1. ¿Imanaqtinmi importante imapas pasashasqanta makilla reparay? (Kay paginapi fotota qhaway.)

¿IMAN pasawasunman imapas ima ratopichus pasashan chayta mana reparaqtinchis? Chaypaq rimasunchis asambleanchiskunamanta. Yachasqanchis jina, juj umalliqmi asambleataqa qallarichin: “Allin jamusqan kankichis”, nispa. Chayta uyarispan llapanku tiyanankuman rinanku, chhaynapi tukuy yuyaywan musicata uyarinankupaq. Wakinmi ichaqa mana reparankuchu umalliqpa rimamusqanta, música qallarisqantapas. Chaymi purikachashallanku, otaq jujkunawan parlakushallanku. Chaytaqa ruwanku imachus pasashasqanta mana reparasqankuraykun. Chay ejemplomantan yachasunman makilla imatapas reparananchis kasqanta. Astawanqa imachus pisi tiempollamanta pasanqa chaytan makilla reparananchis.

2. ¿Imanaqtinmi Jesús niran: “Makilla kashaychis”, nispa?

² Jesucriston discipulonkunata kamachiran makilla kashanankupaq,  chhaynapi ‘tukukuy tiempopaq’ preparasqa kashanankupaq. Paykunatan niran: “Makilla qhawashaychis, rijch’asqallataq kashaychispas, manan yachankichischu jayk’aqchus Diospa ajllasqan tiempo kasqanta”, nispa. Chaymantataq askha kutita paykunata niran: “¡Makilla kashaychis!”, nispa (Mat. 24:3; leey Marcos 13:32-37, NM). Chhayna nisqanmantaqa Mateo libropipas willakushanmi. Chaypin Jesusqa niran: ‘Makilla kashaychis, manan yachankichischu ima horatachus Señorniykichispa kutimunanta. Runaq Churinqa jamunqa mana yachasqaykichis horatan, chayrayku qankunapas makilla kashaychis’, nispa. Jinaspan wajmanta niran: “Makilla kashaychis, manan yachankichischu ima p’unchaytachus ima horatachus Runaq Churin kutimunanta”, nispa (Mat. 24:42-44; 25:13).

3. ¿Imanaqtinmi Jesuspa nisqanta kasukunanchis?

³ Jehová Diospa testigonkunaqa kasukunanchismi Jesuspa chay nisqanta. Yachasqanchis jina, ‘p’uchukay tiempopiñan kashanchis’, ‘manchay ñak’ariypas’ cercapiñan kashan (Dan. 12:4; Mat. 24:21). Chayraykun pachantinpi allin willakuykunata willakushan. Chaymantapas askhan kashan guerrakuna, onqoykuna, terremotokuna, yarqaykunapas. Pantasqa religionkunapas, maqanakuykunapas, imaymana mana allinkunapas astawanmi yapakushan (Mat. 24:7, 11, 12, 14; Luc. 21:11). Chaymi Jesusqa kutimuspa Yayanpa munayninta junt’anqa. Maytan munasunman chay pasananta ¿riki? (Mar. 13:26, 27.)

4. a) ¿Imanaqtinmi nisunman: “Jesusqa yachashanmanmi jayk’aqchus Armagedón kanqa chayta”, nispa? b) ¿Imatan allinta yachanchis manchay ñak’ariy tiempomanta?

⁴ Asambleanchiskuna jayk’aqchus qallarinanqa ñaupaqmantaraqmi yachakun, manchay ñak’ariy tiempo jayk’aqchus qallarinanmi ichaqa mana yachakunchu. Chaymi Jesusqa niran: “Chay p’unchayta chay horatawanmi ichaqa mana pipas yachanchu, manallataq janaq pachapi kaq angelkunapas, Churipas, aswanpas Yayallan yachan”, nispa (Mat. 24:36). Jesustaq Armagedón guerrata umallinqa chayqa, kunanqa ñan paypas yachashanmanña jayk’aqchus chay qallarinqa chayta (Apo. 19:11-16). Noqanchismi ichaqa mana chayta yachasunmanchu, chaymi makilla kashananchis. Jehová Diosqa ñan churanña chaypaq juj p’unchayta, chaymi sapa p’unchay astawan chayman achhuykushanchis. Chay p’unchayqa “tiemponpipunin chayamunqa” (leey Habacuc 2:1-3). ¿Chhaynapunichu chay kanqa?

