1. ¿Imaraykun bautizakunanchis? (Kay paginapi fotokunata qhaway.)

SAPA watanmi askha runakuna bautizakushanku Testigo jina. Paykunamanta wakinqa wayna-sipaskunan kanku. Paykunaqa yaqapaschá Testigo familiapi uywasqa karanku. Qanri, ¿ñachu bautizarukunkiña? Bautizarukunkiña chayqa allinmi chay ruwasqayki. ¿Imarayku? Bautizasqa kaspallan salvasqa kasun wiñay kausaymanpas chayasun (Mat. 28:19, 20; 1 Ped. 3:21).

2. ¿Imaraykun mana manchakunachu Diosman entregakuyta?

² Bautizakuqtiykiqa imaymana bendicionkunatachá Diosqa qorasunki. Ichaqa, bautizakuyqa manan común ruwaychu. ¿Imarayku? Yuyashankipaschá chay p’unchaypi discurso qoq: “Jesucristo sacrificakusqanrayku, ¿ñachu juchaykikunamanta pesapakuspa Jehová Diosman entregakunkiña  munayninta ruwanaykipaq?”, nispa tapumusqanta. Chaypiqa “arí” nirankichá. Chaywanmi rikuchisharanki Jehová Diospa munaynin ruwanaykipaq entregakusqaykita. Ichaqa, ¿“yanqapuni chay promesata ruwarani” ninaykichu? Manan. Manan jayk’aqpas pesapakunaykichu Diosman entregakusqaykimantaqa. Manachus Diosman entregakuwaq karan chayqa, yaqapaschá Satanaspa makinpi kashawaq karan. Yachasqanchis jina Satanaspaqqa manan valenchu runaq vidanqa. Payqa maytachá kusikunman Diosta saqespa wiñay kausayta chinkachiqtiykiqa.

3. ¿Ima bendicionkunatan chaskiranki Diosman entregakusqaykimanta?

³ Imaymana bendicionkunatachá chaskiranki Jehová Diosman entregakusqaykimantaqa. Kunanqa ñataq paypa makinpiña kashanki chayqa confianzawanchá ninki: “Diosqa noqawanmi kashan, manan manchakunichu. ¿Imanawanmantaq runari?”, nispa (Sal. 118:6). Manan imapas kanmanchu Dioswan puriy jinaqa.

4, 5. a) ¿Pimantan kanqa salvasqa kanayki? b) ¿Iman kanqapuni llapa cristianopaq kuraqña waynaña kanchis chaypas?

⁴ Bautizakuranki chayqa manan tayta-mamayki Dioswan allinpi kasqanraykuchu qanpas Dioswan allinpi kanki. Qanmantan kanqa salvasqachus kanki icha manachus chayqa. Yachasqayki jina, sapankan imaymana formapi pruebaman churasqa kanchis. Juch’uyllaraq kashaspa bautizakuranki chayqa facilpaschá imapas qanpaq karan. Kunanqa ñataq wiñarunkiña chayqa manapaschá ñaupaqpi jinañachu imapas, juj sasachakuykuna imapaschá chayamusunki. Juj sipas hermanan nin: “Juch’uyllaraq kaspaqa faciltan imatapas ‘manan’ ninki. Escuelapiña cumpleaños tortata mijushanku chaypas manan sientekunkichu. Wiñaruqtiykin ichaqa sasa imapas. Mayninpiqa yaqapaschá qhariwan kayta munanki. Chaykunapi tarikuspaqa allintan yachanayki imaraykus Diospa kamachikusqan allin chayta”, nispa.

⁵ Manan wayna-sipaskunallachu sasachakuykunapiqa tarikunku. Kuraqña kashaspa bautizakuqkunapas imaymana sasachakuykunapin tarikunku. Yaqapaschá chaykuna kanqa llank’anapi, familia ukhupi ima. Kuraqña waynaña kanchis chaypas sasachakuykunaqa kanqapunin. Chaymi kallpachakunanchis Jehová Diospaq junt’aq sonqo kananchispaq (Sant. 1:12-14).

