1, 2. a) ¿Imanaqtinmi llakipakuykuna kan? (Kay paginapi fotota qhaway.) b) ¿Imamantan kay estudiopi yachasunchis?

BIBLIAQ nisqan jina, “Saqraqa qaparishaq león jinaraqmi purishan pillatapas millp’uruyta munaspa” (1 Ped. 5:8; Apo. 12:17). Chaymi lliupaq imaymana llakikuykuna kan kay tiempopi. Ñaupa tiempopi Diosta serviqkunapas llakikuykunapin tarikuranku. Jujninmi karan rey David (Sal. 13:2). Apóstol Pablopas ‘llakisqan tarikuran llapa iñiq t’aqakunapi piensaspa’ (2 Cor. 11:28). ¿Imatan ruwananchis ama llakipakuykunawan ñit’ichikunanchispaq?

² Jehová Diosninchismanmi jap’ipakunanchis. Payqa munakuq tayta jinan ñaupaq tiempopipas serviqninkunata yanaparan, chaymi Biblia nin: “Tukuy llakipakuyniykichista payman saqeychis, payqa qankunamantan llakikun”, nispa (1 Ped. 5:7). ¿Imaynatan Jehová Diosman llakipakuyninchiskunata saqesunman? 1) Paymanta mañakuspa,  2) paypa simin qelqata leespa, chaypi allinta piensaspa, 3) santo espiritunwan yanapachikuspa, 4) confianza amigonchisman llakikuyninchista willaspa iman. Chaykunamantan yachasunchis kay estudiopi. Allinta qhawarikusun imaynatachus chaykunawan yanapachikusunman chayta.

3. ¿Imaynatan Jehová Diosman ‘llakipakuyninchiskunata saqesunman’?

³ Jehová Diosman llakipakuyninchiskunata saqenapaqqa paymantan tukuy sonqowan mañakunanchis. Diosqa chay ruwananchistan munan. Rey Davidpas niranmi: “Diosníy, mañakusqayta uyariykuway”, nispa. Jinaspa nillarantaq: “Señor Diosman llakipakuyniykikunata saqey, paymi qaqata sayachisunki”, nispa (Sal. 55:1, 22). Sichus ima sasachakuytapas allichanapaq tukuy atisqanchistaña ruwaranchis chayqa, manañan nishuta chaymanta llakikunanchischu, aswanpas Jehová Diosmantan mañakunanchis. Ichaqa, ¿imaynatan mañakuy yanapawasunman? (Sal. 94:18, 19.)

4. ¿Imanaqtinmi Diosmanta mañakunanchis?

⁴ Leey Filipenses 4:6, 7. Jehová Diosqa runakunaq mana aypay atisqan thaj kaytan qowasunchis paymanta mañakuqtinchis, chhaynapin payqa mana allin piensaykunamanta cuidawasun. Askha iñiqmasinchiskunapas chaskirankun chay thaj kaytaqa. Chayta chaskispan noqanchispas ima llakikuytapas aguantasunman. Chaymi Jehová Dios niwanchis: “Ama manchakuychu, qanwanmi noqaqa kashani, ama pisipaychu, noqaqa Diosniykin kani, noqan kallpachasaykipas yanapasaykipas”, nispa (Is. 41:10).

5. ¿Imaynatan Diospa simin yanapawasunman thaj kayta tarinanchispaq?

⁵ Diospa thaj kaynintaqa paypa simin qelqapin tarillasunmantaq. Chaypaqmi Bibliata leenanchis, chay leesqanchispitaq allinta piensananchis. Chaypin tarisunchis kamaqninchispa sumaq yachachikuyninkunata. Chaymi ima llakikuypiña tarikuspapas chay yachachikuykunapi piensananchis, chhaynapin allin kallpachasqa kasunchis. Chaymi yanapawasun llakipakuyninchiskunata aguantanapaq, pisiyachinapaq, chinkachipunapaqpas. Arí, Diospa siminta leesunchis chayqa, allintan ‘kallpachakusunchis, manataqmi manchakusunchu nitaq pisi kallpayasunpaschu’ (Jos. 1:7-9).

