1, 2. ¿Imaraykun nisunman “Jehová Diosqa qoykukuqmi” nispa?

JEHOVÁ DIOSQA qoykukuq Diosmi. Kay pachapi tukuy imapas paypa qowasqanchismi. Arí, paypan qoripas qolqepas kay pachapi tukuy ima kaqpas (Sal. 104:13-15; Hag. 2:8). Bibliapi willasqan jina chaykunawanmi mayninpiqa llaqtanta yanaparan.

² Chaykunawanmi ñaupa tiempopi israelitakunatapas Diosqa yanaparan. Paykunamanmi 40 wata desiertopi purishaqtinku unuta mijunata ima qoran (Éx. 16:35). Chhaynapin “mana imankupas pisiranchu” (Neh. 9:20, 21). Jehová Diosqa juj milagrotawanmi ruwaran, profeta Eliseowanmi juj viudaq aceitenta askhaman tukuchiran. Chayta vendespan chay viudaqa llapa manunkunata pagapuran; puchuranraqmi paypaqpas (2 Rey. 4:1-7). Chaymantapas Diosqa Jesusmanmi atiyta qoran, chay atiywanmi Jesusqa  askha runakunata mijuchiran. Chay atiywanmi qolqetapas rijurichiran (Mat. 15:35-38; 17:27).

3. ¿Imakunamantan kay estudiopi yachasun?

³ Jehová Diospataq tukuy imapas chayqa, payqa atinmanmi juj ratollapi llaqtanman llapa imapas qoyta. Ichaqa noqanchis yanapakunanchistan payqa munan. Chayta ruwananchispaqmi invitawanchis (Éx. 36:3-7; leey Proverbios 3:9). ¿Imaraykun Dios munan qowasqanchis cosaskunata payman qonanchista? ¿Imaynatan ñaupa tiempopi Diosta serviqkuna Diospa llaqtanpi yanapakuranku? ¿Imaynatan Diospa llaqtanpi usakun donacionkuna churasqanchista? Chaykunamantan kaypi yachasun.

4. ¿Imatan Diosman rikuchishanchis llaqtanta apoyaspanchis?

⁴ ¿Imaraykun Jehová Diosman imatapas qonchis? Munakusqanchisraykun ¿riki? Agradecesqan paywan kashanchis tukuy imaymana qowasqanchismanta ¿riki? Rey Davidpas chhayna agradecesqan kasharan. Paypa nisqan jina tukuy imanchispas Jehová Diosmantan jamun. Imataña Diosman qonchis chaypas paypa qowasqanchistan qoshanchis (leey 1 Crónicas 29:11-14).

5. Bibliaq nisqan jina, ¿imatan rikuchishallanchistaq Jehová Diosman imanchistapas qospanchis?

⁵ Diosman imatapas qospan rikuchillanchistaq payllata adorasqanchista. Apóstol Juanpa nisqan jina, janaq pachapi kaqkunan Diosta niranku: “Qanqa, Jehová Diosniyku, alabaytapas, jatunchaytapas, atiytapas chaskinaykipaq jinapunin kanki, tukuy imatapas qan kamasqaykirayku”, nispa (Apo. 4:11). Chaypi nisqan jina Jehová Diosllan alabaytapas, jatunchaytapas chaskinan, payllamanmi tukuy imatapas qonanchis. Chaytan Israel runakunapas ruwaranku. Moisespa chaskisqan kamachikuy simipi nisqanman jinaqa, watapin kinsa kutita fiestata ruwananku karan. Chay kamachikuypin nillarantaq: “Chay fiestakunapiqa aman pipas jinalla Señor Diosman rinqachu”, nispa (Deut. 16:16). Chaypi nisqan jina, manan ch’usaq makintinchu Diospa wasinman rinanku karan. Chaywanmi rikuchiranku Diosta adorasqankuta. Chhaynatan noqanchispas Diosta adoranallanchistaq. Ichaqa manan imatapas chaskinanchisraykullachu paymanqa imatapas qonanchis, aswanmi sonqomanta qonanchis. Imapas qosqanchiswanmi kay pachapi Diospa llaqtanta apoyasun.

6. ¿Imaraykun Diosman qonallanchistaq kaqninchiskunata? (15 paginapi fotokunata qhaway.)

