1, 2. ¿Imawanmi Jehová Dios kallpachawanchis? ¿Imatan prometen Jeremías 29:11, 12 textopi?

BIBLIAPIN nishan: “Casarakuqkunaqa ñak’ariypin tarikunqaku”, nispa (1 Cor. 7:28). Chay textotan juj wayna leesqa jinaspa chaypi piensayta qallarisqa; chaymantataq juj kuraq casado hermanota tapukusqa: “¿Ima ninantan chay texto nishan? ¿Jayk’aqllapas casarakusaq chayqa imatan ruwayman chaypi tarikuspay?”, nispa. Chaymi chay casado hermanoqa chay tapukusqanman manaraq imatapas kutichishaspa nisqa: “Ama chayllapichu piensay; piensay apóstol Pabloq wakin qelqasqankunapipas, paymi nillarantaq: ‘Diosmi tukuy imaymana pruebakunapi kallpachawanchis’”, nispa (2 Cor. 1:3, 4).

² Chaypi nisqan jina Jehová Diosqa tukuy ima llakikuyninchispin kallpachawanchis sonqochawanchis ima.  Yaqapaschá jayk’aqllapas chayta repararanki. Mayninpiqa Bibliawanmi chayta ruwan. Payqa imaynan ñaupa tiempopi serviqninkunaq allin kausanankuta munaran, chhaynata allin kausananchistan munan (leey Jeremías 29:11, 12).

3. ¿Imakunamantan kaypi yachasunchis?

³ Sichus allinta yachasun imaraykus casado kausaypi familiapipas problemakuna kasqanta chayqa, yachasunmi chaykuna imayna allichayta imayna aguantaytapas. Chhaynaqa, ¿ima jawan familiapi “ñak’ariykuna” kanman? ¿Ima ejemplokunan yanapawasunman chaykunata aguantanapaq kallpachasqa kanapaqpas? Chaykunamantan kunan yachasun.

4, 5. ¿Imakunan casarasqakunata ‘ñak’arichinman’?

⁴ Diosmi ñaupaq warmi-qharita casarachishaspa niran: “Chayrayku, runaqa taytantapas mamantapas saqepunqa, jinaspan warminman jujllachaykakapunqa, juj aychallataq kapunqaku”, nispa (Gén. 2:24). Ichaqa juchasapa runakuna kasqanchisraykun mana facilchu warmi-qhari kausayqa (Rom. 3:23). Chaymantapas Bibliaq nisqan jina, qharitan Jehová Diosqa churan familiapi uma kananpaq. Chaymi casarasqa warmiqa qosanta kasukunan kanqa (1 Cor. 11:3). Chayraqtaq tiyanqaku chayqa manapaschá qharipaqqa facilchu kanqa familiapi umalli kay. Chaymantapas warmiqa tayta-mamallantataq kasukuq chayqa manapaschá facilchu kanqa qosanta kasukuy. Familiamanta wakinwanpas yaqapaschá ima problemapas kanqa. Chaykunapaschá chayllaraq casarasqakunapaqqa “ñak’ariy” jina kanman.

⁵ Wawayoq kay kusikunapaqña chaypas, wakinqa wawayoq kanankuta yachaspan astawanraq llakikunku. ¿Imarayku? Mayninpiqa imaymanan pasan warmikunaq onqoq kasqan tiempopi. Chaymantapas gastopi iman wakinqa tarikunku, chaykunapi piensaspan llakikunku. Chaymantapas warmiqa wawanmanmi masta tiempota qonan kanqa, qharipas astawanpaschá llank’anan kanqa. Chhayna kaqtinqa manapaschá tiempo kanqachu ñaupaqpi jina kuska pasarinankupaq.

6-8. ¿Imaynan tarikunku wakin casarasqakuna mana wawayoq kayta atispa?

⁶ Wakin casarasqakunaqa wawayoq kaytañataqmi munanku, ichaqa manan atinkuchu. Chaywanmi paykunapas ‘ñak’arishankumanpas’ jina sinchi llakipi tarikunku (Prov. 13:12). Ñaupa tiempopipas wawayoq kayqa ancha importanten karan. Chaymi Jacobpa esposan Raquelqa mana wawayoq kayta atispa sinchita llakikuran, wañuytaraqmi munaranpas (Gén. 30:1, 2). Kunan tiempopas wakin nacionkunapiqa importanten wawakunayoq kayqa. Chaymi chay nacionpi runakuna misionerokunata tapunku: “¿Imaraykutaq mana wawayoqri kankichis?”, nispa. Allintaña misionerokuna explicanku chaypas. “Ay, imay sonqo, Diosmantachá mañapusaykiku wawayoq kanaykichispaq” nispan chay runakuna ninku.

