1, 2. a) ¿Iman kanqa Diosta astawan munakuqtinchis? b) ¿Imamantan kay estudiopi yachasunchis?

JEHOVÁ DIOSNINCHISQA munakuwasqanchisraykun prometewaranchis juj premiota qowananchispaq, chaymi paytaqa anchata munakunanchis (1 Juan 4:19). Astawan payta munakuqtinchisqa iñiyninchispas astawanmi wiñanqa, arí, aswan allintan reparasunchis payqa munakusqankunaman premiota qoq kasqanta (leey Hebreos 11:6).

² Jehová Diosqa tukuy sonqo serviqninkunamanqa qonqapunin premionkuta. Manachus chaypi confiasunman chayqa, manan iñiyninchisqa junt’asqachu kanman. Bibliaq nisqan jina, “iñiyqa imatachus suyashanchis chayta cheqaqpaqpuni jap’iymi” (Heb. 11:1). Iñiyniyoq kanapaqqa manapunin iskayananchischu Dios premio qowananchismanta. ¿Imaynatan chay premiota suyakuy allinninchispaq kanman? ¿Ima premiotan Jehová Dios ñaupa tiempopi qoran?  ¿Ima premiotan kay tiempopi qowashanchis? Chaykunamantan kay estudiopi yachasunchis.

3. ¿Imatan Jehová Dios prometekuran Malaquías 3:10 textopi?

³ Sichus tukuy atisqanchista Dios serviypi ruwasunchis, premio chaskinanchismantapas mana iskayasunchu chayqa, bendicionnintan Diosqa qowasunchis. Payqa niranñan: “Probaykuwaychis, ajinapin yachankichis janaq pacha ventanakunata kicharispa saminchata llimp’arishaqta jich’aykamusaykichischus icha manachus chayta”, nispa (Mal. 3:10). Chay promesanmanta agradecekunanchispaqqa nisqanman jinan payta probaykunanchis.

4. ¿Iman rikuchin Mateo 6:33 textopi Jesuspa nisqan cheqaqpuni kasqanta?

⁴ Jesusqa yacharanmi Diosqa promesankunata junt’aqpuni kasqanta (Is. 55:11). Chaymi discipulonkunata niran: ‘Diospa gobiernonta ñaupaqta maskhankichis chayqa, Diosmi yanapasunkichis’, nispa (leey Mateo 6:33). Chayraykun tukuy sonqonchiswan Jehová Diospi confiananchis. Paymi niran: “Manan jayk’aqpas saqesaykichu, manan jayk’aqpas qonqasaykichu”, nispa (Heb. 13:5). Chay nisqanmi rikuchin discipulonkunaman Jesuspa nisqanqa cheqaqpuni kasqanta.

5. ¿Imatan yachasunman Pedroman Jesuspa kutichisqanmanta?

 ⁵ Juj kutinmi apóstol Pedro Jesusta niran: “Noqaykuqa tukuy imata saqespaykun qatikamushaykiku, ¿imataq noqaykupaqri kanqa?”, nispa (Mat. 19:27). Jesusqa manan Pedrota phiñarikuranchu chay tapusqanmanta, aswanmi llapa discipulonkunaman prometeran juj premiota chaskinankupaq. Paykunaqa juj cristianokunapiwanmi janaq pachapi Jesuswan kuska kamachinanku karan. Ichaqa chay tiempopipas chaskisharankuñan bendicionkunataqa, chaymi Jesusqa niran: “Pipas wasintapas, wayqenkunatapas, panankunatapas, taytantapas, mamantapas, wawankunatapas, allpankunatapas sutiyrayku saqeqqa, pachaj kutitawanraqmi chaskinqa, wiñay kausaytaq herencian kanqa”, nispa (Mat. 19:29). Chaypi nisqan jina, Diospa llaqtanpi kaqkunaqa familianchiskuna jinan kanku. Chaymi Diosrayku ima saqesqanchismantapas aswan valorniyoq.

6. ¿Imaraykun Jehová Dios juj premiota prometewanchis?