⁶ Yachananchismi qoykukuq kayta, chaytan Bibliapas nin (leey Hechos 20:35). Chaypaq kaypi piensasun. Juj wawas tayta-mamanpa qosqan propinata juñuspa paykunapaq juj sumaq regalota rantipunman. ¿Ima ninqan chay tayta-mama? Kusikunqakun ¿riki? Kaypi piensallaytaq. Tayta-mamanwan kuska tiyaq precursor waynas gastokunapi yanapakunanpaq wakin qolqechanta tayta-mamanman qonman. ¿Imaynan chay tayta-mamakunapas kanqaku? Kusikunqakun ¿riki? Gastonkupaq kashanña qolqenku chaypas, wawankuq qosqanta chaskispan paykunaqa yachachinqaku qoykukuq kayta. Chhaynatan Jehová Diospas yachachiwanchis qoykukuq kayta.

7, 8. a) ¿Imatan ñaupa tiempopi Diosta serviq runakuna ruwaqku ima obrapas aparikunanpaq? b) ¿Imatan ruwaqku Diospa llaqtanpi llank’aqkunata yanapanankupaq?

⁷ Bibliaq willasqan jina ñaupa tiempopiqa imaymanapaqmi Diosta serviqkunaqa donacionkunata churaqku. Mayninpiqa ima obrapas aparikunanpaqmi chayta churaqku. Chaymi pasaran Moisespa tiemponpipas. Chay tiempopiqa Diosta adorana karpata ruwakunanpaqmi imaymanata necesitakusharan, jinan Moisesqa runakunata kallpacharan donacionkunata apamunankupaq. Rey Davidpas kaqtan ruwallarantaq templota ruwakunanpaq (Éx. 35:5; 1 Crón. 29:5-9). Rey Jehoaspa tiemponpipas runakunaq churasqan qolqewanmi Diospa wasinta allichakuran (2 Rey. 12:4, 5). Apostolkunaq tiemponpipas lliu hermanokunan atisqankuman jina donacionta churaranku Judapi hermanokunata yanapanankupaq. Judá llaqtapiqa sinchi yarqaymi kasharan (Hech. 11:27-30).

⁸ Ñaupa tiempopiqa Diospa llaqtanpi llank’aqkunapaqwanmi donacionkunata churaqku. ¿Imaynan chay karan? Ñaupa tiempopiqa Leví ayllumanta runakunan encargasqa kasharanku Diospa wasinpi llank’anankupaq. Manataqmi paykunaqqa ima herenciankupas karanchu. Chaymi Diosqa kamachikuran wakin ayllumanta runakuna diezmota churanankupaq. Chhaynapi Leví runakuna tukuy yuyaywan Diospa wasinpi llank’anankupaq (Núm. 18:21). Jesuspa tiemponpipas wakin sumaq sonqo “warmikunan imachus kaqninkuwan Jesusta apostolninkunatawan atiendeqku” (Luc. 8:1-3).

9. ¿Maymantan Diosta serviqkuna imatapas orqomuqku donacionkunata churanankupaq?

⁹ Chay runakunaqa imaymana formapin churaqku donacionninkuta. Israelitakuna desiertopi kashaspa Diosta adorana karpapaq donacionninkuta churashaspankuqa, yaqapaschá churaranku Egiptomanta apamusqanku cosaskunata (Éx. 3:21, 22; 35:22-24). Apostolkunaq tiemponpi cristianokunapas allpankuta wasinkuta vendespan apostolkunaman aparanku chay vendesqanku qolqeta. Chaytataq apostolkunaqa yanapanata necesitaqkunaman rakiranku (Hech. 4:34, 35). Wakinqa sapa kutillanmi donacionkunata churaqku Diospaq llank’aypi yanapakunankupaq (1 Cor. 16:2). Rikusqanchis jina chay tiempokunapi Diosta serviqkunaqa atisqankuman jinan wajchapas qhapaqpas donacionta churaqku (Luc. 21:1-4).

10, 11. a) ¿Imaynatan rikuchisunman ñaupaq tiempopi Diosta serviqkuna jina qoykukuq kasqanchista? b) ¿Imaynan sientekunki Diospa llank’ayninpi yanapakuspayki?