5. ¿Iman rikuchiwanchis Jehová Diospa profeciankuna tiempollanpi junt’akusqanta?

⁵ Chhaynapunin kanqa. Jehová Diospa  profeciankunaqa tiemponpipunin junt’akun. Chaypaq yuyarisunchis Israel runakuna Egiptomanta librasqa kasqankuta. Paykunaqa 1513 watapi, 14 de nisán p’unchaypin librasqa karanku. Kaq p’unchayllapitaqmi 430 watakuna ñaupaqta Jehová Diospa Abrahanman promesa ruwasqan churasqa karan (Gál. 3:17, 18). Chaymi Moisesqa niran: “Tawa pachaj kinsa chunka wata junt’akuqtintaq, chay kikin p’unchaypi Señor Diospa llaqtanqa Egipto suyumanta t’aqa-t’aqa lloqsimpuranku”, nispa (Éx. 12:40-42). Jehová Diosmi Abrahanta niran: “Mirayniykiqa karu llaqta suyupin kamachi kanqa, chaypin kamachi kaspa ñak’arichisqa kanqaku tawa pachaj watantin”, nispa (Gén. 15:13; Hech. 7:6). Chay 400 watakunan qallariran 1913 watapi, Abrahanpa kuraq wawan Ismael Isaacta maltrataqtin; junt’akurantaq Israel runakuna librasqa kaqtinku (Gén. 21:8-10; Gál. 4:22-29). Chhaytukuy watakuna ñaupaqtan Jehová Diosqa willaranña ima p’unchaychus llaqtan librasqa kanan karan chayta.

6. ¿Imanaqtinmi mana iskayananchischu Jehová Diospa promesankunamanta?

⁶ Chay librasqa kaqkunamanta jujninmi karan Josué. Paymi Israel runakunata niran: ‘Jehová Diosqa llapantapunin rimarisqantaqa junt’aran’, nispa (Jos. 23:2, 14). Kunan tiempopas chhaynan kanqa Diospa promesankunaqa. Paymi prometekuran manchay ñak’ariymanta llaqtanta salvananpaq, jinaspa mosoq pachaman pusananpaq. Payqa junt’anqapunin chay promesanta, chaymi makilla kashananchis.

7, 8. a) ¿Imatan llaqta qhawaqkuna ruwananku karan? ¿Imatan chaymanta yachasunman? b) ¿Iman Jerusalén llaqtapi pasaran 70 watapi?

⁷ Kunan yachasunchis ñaupaq tiempopi perqayoq llaqtakunata qhawaq runakunamanta. Chay runakunan llaqtaq perqan patamanta tukuy ladota qhawananku karan. Wakin qhawaqkunaqa llaqtaq punkuntan cuidananku karan. Llapan chay qhawaqkunaqa makillan kashananku karan p’unchaypipas tutapipas, chhaynapi enemigokuna jamushaqta rikuspa llaqtaman willanankupaq (Is. 62:6). Paykunaqa rijch’ashaqllan kananku karan llaqtata qhawananku ratopiqa, mana chayqa sinchi mana allinpin llaqta tarikunman karan (Ezeq. 33:6).

⁸ Chaymi pasaran 70 watapi Jerusalén llaqtawan. Historiador Josefo willasqan jina, juj kutinsi llaqta qhawaq wakin runakuna puñurapusqaku. Chaysi Roma soldadokunaqa llaqta ukhuman jaykuspa templota kanaykapusqaku, jinaspa llaqtata lliuta thunichipusqaku. Chaymi karan judiokunapaq ancha jatun ñak’ariy.

