1-3. a) ¿Ima importante yachachikuypin creenchis? b) ¿Imaraykun ancha importante? (Kay paginapi dibujota qhaway.)

PIPAS tapusunkiman: “¿Imakunapin creenki?”, nispa chayri, ¿ima niwaqmi? Yaqapaschá niwaq: “Noqaqa Jehová Diospin creeni, paymi kamaqninchis”, nispa. Chaymantapas yaqapaschá niwaq: “Jesuspin creeni, payqa noqanchisraykun vidanta qoran”, nispa. Yaqapaschá nillawaqtaq: “Pisi tiempollamantan kay pacha paraiso kapunqa”, nispa. Ichaqa, ¿willawaqchu imatapas kausarimpuymanta?

² Wakinqa kausashaqllan manchay ñak’ariyta pasasun, chhaynaña kaqtinpas kausarimpuypi creeyqa ancha importanten. Ichaqa, ¿imaraykun importante kausarimpuypi creey? Chaymanta rimashaspan apóstol Pablo niran: “Manataq wañusqakuna kausarimpunqakuchu chayqa, manachá riki Cristopas kausarichisqachu karan”, nispa. Chaypi nisqan jina manachus Jesús kausarimpunman karan chayqa, manachá janaq pachapiqa  gobiernashanmanchu karan. Predicasqanchispas yanqapaqchá kanman (leey 1 Corintios 15:12-19). Ichaqa, yachasqanchis jina Jesusqa kausarichisqapunin karan. Chaymi noqanchisqa mana saduceokuna jinachu kananchis. Paykunaqa manan creeqkuchu kausarimpuypi. Chayrayku, runakunaña burlakunqaku chaypas rimashallasun kausarimpuymantaqa (Mar. 12:18; Hech. 4:2, 3; 17:32; 23:6-8).

³ Apóstol Pabloq nisqan jina ‘wañusqakunaq kausarimpunanmanta yachachikuyqa’ ‘Cristomanta qallariy yachachikuykunan’ (Heb. 6:1, 2). Chaymantapas Pabloqa allintan yacharan kausarimpuy kananta (Hech. 24:10, 15, 24, 25). Cristiano kananchispaqqa kausarimpuymantawanmi ñaupaqtaqa yacharanchis ¿riki? Chaywanpas astawanraqmi yachananchis kashan kausarimpuymanta (Heb. 5:12).

4. ¿Imakunatan mayninpi pipas tapuwasunman?

⁴ Chayllaraq Bibliata estudiashaspaqa yacharanchischá Lazaroq kausarimpusqanmanta. Yacharanchischá Dios sonqo runakuna kausarimpuypi creesqankutapas, paykunan karanku Abrahán, Job, Daniel ima. Chaykunataña yacharanchis chaypas, yaqapaschá pipas niwasunman: “Unay watakunañataq kausarimpuymanta willakuran chayqa, ¿creeshanallachu chaypi? ¿Bibliari willanchu jayk’aqchus kausarimpuy kanqa chayta?”, nispa. Chaykunata allinta yachayqa iñiyninchistachá kallpachanqa.

5. ¿Imamantan yachasun?

⁵ Pipas chayllaraq wañupusqanmanta kausarichisqa kanman chayqa, fácil creeymi kanman ¿riki? (Juan 11:11; Hech. 20:9, 10). Ichaqa, yaqapaschá pipas ninman: “Askha watakuna ñaupaqta juj runaq kausarimpunanmanta willakusqanpiri, ¿creeymanchu? Juj runa chayllaraq wañunman karan chaypas, unayña wañunman karan chaypas, ¿atinmanchu kausarimpuyta?”, nispa. Chaymi pasaran juj runawan. Paypa kausarimpunanmantaqa unay watakuna ñaupaqtañan willakuran. Chay pasasqanpin llapallanchis creenchis. ¿Pin karan chay runa? ¿Imaynatan chay kallpachawasunman astawan kausarimpuypi confiananchispaq?

6. ¿Imaraykun nisunman: “Salmos 118 capituloqa Jesusmantan rimashan”, nispa?

⁶ Chay runaq kausarimpunanmantan willasqaña Salmos 118 capitulopi. Chay capitulotaqa yaqapaschá rey David qelqaran. Chaypin nin: “Señorniyku, rogakuykikun qespichiwanaykikupaq [...] ¡Saminchasqan Señor Diospa sutinpi jamuqqa!”, nispa. Chhaynatan runakunapas nillarankutaq 9 nisán killapi Jerusalenman Jesús jaykushaqtin. Chayqa karan yaqaña wañupunan kashaqtinmi (Sal. 118:25, 26; Mat. 21:7-9). Ichaqa, ¿imaraykun nisunman: “Salmos 118 capitulopiqa kausarimpuymantan rimashan”, nispa?

