1, 2. ¿Imaraykun wakin tayta-mamakuna manchakunku wawankuq bautizakunanta?

SAPA watanmi askha runakuna bautizakushanku Testigo jina. Paykunamanta wakinmi kanku Testigo familiapi wiñaq wayna-sipaskuna (Sal. 1:1-3). Chayta rikuspaqa wakin Testigo tayta-mamakunapas maytachá munanku wawanku bautizakunanta (tupachiy 3 Juan 4 textowan).

² Ichaqa, yaqapaschá wakin tayta-mamakunaqa manchakunku wawanku bautizakunanta. ¿Imarayku? Yaqapaschá rikuranku wakin wayna-sipaskuna bautizasqa kashaspa Diosta saqepusqankuta. Chaypaschá paykunaqa ninkuman: “Wawaypas chhaynatapaschá manaña Diosta munakunqachu”, nispa. Chaymi pasaran Éfeso llaqtapi iñiqmasikunawanpas. Paykunatan Jesús niran: “Munakuyniykiqa manañan qallariypi jinañachu kashan”, nispa (Apo. 2:4). Chayrayku, ¿imatan tayta-mamakuna ruwankuman wawankuq munakuynin  ama chiriyapunanpaq, iñiypi ‘wiñaspa salvasqa kanankupaqpas’? (1 Ped. 2:2.) Chaypaq yachasun Timoteomanta.

3. a) ¿Jayk’aqmi Timoteo cristiano kapunman karan? b) ¿Imakunatan Pablo Timoteoman niran?

³ Apóstol Pabloqa 47 watapi jinan Listra llaqtaman chayaran, chaypipaschá Timoteoqa Jesusmanta allinta yacharan. Payqa imachus yachasqanman jinachá kausaran chaychá Pabloqa pusaran viajasqankunapi compañananpaq. Chay watamanta 16 wata qhepaman jinan Pabloqa Timoteoman qelqaran: “Qaqata sayay imatachus allinta yachachirasunkiku, iñinaykipaqpas convencerasunkiku chaypi; chaymantapas, qanqa allintamá riki yachashanki pikunachus yachachirasunki chaytaqa. Chaymantapas wawacha kasqaykimantapachan ch’uya qelqakunamantaqa yacharanki ¿riki? Chaykunan yanapasunki yachayniyoq kanaykipaq, chhaynapi Cristo Jesuspi iñispa salvasqa kanaykipaq”, nispa (2 Tim. 3:14, 15). Chaypi Pabloq nisqan jina Timoteoqa yacharanmi ‘ch’uya qelqakunamanta’, allintan paytaqa ‘convenceranku’ chhaynapi ‘chaykunaq yanapayninwan yachayniyoq kaspa [...] salvasqa kananpaq’. Chay kinsantinmantan astawan yachasun.

4. ¿Imakunawanmi wawaykikunata yanapashanki Diosta reqsinankupaq? (15 paginapi fotota qhaway.)

⁴ ¿Imakunatan nikun “ch’uya qelqakuna” nispa? Chaykunaqa Bibliapi kaq llapa librokunan. Maytachá Testigo tayta-mamakunaqa munanku wawanku chay qelqakunamanta allinta yachanankuta. Wawakuna juch’uyllaraq kashanku chaypas, entiendenkumanmi Bibliapi willakuykunata. Chaypaqmi Diospa llaqtanpipas imaymana librokuna, folletokuna, videokuna ima orqokamushan; chaykunaq yanapayninwan tayta-mamakuna wawankuman Diosmanta yachachinankupaq. Chhaynapi wawankupas Dioswan allin amigontin kanankupaq.

5. a) ¿Imatan tayta-mamakuna wawankuwan ruwananku? b) ¿Imamantan Timoteo convencesqa kasharan?

⁵ Wawakunamanqa manan yachachiyllachu yachachina. Imaynan Timoteomanpas iñinanpaq convenceranku, chhaynatan tayta-mamakunapas wawankuta convencenanku. Chaymantapas Timoteomanqa wawacha kasqanmantapachan yachachiranku Diospa siminta. Watakunaq pasasqanman jinataq allinta entiendechiranku. Chaychá payqa bautizakapuran, Pablotapas viajenkunapi puriysiran.

