1, 2. a) ¿Imaraykun nisunman: “Atisunmanmi mosoq runa kaywan churakuyta”, nispa? b)  Colosenses 3:10-14 textopi willasqanman jina, ¿imakunatan nikun “mosoq runa kay” nispa?

“MOSOQ runa kaywan p’achakuychis” nisqa simiqa iskay kutitan rijurin Mosoq pachaq Biblian Diospa palabran nisqa Bibliapi (Efes. 4:24; Col. 3:10). Chayta nispaqa nishan Diospa munasqanman jina kausaymantan. Ichaqa, ¿atisunmanchu Diospa munayninman jina mosoq runa kaywan p’achakuyta? Arí, atisunmanmi. Noqanchisqa Diospa rijch’ayninman jinataq kamasqa karanchis chayqa, atisunmanmi paypa munayninman jina kausayta pay jina kaytapas (Gén. 1:26, 27; Efes. 5:1).

² Ichaqa juchasapa runakunataq kanchis chayqa, manapaschá facilchu kanqa chayta ruway. Muyuriqninchispi tiyaq runakunapas samaykuwasunpaschá. Chhaynaña kaqtinpas khuyapayakuq Diosninchispa yanapayninwanqa atillasunmi paypa munayninman jina kausayta. Chaypaqmi  ichaqa mosoq runa kaywan p’achakunanchis. ¿Imaynatan chayta ruwasunman? Chaytan kaypi yachasun (leey Colosenses 3:10-14). Chaykunan yanapawasun predicacionpipas.

3. Mosoq runa kaspaqa, ¿imaynatan kausasun noqanchispura?

³ Pabloq nisqan jina mosoq runa kaspaqa igual-llan piwanpas kasun. Paymi niran: “Mosoq runa kaypiqa igual-llan kanku griego runawan judío runawanqa, qhari kaynin qaracha kuchusqa runawan mana kuchusqa runawanpas, kamachi runawan libre kaqwanpas, waj llaqtayoqwanpas escita * runakunawanpas”, nispa (Col. 3:11). Chhaynaqa ima colorña kasunman, may nacionmantaña kasunman, qhapaqña kasunman chaypas manan jujkunataqa sarunchananchischu. Cristianokunaqa “jujllan kanchis” manan noqanchispiqa t’aqanakuy kananchu (Gál. 3:28).

4. a) ¿Imaynan trato kanan cristianopurapi? b) ¿Iman mayninpi jark’awasunman jujlla kananchista?

⁴ Mosoq runa kaspaqa respetowanmi pitapas tratasun, manan qhapaq kasqanraykuchu ni imaraykuchu pimanpas sayapakusun (Rom. 2:11). Wakin partekunapiqa manan facilchu chay. Sudáfrica nacionpipas colorninkuman jinan autoridadkunaqa runakunata t’aqaranku. Wakin partepin kasharan yuraq colorniyoq runakuna, wakin partepitaq yana colorniyoq runakuna, wakin partepiñataq mestizo runakuna. Kunankamapas chhayna t’aqanasqallan runakunaqa tiyashanku, Testigokunapas chhaynallan kasharanku. Chaymi Umalliq t’aqamanta hermanokunaqa chay nacionpi iñiqmasikuna ‘sonqonkuta jatunta kicharinankupaq’ yanaparan (2 Cor. 6:13). 2013 watapin juj programa aparikuran llapa hermanokuna imayna colorña kanku chaypas paykunapura reqsinakunankupaq.

5, 6. a) ¿Imatan ruwakuran Sudáfrica nacionpi hermanokuna jujlla kanankupaq? (21 paginapi fotokunata qhaway.) b) ¿Iman karan chay ruwakusqanmanta?

⁵ Chay programapiqa sapanka congregacionmanta hermanokunan ima simitaña rimaranku chaypas ima colorña karanku chaypas sapa semana tukuyta kuska predicananku karan. Kuskan juñunakuykunamanpas rinanku karan, wasinkumanpas invitanakunankun karan. Chay programapiqa askha congregacionkunan participaranku. Chayta rikuspan askha hermanokuna juj runakuna ima sucursalman cartakunata qelqaranku. Juj pastormi nisqa: “ May admiranapaqmi qankunaq imayna organizasqa kasqaykichisqa, jujlla kasqaykichispas”, nispa. Iñiqmasikunari, ¿imaynan karanku chay programawan?

