1, 2. a) ¿Imaraykun mayninpi Jehová Diosta nisunman “¿jayk’aqkama?” nispa? b) ¿Imatan ñaupa tiempopi Diosta serviqkunapas tapukuranku? ¿Imatan chaymanta yachasunman?

PROFETA Habacucmi Diosta tapuran: “¿Jayk’aqkamataq wajakamusayki?”, nispa. Profeta Isaiaspas chhaynatan tapullarantaq (Hab. 1:2; Is. 6:11). Rey Davidpas pisqa kutitan chhaynata tapukuran Salmos 13 capítulo qelqasqanpi (Sal. 13:1, 2). Jesuspas chhaynatan tapukullarantaq runakuna Diospi mana iñisqankuta rikuspa (Mat. 17:17). Chhaynaqa yaqapaschá noqanchispas jayk’aqllapas chhaynata tapukuranchis, chaywanqa manan llakikunanchischu.

² Yaqapaschá pipas ima mana allintapas ruwawaranchis, yaqapaschá kuraqña kashanchis otaq onqosqapas kashanchis, yaqapaschá ‘sinchi sasa tiempokunaq’ kasqanrayku llakisqa kashanchis (2 Tim. 3:1). Mayninpiqa runakuna millay kasqanraykupaschá manaña ganas kanchu ima ruwanapaqpas. Chhaynapi tarikushanchis chayqa yaqapaschá Jehová  Diosta niranchis: “¿Jayk’aqkaman Diosniy kaykuna kanqa?”, nispa. Ichaqa, ¿juchachu chayta niy? Manan. Yachasqanchis jina ñaupa tiempopi Diosta serviqkunapas tapukurankun chaytaqa, manataqmi Diosqa juchacharanchu paykunata.

3. ¿Iman yanapawasunman sinchi llakipi tarikuqtinchis?

³ ¿Iman yanapawasunman sinchi llakipi tarikuqtinchis? Jesuspa wayqen Santiagon Diospa yuyaychasqan kaspa niran: “Wayqe-panaykuna, Señorpa chayamunan tiempokama pacienciakuychis”, nispa (Sant. 5:7). Chhaynaqa imatapas aguantanapaqqa pacienciakuqmi kananchis. Ichaqa, ¿iman pacienciakuq kay? ¿Imaynatan rikuchisunman pacienciakuq kasqanchista?

4, 5. a) ¿Iman pacienciakuq kay? ¿Imaynatan rikuchisunman pacienciakuq kasqanchista? b) ¿Ima niranmi Santiago pacienciakuq kaymanta? (3 paginapi dibujota qhaway.)

⁴ Bibliaq nisqan jina pacienciaqa Diospa espiritunmantan paqarimun. Chaymi noqallanchismantaqa mana atisunmanchu pacienciakuq kayta. Chaymantapas pacienciaqa Diospa regalonmi. Pacienciakuq kaspaqa Diostawan runamasinchistawan munakusqanchistan rikuchisun. Manachus pacienciakuq kasun chayqa, manan faciltachu pitapas munakusun (1 Cor. 13:4; Gál. 5:22). Chaymantapas pacienciakuq kasun chayqa, pacienciallawanmi ima sasachakuytapas aguantasun (Col. 1:11; Sant. 1:3, 4). Imapiña tarikusun chaypas manan jayk’aqpas Diostaqa saqesunchu, manataqmi pimantapas vengakusunchu. Santiago 5:7, 8 (leey) textopi nisqan jina, pacienciakuq kaspaqa pacienciallawanmi imatapas suyakusun.

⁵ Ichaqa, ¿imaraykun pacienciallawan suyakunanchis Diospa promesan junt’akunanta? Santiagoq nisqan jina, noqanchisqa chajra llank’aq runa jinan kanchis. ¿Imaynataq chayri? Chajra llank’aq runaqa tarpukullanmi mujunta, ichaqa manan paychu parachin ni tarpusqantapas wiñachin. Manataqmi payqa atinmanchu tarpusqan ñaupamunanta ni qhepamunantapas. Aswanmi pacienciallawan suyakun cosechanan tiempo chayamunanta. Chhaynatan noqanchispas pacienciallawan suyakunanchis Diospa promesankuna junt’akunanta. Manan makinchispichu kashan chay p’unchay ñaupamunanpaq ni qhepamunanpaqpas (Mar. 13:32, 33; Hech. 1:7). Chaymi chajra llank’aq runa jina pacienciallawan suyakunanchis chay p’unchay chayamunanta.

