MANARAQ chay pasashaqtinmi noqaqa yachaytapuni munarani Diosmanta. Mamaymanmi qosqaku Bibliamanta willaq wakin qelqakunata, chaykunatan noqaqa estudiayta munarani. Anchatan gustawaq chay qelqakunapi kaq dibujokuna. Papaymi ichaqa mana munaqchu chay qelqakunamanta mamay yachachiwananta. Chaywanpas noqaqa yachayta munaspan mamayta imaymanata tapuq kani, chaymi papay lloqsinankama mamayqa wasipi yachachiwaq. Chhaynapin decidikurani Jehová Diosta servinaypaq, chaymi 1943 watapi Inglaterra nacionpi Blackpool llaqtapi bautizakurani chunka wataypi kashaspa.

Chaymantapachan mamaywan kuska sapa kuti predicaq kani. Chay tiempopiqa tocadiscokunawanmi predicaq kayku. Jatun tocadiscokunan karan, tawa kilo mastan pesaqpas. Chaymi ñak’ayta chaykunata apaq kani.

 14 watallaypiraq kashaspaymi precursor kayta munarani. Chaymi mamay niwaran ñaupaqta watukuq umalliqwan rimanaypaq. Jinan chay umalliq niwaran: “Yachanaykiraqmi ima oficiotapas chaywan mantenekunaykipaq”, nispa. Chaymi iskay wata llank’arani. Chay qhepamanmi juj watukuq umalliqwanñataq rimarani, jinan payqa “allinmi, kawaqñan precursorqa” nispa niwaran.

Chaymi 1949 watapi abril killapi mamaywan kuska Middleton llaqtaman ripurayku precursor kanaykupaq. Chayman astakunaykupaqqa wakin cosasniykutan regalapurayku, wakintataq vendepurayku. Tawa killamantataq juj precursor predicaqmasiy kapuran. Sucursalmi iskayniykuta niwaranku Irlam llaqtapi chayllaraq qallariq iñiq t’aqaman ripunaykupaq, jinan chayman ripurayku. Mamitaytaq juj hermanapiwan juj iñiq t’aqapi yanapakuranku.

Chay iñiq t’aqapiqa pisillan karanku yachachinankupaq jina kaq hermanokuna, chaymi 17 watallaypiraq kasharani chaypas, precursormasiywan juñunakuykunata ruwaq kayku. Chaymantataq Buxton llaqtapi kaq iñiq t’aqaman ripurani yanapakuq, chaypiqa pisillan karanku predicaqkunaqa. Chhaynata yanapakuspaymi preparakurani Diospa llaqtanpi juj llank’aykunata chaskinaypaq.

1951 watapin solicitudta junt’arani “Galaad” nisqa escuelaman rinaypaq. 1952 watapi diciembre killapin ichaqa cuartelman jaykunaypaq wajawaranku. Jinan juezkunata nirani: “Manan atiymanchu, noqaqa tukuy tiempoywanmi Diosta servishani”, nispa. Paykunan ichaqa soqta killapaq carcelman wisq’achiwaranku. Chaypi kashaqtiymi Galaad escuelaman rinaypaq invitación chayamuwaran. Ichaqa 1953 watapi julio killapi carcelmanta lloqsispañan chay escuelaman rirani, clase 22 nisqaman. Georgic nisqa barcopin chaymanqa rirani.

Nueva York llaqtaman chayaspay jinan “Sociedad del Nuevo Mundo” nisqa asambleaman rirani. Chaymantataq trenpi carropi ima viajarani Lansing llaqtachaman,  chaypin chay Galaad escuelaqa aparikuq. Chayllaraqtaq carcelmanta lloqsirani chayqa, pisillan qolqey karan. Chaymi juj pasajeromanta qolqeta mañakurani pasajeyta paganaypaq.

Galaad escuelapin yachachiwaranku ‘runakunata yanapanaykurayku imaymanata ruwanaykupaq’ (1 Cor. 9:22). Noqata, Paul Bruun hermanota, Raymond Leach hermanotawanmi niwaranku Filipinas nacionman ripunaykupaq. Chaypaqmi ichaqa iskay kinsa killataraq suyarayku “visa” nisqa documentota chaskinaykupaq. Chaymantataq barcopi viajarayku Países Bajos nacionpi Rotterdam llaqtaman. Chaymantataq barcollapitaq viajarayku Malasia nación ladoman Hong Kong llaqta ladomanwan. 47 p’unchaymi barcopi viajarayku, chhaynapin 1954 watapi 19 noviembrepi chayarayku Filipinas nacionpi Manila llaqtaman.

Noqaykuqa chay llaqtapi runakunamanmi yachakunayku karan, rimasqanku simitapas yachanaykun karan. Ñaupaqtaqa Quezón llaqtapin predicayta qallarirayku, chaypiqa tagalo simitan rimanku, ichaqa askhan yachasqaku inglés simita, chaymi pisillata yacharayku tagalo simita.

1955 watapi mayo killapin Raymond hermanota noqatawan nombrawaranku watukuq umalliq kanaykupaq. Chaypaqqa 22 watallaypin kasharani, chaymi imaymanakunataraq yachanay karan “imaymana clase runakunata yanapanaypaq”.