⁶ Kay tiempopi bendicionkuna chaskisqanchismantapas aswan jatun bendicionkunataraqmi jamuq tiempopiqa chaskisunchis (1 Tim. 4:8). Chaykunapi piensasun chayqa, aguantasunmi ima sasachakuytapas. Arí, Jehová Dios ‘tukuy sonqowan maskhaqninkunaman premiota qoqpuni kasqanpi’ confiaspaqa tukukuykaman Dios sonqo kasunchis (Heb. 11:6).

7. ¿Imanaqtinmi suyakuyta anclawan tupanachikun?

⁷ Diospa serviqninkunamanta wakinqa janaq pachapin premionkuta chaskinqaku, chaymi Jesusqa niran: “Anchatapuni kusikuychis, janaq pachapi premioykichisqa jatunmi, chhaynatapunin profetakunatapas ñaupa tiempopiqa qatikacharanku”, nispa (Mat. 5:12). Wakinmi ichaqa kay pacha paraisopi wiñaypaq kausasunchis (Sal. 37:11; Luc. 18:30). Chay iskay suyakuykunaqa ancha kusikunapaqmi, chaymantapas ‘ancla jinan vidanchispaq, cheqaqpunitaqmi mana kuyuriqtaqmi kanpas’ (Heb. 6:17-20). Imaynan anclapas barcota sayachin jatun wayrakuna kaqtin, chhaynallataqmi suyakuyninchispas allinta sayachiwasun, chhaynapi ima pruebatapas aguantananchispaq.

8. ¿Imaynatan suyakuyninchis yanapawasunman?

⁸ Suyakuyninchisqa yanapawasunmanmi ama nishuta imamantapas llakikunanchispaq. Imaynan sumaq jawinapas cuerponchista llamp’uyachin, chhaynallataqmi Diospa promesankunapas sonqonchista “thaj” nichin. Llakipakuyninchiskunata Diosman saqesunchis chayqa, paymi sumaqta cuidawasunchis (Sal.  55:22). Payqa ‘imakunachus mañakusqanchismantapas aswantaraqmi imatapas ruwanman’ (Efes. 3:20). Chaymi manapuni paymantaqa iskayananchischu.

9. ¿Imanaqtinmi mana iskayananchischu Diospa promesankunamanta?

⁹ Premionchista chaskinanchispaqqa Jehová Diospin confiananchis, kamachikuyninkunatapas kasukunanchismi. Chaymi Moisesqa Israel runakunata niran: “Diosmi jap’ikapunaykichispaq qonasuykichis suyupi saminchasunkichis, Señor Diosniykichistachus kasukunkichis, kunan kamachisqay paypa tukuy kamachikuyninkunatachus junt’ankichis chayqa, prometesqasuykichisman jinan Diosniykichis Señor Diosqa saminchasunkichis”, nispa (Deut. 15:4-6). Chhaynaqa manan razón kanchu paymanta iskayananchispaq. ¿Tukuy sonqowanchu Jehová Diospa promesankunapi confianchis?

10, 11. ¿Imaynatan Jehová Dios Joseta yanaparan?

¹⁰ Bibliaqa allinninchispaqmi qelqasqa karan. Chaypin willakushan Jehová Dios serviqninkunaman premiota qosqanmanta (Rom. 15:4). Jujnin serviqninmi karan José. Paytaqa wayqenkunan kamachita jina vendepuranku. Chaymantataq Joseqa Egiptopi carcelman wisq’asqa karan patronninpa warmin yanqamanta tumpasqanrayku. ¿Qonqapuranchu Jehová Dios Joseta? Manan. Payqa ‘Josewanmi kasharan’, sumaqtataqmi qhawariranpas. Chaymi Biblia nin: ‘Josepa imapas ruwasqantaqa Diosmi allinyachiran’, nispa (Gén. 39:21, 23). Carcelpiña kasharan chaypas, Joseqa confiashallaranmi Jehová Diospi.