6. ¿Imaynatan Jesuspa yachachikuyninkuna yanapawasunman?

⁶ Jesuspa yachachikuyninkunapas anchatan yanapawasunchis. Payqa sumaqtan runakunata rimapayaq, chaymi pisi  kallpayashaqkuna, llakisqa kaqkunapas tukuy yuyaywan payta uyariqku (leey Mateo 11:28-30; Mar. 6:30-32). Imaynan apostolkunatapas yanaparan, chhaynatan kunan tiempopas noqanchista yanapawasunchis. Jesusqa janaq pachapiña kashan chaypas, munakuwashallanchismi. Chhaynaqa ima llakikuypiña tarikuspapas yuyarinanchismi Jesuspa yachachikuyninkunata, chhaynapin allinta kallpachakusunchis llakipakuyninchiskunata atipananchispaq (Heb. 2:17, 18; 4:16).

7. ¿Imaynatan Diospa santo espiritun yanapawasunman?

⁷ Diospa espiritunpas yanapawasunmi llakipakuyninchiskunata aguantananchispaq, chaymi Jesusqa discipulonkunata kallpacharan Diosmanta santo espirituta mañakunankupaq (Luc. 11:10-13). Chay espiritun noqanchistapas yanapawasunchis Diosman rijch’akuq kananchispaq (Col. 3:10). Arí, santo espiritun noqanchispi allin kaqkunata ‘ruruchinqa’ (leey Gálatas 5:22, 23). Chhaynapin allin cristiano kapusunchis, jujkunawanpas sumaqtan kausasunchis, chhaynapitaq thajpi kausasunchis. Kunanmi qhawasunchis ima ruwaykunapis santo espíritu yanapawasunman chayta.

8-12. ¿Imaynatan Diospa santo espiritun yanapawasunman?

⁸ Santo espiritun noqanchispi ruruchinqa “munakuyta, kusikuyta, thaj kausayta” ima. Chaymi yanapawasun iñiqmasinchiskunata munakunanchispaq, sumaqta qhawarinanchispaq, respetananchispaq ima. Chhaynapin manaña kanqañachu phiñachinakuy, qhawanakuy, llakipakuy ima, aswanpas sumaqtan paykunawan kausasunchis (Rom. 12:10).

⁹ Santo espirituqa ruruchillanqataqmi “pacienciakuyta, sumaq sonqo kayta, allin sonqo kayta” ima. Biblian nin: “Sumaqta qhawarinakuychis, munakuywan khuyapayanakuychis, tukuy sonqowantaq perdonanakuychispas”, nispa (Efes. 4:32). Chay nisqanta kasukuspapas sumaqtan jujkunawan kausasunchis, chhaynapitaq thajpi kasunchis. Imaynapiña jujkunawan phiñachinakusunman chaypas, facil-llatan allipunakapusunchis.

¹⁰ Chaymantapas santo espiritun yanapawasun ‘iñiyniyoq’ kananchispaq. Iñiyniyoq kaspaqa manañan qolqemanta nitaq ima necesitasqanchismantapas llakipakusunchu (Prov. 18:11). Aswanpas ‘imanchischus kan chayllawanmi contento kausasunchis’. Chaymantapas manan iskayasunchu Jehová Dios ima necesitasqanchistapas qowananchismanta. Paymi niran: “Manan jayk’aqpas saqesaykichu,  manan jayk’aqpas qonqasaykichu”, nispa. Chaymi apóstol Pablo jina ninanchis: “Jehová Diosmi yanapawaqniyqa, manan manchakusaqchu. ¿Imanawanmantaq runari?”, nispa (Heb. 13:5, 6).

