1, 2. ¿Imanaqtinmi Romanos 8 capítulo allinpuni ajllasqa cristianokunapaq?

JESUSPA wañupusqanta yuyarina killakunapiqa leeranchischá Romanos 8:15-17 textota. Chay textopin willakun imaynatas ajllasqa cristianokuna yachanku janaq pachapaq ajllasqa kasqankuta chayta. Romanos 8:1 textopas willanmi ajllasqakunaqa ‘Cristo Jesuswan jujllachasqa kasqankumanta’. Chhaynaqa, ¿ajllasqakunallapaqchu chay capítulo kanman, icha paraisopi kausayta suyakuqkunapaqwanchu kanman?

² Romanos libropi 8 capituloqa ajllasqa cristianokunapaqmi ñaupaqtaqa qelqasqa karan. Paykunan santo espirituta chaskinku ‘Diospa wawankuna jina adoptasqa kanankupaq, aycha cuerponkumanta kacharichisqa kanankupaqwan’ (Rom. 8:23). Paykunatan Jehová Diosqa Jesuspa sacrificakusqanrayku juchankumanta perdonapuran  chaninpaq ima qhawariran. Chaymi paykunaqa Diospa wawankuna kanqaku janaq pachapi (Rom. 3:23-26; 4:25; 8:30).

3. ¿Imanaqtinmi paraisopi kausayta suyakuqkunapas estudiananku Romanos 8 capitulota?

³ Ichaqa manan ajllasqakunallatachu Diosqa chaninpaq qhawariran. Romanos libropi 4 capitulopin apóstol Pablo qelqaran Abrahanmanta. Paytapas Jehová Diosqa chaninpaqmi qhawariran. Payqa kausaran manaraq Jesús kay pachaman jamuspa sacrificiota jaywashaqtinmi (leey Romanos 4:20-22). Chhaynaqa paraisopi kausayta suyakuqkunatapas chaninpaqmi Diosqa qhawarin. Paykunatapas yanapanmanmi Romanos libropi 8 capituloqa.

4. ¿Imatan tapukunanchis Romanos 8:21 textota leespa?

⁴ Romanos 8:21 nisqan jina, Jehová Diosqa mosoq pachapin juchamanta wañuymantawan kacharichiwasun. Chaypachan lliupas ‘Diospa wawankuna jina libre kapusunchis’. Chaymi tapukunanchis: “¿Imatan ruwanay chayman chayanaypaq?”, nispa. Qatiqninpin chaymanta yachasunchis.

5. ¿Imamantan Pablo rimasharan Romanos 8:4-13 textopi?

⁵ Leey Romanos 8:4-13. Pusaq capitulopin Pablo rimaran ‘aychaq munayninman yuyayta churaqkunamanta’ ‘espirituq  munayninman yuyayta churaqkunamantawan’. Wakinmi chayta leespa piensanku cristianokunamanta mana iñiqkunamantawan Pablo rimashananpaq. Ichaqa ‘ch’uya kanankupaq ajllasqakunallapaqmi’ Pabloqa chay cartata qelqaran (Rom. 1:7). Chhaynaqa chay aychaq munayninman yuyayta churaqkuna, espirituq munayninman yuyayta churaqkunapas cristianokunan karanku.

6, 7. a) ¿Imamantan Bibliapi riman “aycha” nisqa simi? b) ¿Imamantan “aycha” nisqa simi rimashan Romanos 8:4-13 textopi?

⁶ Griego rimaypi “aycha” nisqa simiqa wakin textokunapin aycha cuerponchismanta rimashan (Rom. 2:28; 1 Cor. 15:39, 50). Wakin textokunapitaq piwanpas familiantin kaymanta rimashan. Ejemplopaq, Jesusmantan Biblia nin: ‘Davidpa mirayninmantan naceran’, nispa. Pablopas “wayqe-panaykuna” nispan niran judiomasinkunata (Rom. 1:3; 9:3).

⁷ ¿Imaynan kanku ‘aychaq munayninman jina kausaqkuna’? (Rom. 8:4-13.) Chayta yachanapaq leesun Romanos 7:5 textota, chaypin Pablo niran: “Aychanchispa munayninman jina kausashaqtinchismi kamachikuy simiqa sut’iman orqoran juchaman aysaq munapayaykunata”, nispa. Chaypi nisqan jina, aychaq munayninman jina kausaqkunaqa sonqonkupi imatapas munapayasqankuman jina kausaqkunan kanku.