⁶ Xhosa rimay congregacionmanta Noma sutiyoq hermanaqa manan munasharanchu  inglés simita rimaq hermanokunata wasinman invitayta, ¿imarayku? Payqa p’enqasqan kasharan, “qhawawanqakupaschá” nispan nisharan. Ichaqa chay hermanokunawanmi payqa predicaran chaymantataq wasinkuman invitaranku. Chayraqmi payqa niran: “Paykunaqa noqanchis jinallamá kasqaku”, nispa. Chaymi paypa congregacionninman inglés rimaq hermanokuna jamuqtinqa wasinman invitaran wakin hermanokunata. Jujnin invitasqan hermanoqa umalliqmi karan, yuraq colorniyoqtaqmi karanpas. Chay hermanan nin: “Chay p’unchayqa may admirasqan kasharani, paykunaqa pampallapin tiyarunku”, nispa. Chay programaqa kashallanmi kunankamapas. Chay programaq kasqanwanmi askha hermanokunaña reqsinakushanku. Imaymana claseña kanku chaypas astawanraqmi paykunaqa reqsinakuyta munashanku.

7. ¿Imaraykun khuyapayakuq kananchis?

⁷ Satanaspa kamachisqan kay mundopiqa kashallanqan llakikuykuna. Mayninpiqa manapaschá llank’anata tarisunchu, onqorusun imapaschá, jujkunapaschá cheqnikuwasun, ima desgraciapipaschá tarikusun, suwa imapaschá suwawasun. Chayraykun llapanchispas yachananchis khuyapayakuq kayta. Khuyapayakuq kaymi yanapawasun sumaq sonqowan jujkunata yanapanapaq (Efes. 4:32). Chhaynapin rikuchisun mosoq runa kaywan p’achakusqanchista, Dios jina kasqanchista, sonqochakuq kasqanchistapas (2 Cor. 1:3, 4).

8. ¿Iman kanqa munakuq khuyapayakuq kaqtinchis? Juj ejemplota willay.

⁸ ¿Imaynatan rikuchisunman munakuq kasqanchista juj lado nacionkunamanta jamuqkunaman, wajchakunamanpas? Paykunata sumaqta chaskispa yanapaspa ima. Chaymantapas familiapi jinan paykunaqa kananku (1 Cor. 12:22, 25). Dannykarl sutiyoq runamanta yachasun. Payqa Filipinas nacionmantan Japonman astakusqa. Llank’ananpiqa Japonmanta llank’aqkunallamansi allin tratota qoqku paymansi ichaqa mana. Ichaqa juj kutinsi payqa Jehová Diospa testigonkunaq juñunakuyninman risqa, chaypiqa sumaqtas chaskisqaku. Pay kikinmi nin: “Chay juñunakuypiqa Japonmantan yaqa llapankupas kasqaku, ichaqa unayñapas reqsinakuykuman karan jinaraqmi sumaqta chaskiwaranku”, nispa. Chay hermanokunaqa chhayna sumaqtan sapa kutinpas chaskiqku, chhaynapin paypas Testigo jina bautizakapuran. Kunanqa umalliqmi payqa kashan. Umalliqmasinkunan paymanta ninku: “Kay hermanoqa esposanwan kuskan kusata yanapakunku. Paykunaqa precursorkunan kanku, manataqmi imapipas afanasqachu kausanku, aswanmi ejemplo kanku Diospa gobiernonta ñaupaqta maskhaypi”, nispa (Luc. 12:31).

9, 10. ¿Ima bendicionkunatan wakin iñiqmasikuna chaskiranku khuyapayakuq kasqankumanta?

⁹ Bibliaq nisqan jina ‘lliupaqmi imachus allin kaqta ruwapunanchis’ (Gál. 6:10). Chaytaqa rikuchisun jujkunaman Diosmanta yachachispan. Chayta ruwanankuraykun wakin hermanokunaqa juj simikunata yachashanku, chaywantaqmi kusisqa kashanku (1 Cor. 9:23). Yachasun  Australia nacionpi Tiffany sutiyoq hermanamanta. Payqa Brisbane llaqtapi suajili rimay congregacionpis yanapakuyta munashasqa, chaysi chay simita yachayta qallarisqa. Sasaña paypaq karan chaypas imaymanakunatas chaypi yachasqa. Paymi nin: “Pipas kusisqa serviyta munan chayqa, juj simita rimaq congregacionpin servinan. Juj llaqtapipas kashawaq jinan chayqa. Chaypin rikunki Diospa llaqtanqa jujlla kasqanta”, nispa.