6. a) ¿Ima nispan Jehová Diosman entregakuranki? b) ¿Imatan yachachisunki Filipenses 4:11-13 texto?

⁶ ¿Iman yanapasunkiman sasachakuykunapi tarikuqtiyki? Chaypaqqa sapa kutillanmi yuyarinayki ima nispachus Jehová Diosman entregakuranki chayta. Chaypiqa imaña kaqtinpas, tayta-mamaykiña Diosta saqeqtinpas junt’aq sonqolla kanaykipaqmi prometekuranki ¿riki? (Sal. 27:10.) Chayrayku, imapiña tarikuspapas Jehová Diospa yanapayninta mañakuy chay promesaykita junt’anaykipaq (leey Filipenses 4:11-13).

7. ¿Iman salvasqa kanapaq manchakuywan khatatataywan llank’ay?

⁷ Jehová Diosqa amigon kanaykitan munan. Paypa amigon kaspa salvasqa kanaykipaqmi  ichaqa tukuy atisqaykita kallpachakunayki. Filipenses 2:12 textopin nishan: “Manchakuywan khatatataywan ima sapankaykichis llank’ashaychis salvasqa kayman chayanaykichispaq”, nispa. Chaypaqqa allinta piensaspan imatapas ruwanayki, chhaynapin imaña kaqtinpas Jehová Diosmanta mana t’aqakunkichu. Ichaqa amapunin qanllapiqa confiakunkichu. Wakinqa unayña Diosta servishaspapas saqerankun payta. ¿Imakunan yanapasunkiman qanwan chay ama pasananpaq?

8. a) ¿Imaynatan Diosta uyarisunman? b) ¿Imaraykun allinpuni Bibliatapas qelqanchiskunatapas estudiay?

⁸ Diospa amigon kanapaqqa allintan payta uyarinanchis. Ichaqa, ¿imaynatan uyarisunman? Bibliata leespa, qelqanchiskunata leespa iman. Chaymi sapa p’unchay chaykunataqa leenanchis. Ichaqa Bibliatapas qelqanchiskunatapas leespaqa manan yachanallapaqchu leenanchis. Aswanmi allinta piensarispa, “¿imatan kay Diosmanta yachachiwan?” nispa tapurikuspa ima, allin yuyaywan leenanchis. Chayta ruwanki chayqa astawanmi Diosman achhuykunki paypas astawanmi qanman achhuykamusunki (Sant. 4:8).

9. ¿Imakunawanmi yanapachikuranki Bibliata estudianaykipaq?

⁹ Diospa llaqtanpiqa imaymana yanapaykunan kashan Bibliata estudianapaq. Chaypaqqa yaqapaschá jaykuwaq jw.org  nisqa paginaman. Chay paginapin kashan “wayna-sipaskuna” nisqa parte, chay ukhupitaq kashan “Bibliata estudianapaq yanapaykuna” nisqa. Chaykunata estudianki chayqa imaymanatan yachanki ñaupa runakunaq ejemplonmanta. “Wayna-sipaskuna” nisqa ukhupin kashallantaq ¿Imatapunin Biblia yachachin? nisqa librota “estudianapaq yanapaykuna”. 2017 watapi enero killapi lloqsimuq predicanapaq Qhawaq revistapipas kashallantaqmi yanapaykunaqa. Kaypi yachasqanchis jina, sichus allinta estudianki chaypitaq yuyaymananki chayqa salvasqan kanki (leey Salmos 119:105).

10. ¿Imaraykun rimashanallanchispuni Dioswan?

¹⁰ Bibliata estudiaspataq Diosta uyarinchis chayqa, ¿imaynatataq paytari rimapayasunman? Orakuspanchismi. Ichaqa manan yanqa ruwayta jinallachu chaytaqa qhawarinanchis. Mañakuspaqa imachus piensasqanchista sientesqanchista iman Diosman willakunanchis. Chaymantapas payqa uyariytan munawashanchis (leey Filipenses 4:6). Chayrayku imapiña tarikushanki chaypas payman willakuy chayta. Bibliapunin nin: “Diosman llakipakuyniykikunata saqey”, nispa (Sal. 55:22). Lliu hermanokunan yachanku Diosqa yanapakuq kasqanta. Qantapas yanapasunkin payqa.

