1, 2. a) ¿Iman noqanchispaq aswan importante kanan? b) ¿Imaraykun chayta allinta entiendenanchis?

KUNAN tiempopi wakin runakunapaqqa qolqen imamantapas aswan importante, chaytan imata jinaraq maskhashanku. Wakinpaqtaq familianku, wakinpaqtaq qhali kausay, wakinpaqtaq allin reqsisqa kay.

² Ichaqa, ¿chaykunachu noqanchispaq aswan importante kanan? Manan. Jehová Dioslla autoridadniyoq kasqanta rikuchiymi noqanchispaqqa imamantapas aswan importante kanan, chaypin yuyayta churananchis. Mana chayqa kay vidapi imaymana llakikuykuna kasqanwanmi chayta qonqarapusunman. Chaymantapas Dioslla autoridadniyoq kasqanta apoyasun chayqa facilmi noqanchispaq kanqa ima problemata aguantaypas, astawantaqmi Diostapas munakusun.

3. ¿Ima ninmi Satanás Diospa gobiernonmanta?

³ Satanaspa nisqanman jinaqa Diosqa manas imaraykupas  autoridadqa otaq gobernanteqa kananchu. Paypa nisqanman jinaqa Diosqa llullas, manas runakunaq allin kanankutapas munanchu. Runakunaqa noqallanchismantas kusisqa kausasunman (Gén. 3:1-5). Chaymantapas pipas Diosta kasukuqqa manas sonqomantachu kasukun. Ima pruebapipas tarikuspaqa saqepunmansi Diosta (Job 2:4, 5). Ichaqa, ¡Satanaspa chaykuna nisqanqa yanqan! Chaymantapas mana Dioswanqa manan runaqa jayk’aqpas allin kausaytaqa tarinmanchu. Chaykunata runakuna cuentata qokunankupaqmi Diosqa tiempota qoshan.

4. ¿Imaraykun allinta yachakunan pichus gobernante kanan chayta?

⁴ Jehová Diosqa allintan yachan Satanaspa rimasqanqa yanqa kasqanta. Chhaynaqa, ¿imaraykutaq kunankamari jinallata qhawashan Satanaspa gobiernananta? Chayqa manan Diosllamantachu, aswanpas runakunamanta angelkunamanta iman (leey Salmos 83:18). Kunankamaqa askhañan runakuna Adán Eva jina mana Diospa gobiernonta apoyashankuchu. Chaywanqa yaqapaschá pipas ninman “chhaynaqa razonwanchá Satanasqa rimasharan” nispa. Chaykunata allinta yachakunankamaqa manapunin jayk’aqpas kanqachu sumaq kausayqa. Ichaqa maypachachus Jehová Dioslla gobernante kanqa chayqa, llapa chay gobiernopi kaqkunan sumaqta kausanqaku (Efes. 1:9, 10).

5. ¿Imaraykun apoyananchis Diospa gobiernonta?

⁵ Pisi tiempomantaqa lliumi yachanqaku Diospa gobiernollan allin gobierno kasqanta. Chhaynapin Satanaspa gobiernonqa chinkachisqa kapunqa. Diospa gobiernollanñan qhepanqa. Llapa junt’aq sonqo runakunataqmi rikuchinqaku Diospa gobiernollan apoyasqankuta (Is. 45:23, 24). ¡Maytachá noqanchispas munashanchis chay junt’aq sonqo runakuna ukhupi kayta! Chay runakuna ukhupi kananchispaqqa allintan yachananchis imaraykus Diospa gobiernonta apoyananchis chayta.

6. ¿Iman imamantapas aswan importante?

⁶ Yachasqanchis jina Jehová Dioslla autoridadniyoq kasqanta rikuchiymi imamantapas aswan importanteqa. Salvacionninchisri, ¿manachu importante? Diosninchispaqqa salvacionninchispas importanten. ¿Imaynapin chayta yachanchis?

7, 8. ¿Imaynapin allinninchispaq kanqa Jehová Dioslla autoridadniyoq kasqanta rikuchisqan?

⁷ Jehová Diosqa anchatan munakun runakunataqa. Munakuwasqanchisraykun wawantapas kachamuran, chhaynapi wiñay kausayta chaskinanchispaq (Juan 3:16; 1 Juan 4:9). Ichaqa manachus Dios promesanta junt’anman chayqa, astawanraqchá Satanasqa Diosmanta malta rimanman.  Kanmanchá razonnin “llullan, manan munanchu runakuna allin kausanankuta” nispa ninanpaqpas. Burlakuq runakunapas razonwanchá ninkuman: “‘Jamusaqmi’ nintáq, ¿maytaq jamusqan kanchu? Ñaupa taytanchiskunaq wañusqanmantapachapas kaqllamá imapas kakushan, arí, runata Diospa kamasqanmantapachapas manan imapas cambianchu”, nispa (2 Ped. 3:3, 4). Ichaqa junt’anqapunin Diosqa promesanta. Chaymantan kashan paylla autoridadniyoq kasqanta rikuchinanpas (leey Isaías 55:10, 11). Chaymantapas Diosqa munakuywanmi gobiernanqa. Kasukuqkunataqa sumaqtan cuidanqa (Éx. 34:6).