6. ¿Imatan yachasunman profeta Miqueasmanta?

⁶ Noqanchisqa profeta Miqueaspa tiemponpi jinan kashanchis. Paypa tiemponpiqa Ahasmi rey kasharan, runakunapas sinchi millaymanmi tukupuranku, ‘mana allinkaqta ruwanankupaqpas kusallañan’ kaqku (leey Miqueas 7:1-3). Miqueasqa manañan imatapas ruwayta atiranchu, chaymi niran: “Noqan ichaqa Señor Diospi makilla suyakusaq, qespichiwaqniy Diostan suyakusaq”, nispa (Miq. 7:7). Pay jinan noqanchispas Jehová Diosta pacienciawan suyakunanchis.

7. ¿Imaraykun kusisqa suyakunanchis Diospa promesankuna junt’akunanta?

⁷ Sichus Miqueas jina iñiyniyoq kasun chayqa tukuy sonqowanmi Diospa p’unchaynin  chayamunanta suyakusunchis. Chaymantapas manan wañunanpaq sentenciasqa preso jinachu suyakushanchis wañunanchis p’unchay chayamunanta. Aswanmi noqanchisqa suyakushanchis Diospa wiñay kausay qowananchis p’unchay chayamunanta. Chaymi ima llakipiña tarikusunman chaypas kusisqa suyakushananchis chay p’unchayta (Col. 1:11, 12). Chaymantapas, ¿ima ninmanmi Jehová Dios p’unchaynin chayamunanta llakisqa, renegasqa suyakuqtinchis? Manachá allintachu qhawariwasunman (Col. 3:12).

8. ¿Imakunapin allinta piensananchis ñaupa tiempopi Diosta serviq runakunamanta yachasqanchisman jina?

⁸ ¿Iman yanapawasunman pacienciakuq kananchispaq? Ñaupa tiempopi Diosta serviq runakunaq ejemplonmi. Paykunapas pacienciawanmi suyakuranku Diospa promesanta, chaymi kunan chay runakunamanta yachasun (Rom. 15:4). Ichaqa, ¿jayk’a tiempon suyakuranku? ¿Imaraykun suyakuranku? ¿Ima bendicionkunatan chaskikuranku? Chaykunapi allinta piensasun sapankamanta yachasqanchisman jina.

9, 10. ¿Jayk’a watatan Abrahanwan Sarawan suyakuranku Diospa promesan junt’akunanpaq?

⁹ Ñaupaqtaqa Abrahanmanta Saramantawan yachasun. Paykunaqa “iñiywan pacienciawan” suyakusqanku qhepatañan “promesata” chaskiranku. Bibliaq nisqan jina, “pacienciawan suyakusqan qhepatañan Abrahanqa chaskiran” askha  mirayniyoq kananpaq promesata (Heb. 6:12, 15). Ichaqa chay promesa junt’akunanpaqpas pacienciawanraqmi suyakunan karan, ¿imarayku? Unay tiempomantaraq junt’akunan kasqanrayku. Chaymantapas askha mirayniyoq kananpaq promesaqa 1943 watamanta 14 p’unchay nisán killamantaraqmi yupayta qallarikuran. Chay p’unchaypin Abrahanqa Sarawan kuska Éufrates mayuta chimpamuranku jinaspa prometesqa allpaman chayamuranku. Chaymantapas 25 watataraqmi suyakunan karan wawayoq kananpaq; paypa wawan Isaacqa 1918 watapin naceran. Nietonkuna kananpaqtaq suyakuran 60 watataraq. Esauwan Jacobwanqa 1858 watapin naceranku (Heb. 11:9).