¹⁰ Japonpi juj familiamanta yachallasuntaq. Paykunapas juj runakunata yanapanankuraykun juj simita yachallasqakutaq. Sakiko sutiyoq ususinkun nin: “1990 watakunapiqa askhatan predicacionpi tariq kayku Brasilmanta runakunata. Chaymi portugués rimay Bibliankupi Apocalipsis 21:3, 4 textota; Salmos 37:10, 11, 29 textota ima leepuq kayku, wakinqa waqaspa imaraqmi uyariqku chay leesqaykuta”, nispa. Paykunata khuyapayaspas chay familiaqa estudiasqaku portugués simita. Yanapakusqakus Japonpi portugués simipi congregación kananpaqpas. Askha runakunatas paykunaqa yanapasqaku Diosta servinankupaq. Sakikon nillantaq: “Manan facilchu karan portugués simita yachayqa. Ichaqa may kusisqan kashayku imaymana bendicionkuna chaskisqaykumanta. Anchatan Diostapas ‘gracias’ niyku tukuy ima qowasqankumanta”, nispa (leey Hechos 10:34, 35).

11, 12. a) ¿Imapaqmi mosoq runa kaywan p’achakunanchis? b) ¿Iman yanapawasun k’umuykukuq kananchispaq?

¹¹ ¿Imaraykun mosoq runa kaywan p’achakunanchis? ¿Jujkuna jatunchawananchispaqchu? Manan, aswanpas Jehová Dios jatunchasqa kananpaqmi. Ichaqa juj ch’uya angelpas jatunchakuqmanmi tukupuran, chhaynapin juchallikuran (tupachiy Ezequiel 28:17 textowan). Noqanchisqa juchasapa runakunataq kanchis chayqa faciltan jatunchakuqman tukusunman. Chaymi k’umuykukuq kaywan p’achakunanchis. ¿Imaynatan chayta ruwasunman?

¹² Sapa p’unchaymi Bibliata leenanchis, leesqanchispitaq allinta piensananchis (Deut. 17:18-20). Chaymantapas Jesuspa yachachisqankunapin piensananchis,  paypa ejemplontataq qatikunanchis (Mat. 20:28). Payqa k’umuykukuq kayninpin apostolkunaq chakintapas maqchiran (Juan 13:12-17). Chaymantapas Diospa espirituntan mañakunanchis, chay espiritun yanapawasun ama imawanpas creekunanchispaq (Gál. 6:3, 4; Filip. 2:3).

13. ¿Imakunan kanqa k’umuykukuq kaqtinchis?

¹³ (Leey Proverbios 22:4). Jehová Diosqa k’umuykukuq kananchistan munan. K’umuykukuq kasun chayqa imaymana bendicionkunatan chaskisun, iñiqmasikunawanpas sumaqtan kausasun, Diospas astawanmi munakuwasun. Apóstol Pedropunin niran: “Llapaykichispas k’umuykukuq kaywan p’achakuychis [...] Diosqa uma oqariqkunaq contranpin kashan, k’umuykukuq kaqkunamanmi ichaqa ancha sumaq sonqo kayninta rikuchin”, nispa (1 Ped. 5:5).

14. ¿Pin allin ejemplo llamp’u sonqo kaypi pacienciakuq kaypipas?

¹⁴ Wakin runakunan llamp’u sonqo runakunata pacienciakuq runakunatawan ninku: “Cobarden payqa”, nispa. Ichaqa manan chhaynachu, pacienciakuq kaypas llamp’u sonqo kaypas Jehová Diosmantan jamun. Paypunin chhayna kanapaq ejemplota qowaranchis (2 Ped. 3:9). Chay ejemplokunan rikukun Abrahanwan rimasqanpi Lotwan rimasqanpi ima (Gén. 18:22-33; 19:18-21). Chaymantapas 1500 wata masmi pacienciakuran Israel runakunawan (Ezeq. 33:11).

15. ¿Ima ejemplotan Jesús qowaranchis?

¹⁵ Jesuspas ‘llamp’u sonqon karan’ (Mat. 11:29). Discipulonkunawanpas pacienciakuranmi. Enemigonkunaña imaymanata k’amiranku, yanqa tumparanku chaypas pacienciallawanmi aguantaran. K’aspimanña warkuranku chaypas manan kutipakuranchu, aswanmi Jehová Diosta niran: “Perdonay kay runakunata, paykunaqa manan yachankuchu imatachus ruwashanku chayta”, nispa (Luc. 23:34). Rikusqanchis jina Jesusqa imaymanapiña sufriran chaypas pacienciakuranmi. Chhaynapin paypas allin ejemplo noqanchispaq karan (leey 1 Pedro 2:21-23).