⁸ Kaypi yachasqanchis jina, Jehová Dioslla autoridadniyoq kasqanqa importanten, salvasqa kananchispas importantellataqmi. Ichaqa allintan reparananchis mayqensi aswan importante chayta, tukuy kallpanchiswantaqmi apoyananchis Diospa gobiernonta.

9. ¿Ima niranmi Satanás Jobmanta? (15 paginapi dibujota qhaway.)

⁹ Job libropi willasqanmi rikuchishan imatas aswan allinpaq qhawarinanchis chayta. Chaypin willashan Satanaspa imachus nisqanmanta. Paypa nisqanman jinaqa Jobqa yanqallas Diosta servishanman karan. Chaymi Satanasqa niran: “Qechuy lliu imaymananta”, nispa. Diosqa manan munaranchu chay ruwayta, aswanmi niran: “Jobpa lliu kaqninta munasqaykita ruwamuy”, nispa (leey Job 1:7-12). Jinan Satanasqa juj ratollapi Jobpa tukuy imaymananta qechupuran. Wawankunapas chunkantinmi wañupuranku. Satanasqa Diospas chaykunata ruwashanman jinatan lliu chaykunata qhawarichiran (Job 1:13-19). Chaymantataq Jobta juj millay onqoywan jap’ichiran (Job 2:7). Chaymantaqa warminñataqmi imaymanakunata nispa pisicharan, juj kinsa runakunapas astawanraqmi pisicharanku (Job 2:9; 3:11; 16:2).

10. a) ¿Imaynatan Job rikuchiran Diospaq junt’aq sonqo kasqanta? b) ¿Imatan qonqaruran?

¹⁰ ¿Razonwanchu Satanás chayta nisharan Jobmanta? Manan. Jobqa manan jayk’aqpas Diostaqa saqeranchu (Job 27:5). Ichaqa qonqaruranmi imachus aswan importante kasharan chayta. ¿Imaynapi? Sufrisqanpin masta piensasharan. Chaymi yachaytapuni munasharan imaraykus sufrisharan chayta (Job 7:20; 13:24). Noqanchispas yaqapaschá chhaynata piensasunman, Diosmi ichaqa mana chhaynatachu piensaran, chaymi Jobtaqa corregiran. ¿Imaynatan chayta ruwaran?

11, 12. a) ¿Imatan Job entienderan Diospa yanapayninwan? b) ¿Chaskikuranchu Job Diospa yanapayninta?

¹¹ Job 38-41 capitulokunapin willashan Jehová Dios imatachus Jobta niran chayta. Chaypi willasqanman jinaqa, manan Diosqa Jobmanqa willaranchu imarayku sufrisqanta. Aswanmi yanaparan Diospa ñaupanpiqa juch’uychalla kasqanta reparakunanpaq. Chaymantapas yanaparanmi paypa problemankunaqa mana imapaschu kasqanta reparakunanpaq (leey Job 38:18-21). Chhaynatan Diosqa Jobta yanaparan.

 ¹² ¿Mana khuyapayakuqchu Dios kasharan Jobwan? Manan. Jobpas chaytaqa yacharanmi. Chaymi payqa imaymana llakipiña tarikuran chaypas niran: “Noqa kikiyta millakuni, ñut’u allpapi, usphapi tiyaykuspa, llakikuspa yuyayniyta jap’ikuni”, nispa. Chaypi rikusqanchis jina, Diosqa allintan Jobta yanaparan (Job 42:1-6). Elihupas ñan Jobtaqa yanapasqaña (Job 32:5-10). Chay yanapaykunata, consejokunatapas allinta chaskikusqanraykun Diosqa Jobta allinpaq qhawariran (Job 42:7, 8).

13. ¿Imaynatan Jobta yanapashallanman karan Diospa simin?

¹³ Diospa siminqa maytachá Jobtaqa kallpacharan. “Ñaupaqmanta aswantaraq saminchapuran” chaypas piensashallaranchá Diospa siminpiqa. Unaymantañan karan ‘qanchis churinkuna, kinsa ususinkunapas’ (Job 42:12-14). Chaymantapas Jobqa extrañaranchá ñaupaq wawankunataqa. Tukuy ima sufrisqanpas umallanpichá kasharan. Tiempowanqa yaqapaschá yacharan imarayku chaykunapi sufrisqanta. Yacharan chayqa yaqapaschá tapukuran, “¿imaraykutaq chhaynaniraqtari sufrinay karan?” nispa. Imaynaña kaqtinpas piensashallaranchá Diospa rimapayasqanpiqa. Chaychá yanaparan allin yuyaywan imatapas qhawarinanpaq (Sal. 94:19).