7. ¿Imatan judiokuna Jesusta ruwaranku?

⁷ Salmos 118:22 textopin nillantaq: “Wasi perqaqkunaq wijch’usqan rumin  esquina jap’iq kapun”, nispa. Ichaqa, ¿pitan nikun “esquina jap’iq rumi” nispa? Jesustan. Paytan judiokunaqa mana chaskirankuchu aswanmi negaranku. Chaymantataq Pilatota niranku: “¡Wañuchiy chay runata!”, nispa (Luc. 23:18-23). Arí, judiokunan juchayoq karanku Jesuspa wañunanpaqqa.

8. ¿Imaynapin Jesús esquina jap’iq rumi kapuran?

⁸ Ichaqa ñataq Jesusta wañuchirankuña chayqa, ¿imaynapin ‘esquina jap’iq rumi’ kanman karan? Wañuymanta kausarispallan. Chaypaq yuyarisun Jesuspa willasqan uvas chajrayoq runamanta, chay runan cosecha tiempopi kamachinkunata kacharan chajranta llank’aqkunaman. Chay runakunan ichaqa maqaranku kamachinkunata. Jinan uvas chajrayoq runaqa niran: “Churiytachá kachasaq, paytaqa respetanqakuchá”, nispa. Ichaqa wañuchirankun paytapas. Chay jinallataqmi israelitakunapas Diospa kachasqan profetakunata maqaranku, kachamusqan churintapas wañuchiranku. Chay willakuyta willayta tukuspan Jesusqa Salmos 118:22 textopi tarikuq profeciata willaran (Luc. 20:9-17). Apóstol Pedropas chay textomantan willaran Israel llaqtapi kuraq runakunaman, umallikunamanwan. Chaypin payqa Jesusmanta rimashaspa niran: “Paytan qankunaqa k’aspipi wañuchirankichis, ichaqa Diosmi kausarichimpuran”, nispa. Chaymantataq niran: “Paymi ‘qankuna wasi sayarichiqkunaq mana valeqta jina wijch’usqaykichis rumiqa, paymi esquina jap’iq jatun kaq rumi kapun’”, nispa (Hech. 3:15; 4:5-11; 1 Ped. 2:5-7).

9. ¿Imatan willakuranña Salmos 118:22 textopi?

⁹ Kaypi yachasqanchis jina Salmos 118:22 textoqa ñaupaqmantapachan willaranña juj runa kausarimpunanmanta. Paymi karan Jesús. Jesustaqa wañuchinankun karan chaymantataq kausarichisqa kanan karan ‘esquina jap’iq rumi’ kananpaq. “Kay pachapiqa manan pitapas Diosqa ajllaranchu salvawananchispaq, aswanpas payllatan ajllaran” (Hech. 4:12; Efes. 1:20).

10. a) ¿Imamantan Salmos 16:10 texto willaranña? b) ¿Davidmantachu chay texto rimashan?

¹⁰ Juj textopas willallarantaqmi kausarimpuy kananmanta. Chay textoqa waranqa wata ñaupaqtaraqmi qelqakuran.  Chayta yachayqa astawanchá yanapawasun Diospa promesanpi confiananchispaq. Salmos 16:10 textopin David niran: “Manan noqataqa wañuy-pachapi saqerpariwankichu, manan qan sonqo kamachiykitaqa ismurichiwankichu”, nispa. ¿Imatan chaywan David nisharan? ¿Manachu jayk’aqpas wañunan karan? Bibliaq willasqan jina Davidqa machuyapuspan wañupuran (1 Rey. 2:1, 10). Chhaynaqa, ¿pimantan Salmos 16:10 textopi rimasharan?

11. ¿Jayk’aqmi apóstol Pedro explicaran Salmos 16:10 textota?

¹¹ Waranqa wata qhepamanmi Salmos 16:10 textopi Davidpa nisqanta apóstol Pedro astawan explicaran. Chayqa karan Jesuspa kausarimpusqan pisi semana qhepallamanmi. Askha runakunamanmi payqa explicaran pimantachus chay texto rimasharan chayta (leey Hechos 2:29-32). Chay kutipi Pedroq willasqan jina, rey Davidqa wañupuranmi, chaytaqa allintan yacharanku llapa uyariqninkunapas. Chaymantataq niran: “Davidqa rikushanmanpas jinan Cristoq kausarimpunanmanta rimaran”, nispa. Chhaynaqa Jesusmantan Davidqa Salmos 16:10 textopi rimasharan.