¹⁰ Kunan tiempopas yaqapaschá ima obra aparikunanpaqpas donacionkunata  necesitakunqa. Yaqapaschá juñunakunanchis wasita allichana kanqa, mayninpiqa jujtapaschá ruwana kanqa. Mayninpiqa yaqapaschá sucursalta allichanapaq qolqe necesitakunqa. Desgraciakunapi tarikuq iñiqmasikunapaqpas churanapaschá kanqa donacionkunata. Chaymantapas donacionkuna churasqanchiswanmi yanapashanchis misionerokunata, precursor especialkunata, watukuq umallikunata, betelkunapi llank’aqkunata ima. Chaymantapas lliu mundopin ruwakushan asambleapaq salonkuna, juñunakuna wasikuna ima. Chaykunapaqwanmi donacionkuna churasqanchisqa kashan. Chaytan sapanka iñiq t’aqapi encargasqa hermanokuna sapa killan apachinku.

¹¹ Llapanchismi invitasqa kashanchis Jehová Diosta llank’ayninpi yanapakunanchispaq. Salonpiña donacionta churanchis chaypas, jw.org nisqa paginapiña churanchis chaypas, manan pipas chaytaqa yachanchu, Diosllan yachan. Wakinqa yaqapaschá pisipaq qhawarisunman ima donación churasqanchistapas. Ichaqa manan chhaynachu. Diospa llaqtanpi donacionkunaqa manan pipas askha qolqe churasqanmantachu jamun, aswanmi llapanchispa churasqanchis askhaman tukun. Noqanchisqa ñaupa tiempopi Macedonia llaqtamanta cristianokuna jinan kanchis. Paykunaqa “wajchaña kashaspapas” maytan rogakuranku contribucionta churanankupaq, may kusikuywantaqmi paykunaqa chayta ruwaranku (2 Cor. 8:1-4).

12. ¿Imatan ruwakun Diospa llaqtanpi donacionkunata allin yuyaywan usakunanpaq?

¹² Umalliq t’aqamanta hermanokunaqa allin yuyaywanmi usanku donacionkuna churakusqanta (Mat. 24:45). Ñaupaqtaqa Diospa yanapaynintan mañakunku, chaymantataq imapaqchus necesitakusqanman jina chayta usanku (Luc. 14:28). Chaymantapas ñaupa tiempopi Diosta serviqkuna jinan paykunaqa imatapas ruwanku. Chay tiempopiqa junt’aq sonqo runakunamanmi ima donaciontapas encargaqku. Chay runakunataq Diospa munayninman jina chay qolqeta usaqku. Esdrasmanta yachasun, paymi Jerusalenman aparan Persia ladopi reypa churasqan qorita, qolqeta, juj ofrendakunata ima. Llapanpiqa 100 millón dolar masta valeqmi chay ofrendakunaqa karan. Esdrasqa Diospa kaqninta jinan chaykunata rikuran, chaymi paywan kuska apaq runakunatapas imaymanata kamachiran (Esd. 8:24-34). Apóstol Pablomanta yachallasuntaq. Paypas Judapi hermanokunata yanapananpaqmi qolqeta juñuran, chaytataq allin honrado hermanokunaman qoran rakinankupaq (leey 2 Corintios 8:18-21). Kunan tiempopas Diospa llaqtanpiqa Esdraspa ruwasqanta Pabloq ruwasqanta jinan ruwakun.

13. ¿Imaraykun Diospa llaqtanpi cambiokunata ruwakuran?

¹³ Diospa llaqtanpiqa allin yuyaywanmi donacionkunata usakun. Chaypaqmi encargasqa hermanokunaqa kallpachakushanku. Juj familiapi piensasun. Mayqen familiaqpas qolqen pisiyaqtinqa imaymana cambiokunatan ruwan ama nishuta gastanankupaq. Wakinqa Dios serviyta munasqankuraykun manaña ñaupaq jinachu ima gastotapas ruwanku. Chhaynallataqmi  Diospa llaqtanpipas pasan. Qayna watakunallan imaymanakuna ruwayta qallarikuran, ichaqa nishutan gastakusharan manataq donacionkuna aypasharanchu. Chaymi imaymana cambiokunata ruwakuran donacionkunata allin yuyaywan usakunanpaq.

14-16. a) ¿Imakunatan ruwakushan donacionkuna churasqanchiswan? b) ¿Imaynatan yanapashasunki Diospa llaqtanpi yanapaykuna lloqsimusqan?

¹⁴ Unayña Diosta serviq wakin hermanokunaq nisqan jina, manan jayk’aqpas Diospa llaqtanpiqa kunan tiempopi jina regalokuna karanchu. Manan unayraqchu kashan jw.org nisqa paginaq lloqsimusqan JW Broadcasting nisqa canalpa lloqsimusqanpas. Mosoq pachaq Biblian, Diospa Palabran nisqa Bibliapas askha simikunapin lloqsimushan. 2014, 2015 watakunapi “Diospa gobiernonta ñaupaqta maskhasun” nisqa asamblea internacionalpas 14 llaqtakunapin aparikuran. Chay asambleakunapi kaqkunaqa may kusisqapunin kasharanku.