14. ¿Imatan yachasunman Jobta imachus pasasqanmanta?

¹⁴ Noqanchistapas Jobmanta willakuyqa yanapawasunmanmi allin yuyaywan imatapas qhawarinanchispaq. Bibliapipunin nin: “Ñaupaqpi qelqasqa kaqkunaqa yachachiwananchispaqmi qelqasqa karan; chaymantapas Diospa simin qelqan kallpachawanchis, aguantananchispaqpas yanapawanchis, chaymi suyakuyniyoqpas kanchis”, nispa (Rom. 15:4). ¿Imatan chay willakuymanta yachasunman? Ima problemapiña tarikuspapas manan chaypichu masta piensananchis. Aswanpas Jehová Dioslla autoridadniyoq kasqanta  rikuchiypin piensananchis. Chaymi imaña kaqtinpas paypa gobiernollanta apoyananchis, chhaynapin rikuchisun junt’aq sonqo kasqanchista.

15. ¿Imatan chaskisun imaña kaqtinpas Diospaq junt’aq sonqolla kaqtinchis?

¹⁵ Maytachá Jobpa experiencianqa kallpachawanchis. ¿Imaynata? Imapiña sufrinchis chaypas manan yanqachu sufrinchis nitaqmi Dioschu pruebaman churawashanchis. Aswanmi chaykuna kasqanpi rikuchinanchis kanqa piqpa gobiernontas apoyashanchis chayta (Prov. 27:11). Ima pruebatapas aguantasun chayqa Diosmi allinta qhawariwasun (leey Romanos 5:3-5). Chaymantapas Jobmanta willakuymi rikuchin “Jehová Diosqa [...] ancha munakuq kasqanta, khuyapayakuq kasqantawan” (Sant. 5:11). Chhayna kasqanraykun payqa llapa apoyaqninkunaman juj sumaq regalota qonqa. Chayrayku imapiña tarikusun chaypas amapuni Diosmantaqa t’aqakusunchu (Col. 1:11).

16. ¿Imaraykun piensananchispuni Dioslla autoridadniyoq kasqanpi?

¹⁶ Ima llakipipas tarikuqtinchisqa manapaschá facilchu kanqa Dioslla autoridadniyoq kasqanpi piensay. May juch’uyña chay llaki kanman chaypas chayllapi yuyayta churasun chayqa faciltan imatapas qonqarapusunman. Chaymi imapiña tarikuspapas piensananchispuni Dioslla autoridadniyoq kasqanpi.

17. ¿Imaynatan predicación yanapawasunman imachus aswan importante kaqta ama qonqananchispaq?

¹⁷ Diospa qowasqanchis llank’anapi ocupasqa kasun chayqa manan jayk’aqpas qonqasunchu imachus aswan importante chayta. Chaypaq yachasun juj hermanamanta. Paytaqa derrame cerebral nisqan jap’isqa. Chaymantapas lliu cuerponmi nanaq, cáncer onqoywantaqmi kasharanpas. Hospitalpi tratamientota chaskishaspaqa chaypi llank’aqkunaman,  pacientekunaman, visita jamuqkunaman imas Diosmanta willaq. Juj kutinpas iskay semana kuskallanpin 80 horasta predicasqa. Yacharanña wañukapunanta chaypas manan jayk’aqpas qonqaranchu imachus aswan importante chayta. Chaymantapas chayta ruwasqanmi yanaparan mana nishuta sufrinanpaq.

18. ¿Imatan yachasunman juj hermanaq experiencianmanta?

¹⁸ Sapa p’unchaymi imaymana problemakuna kan, chaymi sapa p’unchay rikuchinanchis kanqa imachus aswan importante chayta. Chaypaq yachasun hermananchis Jennifermanta. Wasinman viajanan kashaqtinsi cancelapusqaku avionninta chaysi kinsa p’unchay aeropuertopi qhepakusqa. Chhaynas pasasqa juj avionkunawanpas. Chaysi payqa llakisqa kashananmantaqa Diosmanta kallpata mañakuspa juj pasajerokunaman predicasqa. Paymi nin: “Llakikunapaqña chay karan chaypas Jehová Diospa yanapayninwan kallpata jap’ispan jujkunaman paymanta yachachirani”, nispa.

19. ¿Imapin jujniray kanchis falso religionkunamanta?

¹⁹ Diospa llaqtanpi kaqkunallan Diospa gobiernontaqa apoyashanchis, chaypin jujniray kanchis falso religionkunamanta. Chaymi imaña kaqtinpas apoyashanallanchis Diospa gobiernontaqa.

20. ¿Imaynatan Dios qhawarin payllata apoyasqanchista?

²⁰ May kusisqachá Diosqa kashan ima sasachakuyña kaqtinpas paypa gobiernollanta apoyasqanchismanta (Sal. 18:25). Qatimuq estudiopin astawan yachasun imaraykus Diospa gobiernollanta apoyananchis chayta, imaynatas chayta ruwasunman chaytawan.