8. ¿Imanaqtinmi Pablo cristianokunata kamachiran ama “aychaq munasqanman jina” kausanankupaq?

 ⁸ Pi cristianopas aychanpa munasqanman jinan kausayta qallarinman. Chaymi apóstol Pabloqa ajllasqa cristianokunata niran chaymanta cuidakunankupaq. Roma llaqtapi wakin cristianokunaqa ‘aychankuq kamachinkunañan kasharankupas’. Yaqapaschá paykunaqa warmi-qhari puñuypi, mijuypi, otaq chay jina kusirikuykunallapi ocupasqa kasharanku (Rom. 16:17, 18; Filip. 3:18, 19; Jud. 4, 8, 12). Chaymantapas Corinto llaqtapin juj hermano qhelli juchapi purisharan ‘taytanpa warminwan’ (1 Cor. 5:1). Chaykunaraykun Pabloqa cristianokunata niran ama “aychaq munasqanman jina” kausanankupaq (Rom. 8:5, 6).

9. ¿Ima ruwananchistan Romanos 8:6 mana jark’awashanchischu?

⁹ Noqanchispas kasukunanchismi apóstol Pabloq nisqanta. Unayña Jehová Diosta servishasunman chaypas, ‘aychanchispa munasqanman jinan’ kausayta qallarisunman. Chhaynaqa ¿manañachu cristianokuna piensananchis mijunapi, llank’anapi, imawanpas kusirikuypi, casarakuypipas? ¿Chaytachu Pablo nisharan? Manan. Chay ruwaykunapi piensayqa manan juchachu. Jesuspas kusikuranmi mijuspa, jujkunaman mijuchispa ima; payqa t’aqaranmi tiempota samarinanpaqpas. Pablopas allintan rimaran casarasqa warmi-qhari puñuymanta.

10. ¿Iman ‘aychaq munayninman yuyayta churay’?

¹⁰ Griego rimaypi “yuyayta churay” nisqa simiqa “tukuy yuyaywan ima ruwaypipas piensay” ninantan nin. Juj allin yachaq runan niran: ‘Aychaq munayninman yuyayta churaqkunaqa ima munasqallankupin piensanku, chayllamantan rimanku, chayman jinataqmi kausankupas’, nispa.

11. ¿Ima ruwaykunapin mana nishuta piensananchischu?

¹¹ Roma llaqtapi cristianokunaqa allintan qhawarikunanku karan imamanchus yuyayninkuta churasharanku chayta. Noqanchispas kaqllatataqmi ruwananchis. Chaypaqmi tapukunanchis: “¿Imallamantan tukuy tiempo rimashani? ¿Ima ruwaymi nishuta gustawan?”, nispa. Wakinqa yaqapaschá nishuta piensanchis imaymana clase ujanakuna tomaypi, wasinchista sumaqyachiypi, p’acha rantikuypi, qolqenchista imayna mirachiypi, otaq maytapas viajaypi. Chay ruwaykunaqa manan juchachu. Ejemplopaq, juj kutinmi Jesús casarakuy fiestapi unuta vinoman tukuchiran. Pablopas Timoteotan yuyaycharan onqoyninpaq “juj chikan vinota” ujananpaq (1 Tim. 5:23; Juan 2:3-11). Ichaqa, ¿chayllapiñachu paykuna piensaranku? Manan. Noqanchisri, ¿imapin tukuy tiempo piensanchis?

12, 13. ¿Imanaqtinmi allinta qhawarikunanchis imamanchus yuyayninchista churashanchis chayta?

¹² Sichus “aychaq munayninman” jina kausasunman chayqa, manañan Jehová Diospa amigonkunachu kasunman,  wiñay kausaymanpas manañan chayasunmanchu. Chaymi apóstol Pablo niran: “Aychaq munayninman yuyayta churayqa wañuymanmi apan”, nispa (Rom. 8:6). Chayrayku, ima juchamanpas urmasunman chayqa, cambiananchismi imaynan Corinto llaqtapi juchanrayku qarqochikuq hermanopas cambiaran jinata. Payqa saqepuranmi juchanta, jinaspa wajmanta Jehová Diosta serviran (2 Cor. 2:6-8).

¹³ Payqa “aychaq munayninman” jina kausaspan jatun juchapi puriran, chaywanpas cambiaranmi. Chhaynaqa, pi iñiqmasinchispas aychaq munayninman jina kausayta qallarinman chayqa, atinmanmi cambiayta. Chaymantapas yuyarinanmi imapichus chhayna kausaqkuna tukunqaku chayta.