¹⁰ ¿Qoranchu Jehová Dios Abrahanman kay pachapi ima herenciatapas? Biblian nin: “Manan ima herenciatapas kaypiqa qoranchu, ni chakinta churaykunallanpaqpas. Ichaqa prometeranmi payman mirayninmanwan kay allpata qopunanpaq, chaytaqa prometeran manaraq wawayoq kashaqtinmi”, nispa (Hech. 7:5). Abrahanpa Éufrates mayuta chimpamusqanmantapachaqa 430 watan pasaran miraynin juj nación kananpaq (Éx. 12:40-42; Gál. 3:17).

11. a) ¿Imaraykun Abrahán pacienciallawan suyakuran? b) ¿Ima bendicionkunatan chaymanta chaskiran?

¹¹ Abrahanmanqa imaymanatan Diosqa prometeran, ichaqa manan lliuchu kausasqan tiempopi junt’akuran; chaywanpas Diospi confiasqanraykun payqa pacienciallawan chaykunata suyakuran (leey Hebreos 11:8-12). Paymantaqa askha capitulokunapin Bibliaqa willashan. * Chaymantapas paypa mirayninmantan Jesusqa jamuran, chaywanmi Diospa munayninpas junt’akuran. ¡Kausarimpusqan qhepaman chaykunata yachaspaqa maytachá Abrahanqa kusikunqa! ¡“Allipaqchá pacienciakurani” ninqachá!

12, 13. a) ¿Imaraykun José pacienciakuq kanan karan? b) ¿Phiñakuranchu José chaykunapi tarikusqanmanta?

¹² Kunanqa Abrahanpa nietonpa wawan Josemantañataq yachasun. Payqa imaymanakunapiña sufriran chaypas pacienciawanmi chaykunata aguantaran. Ñaupaqtaqa 17 watanpi jinallaraq kashaqtinmi esclavota jina venderanku. Chaymantataq patronninpa warminta violaqmanta tumparanku. Yanqaña chay tumpasqanku karan chaypas Josetaqa carcelmanmi wisq’aranku (Gén. 39:11-20; Sal. 105:17, 18). Chaykunapiña tarikushaspapas manan Diostaqa saqeranchu. Bendicionkunata chaskinanmantaqa castigokunatapas chaskishanman jinan kasharan. Ichaqa 13 wata jina pasasqan qhepamanmi imapichus tarikusqan jujllapi cambiaran. Carcelmanta lloqsispanmi Egiptopi jatun autoridad kapuran, Faraonllan paymanta kuraqqa karan (Gén. 41:14, 37-43; Hech. 7:9, 10).

¹³ ¿Renegaranchu José chaykuna pasasqanmanta? ¿“Diosqa manan yanapawanmanchu” niranchu? Manan, aswanmi pacienciakuran, ¿imarayku? Jehová Diospi confiasqanrayku. Payqa allintan yacharan  Diospa yanapananta, chaymi wayqenkunatapas niran: “Ama manchapakuychischu, noqaqa manan Dioschu kani. Qankunaqa mana allinniypaqmi yuyaykurankichis, Diosmi ichaqa allinman tukuchiran kunan rikusqanchista ruwanapaq, askha runata kausachinapaq”, nispa (Gén. 50:19, 20). Chhaynapin Joseqa cuentata qokuran suyakusqanqa mana yanqapaqchu kasqanta.

14, 15. a) ¿Imaraykun Davidpa pacienciakusqan admirakunapaq jina? b) ¿Iman Davidta yanaparan pacienciawan Diospi suyakunanpaq?

¹⁴ Kunanqa rey Davidmantañataq yachasun. Paypas imaymana ñak’ariykunapin tarikuran. Paytaqa waynallaraq kashaqtinmi Jehová Dios ajllakuran Israel llaqtapi rey kananpaq. Davidmi ichaqa 15 watataraq suyakunan karan Judá ayllupi rey kananpaq (2 Sam. 2:3, 4). Chaykamaqa juj llaqtakunapi, llaqta jawakunapi, qaqa t’oqokunapi iman Davidqa tiyaran, ¿imarayku? Rey Saúl wañuchiyta munasqanrayku. * Tiempowanqa wañupuranmi Saulqa, chaywanpas qanchis watatawanraqmi Davidqa suyakunan karan llapa Israel llaqtapi rey kananpaq (2 Sam. 5:4, 5).

