LLAPANCHISMI tapukunanchis: “¿Agradecekuqchu kani?”, nispa. Bibliaqa willaranmi kay tiempopi runakuna mana agradecekuq kanankuta (2 Tim. 3:2). Askha runakunan piensanku imatapas chaskinankupaq derechoyoq kasqankuta, manataqmi gracias niytapas yachankuchu, yaqapaschá reqsinchis chhayna runakunata. Manan pipas munanchu chhayna runakunawan juñukuytaqa.

Jehová Diosmi ichaqa serviqninkunata kamachin ‘agradecekuq kasqankuta rikuchinankupaq’, ‘tukuy imamanta graciasta ninankupaqpas’ (Col. 3:15; 1 Tes. 5:18). Jinaspapas agradecekuq kayqa allinninchispaqmi, chaymanta astawanraq yacharisun.

Agradecekuq kasqanchismi yanapawanchis allin sientekunanchispaq. Pipas gracias nisunki chayqa allinmi sientekunki, paypas allinmi sientekullantaq. Imallatapas qanpaq ruwaqtinmi reparanki munakusqasuykita qanpi piensasqantapas, jinaspa kusikunki. Rimasun Ruthmanta. Boazmi paytaqa khuyapayaran yanaparantaq, chayta reparaspan Ruthqa anchata kusikuran (Rut 2:10-13).

Astawanqa Jehová Diostan agradecekunanchis. Mayninpiqa piensaranchischá Jehová Dios imaymana necesitasqanchista qowasqanchispi (Deut. 8:17, 18; Hech. 14:17). Ichaqa manan juj ratollachu chaypiqa piensananchis, aswanmi tiempota orqonanchis imaynatas Jehová Dios noqanchistapas familianchistapas yanapawaranchis chaypi piensananchispaq. Chhaynapin tukuy sonqomanta Jehová Diosta agradecekusun reparasuntaq munakuwasqanchista (1 Juan 4:9).

Chaymantapas Jehová Diostan gracias ninanchis tukuy imaymana qowasqanchismanta (Sal. 100:4, 5). Agradecekuq kaspaqa kusisqan kausasunchis.

Agradecekuq kasun chayqa sumaqtan amigonchiskunawan kausasun. Llapanchispas necesitanchismi munasqa sientekuyta. Sichus amigonchiskunata sonqomanta agradecekusun imachus ruwapuwasqanchismanta chayqa, paykunawanmi allin amigontin kasun (Rom. 16:3, 4). Agradecekuq runaqa munanmi jujkunata yanapayta. Allintan reparan jujkunaq yanapasqanta chaymi kaqta ruwayta munan. Jujkunata yanapayqa kusichiwanchismi, chaymi Jesuspas niran: “Qoypin aswan kusikuyqa kan, manan chaskiypichu”, nispa (Hech. 20:35).

California universidadmanta profesor Robert Emmons nin: “Agradecekuq kanapaqqa reparananchismi jujkunaq yanapayninta necesitasqanchista. Mayninpiqa jujkunan noqanchispaq imatapas ruwanqa, mayninpitaq noqanchisñataq jujkunapaq imatapas ruwapusun”, nispa. Vidanchispiqa necesitanchismi jujkunaq yanapayninta. Kaypi piensasun, mayninpiqa jujkunan mijunataqa wayk’upuwanchis, onqosqa kaqtinchispas jujkunan atiendewanchis (1 Cor. 12:21). Agradecekuq runaqa reparanmi jujkunaq yanapasqanta. Chhaynaqa, ¿gracias ninchischu jujkunata amigonchiskunatapas yanapawasqanchismanta?

Runaqa imachus pasawasqanchistan yuyarinchis wakinkunatataq mana. Agradecekuq runakunan ichaqa allinkunata astawan yuyarinku manan allin ruwaykunamantaqa. Agradecekuq kaspaqa jujkunaq allin ruwasqantan astawan qhawarisun, jinaspa aswan  agradecekuq runaman tukupusun. Chhayna kaspaqa apóstol Pabloq nisqantan ruwasun, paymi niran: “Señorninchisrayku kusikullaychispuni”, nispa (Filip. 4:4).

Agradecekuq kayqa yanapawanchismi mana allin ruwaykunapi ama piensananchispaq. ¿Atisunmanchu agradecekuq kayta envidiakuq kaspa, sintipakuq kaspapas? Manan. Chaymantapas agradecekuq runaqa manan imaymanayoq kaytachu maskhan, aswanmi kapuqnillanwan kusisqa kausan (Filip. 4:12).

Satanasqa munanmi kay tukukuy tiempopi sasachakuykunapi tarikuspa pisipananchista llakikunanchistapas. Munantaqmi vidanchis mana allin kananpaq piensananchista, imamantapas quejakunanchista. Chhayna kaspaqa manan runakunata yanapasunmanchu allin willakuykunata uyarinankupaq. Agradecekuq runan ichaqa Diospa santo espiritunta chaskin, chaymi kusikun Jehová Diospa imaymana qosqanmanta, iñintaqmi Diospa promesankunapipas (Gál. 5:22, 23).

Diosta serviqkunaqa yachanchismi agradecekuq kayqa allinpuni kasqanta. Ichaqa sichus reparakunchis mana agradecekuq kasqanchista, imamantapas quejakusqanchista chayqa, manan pisipananchischu. Atisunmanmi agradecekuq runa kayta. Chaypaqmi ichaqa sapa p’unchay tiempota orqonanchis imakuna pasawasqanchismanta Diosta gracias ninanchispaq. Chayta astawan ruwaspan sonqomanta agradecekuq runaman tukupusun, aswan kusisqataq kausasun sasachakuykunallapi piensaq runamantaqa. Yuyarinanchismi imatachus Jehová Diospas juj runakunapas yanapawananchispaq ruwaranku chayta. Jinaspapas sapa p’unchaymi anotasunman iskay-kinsa ruwaykunamanta Diosta gracias ninanchispaq.

Científico runakunan ninku: “Sapa kutilla agradecekuq runaqa allinmi sientekun”, nispa. Arí, paykunaqa aswan kusisqan kausanku. Chay jinaqa vidanchispi imakunachus allin kasqantan masta qhawarinanchis, kusikunanchistaqmi ima allinpas pasawasqanchismanta, jinaspa chaykunamanta “gracias” niyta yachananchis. Chaymi Bibliaqa niwanchis imatapas chaskispa, kayta ruwananchispaq: “Señor Diosta yupaychaychis, payqa allinmi, tukuy imamanta graciastapas qoshallaychispuni”, nispa (1 Crón. 16:34; 1 Tes. 5:18).