6. ¿Imaynatan tayta-mamakuna wawankuta yanapankuman convencesqa kanankupaq?

⁶ ¿Imaynatan tayta-mamakuna wawankuta yanapankuman Timoteo jina convencesqa kanankupaq? Ñaupaqtaqa pacienciakuqmi kananku. ¿Imarayku? Wawakunaqa manan ratochu imatapas creenqaku. Manataqmi tayta-mamanku imatapas creesqankuraykuchu paykunapas creenqakupacha.  Aswanmi paykuna kikinku allinta t’aqwinanku “allin kaqta mana allin kaqtapas reparanankupaq”. Chhaynapin yachanqaku Diospa siminpi confiayta (leey Hebreos 5:14). Ichaqa tayta-mamakunan chaypi yanapananku. Astawanqa imatapas tapukuqtinkun allin yuyaywan paykunata yanapananku. Chaypaq juj hermanomanta yachasun.

7, 8. a) ¿Imaynatan juj tayta rikuchiran pacienciakuq kasqanta? b) ¿Imakunapin rikuchinayki karan pacienciakuq kasqaykita?

⁷ Thomas sutiyoq hermanon willakun: “Ususiyqa 11 watallanpiraqmi kashan, mayninpin pay niwan: ‘Evolucionwanpaschá Diosqa tukuy imatapas kamaran’, nispa. Mayninpitaq niwan: ‘Elección kaqtin pillapaqpas votasunman ima allinllatapas ruwananpaq chayri’, nispa. Chaykunata niwaqtinqa qallullaytañan kanikuni ama imatapas mana allinta piensaspa ninaypaq”, nispa. Thomaspa nisqan jina, wawakuna imatapas creenankupaqqa manan chay ratochu imaymanata nirparina, aswanmi pisi-pisimanta chaykunata explicana.

⁸ Thomasqa pacienciawanmi wawanman chaykunata explicaran. Arí, llapa cristianokuna jinan payqa pacienciakuran (Col. 3:12). Chaymantapas payqa yacharanmi wawanqa mana juj ratollapichu imatapas yachananta. Pisi-pisimantan payqa yachachinan karan Bibliapi yachachikuykuna sonqonpi saphichasqa kananpaq. Paymi nillantaq: “Noqaykuqa wawayku Diosmanta allinta yachanantan munayku. Manan munaykumanchu yanqa-yanqalla imatapas yachanantaqa. Chaymi tapukuqtinqa allinta uyariyku. Mana tapukuspallachus imatapas creenman chayqa llakisqachá kaykuman”, nispa.

9. ¿Imaynatan tayta-mamakuna wawankuta yanapankuman Diospa siminpi creenankupaq?

⁹ Pacienciawanchus tayta-mamakuna wawankuman yachachinqaku chayqa, pisi-pisimantan entiendenqaku “cheqaq kaqpa anchonta, largonta, altonta, ukhuntapas” (Efes. 3:18). Chaymantapas wiñasqankuman jinan wawakunamanqa yachachina. Allin convencesqachus kanqaku chayqa, faciltan paykunaqa compañeronkunawanpas Diosmanta rimanqaku (1 Ped. 3:15). Chayrayku tapurikuychis: “¿Waway atinmanchu wañuqkunamanta Bibliawan explicayta? ¿Creenpunichu Bibliaq yachachisqanpi?”, nispa. * Kaypi yachasqanchis jina wawakunataqa pacienciawanmi Diosmanta yachachina. Chaytachus ruwankichis chayqa kusikuymi qankunapaq kanqa (Deut. 6:6, 7).

10. ¿Imatan tayta-mamakuna wawankuman qonanku? Juj ejemplota willay.