11. ¿Imaraykun Jehová Dioswan agradecido kananchis?

¹¹ Dioswanqa sapa kutillanmi rimananchis manan imapipas tarikuspallachu. Biblian nin: “Agradecekuq kaychis”, nispa (Col. 3:15). Chhaynaqa tukuy ima qowasqanchismantan Diostaqa agradecekunanchis. Ichaqa, yaqapaschá mayninqa sasachakuykunapi tarikuspanchis qonqapusunman Diosta “gracias” niyta. Chayrayku sapa p’unchay piensay imakunamantas Diosta “gracias” niwaq chaypi. Hermana Abigailmi 12 watanpi bautizakusqa, paymi nin: “Piensasqayman jinaqa Jehová Diostan pimantapas masta ‘gracias’ ninanchis. Pay kaqtinmi tukuy imapas kashan. Juj kutinmi uyarini ‘imamantachus agradecekusqallaykita Jehová Dios paqaristin qosunkiman chayri, ¿ima niwaqtaq?’ nispa niqta. Chaypin noqaqa sapa kutillan piensani”, nispa. *

12, 13. ¿Imaynatan Jehová Dios yanaparasunki? ¿Imaraykun sonqoykipi allinta chayta jap’ikunayki?

¹² Davidtaqa imaymanapin Jehová Dios yanaparan chaymi payqa niran: “Reqsiykuychis, jinaspa rikuychis may sumaqchus Señor Diosqa kashasqanta. ¡Kusisamiyoqmi payman jap’ipaykukuq runaqa!”, nispa (Sal. 34:8). Chaypi Davidpa nisqan jina, qan kikiykin rikunayki Diosqa sumaq sonqo kasqanta. Yaqapaschá Biblia leesqaykipi, qelqanchiskuna leesqaykipi, juñunakuykunapi  ima rikuranki imaynatachus Jehová Dios serviqninkunata yanaparan chayta. Ichaqa wiñasqaykiman jinan qan kikiyki rikunayki imaynatas Diosqa yanapakun chayta. ¿Ñachu qan chayta rikurankiña?

¹³ Bibliaq willasqan jina, sapankanchistan Diosqa llaqtanman pusamuwaranchis. Jesusmi niran: “Manan pipas noqamanqa jamunmanchu manachus kachamuwaqniy Yaya pusamunman chayqa”, nispa (Juan 6:44). Qanri wayna-sipas, “Diosmi pusamuwan” ¿ninkichu? Icha, “tayta-mamaytan Diosqa pusamusqa, paykunallatan noqaqa qatikamushani” ¿nishankichu? Chhaynata nishanki chayqa kaypi piensay, qanqa Diosta munakusqaykiraykun payman entregakuspa bautizakuranki ¿riki? Chhaynataq chayqa paypa reqsisqanñan qanqa kanki. Biblian nin: “Pipas Diosta munakuqqa Diospa reqsisqanmi”, nispa (1 Cor. 8:3). Chayrayku, valoray Diospa llaqtanpi imachus ruwasqaykita.  

14, 15. ¿Imata ruwaspan rikullawaqtaq Diospa yanapayninta?

¹⁴ Wasin-wasinta predicaspayki escuelapi predicaspayki iman rikullankitaq Diospa yanapayninta. Mayninpiqa yaqapaschá sasa kanqa compañeroykikunawan Diosmanta rimay. “Phiñakunqakuchu kanpas” ninkipaschá. Llapankuq ñaupanpiqa astawanpaschá manchakunki. ¿Iman yanapasunkiman chhaynapi tarikuqtiyki?

