Paykunaqa representan janaq pachapi Diospa ejercitontan. Paykunan ñaupa tiempopi Jerusalén llaqtata thunichiranku, jamuq tiempopitaq Satanaspa kamachisqan millay pachata armagedonpi chinkachipunqaku. Kaywanmi cambiakun ñaupaq tiempokunapi entiendesqanchis. ¿Imarayku cambiakun?

607 wata (m.J.j.) ñaupaqtan Jehová Dios profeta Ezequielman juj rijuriypi rikuchiran Jerusalenpi runakuna Diospa contranpi millaykuna ruwasqankuta. Chaypin rikuchillarantaq imachus sucedenanta. Ezequielmi rikuran soqta runakunata q’asuna jap’inantintakama, cinturanpi qelqanakunayoq ‘linomanta yuraq qoysu p’achayoq runatawan’ (Ezeq. 8:6-12; 9:2, 3). Chay runatan Dios kamachiran: “Jerusalén llaqtata puriykacharamuy, jinaspataq mat’inpi marcamunki llapan millay qhelli mana chanin ruwasqakunamanta llakikuspa khuyay kaqkunata”, nispa. Wakin runakunatan nillarantaq: “Llaqta ukhunta riychis chay runaq qhepanta, [mana marcasqa runakunata] wañuchimuychis ama khuyapayaykuspa”, nispa (Ezeq. 9:4-7). ¿Imatan chaymanta yachanchis? ¿Pitan representan cinturanpi qelqanakunata apaq runa?

Chay profeciataqa 612 watapin (m.J.j.) Ezequiel willaran, pisqa wata qhepallamantaqmi junt’akuran Babilonia llaqta Jerusalenta  thunipuqtin. Chaytaqa Jehová Diosmi ruwachiran, mana allinkuna ruwasqanmanta llaqtan castigasqa kananpaq (Jer. 25:9, 15-18). Ichaqa, ¿chanin mana chanin runakunatachu Dios chaypi castigaran? Manan, allin kaqta ruwaqkunataqa salvaranmi. ¿Imaynatan chayta ruwaran?

Ezequielqa manan runakunata marcaypichu nitaq Jerusalén llaqtata thunichiypichu yanapakuran. Chaytaqa angelkunan ruwaranku. Diosmi angelkunata kamachiran chanin runakunata t’aqaspa millay runakunata wañuchinankupaq. *

Ñaupaqqa niranchismi: “Cinturanpi qelqanakunata apaq runaqa janaq pachapaq ajllasqa cristianokunan, mat’inpi marcasqa runakunataq allin willakuykunata uyarikuq runakuna”, nispa. Ichaqa aswan allintan kunanqa chay profeciata entiendekun. Mateo 25:31-33 texton willashan Jesuslla runakunata juzgananpaq kamachisqa kasqanta. Paymi manchay ñak’ariy p’unchaypi runakunata juzganqa. Chaypin ovejaman rijch’akuq runakuna salvasqa kanqaku, cabraman rijch’akuq runakunataq wañuchisqa kanqaku.

Chhaynaqa, ¿imatan yachanchis Ezequielpa rikusqan rijuriymanta? Pisqa yachachikuykunatan:

1.  Jerusalén llaqta manaraq thunichisqa kashaqtinmi Jehová Dios willachiranña Isaías, Jeremías, Ezequiel profetakunawan imachus llaqtawan pasananta. Kunanpas juch’uy t’aqa cristianokunawanmi espiritual mijunata llaqtanman qoshan, willachishantaqmi Diospa juicion chayamushasqanta. Chay llank’aypin Cristoq llapa ‘kamachinkuna’ yanapakushanku (Mat. 24:45-47).

2.  Ezequielqa manan runakunata marcaypiqa yanapakuranchu. Diospa llaqtanpas manan runakunata marcaypichu yanapakushan. Aswanmi angelkunaq umallisqan Diospa juicionmanta willakuyta llapa runaman willashanku (Apo. 14:6).

3.  Ezequielpa tiemponpi salvasqa runakunaqa manan marcasqapunichu karanku. Jamuq tiempopi salvakunankupaq ajllasqa runakunapas manan mat’inkupichu marcasqa kanqaku. Ichaqa, ¿imatan ruwananku salvasqa kanankupaq? Chaypaqqa allin willakuykuna predicakusqantan chaskikunanku, kausayninkutan cambiananku, Diosman qokunanku, tukuy sonqowantaq Cristoq wayqenkunata yanapakunanku. Chaykunata ruwasqankun paykunapaq juj marca jina kanqa (Mat. 25:35-40). Chaykunata ruwaqkunallan manchay ñak’ariy p’unchaypi salvasqa kanqaku.

4.  Ezequielpa profetizasqanqa kunanpas junt’akunqan. Chaypiri, ¿pitan representan cinturanpi qelqanakunata apaq runa? Jesucristotan. Paymi ovejaman rijch’akuq runakunata marcanqa. Chay marcataqa manchay ñak’ariy p’unchaypin chaskinqaku. Chaypin paykunaqa salvasqa kanqaku wiñaypaqtaq kay allpapi tiyanqaku (Mat. 25:34, 46). *

5.  Q’asunata apaq soqta runakunari, ¿pikunatan representan? Janaq pachapi Jesuspa umallisqan ejercitotan. Paykunan kay pachapi llapa millay ruwaykunata ñak’ariytapas chinkachinqaku (Ezeq. 10:2, 6, 7; Apo. 19:11-21).

Ezequielpa profetizasqanmi rikuchiwanchis Diosqa chanillanta juicio p’unchaypi juzgananta (2 Ped. 2:9; 3:9). Jinaspapas llapa runakunan yachananku Diospa juicion kayllapiña kashasqanta. Chaymi rikuchiwallanchistaq llapa runakunaman predicananchis kasqanta (Mat. 24:14).