14, 15. a) ¿Imamanmi yuyayninchista churananchis? b) ¿Imatan Pablo mana nisharanchu ‘espirituq munayninman yuyayta churaychis’ nisqanwan?

¹⁴ “Aychaq munayninman yuyayta” mana churanamanta rimaspan Pabloqa niran: “Espirituq munayninman yuyayta churaymi ichaqa kausayman thaj kayman ima apan”, nispa. ¡Chayqa ancha sumaq premion!

¹⁵ Chhaynaqa, ¿Jehová Diosmanta Bibliamantawan rimaspallañachu maypipas kananchis? ¿Chayllapiñachu piensananchis? ¿Chay ninantachu Pablo nisharan ‘espirituq munayninman yuyayta churaychis’ nisqanwan? Manan. Apostolkunaq tiemponpi cristianokunapas normaltan mijukuqku, casarakuqku, wawakunayoq kaqku, llank’anayoqpas kaqku (Mar. 6:3; 1 Tes. 2:9).

16. ¿Iman Pablopaq imamantapas aswan importante karan?

¹⁶ Chaywanpas cristianokunapaqqa manan chay ruwaykunachu aswan importante karan. Apóstol Pablopas karpakunata ruwaspaña llank’aran chaypas, manan chay llank’ananchu paypaqqa aswan importante karan. Paypaqqa Diosta serviymi aswan allin karan, chaymi Diosmanta willaypi yachachiypi ima ocupasqa kasharan (leey Hechos 18:2-4; 20:20, 21, 34, 35). Roma llaqtapi cristianokunaqa Pablo jinan kananku karan. Noqanchispas pay jinan kananchis (Rom. 15:15, 16).

17. ¿Imaynan kausasunchis ‘espirituq munayninman yuyayninchista churasun’ chayqa?

¹⁷ Sichus Jehová Diospa munayninta ruwaspa kausasunchis chayqa, kusisqan kasunchis, jamuq tiempopitaq wiñay kausayta chaskisunchis. Chaymi Romanos 8:6 nin: ‘Espirituq munayninman yuyayta churayqa kausayman thaj kayman iman apan’, nispa. Chaypaqmi Diospa santo espiritunwan pusachikunanchis, Diospa piensasqanman jinataq piensananchispas.

18. ¿Ima bendiciontan Dios qowallasuntaq ‘espirituq munayninman yuyayninchista churaqtinchis’?

 ¹⁸ Apóstol Pabloq nisqan jina, ‘espirituq munayninman yuyayta churayqa’ thaj kaymanmi apan. Jehová Diosmi chay thaj kaytaqa qowasunchis, chhaynapi ama juj runakuna jina llakipakushananchispaq. Chaymantapas thaj kaymi kanqa familianchispi iñiq t’aqapipas. Chaywanpas mayninpiqa kanqapunin iñiqmasinchiskunawan ima phiñachinakuypas. ¿Imatan ruwananchis chay pasaqtin? Kaq raton chay iñiqmasinchiswan allipunakapunanchis (Mat. 5:24). ‘Thaj kayta qoq Diosta’ servisqankuta yuyariymi yanapawasun chayta ruwanapaq (Rom. 15:33; 16:20).

19. ¿Piwanmi thajpi kallasuntaq ‘espirituq munayninman yuyayta churasunchis’ chayqa?

¹⁹ ‘Espirituq munayninman yuyayta churasunchis’ chayqa, Dioswanpas thajpin kausasunchis. Profeta Isaiasmi niran: “Señor Diosníy, qanqa thaj kaypin waqaychanki ñaupaqeykipi qaqa sayaq runataqa, qanmanpuni jap’ipakusqanrayku”, nispa (Is. 26:3; leey Romanos 5:1).

20. ¿Imaynatan Romanos 8 capítulo yanaparuwanchis?

²⁰ Kaypi rikusqanchis jina, janaq pachapaq ajllasqa cristianokunatapas, paraisopi kausayta suyakuqkunatapas allintan Romanos 8 capituloqa yanapawasunman. Chaymi anchata Jehová Diosta agradecekunanchis. Chay capitulon allinta kallpacharuwanchis Jehová Dios serviypi ocupasqa kananchispaq, aychaq munayninmanta karunchakunanchispaqwan. Sichus ‘espirituq munayninman yuyayninchista churasunchis’ chayqa, ‘wiñay kausaytan’ chaskisunchis Señorninchis Jesucristorayku (Rom. 6:23).