¹⁵ Ñaupaqtaqa allinta piensay imaraykus imapipas creenki chaypi. Chaypaq jaykuy jw.org paginaman. Chaypin kashan imapichus creenki, imaraykus chaypi creenki, imaynatas chayta explicawaq chaykunapaq yanapaykuna. Imapichus creesqaykita allinta entiendenki, allintataq preparakunkipas chayqa confianzawanmi rimanki Jehová Diosmanta (Jer. 20:8, 9).

16. ¿Imatan ruwawaq Diosmanta mana manchakuspa rimanaykipaq?

¹⁶ Allintaña preparakunki chaypas yaqapaschá mayninpiqa manchakunkiraq jujkunawan Diosmanta rimayta. Juj hermanan 13 watallanpiraq kashaspa bautizakusqa, kunanqa 18 watanpiñan kashan, paymi nin: “Noqaqa allintan yachani imapichus creesqayta, ichaqa manan facilchu chaykunamanta rimay”, nispa. Chhaynaqa, ¿imatan ruwan? Paymi nillantaq: “Compañeraykunaqa mana manchakuspan imankumantapas rimanku. Chaymi tapukuq kani, ‘¿imaraykutaq noqari manchakuyman?’ nispa. Chaymi mayninpiqa rimasqayman jina paykunaman willani Bibliamanta yachachisqaypi imachus pasawaran chayta. Manaña Bibliamantapunichu rimashani chaypas, wakinqa mana piensayllan tapukunku imaynatas Bibliamanta yachachini chayta. Chhaynapin confianzawan rimani. Noqaqa kusikunin Diosmanta rimaspay”, nispa.

17. ¿Imaraykun mana manchakuspa rimananchis imapichus creesqanchismanta?

 ¹⁷ Jujkunata respetanki paykunapitaq piensankipas chayqa, kaqtan paykunapas qanwan ruwallanqakutaq. Chaypaq yachasun hermana Oliviamanta payqa juch’uyllaraqmi bautizakusqa, kunanqa 17 watanpiñan kashan. Paymi nin: “Manchakuqmi kani jujkunawan Bibliamanta rimayta. ‘Fanaticon kayqa niwanqakupaschá’ niqmi kani”, nispa. Tiempowanmi ichaqa cuentata qokuran chay piensasqan mana allinchu kasqanta. Paymi nillantaq: “Escuelapi compañerokunaqa manan imatapas yachankuchu Testigokunamanta. Noqallanchistan paykunaqa reqsinku. Chaymi allin yuyaywan imatapas ruwana. Sichus manchan-manchan Diosmanta rimasun otaq p’enqakusun paymanta rimayta chayqa, maltan jujkunaqa qhawariwasun, manan ni respetawasunpaschu. Chaymantapas, manapas Testigo kasqanchismanta kusisqachu kasunman jinan kanqa. Ichaqa sichus mana manchakuspa confianzawan respetowan ima rimasun chayqa respetawasunmi paykunapas”, nispa.

18. ¿Imatan ruwanayki salvasqa kanaykipaq?

¹⁸ Kaypi yachasqanchis jina salvasqa kayman chayayqa manan facilchu ichaqa atiwaqmi. Chaypaqmi ichaqa sapa p’unchay Bibliata leenayki chaypitaq yuyaymananayki. Chaymantapas Diospa yanapaynintan mañakunayki, sonqoykipitaqmi jap’ikunayki imaynatachus pay yanapashasunki chayta. Chayta ruwanki chayqa Diospa amigonmi kanki. Mana manchakuspan paymantapas rimanki (leey Salmos 73:28).

19. ¿Imaraykun kallpachakunanchis salvasqa kayman chayananchispaq?

¹⁹ Jesusmi niran: “Pipas qhepayta jamuyta munaqqa pay kikinta negakuchun, jinaspa ñak’arina k’aspinta apaspa qhepayta jamushallachun”, nispa (Mat. 16:24). Jesusta qatikunapaqqa Jehová Diosman entregakuspan bautizakuna. Chayta ruwasun chayqa imaymana bendicionkunatan chaskisun, jamuq tiempopitaq wiñay kausayta Dios qowasun. Chhaynaqa, wayna-sipaskuna, kallpachakushallaychis salvasqa kayman chayanaykichispaq.