinchiswan compañachikuq. Chhaynapin chay waynaqa allinta yacharan iñiqmasinchiskuna yanapayta (Rom. 12:10).

15. ¿Imanaqtinmi umalliqkuna iñiq t’aqapi qharikunata yanapananku allin yachachiq kanankupaq?

¹⁵ Jehová Diosqa qharikunatan churaran iñiq t’aqapi yachachinankupaq. Chayraykun qharikunaqa anchata kallpachakunanku allin yachachiq kanankupaq. Chaypaqmi umalliqkuna yanapankuman. Atispaqa yanapakuq kamachikunatan ensayachinkuman discursonku tupaqtin (Neh. 8:8) ^[3] (26 paginapi willakuyta qhaway).

16, 17. a) ¿Imaynatan Pablo Timoteota allinta prepararan? b) ¿Imaynatan umalliqkuna yanapakuq kamachikunata preparankuman?

¹⁶ Diospa llaqtanpiqa necesitakushanmi aswan askha umalliqkunata, chaymi qharikunata preparana kashan chayman chayanankupaq. Apóstol Pablon Timoteota allinta prepararan, jinaspa niran: “Kallpachakushallay Cristo Jesuspa rikuchisqan ancha sumaq sonqo kaywan, imakunatachus noqamanta uyariranki chaykunawan ima; chaykunamantaqa askha runakunan “chhaynapunin” nirankupas, chaykunata yachachiy junt’aq sonqo runakunaman, chhaynapin paykunapas allin preparasqa kanqaku jujkunata yachachinankupaq”, nispa (2 Tim. 2:1, 2). Apóstol Pablon Timoteotaqa yachachiran allin predicaq kayta, iñiqmasikuna yanapaytapas (2 Tim. 3:10-12).

¹⁷ Pabloqa unay tiempon Timoteota yachachiran, chhaynapi allinta preparananpaq (Hech. 16:1-5). ¿Imaynatan  umalliqkuna Pablo jina jujkunata yachachinkuman? Chaypaqmi allin yachaq yanapakuq kamachikunata pusarikunkuman wakin iñiqmasikunata waturikunankupaq. Chhaynapin paykunapas yachanqaku jujkunata imayna yachachiyta, pacienciakuq kayta, munakuq kayta, Jehová Diospi confiaytapas (1 Ped. 5:2).

18. ¿Imanaqtinmi kay tiempopi jujkunata allinta preparananchis?

¹⁸ Kay tukukuy p’unchaykunapiqa allintan mosoqkunata preparana predicanankupaq. Chaymantapas qharikunatan preparana iñiq t’aqapi Diospa ovejankunata michinankupaq. Jehová Diosqa llapan serviqninkuna allin preparasqa kananchistan munan, chayraykun Jesús jina, Pablo jina tukuy atisqanchista kallpachakunanchis mosoqkunata preparananchispaq. Tukukuy p’unchayqa cercapiñan kashan, chayrayku llapa yanapana kaqkunata preparananchis.

19. ¿Pikunan yanapawasunchis jujkunata allinta preparananchispaq?

¹⁹ Mosoqkunata preparanapaqqa necesitakunmi tiempota kallpata ima. Chayraykun Jehová Diosqa Jesuspiwan allinta yanapawasunchis jujkunata preparananchispaq. Chay preparasqanchiskuna predicacionpipas iñiq t’aqapipas ‘mana sayk’uspa llank’aqtinkutaq’ anchatapuni kusikusunchis (1 Tim. 4:10). Ichaqa lliumi kallpachakunanchis espiritualpi wiñananchispaq, Dios sonqo kananchispaq, Jehová Diosman astawan k’askakunanchispaqwan.