9. ¿Imatan runakuna mana reparankuchu?

⁹ Kunan tiempopiqa llapa gobiernokunan nacionninkuta cuidanankupaq askha soldadokunata churanku, imaymana mosoq maquinakunawantaq cuidankupas. Chaywanmi gobiernokunaqa enemigonkumanta cuidakunku. Ichaqa manan reparakunkuchu  janaq pachapi juj ancha jatun gobierno kasqanta, chay gobiernotan Señorninchis Jesucristo umallishan. Chay gobiernon pisi tiempollamanta kay pachapi llapa gobiernokunawan maqanakunqa (Is. 9:6, 7; 56:10; Dan. 2:44). Noqanchisqa liston kashananchis chay p’unchaypaq, chaymi allinta reparananchis Bibliaq profeciankuna junt’akusqanta, tukuy sonqowantaq Jehová Diosta servishananchis (Sal. 130:6).

10, 11. a) ¿Imamantan allinta cuidakunanchis? b) ¿Imatan Saqra ruwashan runakunawan?

¹⁰ Wasita tutantin qhawaq runapaq, ¿ima horan aswan sasa kanman rijch’asqalla kay? Último horakunan ¿riki? Chay horakunapin payqa sayk’usqaña kashan. Chay último horakunapi jinan noqanchispas kay tiempopi tarikushanchis, chaymi sasa rijch’asqalla kay. Chayraykun cuidakunanchis amapuni espiritualpi puñurapunapaq. ¿Imakunan puñuchiwasunman?

¹¹ Saqran puñuchiwasunman. Paymi ‘kay pachapi kamachikuqqa’. Chaytan Jesusqa kinsa kutita discipulonkunaman yuyarichiran manaraq jap’ishaqtinku (Juan 12:31; 14:30; 16:11). Saqraqa pantasqa religionkunawanmi runakunata engañashan, chaymi paykunaqa mana Bibliaq willasqan profeciakunata kasunkuchu, manan reparankuchu tukukuy p’unchaykunapiña kausashasqanchista, Cristo janaq pachapi kamachikushasqantapas (Sof. 1:14). Chhaynatan Satanasqa ‘mana iñiqkunaq yuyayninta tutayachipun’ (2 Cor. 4:3-6). Chayraykun runakunaqa “manan tiempoy kanchu” nispa niwanchis Bibliamanta rimapayaqtinchis.

12. ¿Imanaqtinmi Saqrawan mana engañachikunanchischu?

¹² Noqanchisqa manan chaywan pisipananchischu. Aswanpas apóstol Pabloq nisqantan yuyarinanchis, paymi niran: “Qankunaqa allintamá yachankichis Jehová Diospa p’unchayninqa imaynan suwapas tutalla jamun  chhaynata chayamunanta”, nispa (leey 1 Tesalonicenses 5:1-6, NM). Jesuspas niranmi: “Rijch’ashaqlla kashaychis, mana piensasqaykichis horatan runaq Churinqa jamunqa”, nispa (Luc. 12:39, 40, NM). Satanasmi ichaqa runakunata astawanraq engañanqa: “¡Kunanmantaqa thajmi kasunchis!”, nispa paykunaman willachispa. Chayllamanmi ichaqa Jehová Diospa p’unchaynin chayamunqa, chaywantaq llapanku manchasqa kanqaku. Chay runakuna jina mana engañachikunanchispaqmi noqanchisqa ‘rijch’asqalla kashananchis, yuyayninchispitaq kashananchispas’. Chaymi sapa p’unchay Bibliata leenanchis, allintataq chaypi piensananchis.

13. ¿Imatan kay pachaq espiritun ruwashan runakunawan? ¿Imaynatan chaymanta cuidakusunman?