¹⁰ Wawakuna Diospi creenankupaqqa ejemplota iman tayta-mamakunaqa  qonanku. Stephanie sutiyoq hermanan nin: “Kinsan ususiykunaqa. Paykuna juch’uyllaraq kasqankumantapachan sapa kutillan tapukuq kani: ‘¿Explicanichu wawaykunaman imarayku Diospi creesqayta? ¿Yachankuchu imarayku “Diosqa munakuqmi, chaninmi” nisqayta? ¿Yachankuchu noqapas Dios munakusqayta?’, nispa. Imaynapin wawayta ‘creey’ niyman noqa mana creeshaqtiy”, nispa.

11, 12. ¿Imaynan yachayniyoq runa? ¿Imaraykun nisunman: “Yachayniyoq kayqa manan jayk’a watayoq kasqanchismantachu”, nispa?

¹¹ Kaypi yachasqanchis jina Timoteoqa allintan reqsiran ch’uya qelqakunata, convencesqataqmi kasharanpas. Ichaqa, ¿imaynatan ch’uya qelqakuna yanapanman karan ‘yachayniyoq kaspa salvasqa kananpaq’?

¹² Perspicacia libropi nisqan jina, yachayniyoq runaqa imachus yachasqanman jina, entiendesqanman jinan ima sasachakuytapas allichan. Chay yachaywanmi orientachikun ama mana allinkunata ruwananpaq, ima ruway munasqantapas allin yuyaywan ruwananpaq, pita yuyaychananpaqpas. Yachayniyoq kayqa manan igualchu mana yuyayniyoq kaywan. Bibliapin nin: “Loqhe-kayqa [mana yuyayniyoq kayqa] waynaq sonqonpin saphichakun”, nispa (Prov. 22:15). Pipas yachayniyoq kaspaqa allin yuyaywanmi imatapas ruwan. Ichaqa yachayniyoq kanapaqqa Diostan manchakuna, manan jayk’a watayoq kasqanchismantachu chayqa (leey Salmos 111:10).

13. ¿Imaynatan wayna-sipaskuna rikuchinkuman salvasqa kanankupaq yachayniyoq kasqankuta?

¹³ Yachayniyoq wayna-sipaskunaqa manan ‘lamar-qochapi wayraq apakachasqan bote jinachu kanku’. Arí, manan gustonkuwanchu ni compañeronkuwanchu apachikunku (Efes. 4:14). Aswanmi “paykunaq yuyayninkuqa allin preparasqa kashan allin kaqta mana allin kaqtapas reparanankupaq” (Heb. 5:14). Chaymantapas sapallankupi kaspa yachaywan imatapas ruwaspankun rikuchinku allin yuyayniyoq kasqankuta (Filip. 2:12). Chay yachaymi paykunataqa salvanqa (leey Proverbios 24:14). ¿Imatan tayta-mamakuna ruwankuman wawanku yachayniyoq kananpaq? Chaypaqqa allintan yachananku imakunapichus wawanku piensan chayta. Imachus rimasqanpi ruwasqanpi iman rikuchinqa Bibliaq nisqanman jinachus ruwashan icha manachus chayta (Rom. 2:21-23).

14, 15. a) ¿Imakunapin allinta piensanan bautizakuyta munaq wayna-sipas? b) Diospa kamachikuyninkunaqa allinninchispaqmi, ¿imaynatan wawaykita yanapawaq chayta sonqonpi allinta jap’inanpaq?

¹⁴ Wawakunata yanapanapaqqa manan “chaymi allin, chayqa manan allinchu” ninallachu. Aswanpas allintan entiendechina imaraykus imapas allin, imaraykutaqsi mana allinchu chayta. Chaypaqqa yaqapaschá  tapuwaqchis: “¿Imaraykun chaykunata Biblia prohibin? ¿Imaynapin Bibliaq yachachisqan allinniykipaq kanman?”, nispa (Is. 48:17, 18).