¹¹ Tiempowanqa Egipto reymi payta orqochipuran carcelmanta, jinaspa payman qatiq kamachikuqta churaran (Gén. 41:1, 37-43). Chaymantan payqa wawakunayoq kapuran. Phiwi churintan suticharan “Manasés” nispa, jinaspa niran: “Diosmi qonqachipuwan lliu muchuyniyta, taytaypa lliu aylluntapas”, nispa. Juj kaqtataq suticharan “Efraín” nispa, jinaspa niran: “Diosmi mirachiwan llakikusqay suyupi”, nispa (Gén. 41:51, 52). Joseqa Diospa bendicionnintan chaskiran payman jap’ipakusqanrayku. Josewanmi Diosqa Israel runakunata Egipto runakunatapas yanaparan ama yarqaymanta wañunankupaq. Joseqa allintan reparakuran Diospuni payta yanapashasqanta (Gén. 45:5-9).

12. ¿Iman Jesusta yanaparan pruebakunata aguantananpaq?

¹² Jesucristopas askha pruebakunapin tarikuran, chaywanpas Diosmanmi jap’ipakuran, chaymi premiotapas chaskiran. ¿Iman payta yanaparan aguantananpaq? Chaymantan Biblia nin: “Payqa  qhepaman kusikunanta yachaspan ñak’arina k’aspita aguantaran, manataqmi p’enqakuranchu chhayna p’enqay wañuytapas”, nispa (Heb. 12:2). Jesusqa kusikuranmi kasukuq kaspa Diospa sutinta ch’uyanchasqanwan. Chaymi Diosqa sumaqta payta qhawarispa ‘paña ladonpi tiyachiran’, jinaspa “aswan allin puestota qoran, sumaq sonqo kayninpitaq lliu sutimantapas aswan allin sutita qoran” (Filip. 2:9).

13, 14. ¿Imaynatan Jehová Dios qhawarin payrayku imatapas ruwasqanchista?

¹³ Jehová Diosqa allinpaqmi qhawarin payrayku imapas ruwasqanchista. Payqa entiendewanchismi imatapas mana ruway atikuqpaq jina qhawariqtinchis, llank’ananchismanta llakikuqtinchis otaq familianchista uywanapaq qolqemanta llakikuqtinchispas. Wakinninchisqa llakisqapaschá kashanchis onqosqa kasqanchisrayku manaña ñaupaqpi jinachu servisqanchismanta, chaytapas Diosqa allintan yachan. Payqa allinpaqmi qhawariwasunchis sasachakuykunapi kashaspapas payman jap’ipakuqtinchis (leey Hebreos 6:10, 11).

¹⁴ Chaymantapas paymanta mañakuqtinchisqa tukuy yuyaywanmi payqa uyariwasunchis (Sal. 65:2). “Paymi may khuyapayakuq Yayaqa, tukuy ima llakipi kallpachaq Diospas”. Chaymi tukuypi yanapawasunchis payman k’askasqa kananchispaq. Mayninpiqa iñiqmasinchiskunawanmi yanapawasunchis (2 Cor. 1:3). Chaymantapas Jehová Diosqa kusikunmi jujkunata yanapaqtinchis. Biblian nin: “Wajcha runaman manuyqa Señor Diosman manuymi, Señor Diosmi manusqantaqa kutichipunqa”, nispa (Prov. 19:17; Mat. 6:3, 4). Sichus tukuy sonqowan iñiqmasinchiskunata yanapasunchis chayqa, Jehová Diosmi chaymanta bendeciwasunchis.

15. ¿Ima premiotan tukuy sonqo suyakushanki? (21 paginapi dibujota qhaway.)

¹⁵ Janaq pachapaq ajllasqa cristianokunaqa ‘chanin kaqkunaman’ Jesuspa qosqan ‘coronatan’ chaskinqaku (2 Tim. 4:7, 8). ‘Waj ovejakunapas’ jatun premiotan chaskinqaku. Paykunaqa paraisopin wiñaypaq kausanqaku, chaypin ‘sumaq thaj nisqa tiyakunqaku’ (Juan 10:16; Sal. 37:11).