¹¹ Santo espirituqa yanapawallasuntaqmi ‘llamp’u sonqo kananchispaq, cuerponchista kamachinanchispaqwan’. Chhayna kasunchis chayqa, manañan ima mana allintapas ruwasunñachu, chaymantapas wijch’upusunmi ‘sintipakuq kayta, phiñasqa kayta, k’araq phiñakuyta, qaparkachayta, mana respetowan millay rimayta ima’, chhaynapitaq thajpi kasunchis (Efes. 4:31).

¹² Chaymantapas yachananchismi “ancha atiyniyoq Diosman” k’umuykukuyta, chhaynapi ‘tukuy llakipakuyninchista payman saqenanchispaq’ (1 Ped. 5:6, 7). K’umuykukuq otaq juch’uyaykukuq kasunchis chayqa, reparakusunmi maykamalla imatapas ruway atisqanchista (Miq. 6:8). Jinaspa noqanchispi confiananchismantaqa Diospi confiasunchis. Chhaynapin allinta rikusunchis Diospa munakuwasqanchista yanapawasqanchistapas, manañataq llakipakuykunawan ñit’ichikusunchu.

13. ¿Imatan Jesús nisharan ‘aman jayk’aqpas llakipakunkichischu’ nisqanwan?

¹³ Mateo 6:34 textopin (leey) Jesús niran: ‘Aman jayk’aqpas llakipakunkichischu’, nispa. Chhaynaqa, ¿manañachu jayk’aqpas imamantapas llakikunanchis? Manan, Jesusqa manan chaymantachu rimasharan. Ñaupaqpi rikusqanchis jina, rey Davidpas apóstol Pablopas mayninpiqa llakipakurankun. Jesusqa manaraq imapas pasashaqtin llakipakuymanta, sinchita llakikuymantawanmi rimasharan, chhayna llakipakuyqa manan imapipas yanapawasunmanchu. Sapa p’unchaymi imaymana llakikuykuna kan, chaymi noqanchisqa mana llakikushananchischu paqarin p’unchaymanta ni ñaupaqpi imakunachus pasasqanmantapas.

14. ¿Imatan David jina ruwasunman ama nishuta llakikunanchispaq?

¹⁴ Wakin runakunaqa sinchitan llakikunku ñaupaq tiempopi mana allinkuna ruwasqankumanta. Unay watakunaña chaykuna pasaran chaypas, llakikushallankun. Rey Davidpas llakipakuranmi juchankunata yuyarispa. Chaymi niran:  “[Llakikuymanta] sonqoy phataqeqtinmi qaparini”, nispa (Sal. 38:3, 4, 8, 18). Chhaynapi tarikuspan Davidqa yuyariran Jehová Dios khuyapayakuq perdonakuq ima kasqanta. Chayta yuyarispan payqa anchata kusikuran (leey Salmo 32:1-3, 5).

15. a) ¿Imatan Davidmanta yachasunman? b) ¿Imakunatan ruwasunman imamantapas amaña nishuta llakikunanchispaq? (Qhaway “ Llakipakuyta pisiyachinapaq yanapaykuna” nisqata.)

¹⁵ Mayninpiqa imapas pasawashasqanchismantan llakipakusunman. Rey Davidpas llakipakuranmi peligropi tarikuspa (Sal. 55:2-5). Chaywanpas manan Jehová Diosmantaqa karunchakuranchu, aswanmi tukuy sonqo payta rogakuran yanapananpaq, mañakusqanman jinataqmi ruwaranpas (2 Sam. 15:30-34). Noqanchispas pay jinan ruwasunman. Imamantapas sinchita llakikunanchismantaqa tukuy atisqanchistan ruwananchis chay sasachakuyta allichanapaq, jinaspa Diospa makinpi chayta saqenanchis.

16. ¿Imaynatan kallpachawasunman Diospa sutinmanta yachay?

