Deuteronomio 22:25-27 textopiqa rimashan violasqa warmi mana juchayoq kasqanmantan, chaymanta astawanraq rimasun.

Deuteronomio 22:23, 24 textopi willashan casarakunanpaq rimanakusqa sipasta llaqta ukhupi juj qhari violasqanmanta. Casarakunanpaq rimanasqa sipastaqa ñapas casarasqaña kanman jinatan qhawariranku, chaymi chay qharitaqa wasanchaq juchata ruwasqanmanta juchacharanku. ¿Iman pasaran warmiwan? Sichus pay qapariran chayqa jujkunachá uyarispa jark’aykunkuman karan, ichaqa manachus qapariran chayqa, paypas wasanchay juchamantan juchachasqallataq karan.

Ichaqa qatimuq versiculokunapin niran: “Casarakunanpaq rimaykusqa sipasta juj qhari campopi tarinman, jinaspa payta violanman chayqa, qharillata wañuchinkichis. Sipastaqa ama wañuchinkichischu, payqa manan wañuchinapaq jina juchayoqchu, chay violayqa campopi juj runa runamasinta phawaykuspa wañuchin chaymanmi rijch’akun. Chay qhariqa sipasta campopi jap’ispa violaran, qapariqtinpas manataq pipas jark’aykuqnin kanmanchu karan”, nispa (Deut. 22:25-27).

Chay kutipin juezkunaqa warmiq rimasqanta creeranku. Paykunaqa nirankun: “Alto kunkawanchá auxiliota mañakuran”, nispa. Chaymi mana payta tumparankuchu wasanchay juchamanta. Qharitaqmi ichaqa juchayoq karan violasqanmanta wasanchay juchata ruwasqanmantawan.

Chay kamachikuypi nisqanman jinaqa, warmiqa mana juchayoqmi karan, qharitaqmi ichaqa juchayoq karan violasqanmanta wasanchay juchata ruwasqanmantawan. Juezkunaqa allinta investigaspan pitapas juzgaranku, Jehová Diospa kamachikuyninkunaman jina (Éx. 20:14; Deut. 13:14; 17:4).