16. ¿Imaynatan rikuchisunman llamp’u sonqo pacienciakuq kasqanchista?

¹⁶ ¿Imaynatan rikuchisunman llamp’u sonqo pacienciakuq kasqanchista? Jujkunata perdonaspa. Pablon niran: “Qankunapura paciencianakuychis, perdonanakuychis razonwanña pipaqpas phiñasqa kashankichis chaypas. Imaynan Jehová Diospas tukuy sonqowan perdonarasunkichis chhaynallatataq qankunapas ruwaychis”, nispa (Col. 3:13). Chaypi nisqanta kasukunapaqqa llamp’u sonqon kana, yachanataqmi pacienciakuq kaytapas. Chhaynapin iñiqmasinchiskunawan juj sonqolla kasunchis.

17. ¿Imaraykun llamp’u sonqo pacienciakuq kananchis?

¹⁷ Jehová Diosmi munan llamp’u  sonqo kananchista pacienciakuq kananchistapas. Mosoq pachapi tiyayta munanchis chayqa p’achakunanchismi llamp’u sonqo kaywan pacienciawan ima (Mat. 5:5; Sant. 1:21). Chaykunawan p’achakusun chayqa Jehová Diostan jatunchasun, jujkunatapas yanapasunmi Diospa siminta kasukunankupaq (Gál. 6:1; 2 Tim. 2:24, 25).

18. Munakuq kasun chayqa, ¿imatan mana jayk’aqpas ruwasunchu?

¹⁸ Munakuq kasun chayqa facilmi noqanchispaq kanqa kay estudiopi yachasqanchikunata kasukuy. Manataqmi pimanpas sayapakusunchu. Ñaupa tiempopi wakin cristianokunaqa qhapaqkunatan wajchakunamanta aswan allinpaq qhawariqku, paykunamanmi discípulo Santiago yuyarichiran “runamasiykitan qan kikiykita jina munakunki” nisqa kamachikuyta. Chaymantataq niran: “Kaqllachus runakunata imaynachus kasqankuman jina ajllashawaqchis chayqa, juchatan ruwashawaqchis”, nispa (Sant. 2:8, 9). Chhaynaqa, runamasinchistachus colorninkuman jina, imachus kaqninkuman jina, estudionkuman jina ajllakusunman chayqa manan munakuqchu kashasunman. Chaymantapas pitapas munakuspaqa manan simillawanchu munakuna aswanmi sonqomanta munakuna.

19. ¿Imaraykun p’achakunanchis munakuq kaywan?

¹⁹ Chaymantapas “pipas munakuqqa pacienciakuqmi, sumaq sonqon” “manan jatunchakunchu” (1 Cor. 13:4). Chhayna kasun chayqa pacienciawanmi Diospa gobiernonmantapas willamusun (Mat. 28:19). Chaymantapas munakuq kasun chayqa llapa iñiqmasikunawanmi thajpi sumaqta kausasun. Jatunchasunmi Jehová Diostapas. Juj runakunapas Diospa llaqtanman jamuytan munanqaku. Bibliapipunin nin: “Munakuywan p’achakuychis, munakuymi lliuta allintapuni jujllaman tukuchin”, nispa (Col. 3:14).

20. a) ¿Ima nispan tapukunanchis? ¿Imarayku? b) ¿Imaynan jamuq tiempopi kausay kanqa?

²⁰ Juchasapa runakunataq kanchis chayqa manapaschá facilchu kanqa mosoq runa kaywan p’achakuy. Chaymi tapukunanchis: “¿Imatawanmi ruwanay ñaupa kausayniyta qonqapunaypaq? ¿Jehová Diospa munayninman jinachu piensayniy kashan?”, nispa. Chaymantapas Jehová Diospa yanapaynintan mañakunanchis, tukuy atisqanchistataqmi kallpachakunanchis millay piensaykunata umanchismanta wijch’upunapaq (Efes. 4:23, 24). Chayta ruwasun chayqa jaykusunmi Diospa gobiernonman (Gál. 5:19-21) ¡Chay gobiernonpiqa wiñaypaqmi churakusunchis mosoq runa kaywan!