¹³ Kay pachaq espiritunmi puñuchiwasunman. Chay espiritun runakunaq yuyayninta pantachishan, chaymi yaqa llapanku ninku: “Manan Diostaqa necesitanchischu”, nispa (Mat. 5:3, NM). Chaymantapas paykunaqa qolqe maskhayllapin kanku, aychankuq munasqanman jinallan kausankupas (1 Juan 2:16). Chaypaq jinan kay tiempopiqa imaymana aycha kusirichiykuna rijurimushan chaykunawan ocupasqa kanankupaq, chhaynapitaq Diosta qonqapunku (2 Tim. 3:4). Chaykunaqa noqanchistapas pantachiwasunmanmi, chaymi apóstol Pablo cristianokunata niran: “Puñuymanta rijch’arinaykichis tiempoñan”, nispa (Rom. 13:11-14). Chhaynaqa manan aychanchispa munasqanman jinachu kausananchis.

14. ¿Imatan yachasunman Lucas 21:34, 35 textomanta?

¹⁴ Noqanchisqa Diospa espiritunwanmi pusachikunanchis. Jehová Diosqa chay espiritunwanmi allinta entiendechiwanchis imachus pasanqa chayta (1 Cor. 2:12) ^[1] (qhaway 15 paginapi willakuyta). Ichaqa manan confiakunanchischu; mana piensasqanchis cosaskunapas distraewasunmanmi Dios servinanchista (leey Lucas 21:34, 35). Chaymantapas manan pisipananchischu burlakuqkunaq yanqa rimasqankuwan (2 Ped. 3:3-7). Paykunaqa manan yachankuchu tukukuy p’unchaykunapiña kashasqanchista. Chayrayku amapuni juñunakuyninchiskunata saqesunchu, chaymi yanapawasun Diospa espiritunwan pusachikunanchispaq.

15. ¿Iman Pedrowan, Santiagowan, Juanwan ima pasaran? ¿Imatan chaymanta yachasunman?

¹⁵ Pisi kallpa kayninchispas puñuchiwasunmanmi. Jesusqa allintan yacharan runakunaqa imaymanapi pisi kallpa kasqanchista. Juj kutinmi Pedro, Santiago, Juan ima puñukapuranku Señorninchis Jesús “aman puñunkichischu” nishaqtin.  Paykunaqa manan entienderankuchu imaraykus chay ratopi rijch’asqalla kananku karan chayta. Jesusqa mana ima juchayoqña karan chaypas, Yayanpa yanapaynintan necesitaran mana pisipananpaq. Chaymi apostolninkuna jinaña sayk’usqa kasharan chaypas paymanta mañakuran. Apostolkunapas pay jinan Diosmanta mañakunanku karan (Mar. 14:32-41).

16. Lucas 21:36 textoq nisqanman jina, ¿imatan ruwananchis ‘rijch’asqalla kashananchispaq’?

¹⁶ ¿Imatan ruwananchis rijch’ashaqlla kashananchispaq? Tukuy sonqowanmi decidikunanchis allin kaqta ruwananchispaq. Chaymantapas Jehová Diospa yanapaynintan tukuy tiempo mañakushananchis. Chaytan Jesuspas discipulonkunata niran wañunanpaq pisillaña kashaqtin (leey Lucas 21:36). Chhaynaqa Jehová Diospa p’unchaynin rijch’ashaqllata tariwananchispaqqa tukuy tiempon mañakunanchis (1 Ped. 4:7).

17. ¿Imaynapin listo kasunman Diospa p’unchayninpaq?

¹⁷ Jesuspa nisqan jina, tukukuy p’unchayqa ‘mana piensasqanchis horatas’ chayamunqa (Mat. 24:44). Chaymi tukuy tiempo makilla kashananchis. Manan kay pachapi imaymanakunachu kusikuytaqa qowasunchis. Chayraykun Jehová Diosta Jesustawan kasukunanchis, paykunan Bibliapi willawaranchisña imatachus ruwananchista. Chhaynaqa Bibliaq profeciankunata makilla qhawarisun, astawantaq Jehová Diosman achhuykusun, gobiernontapas ñaupaqta maskhasun. Chhaynapin makilla suyasunchis tukukuy p’unchayta, wiñaypaqtaqmi kausasunpas (Apo. 22:20).