 ⁷ Inglaterra nacionpi juj hermanapas wawayoq kaytapunis munasqa ichaqa manas atisqachu. Tiempowanqa manañas edadninpichu kasqa wawayoq kananpaq chaysi payqa sinchi llakisqa tarikusqa. Chaymantaqa juj wawatas adoptasqaku, ichaqa manas chaywanpas sonqon thajchu kasqa. Chay hermanan nin: “Pi familiaypas wañukapunman karan jinaraqmi may llakisqa kasharani. Jujpa wawanqa manan wawayki jinapunichu”, nispa.

⁸ Bibliaq nisqan jina, warmikunaqa wawakunayoqmi “kananku allin waqaychasqa kanankupaq” (1 Tim. 2:15). ¿Imaynataq chayri? ¿Wawakunayoq kaspachu wiñay kausayta tarinqaku? Manan chaytachu nishan. Aswanmi paykunaqa wawakunayoq kaspa cuidasqa kanqaku cuento q’epi kaymanta, jujkunaq vidanman chapukuymanta ima (1 Tim. 5:13). Chaywanpas kanqapunin casado kausaypi problemakunaqa, familiapi problemakunapas.

9. ¿Ima jatun llakipin tarikullankumantaq wakin casarasqakuna?

⁹ Wañuypas ñak’ariytan apamullanmantaq. ¿Imaynapi? Casarasqakunamanta mayqenninkupas wañupunman chayqa, maytachá wañuqniyoqqa sufrinqa. Ichaqa cristianokunataqa maytachá kallpachawanchis kausarimpuymanta Jesuspa willasqanqa (Juan 5:28, 29). Chay suyakuywanmi Diosninchisqa sonqochawallanchistaq. Chaymi kunanqa yachasun imaynatas Diosta serviqkunaqa llakikuyninkupi kallpachasqa tarikuranku chayta, imaynatas chay ejemplokuna noqanchistapas yanapawasunman chaytawan.

10. ¿Iman Anata yanaparan amaña llakikunanpaq? (3 paginapi dibujota qhaway.)

¹⁰ Elcanaq ancha munakusqan esposan Anamanta yachasun. Payqa manan atiranchu wawayoq kayta. Elcanaq jujnin esposanmi ichaqa askha wawakunayoq karan (leey 1 Samuel 1:4-7). Chay esposanpa sutinmi karan Peniná. Paymi Anata sapa watan sufrichiq mana wawayoq kasqanmanta imaymanata nispa. ¿Imatan Ana ruwaran? Bibliaq nisqan jina, ‘Diospa qayllanpin unayta mañakuran’. Arí, Diosmanmi payqa tukuy ima llakikuyninkunata willakuran. Chaymantaqa “manañan llakisqañachu karan” (1 Sam. 1:12, 17, 18). Diosllapiñan confiaran wawayoq kananpaq yanapananpi.

11. ¿Imatan ruwananchis llakipi tarikuspa?

¹¹ Satanaspa kamachisqan millay pachapitaq kashanchis, juchasapa runakunataq kanchispas chayqa, mayraqchá sufrinanchis kanqa (1 Juan 5:19). Ichaqa sichus Ana jina ‘tukuy imapi kallpachakuq’ Diospa yanapayninta mañakusun  chayqa, yanapawasunmi payqa. Chaymi Ana jina tukuy ima llakikuyninchiskunata Diosman willakunanchis. Arí, imachá sonqonchispi kashan, imachá llakichiwashanchis chaytan willakunanchis (Filip. 4:6, 7).

12. ¿Iman profetisa Anata yanaparan kusisqalla kausananpaq?

¹² Sonqo nanaymi kanman esposa otaq qosa wañupuqtinqa. Sonqo nanayllataqmi kanman mana wawayoq kaypas. Chhaynaña kaqtinpas atisunmanmi kusisqa kausayta. ¿Imaynapi? Chaypaq yachasun Jesuspa tiemponpi profetisa Anamanta. Payqa qanchis watallaraq casado kashaspan viuda kapusqa, chaymantapas manachus jina wawankunapas kanmanchu karan. ¿Iman payta yanaparan ama llakiq ñit’isqan kananpaq? “Payqa mana faltaytan riq temploman”, 84 watayoqña kasharan chaypas, ‘chaypin tuta-p’unchay Diosta servisharan ayunaspa rogakuspa ima’ (Luc. 2:37). Chayta ruwaymi Anataqa yanaparan kusisqalla kananpaq.

13. ¿Imaynatan amigokuna yanapawasunman?