¹⁵ ¿Imaraykun David pacienciallawan chaykunata aguantaran? Salmos 13 capitulopin pay kikin chayta willakun, chay capitulopin Jehová Diostapas pisqa kutita tapuran: “¿Jayk’aqkamataq qonqapuwanki?”, nispa. Niranmi: “Noqaqa ancha munakuyniykimanmi k’askakuni, sonqoypin qespichiwasqaykimanta kusikuni. Señor Diosníy, qanpaqmi takisaq allinkunata ruwapuwasqaykimanta”, nispa (Sal. 13:5, 6). Chaypi rikusqanchis jina, Davidqa confiaranmi Jehová Diospi. Chaymantapas ñaupa tiempokunapi Diospa yanapasqanpin payqa piensaq, chaykunan yanaparan pacienciallawan Diospi suyakunanpaq. Chhaynapin Davidpas yacharan allinpuni pacienciakuy kasqanta.

16, 17. ¿Imaynatan Jehová Diospas Jesuspas rikuchiranku pacienciakuq kasqankuta?

¹⁶ Jehová Diosqa manan kamachikullanchu pacienciakuq kananchispaq, pay kikinmi ejemplota qowanchis (leey 2 Pedro 3:9). Payqa waranqa-waranqa watakunan pacienciawan suyakushan Edén huertapi Satanaspa rimasqanqa yanqa kasqanta rikuchinanpaq. Chaymantapas tukuy yuyaywanmi suyashan sutin ch’uyanchasqa kanan tiempo chayamunanta. Chay tiempo chayamuqtinqa ‘kusisqan paypi suyakuqkunaqa’ kasunchis (Is. 30:18).

¹⁷ Jesuspas allin ejemplon pacienciakuq kanapaqqa. Kay pachapi kashaspaqa wañunankaman Diospaq junt’aq sonqo karan. 33 watapi janaq pachaman rispapas 1914 watakaman suyakuran gobiernayta qallarinanpaq (Hech. 2:33-35; Heb. 10:12, 13). Llapa enemigonkuna  chinkananpaqpas waranqa wata gobiernasqan tukunankamaraqmi suyakunqa (1 Cor. 15:25). Yaqapaschá unayta suyakunan kanqa ichaqa may munaymi chay qhepaman kausayqa kanqa.

18, 19. ¿Iman yanapawasun pacienciawan suyakunanchispaq?

¹⁸ Llapanchismi yachananchis pacienciakuq kayta, suyakuq kaytapas. Ichaqa, ¿imatan ruwananchis chaypaq? Jehová Diospa espirituntan mañakunanchis, chay espiritun yanapawasun pacienciakuq kananchispaq (Efes. 3:16; 6:18; 1 Tes. 5:17-19). Chhaynaqa Jehová Diospa yanapayninta mañakusun, chhaynapin yachasun pacienciakuq kayta.

¹⁹ Amapuni qonqasunchu Abrahanpa, Josepa, Davidpa ejemplonkunata. Kaypi yachasqanchis jina, paykunaqa pacienciawanmi suyakuranku Jehová Diospa promesankuna junt’akunanta. Chaymantapas paykunaqa tukuy sonqon Diospi confiaqku, manataqmi paykunaq munaynillankupichu piensaqku. Chhayna kasqankumanta ima bendicionkunatachus chaskiranku, chaypin noqanchispas piensananchis chhaynapin pacienciawan imatapas aguantasun.

20. ¿Pillapin suyakunanchis?

²⁰ Ima sasachakuypiña tarikusunman chaypas pacienciawanmi Jehová Diosllapi suyakunanchis. Yaqapaschá mayninpiqa tapukusun “¿jayk’aqkama Diosniy?” nispa (Is. 6:11). Ichaqa Jehová Diospa espiritunpa yanapayninwanmi profeta Jeremías jina nisunchis: “Señor Diosmi noqapaqqa lliu imaymanay, chaymi paypi suyakushani”, nispa (Lam. 3:21, 24).