16. ¿Imaynatan yanapawasunman 1 Juan 3:19, 20 texto?

¹⁶ Chaywanpas mayninpiqa sinchi llakisqan tarikusunman. Yaqapaschá nisunman: “Diospaq ima ruwasqaypas nishu pisimá. Noqaqa manan ima premiotapas chaskinaypaq jinachu kani”, nispa. Chhaynata piensashanchis chayqa, “yuyarinanchismi Diosqa sonqonchismanta aswan jatun kasqanta, chaymantapas payqa yachashanmi tukuy imatapas” (leey 1 Juan 3:19, 20). Sichus Diospa promesankunapi iñisqanchisrayku, payta munakusqanchisraykupiwan servishanchis chayqa, pisillataña ruwaqtinchispas payqa qowasunpunin premionchista (Mar. 12:41-44).

17. ¿Ima premiotan Diosta serviqkuna kay tiempopi chaskishanchis?

 ¹⁷ Kay sasa tiempokunapipas Jehová Diosqa qoshanñan premiota serviqninkunaman. Payqa llapa serviqninkunatan allinta yachachishan, llapankumantaqmi thaj kaytapas qoshan (Is. 54:13). Chaymantapas pachantinpi llapa serviqninkunatan yanapashan juj familia jina sumaqta kausanankupaq (Mar. 10:29, 30). Tukuy sonqonkuwan payta maskhasqankuraykun llapankuman thaj kayta kusikuytapas qoshan (Filip. 4:4-7).

18, 19. ¿Ima ninkun Jehová Diospa serviqninkuna bendicionkuna chaskisqankumanta?

¹⁸ Chay bendicionkunata chaskispan Jehová Diosta serviqkunaqa ancha kusisqa kashanku. Alemania nacionmanta Bianca iñiqmasinchismi niran: “Maytan Jehová Diosta agradecekuni sapa p’unchay ladoypi kasqanmanta. Kay pachapi kausayqa sinchi millaymi kashan, llakikunapaqtaqmi kanpas. Ichaqa Diospa llaqtanpi kaspaqa makiymantapas pay jap’iwashanman jinan kusisqa kausani. Imatapas Diosman qoqtiyqa pachaj kutitawanraqmi payqa kutichipuwan”, nispa.

¹⁹ Yachasunchis Canadá llaqtayoq Paula iñiqmasinchismanta, payqa 70 watanpin kashan, onqosqataqmi kashan wasa tullunmanta. Chaywanpas payqa tukuy atisqantan ruwan predicananpaq. Paymi nin: “Noqaqa telefonopi, may tarikusqaypipas predicashallanin. Chaymantapas juj cuadernopin qelqarani wakin textokunata, qelqanchiskunamanta orqosqay allin yachachikuykunatawan; chaykunatan leeshallani kallpachakunaypaq. Diospa promesankunapi tukuy yuyaywan piensaspaqa manan reparanipaschu nanayniykunata. Jehová Diosqa ladollanchispin kashanqa yanapawananchispaq”, nispa. Manaña chay hermanakuna jinachu tarikusunman chaypas, chaskiranchischá Jehová Diospa bendicionninta, rikuranchischá jujkunatapas imayna yanapasqanta. Chaymi piensashanallanchis kay tiempopi chaskisqanchis bendicionkunapi, jamuq tiempopi chaskinanchis bendicionkunapipas.

20. ¿Imatan chaskisunchis tukuy sonqowan Diosta servisunchis chayqa?

²⁰ Sichus tukuy sonqowan Diosmanta mañakusunchis, paypa munaynintapas ruwasunchis chayqa, ‘ancha allin premiotan chaskisunchis’ (Heb. 10:35, 36). Chayrayku iñiyninchispi allinta kallpachakusun, tukuy kallpanchiswantaq Jehová Diosta servisun. Payqa qowasunpunin premionchistaqa (leey Colosenses 3:23, 24).