¹³ Llakipi tarikushanchis chayqa iñiqmasinchiskuna ukhupi amigonchiskunapas yanapawasunmanmi (Prov. 18:24). Chaymi pasaran Paulawan. Pay pisqa watallanpiraq kashaqtinmi maman Diospa llaqtanta saqepusqa. Chaywanmi payqa llakisqa tarikusqa. Ichaqa hermana Anan yanapasqa Diosta munakushanallanpaq. Paymi kallpachasqa llakikuyninkunapi. Paulan nin: “Ana manaña familiaychu chaypas, maytan noqapi llakikuq, interesta ima churaq, chay ruwasqanmi noqataqa yanapawaran Jehová Diosta ama saqenaypaq”, nispa. Tiempowanqa kutimpuranmi Paulaq mamanqa, chaywanmi payqa anchata kusikuran. Anapas kusisqan kashan Paulata yanapasqanmanta.

14. ¿Imaynatan jujkunata yanapay yanapawasunman?

¹⁴ Jujkunata yanapasun chayqa, manañan  nishutachu piensasun llakikuyninchiskunapi. Wakin hermanakunaqa casarasqaña mana casarasqaña kanku chaypas, Diosmanta allin willakuykunata jujkunaman willaspan kusisqa kausanku. Paykunamanta wakinpaqqa chay ruwaymi jampi jina. Ichaqa llapanchismi jujkunapiqa interesta churananchis. Iñiqmasinchiskunatapas yanapananchismi, chayta ruwasun chayqa sumaqtan noqanchispura kausasun (Filip. 2:4). Chaytan apóstol Pablopas ruwaran. Juj mama jinan Tesalónica llaqtapi iñiqmasikunata cuidaran, tayta jinataqmi paykunataqa kallpacharanpas (leey 1 Tesalonicenses 2:7, 11, 12).

15. ¿Pikunan responsable kanku wawakunaman Diosmanta yachachinankupaq?

¹⁵ Juj familiakunatapas kallpachananchismi. ¿Imaynatan chayta ruwasunman? Wakin hermanokunaqa mosoqllaraqmi kanku, yaqapaschá paykunaqa aswan experienciayoq hermanokunata valekunkuman wawankuman Bibliamanta yachachinanpaq. Chhayna kaqtinqa yanaparinanchismi. Ichaqa Bibliaq nisqan jina, tayta-maman responsable wawankuman Diosmanta yachachinankupaqqa (Prov. 23:22; Efes. 6:1-4). Chaymi jujkunaña yanapankuman chaypas paykunaqa yachachinankupuni wawankumanqa. Chaymantapas tayta-mamakunaqa rimashanallankun wawankuwanqa.

16. ¿Imapin allinta piensananchis juj wawakunata yachachispa?

¹⁶ Juj hermano niwasun wawanman Diosmanta yachachinanchispaq chayqa, allintan yachananchis mana paypa rantinpichu kasqanchista. Chaymantapas yaqapaschá mana iñiq runaq wawanman Diosmanta yachachinanchis kanqa. Chhayna kanqa chayqa, manan tayta-mamanpaqchu creekunanchis. Chaymantapas paykunawanqa estudiananchis tayta-mamanpa ñaupanpin, mana atikuqtintaq juj iñiqmasiwan kuska. Manachus wasinpi atikunman chayqa jujkunaq rikushasqanmi estudiananchis. Chhaynapin mana pipas malta piensanqachu. Tiempowanqa yaqapaschá tayta-mamanñataq yachachinqa.

17. ¿Imaynatan wawakuna thaj kausayta qonkuman familiankuman?

¹⁷ Jehová Diosta kasukuq wawakunaqa thaj kausaytan familiankuman apamunku. ¿Imaynata? Paykunaqa respetankun tayta-mamankuta, imaymanakunapitaqmi yanapakunkupas. Chaymantapas familianku Dios sonqo kananpaqmi yanapakunku. Noepas thaj kausaytan familianman apamuran; paymantan papan Lamec niran: “Kaymi ruwayninchismanta samarichiwasun, kay pachata Señor Diospa ñakasqanraykun sinchita llank’ashanchis”, nispa. Chay nisqanqa junt’akuranmi (Gén. 5:29; 8:21). Kay tiempopipas Diosta kasukuq wayna-sipaskunaqa thaj kaytan tayta-mamankuman apamunku. Chaymantapas chay wawakunaqa allin preparasqan kashanku ima pruebaña kaqtinpas familiankuta yanapanankupaq.

18. ¿Iman yanapawasun ima pruebapiña tarikuqtinchispas?

¹⁸ Kay tiempopiqa askha runakunan thaj kausayta tarishanku, Diosmanta mañakuspa, Bibliaq willasqan ejemplokunapi piensaspa, Diosta munakuq runakunawan amigota armaspa ima (leey Salmos 145:18, 19). Chaymantapas Jehová Diosllan thaj kausayta qoqqa. Payllan yanapawasun ima pruebapiña ima ñak’ariypiña tarikuqtinchispas.