¹⁵ Lliu hermanokunan kusisqa kashanku Diospa llaqtanpi imaymana yanapaykuna lloqsimusqanmanta. Asia nisqa ladopi juj llaqtachapi serviq hermanon JW televisionmanta nimusqa: “Mayninpiqa sapaykupas kaykuman jinan tarikuyku, JW Broadcasting nisqapi programakunata qhawaspan ichaqa kusisqa kayku. Chaypin yuyariyku lliu mundontinpi juj jatun llaqtamanta kasqaykuta. Kaypi hermanokunaqa kusisqan kashanku chay canalpi lloqsimuq programakunawan. Sapa killan chayta qhawaspankun ninku: ‘Umalliq t’aqa hermanokunawanpas kashaykuman jinan tarikuyku’, nispa. Kusisqapunin kashanku Diospa llaqtanpi kasqankumanta”, nispa.

¹⁶ Juñunakuna wasikunapas lliu mundopin ruwakushan, wakintaq allichakushan.  Llapanpiqa yaqa 2.500 jinañan karun. Mosoq salonta ruwakusqan qhepamanmi Honduras nacionmanta hermanokuna nimusqaku: “May kusisqan kashayku Diospa llaqtanpi kasqaykumanta, kay munay familiamanta kasqaykumantawan. Paykunaq yanapayninwanmi kay munay salón ruwarukun”, nispa. Lliu hermanokunan chhayna agradecesqa kashanku rimasqanku simipi Bibliatapas qelqakunatapas chaskisqankumanta. Wakintaq agradecesqa kashanku ima desgraciapas kaqtin yanapaykuna chaskisqankumanta, llaqtankupi carrochakunawan predicay allin aparikusqanmanta ima.

17. ¿Imaynatan kay tiempopi Jehová Dios llaqtanta yanapashan?

¹⁷ Donacionkuna churakusqallanwanmi chaykunata ruwakun. Chayta yachaspankun wakin runakunaqa admirakunku. Juj empresariopas qelqanchiskunata imprimikusqan localninchista visitaspan niran: “Admirasqan kashani khaynaniraq llank’ayta aparisqaykichismanta, astawanqa mana qolqellapaq llank’asqaykichismanta. ¿Imaynapitaq mana ima actividadtapas ruwashaspari qolqeykichis kan kaykunata ruwanaykichispaq? Mana creeymá kayqa”, nispa. Chay runaq nisqan jina, mana creey atiymi chayqa, ichaqa Jehová Diospa yanapayninwanmi llapa chaykuna ruwakushan (Job 42:2).

18. a) ¿Imakunan kanqa Diospa gobiernonta apoyaqtinchis? b) ¿Imaynatan wawakunata estudiantekunatapas yachachisunman qoykukuq kanankupaq?

¹⁸ Diospa gobiernonta apoyayqa may munaymi, chay ruwananchistan payqa munan. Chayta ruwasun chayqa imaymana bendicionkunatan chaskisun (Mal. 3:10). Diospa nisqan jina ima ruwasqanchispas allinpin tukunqa (leey Proverbios 11:24, 25). Chaymantapas kusisqan kasunchis. Arí, “qoypin aswan kusikuyqa kan, manan chaskiypichu” (Hech. 20:35). Wawanchiskunata estudiantekunata iman yachachinanchis qoykukuq kanankupaq. Ichaqa manan simillanchiswanchu aswanpas ejemplonchiswan iman. Chhaynapin paykunapas imaymana bendicionkunata chaskinqaku.

19. ¿Imata ruwanaykipaqmi kallpacharasunki kay estudio?

¹⁹ Kaypi yachasqanchis jina, tukuy imapas Jehová Diosmantan jamun. Payman imatapas qospaqa agradecido kasqanchistan rikuchishanchis (1 Crón. 29:17). Israel llaqta runakuna templota ruwakunanpaq ofrendankuta qospaqa “llapa llaqtan anchata kusikuranku tukuy sonqo ofrendankuta Señor Diospaq qosqankumanta” (1 Crón. 29:9). Chhayna kusisqan noqanchispas kasun imanchistapas Jehová Diosman qosun chayqa.