¹⁵ Wawaykichus bautizakuyta munashan chayqa, yanapay ama comuntachu chayta qhawarinanpaq. Chaypaqqa yaqapaschá tapuwaq: “¿Imaynatan bautizakuyta qhawarinki? ¿Imakunatan bautizakuspa chaskisunchis? ¿Kanqachu ima sasachakuykunapas? Iman aswan askha kanqa, ¿bendicionkunachu icha sasachakuykunachu?”, nispa (Mar. 10:29, 30). Manaraq bautizakushaspan paykunaqa allinta chaykunata entiendenanku. Chaymantapas allintan tayta-mamakunaqa wawankuman entiendechinanku imas kanqa kasukuqtinku chayta, imas kanqa mana kasukuqtinkupas chaytawan. Chaykunawanmi paykuna kikinku cuentata qokunqaku Bibliata kasukuyqa allinpuni kasqanta (Deut. 30:19, 20).

16. ¿Imatan tayta-mamakuna ruwananku wawanku iñiyninmanta iskayaqtin?

¹⁶ Wakin wayna-sipaskunaqa bautizasqaña kashaspapas iskayankun imapichus creesqankumanta. Wawaykiwanpas yaqapaschá chay pasanqa. Yaqapaschá kay mundopi kaqkunata munapayayta qallarinqa. Mayninpiqa yaqapaschá ninqa:  “¿Kasukunaypunichu Bibliata allinta kausanaypaq?”, nispa (Sal. 73:1-3, 12, 13). ¿Imatan ruwawaq chay pasaqtin? Allin yuyaywanmi yanapanayki. Manan jayk’aqpas paykunawanqa discutinaykichu. Aswanmi rikuchinayki paykuna munakusqaykita. Imaynatachus yanapanki chaymantan kanqa Testigo kanankupas mana kanankupas.

17, 18. ¿Imatan tayta-mamakuna ruwananku iskayaq wawankuta yanapanankupaq?

¹⁷ Yachasqanchis jina pipas bautizakuqqa Jehová Diosmanmi entregakushan payta munakunanpaq, paypa munayninta ruwananpaqwan (leey Marcos 12:30). Diospaqqa manan chayqa común ruwaychu, chhaynatan qhawarinanku bautizasqa wawakunapas (Ecl. 5:4, 5). Chaytan tayta-mamakunaqa munakuyllawan wawankuman yuyarichinanku. Ichaqa ñaupaqtan estudiananku tayta-mamakunapaq lloqsimusqan qelqakunata. Chhaynapin paykunaqa allinta wawankuman entiendechinqaku imas Diosman entregakuy chayta, ima bendicionkunatas chaskinqaku Diosta servispa chaytapas.

¹⁸ Los jóvenes preguntan volumen 1 nisqa libropin kashan tayta-mamakunapaq yanapaykuna. Chaypaq maskhay “Los padres preguntan” nisqa parteta. Chaypi nisqan jina tayta-mamakunaqa manan apuraychu ninanku: “Wawayqa manañachá munanchu Diosmanta yachayta”, nispaqa. Aswanmi allinta qhawarinanku imapunichus paykunawan pasashan chayta. Yaqapaschá compañeronkuna imaymanata nishanku, sapanpaschá escuelapi tarikushan. Mayninpiqa Diospa llaqtanpi wakin wayna-sipaskunaq ñauparisqanta rikuspapaschá chhayna kashan. Ichaqa manan chayraykuchu wawataqa Diospi mana creeqta jina qhawarina. Chay libropi nisqan jina wawakunaqa imapichus tarikusqankuraykun mayninpiqa iskayanku. Chay libropin kallantaq wawakuna iskayaqtin imachus ruwanapaq consejokuna.

19. ¿Imatan ruwanayki wawayki salvasqa kananpaq?

¹⁹ Wawakunata uywayqa manan facilchu, ichaqa sumaq bendicionmi. Chayrayku wawaykichista “sumaqta uywaychis Jehová Diospa nisqanman jina wanachispa, yachachispa ima” (Efes. 6:4). Arí, kaypi yachasqanchis jina wawaykichisman yachachiychis Diospa siminta. Ichaqa ama yachachillaychischu aswanpas convencechiychis. Chhaynapin allin iñiyniyoq kanqa Diosmanpas tukuy sonqowan entregakunqa. Biblia, Diospa espiritun ima wawaykichista yanapachun yachaywan imatapas ruwaspa salvasqa kanankupaq.