12. a) ¿Piwanmi Salmos 16:10 texto junt’akuran? b) ¿Ima nisunmanmi jamuq tiempopaq kausarimpuy promesamanta?

¹² Salmos 110:1 textomantawanmi Pedroqa rimaran imachus nisqanta runakunaman allinta entiendechinanpaq (leey Hechos 2:33-36). Chaykunata uyarispan runakunaqa allinta yacharanku ‘Jesusqa Señor kasqanta Cristo kasqantawan’. Chhaynapin llapanku yacharanku Salmos 16:10 textoqa Jesuspa kausarimpusqanwan junt’akusqanta. Apóstol Pablopas chay textokunawanmi runakunaman explicaran Jesuspa kausarimpusqanmanta. Chaymi pasaran Pisidia ladopi kaq Antioquía llaqtapi. Pablota uyariq runakunaqa admirasqan niranku: “Astawan explicariwayku”, nispa (leey Hechos 13:32-37, 42). Kaypi yachasqanchis jina Jesuspa kausarimpunantaqa unay watakuna ñaupaqtan willakuranña, junt’akurantaqmi chayqa. Chhaynan kanqa jamuq tiempopaq Diospa promesanwanpas.

13. ¿Ima nispan wakin tapukunku kausarimpuymanta?

¹³ May kusisqachá kashanchis unay watakunaña Jesuspa kausarimpunanta rimaranku chaypas, chay promesa junt’akusqanmanta. Ichaqa yaqapaschá pipas ninman: “¿Jayk’a watataq suyakusaq familiay kausarimpunantari? ¿Jayk’aqpunitaq runakunari kausarimpunqaku?”, nispa. Yaqa chhaynatan apostolkunapas Jesusta tapuranku, jinan Jesusqa paykunata niran: “Yayallan ninman jayk’aqchus ima tiempopichus imapas kanantaqa”, nispa (Hech. 1:6, 7; Juan 16:12). Chaywanpas, Bibliaqa willanmi jayk’aqchus kausarimpuy kanqa chayta.

14. ¿Imapin jujniray karan Jesuspa kausarimpusqan juj runakunaq kausarimpusqanwan?

¹⁴ Jesuspa kausarimpusqantaqa manan comparasunmanchu piqpa kausarisqanwanpas. Manachus pay kausarichisqa  kanman karan chayqa, manan kausarimpuy suyakuy kanmanchu karan. Jesuspa ñaupanta kausarimpuq runakunaqa manan wiñaypaqchu kausaranku aswanmi paykunaqa wañupullaranku. Jesusmi ichaqa manaña wañuranchu nitaqmi wañunqapaschu. Bibliaq nisqan jina “ñataq kausarimpunña chayqa, manañan payqa jayk’aqpas wañunqachu; arí, wañuyqa manapuniñan paytaqa munaychakunqañachu”. Aswanmi payqa ‘wiñay-wiñaypaq kausanqa’ (Rom. 6:9; Apo. 1:5, 18; Col. 1:18; 1 Ped. 3:18).

15. ¿Imaraykun Jesusta nikun “ñaupaq kausarimpuq” nispa?

¹⁵ Jesusqa janaq pachamanmi ripuran kausarimpuspaqa (Hech. 26:23). Ichaqa manan payllachu janaq pachamanqa rinqa. Apostolkunapas janaq pachamanmi rinanku karan, chhaynatan Jesús paykunata niran (Luc. 22:28-30). Chaypaqmi ichaqa wañupunankuraq karan, chhaynapi Cristo jina espiritupi kausarichisqa kanankupaq. Apóstol Pablon niran: “Cristoqa kausarichisqapunin karan, paymi wañusqakunamanta ñaupaq kausarimpuq kashan”, nispa. Chaymantataq wakin kausarimuqkunamanta rimashaspa niran: “Ichaqa ordenpin kanqa: Ñaupaq kausarimpuqmi Cristo kashan, chaymantataq paypa chayamusqan tiempopi paypa kaqninkuna kausarimpunqaku”, nispa (1 Cor. 15:20, 23).

16. ¿Ima tiempopin kausarimpunanku karan janaq pachaman ripuqkuna?

¹⁶ Bibliaq nisqan jina, janaq pachaman ripuqkunaqa Jesuspa chayamusqan tiempopin kausarimpunanku karan. Yachasqanchis jina Jesuspa chayamusqan tiempoqa 1914 watapin qallariran, chay tiempopin noqanchispas kausashanchis. Chhaynatan Biblia yachachin.

17, 18. ¿Iman pasanqa janaq pachapaq wakin ajllasqakunawan?