Watukuq umalliq kaspaqa primer discursoytan qorani jawa llaqtachapi juj tiendaq chimpanpi. Chay tiempopiqa manan salón ukhupichu nitaq ima wasipipaschu jujnin kaq discursota ruwakuq. Chaymi chay jina discursokunata qorani mercadokunapi, salón comunalkunaq chimpanpi, pujllana kanchakunapi, parquekunapi, calle esquinakunapi, chay jina sitiokunapi ima. Juj kutinmi San Pablo llaqtapi juj mercadopi discursota qonay karan, ichaqa parashasqanraykun mana atiranichu, chaymi iñiq t’aqamanta encargakuqkunata nirani juñunakunanchis  wasillapiña discursota qonaypaq. Discurso qosqay qhepamantaq tapuwaranku imaynatachus chay juñunakuyta informananku karan chayta.

Noqaqa sapa kutillanmi hermanokunaq wasinpi alojakuq kani. Wajchalla karanku chaypas, limpiotan wasinkuta jap’iqku. Sapa kutillan pampapi puñuq kani esterata mast’aruspa. Chaypiqa llapa runapas wasinku jawapin bañakuqku, chaymi noqaqa runakuna mana rikuwananpaq jina bañakuq kani. Noqaqqa manan carroy karanchu, chaymi juj islakunaman chayanaypaqqa mayninpi carropi viajaq kani mayninpitaq botepi.

Tagalo rimaytaqa mana ima cursoman matriculakuspallan yacharani. Chaypaqmi hermanokuna serviciopi juñunakuykunapipas yanapawaranku. Paykunaqa pacienciawanmi chay simita yachachiwaqku, chaymi anchata paykunata agradecekuni.

1956 watapin hermano Nathan Knorr Filipinas nacionman jamuran, chaymi juj jatun asambleata ruwarayku. Noqan encargasqa kasharani noticia willaqkunawan rimanaypaq. Manan imatapas chaymanta yacharanichu, jujkunan ichaqa yanapawaranku. Yaqa juj watamanta jinan juj jatun asambleata ruwallaraykutaq. Chay kutipiqa Frederick Franz hermanon visitamuwaranku. Chay asambleata qhawarinapaqqa noqan encargasqa kasharani. Chay kutipin hermano Franz discursota qonanpaq Filipinas runakunaq churakusqanku p’achawan churakuran. Chayta rikuspan hermanokunaqa anchata kusikuranku. Chaywanmi yacharani lliu runapaq jina imatapas ruway allinpuni kasqanta.

 Tiempowanqa umalliq t’aqakunata qhawariq (superintendente de distrito) kanaypaqmi nombrasqa karani. Chaypipas imaymanatan ruwanay karan. Chay tiempopin qhawachiq kayku La Felicidad de la Sociedad del Nuevo Mundo nisqa videota. Chaytaqa wasi jawapin qhawachiq kayku “proyector” nisqawan. Mayninpiqa ch’uspikunan proyectorman k’askakuqku, chaytan sasata limpiaq kayku. Chhayna videokunata qhawachiyqa manan facilchu karan, ichaqa chaywanmi askha runakuna Diospa llaqtanmanta yacharanku.

Wakin llaqtakunapi sacerdotekunaqa nishutan autoridadkunata mat’ipayaqku asamblea ruwanaykuta jark’akunankupaq. Chaymantapas discursota qonayku horapin iglesiankupi campanakunata tocaqku, chhaynapi discurso qoqta mana pipas uyarinanpaq. Chaywanpas askhan Jehová Diosmanta yacharanku, chaymi kunanqa chay llaqtakunapi askha runakuna Jehová Diosta servishanku.

1959 watapin sucursalpi llank’anaypaq wajawaranku. Askhatan chaypiqa yacharani. Juj tiempo chaypi kashaqtiymi sucursalkunata watukunaypaq nombrawaranku. Chaypaqmi waj nacionkunata viajaq kani. Chay viajasqaypin reqsirani Janet Dumond hermanata, payqa misioneran karan Tailandia nacionpi. Paywanmi juj tiempo cartakunata apachinakuq kayku, chaymantataq casarakurayku. Paywanmi 51 wataña Jehová Diosta servishayku.

33 nacionkunatan viajarani Jehová Diospa serviqninkunata waturikuspa. Chay nacionkunamanta hermanokunaqa manan igualchu kanku, chaywanpas Jehová Diosqa llapankutan sumaqta chaskin (Hech. 10:34, 35). Askha llaqtakunapi  Diosta servisqaymi allinta yanapawaran paykunata entiendenaypaq.

Anchatan kusikuni esposaywan kuska kay Filipinas nacionpi Diosta servispa, sucursalpi servispa ima. 60 watañan kashan kay nacionman jamusqaymantaqa, chay pachaqa 20.000 hermanokunallan karan, kunantaq 200.000 jina hermanokunaña kashan. Askha wataña Jehová Diosta servishani chaypas, imaymanataraqmi ruwanay kashan Diospa munasqanman jina imatapas ruwanaypaq. Yachasqanchis jina, kay watakunapin imaymana cambiokuna karan Diospa llaqtanpi, chaymi noqaykupas chay cambiokunaman yachakunayku.

Noqaykuqa tukuy atisqaykuman jinan Jehová Diospa kamachisqanta kunankama ruwashayku, chaymi ancha kusisqa kashayku. Iñiqmasinchiskunata yanapanaykupaqpas imaymanatan ruwarayku. Jehová Diospa munayninpiqa ‘imaymanatan ruwashallasaqku imaymana clase runakunata yanapanaykupaq’.