¹⁶ Mayninpiqa llakikusunmanpaschá imapas pasawananchispi piensaspa. Ichaqa manaraq imapas pasawashanchischu chayqa, manan chaymanta llakipakunanchischu. Manapaschá chay piensasqanchisman jinachu imapas kanqa. Chaymantapas Diospaqqa manan imapas mana atikuqqa kanchu, chaymi sutinqa “paymi ruwachin imapas kananta” ninanta nin (Éx. 3:14, NM). Chhaynaqa jamuq tiempopiqa tukuy imapas allichakullanqan, arí, Diosqa junt’achinqapunin ima munasqantapas. Chaymi Diosman jap’ipakunanchis, payqa yanapawasunmi ima llakikuyninchistapas aguantananchispaq.

17, 18. ¿Imaynatan jujkunawan yanapachikusunman?

¹⁷ Llakipakuyninchiskunata atipananchispaqqa jujkunapas yanapawasunmanmi. Paykunan kanman: esposanchis, qosanchis, confianza amigonchis, otaq iñiq t’aqapi mayqen umalliqpas. Paykunamanmi sonqonchista kicharispa ima llakikuyninchistapas willakunanchis. Biblian nin: “Llakipakuyqa runatan ñit’iykun, sumaq simin ichaqa kusichin”, nispa (Prov. 12:25). Bibliaqa nillantaqmi: “Yuyaychaq mana kaqtinqa, imachus yuyaykusqakunan qollupun, askha yuyaychaqkuna  kaqtinmi ichaqa yuyaykusqakunaqa junt’akun”, nispa (Prov. 15:22).

¹⁸ Juñunakuyninchiskunapas allintan yanapawasunman. Chaypin sapa semana munakuq iñiqmasinchiskunawan tupanchis. Paykunaqa llakikunkun noqanchismanta, listotaqmi kashanku kallpachawananchispaq (Heb. 10:24, 25). Paykunawan ‘kallpachanakuspaqa’ atillasunmi ima llakikuytapas atipayta (Rom. 1:12).

19. ¿Imaynatan yanapawasunman Diosman allinta k’askakuy?

¹⁹ Canadá nacionmanta juj umalliq iñiqmasinchismanta yachasun. Payqa juj escuelapi profesormi, onqosqataqmi kanpas. Paypaqqa nishu sasan karan chhaynapi tarikuy, umanraqmi q’oñiriran. Chaymi payqa kallpachakuran Jehová Diosman chay llakipakuyninta saqenanpaq. ¿Imatan chaypaq ruwaran? Jehová Diosmanmi astawan k’askakuran, chaymantapas mana p’enqakuspan esposanman willakuran imaynachus kashasqanta, confianza amigonkunapas allintan yanaparanku. Umalliqmasinkunapas watukuq umalliqpas allintan payta entiendechiranku Jehová Dios jina chay sasachakuyninta qhawarinanpaq. Juj doctorpas allintan entiendechiran onqosqa kasqanrayku imakunatachus manaña ruwanmanchu chayta. Jinan chay hermanoqa tiempota orqoran ejerciciota ruwananpaq allinta samananpaqwan. Chaykunawanmi payqa pisi-pisimanta llakipakuyninta atiparan. Kunanqa imapas mana ruway atinanpaq jina kaqtinqa Jehová Diosmanmi chayta saqen.

20. a) ¿Imaynatan Diosman saqesunman llakipakuyninchiskunata? b) ¿Imamantan qatimuq estudiopi yachasunchis?

²⁰ Kaypi yachasqanchis jina, Jehová Diosman llakipakuyninchiskunata saqenapaqqa paymantan mañakunanchis, simin qelqatan estudiananchis, chaypin allinta piensananchis, santo espirituwanmi pusachikunanchis, jujkunawanmi yanapachikunanchis, rinanchismi juñunakuykunamanpas. Qatimuq estudiopin yachasunchis Diospa sumaq suyakuy qowasqanchismanta (Heb. 11:6).