¹⁷ Imaynachus janaq pachapaq kausarimpuy kanqa chaytan Biblia nillantaq: “Wayqe-panaykuna, noqaykuqa allintan yachanaykichista munayku imachus wañusqakunawan pasanqa chayta, [...] Jesuspa kausarimpusqanpitaq iñinchis chayqa, iñinallanchistaqmi llapa paywan jujllachasqa kaspa wañupuqkunapas paywan kuska kanankupaq Diospa kausarichimpunanpi. [...] Noqanchis ukhumanta pikunachus Señorpa chayamusqan tiempokama kausashaqkunaqa manan wañuypi puñushaqkunamanta ñaupaqtachu oqarisqa kanqaku. Señor kikinmi kamachikuq kunkawan, [...] janaq pachamanta uraykamunqa, jinan pikunachus Cristowan jujllachasqa kaspa wañuranku chaykuna ñaupaqta kausarimpunqaku. Chaymantataq noqanchis ukhumanta kausashaqllaraq kaqkunapas phuyu sonqopi oqarisqa kasunchis [...] chhaynapin Señorwan kuska wiñaypaq kapusunchis”, nispa (1 Tes. 4:13-17).

¹⁸ Kaypi yachasqanchis jina, janaq pachapaq ajllasqakunaqa Jesuspa chayamusqan tiempo qallarishaqtinmi kausarimpuyta qallariranku. ¿Kay pachallapiraq kausashaqkunari? Paykunaqa manchay ñak’ariy tiempopin janaq pachaman ‘oqarisqa kanqaku’ (Mat. 24:31). Arí,  paykunaqa manan unaychu wañuypi puñunqaku, aswanmi “juj ratollapi, ñawi ch’illmiyllapi, último trompeta waqashaqtin” cambiasqa kanqaku (1 Cor. 15:51, 52).

19. ¿Imaraykun jamuq tiempopi kausarimpuyta nikun “aswan allin kausarimpuy” nispa?

¹⁹ Kay tiempopiqa yaqa llapa cristianokunan suyakushanku kay pachapi sumaq kausayta. Chay sumaq kausaymi chayamunqa kay millay kausayta Dios chinkachiqtin. Manapaschá yachakunchu jayk’aq chay p’unchay chayamunanta, ichaqa chayamunqapunin (1 Tes. 5:1-3). Chay qhepamanmi askha runakuna kausarichisqa kanqaku jinaspa kay pacha paraisopi wiñaypaq tiyapunqaku. Arí, ‘aswan allin kausarimpuytan paykunaqa chaskinqaku’, manataqmi ñaupa tiempopi kausarimpuq runakuna jinachu wajmanta wañupunqaku (Heb. 11:35).

20. ¿Imaraykun nisunman “kausarimpuyqa ordenpin” kanqa nispa?

²⁰ Bibliaq willasqan jina janaq pachaman ripuqkunaqa ordenpin kausarimunqaku (1 Cor. 15:23). Chhaynataq chayqa kay pachapi kausaqkunapas yaqapaschá ordenpi kausarimunqaku. Yaqapaschá chayllaraq wañupuqkuna ñaupaqta kausarimpunqaku reqsisqan runakuna paykunata chaskinankupaq. Ñaupa tiempopi allin yachayniyoq umallikunapas yaqapaschá ñaupaqta kausarimunqaku Diospa llaqtanta organizaypi yanapakunankupaq. Ichaqa manan chhaynapunin nisunmanchu, manataqmi chaykunapichu yuyayninchisqa kashanan. Diosta mana jayk’aq serviq runakunawanri, ¿imataq pasanqa? ¿Maypitaq paykunari kausarimunqaku? Manan yachakunchu. Ichaqa confianzawanmi kausarimpuy tiempota suyakunanchis, chaypiñan yachasun imaynas imapas kanqa chayta. Chaymantapas may jatun ruwaykunatapunin Diosqa chay tiempopi ruwanqa.

21. ¿Ima suyakuymi llapanchispaq kashan?

²¹ Chay p’unchay chayamunankaman ichaqa tukuy sonqo confiananchis Jehová Diospi. Paymi Jesuswan willachiran wañupuqkuna kausarimpunanmanta (Juan 5:28, 29; 11:23). Chaymantapas Jesuspa nisqan jina, Diospaqqa Abrahanpas, Isaacpas, Jacobpas kausashanmi (Luc. 20:37, 38). Chhaynaqa manan ima razonpas kanchu Diosmanta iskayanapaqqa. Aswanmi apóstol Pablo jina ninanchis: ‘Diospin suyakuni [...] wañusqakunata kausarichimpunanta’, nispa (Hech. 24:15).