JEHOVÁ DIOSQA serviqninkuna thajpi kausanankutan munan. Chaymi tukuy atisqanchista kallpachakunanchis thajpi kausananchispaq. Chayta ruwasun chayqa sumaq kausaymi Diospa llaqtanpi kanqa. Juj runakunapas noqanchiswan kaytan munanqaku.

Chaypaq yachasun Madagascar nacionpi juj allin reqsisqa layqa runamanta. Paysi rikusqa Diospa llaqtanpi thaj kausay kasqanta. Chaysi payqa nisqa: “Jayk’aqllapas juj religionman jaykusaq chayqa, kay religionmanmi jaykupusaq”, nispa. Tiempoq pasasqanman jinan payqa mana allin ruwayninkunata saqepuran, Bibliaq kamachisqanman jinataqmi casarakuynintapas allichapuran, chhaynapin Testigo kapuran.

Chay layqa runa jinan askha runakuna Diospa llaqtanpi thaj kausayta tarishanku. Ichaqa Bibliaq nisqan jina phiñachinakuy sintichinakuy kasqanwanmi chay thaj kausay tukukapunman (Sant. 3:14-16). Ichaqa kikin Bibliallapitaqmi consejokuna kan chaykunata allichanapaq. Chaymi kunan yachasun imaynatas wakin runakuna chay consejokunawan yanapachikuranku chayta.

Chris sutiyoq hermanon nin: “Llank’anapin juj hermanowan mana allintachu apanakuq kayku. Juj kutinmi sinchitapuni discutisharayku chaytan iskay runakuna rikuruwanku”, nispa.

Hermana Janetmi nin: “Juj hermanawanmi sapa kutillan predicaq kayku; chayllamanmi ichaqa manaña rimaykuwaranchu. Manan yacharanichu imarayku phiñasqa kasqanta”, nispa.

Hermano Michaelmi nin: “Juj kutinmi kinsa runakuna telefononta rimasharayku. Rimasqaykuman jinan jujninqa despidikuran. Jinan noqaqa paymata malta rimayta qallarirani. Ichaqa manan cortamusqachu telefonota, jinan llapa rimasqayta uyarimuwasqa”, nispa.

Hermano Garyn nin: “Congregacionpin iskay precursorakuna nishuta phiñachinakuqku. Chayta rikuspankun juj iñiqmasikunapas manaña thajpichu kasharanku”, nispa.

Chay problemakunaqa manapaschá nishuchu. Ichaqa may llakisqachá tarikuranku chay hermanokunaqa; t’aqanakuytapaschá congregacionpipas jatarichiranku. Ichaqa Bibliapi consejokunata kasukuspan paykunaqa allichapuranku phiñachinakuyninkuta. ¿Ima consejokunan paykunata yanapanman karan? Chaytan kunan yachasun.

Génesis 45:24 textopin nishan: “Aman ñanpi phiñanakunkichischu”, nispa. Chhaynatan José wayqenkunata consejaran. Pipas genionta mana controlayta atiqqa astawanmi phiñachinakuyta jatarichin, jujkunatapas sintichinmanmi. Chhaynan karan Chris sutiyoq hermanopas. Payqa manan faciltachu jujkunaq consejonta chaskikuq. Ichaqa cambiaytan munasharan, chaymi  chay discutiqmasin hermanomanta disculpata mañakuran kallpachakurantaqmi genionta cambiananpaqpas. Chayta rikuspan jujkaq hermanopas kaqta ruwallarantaq. Kunanqa kusisqan paykunaqa Diosta servishanku.

Proverbios 15:22 textopin nishan: “Yuyaychaq mana kaqtinqa, imachus yuyaykusqakunan qollupun”, nispa. Chaypi nisqanman jinan hermana Janetqa ruwaran, chaymi pay contra phiñakuq hermanawan rimaran. Qallariypiqa manas facilchu kasqa, rimasqankuman jinas ichaqa tranquilo rimasqaku. Chaypis payqa tapusqa imaraykus phiñasqa kasharan chayta. Jinas chay hermanaqa chayta willakusqa; Janet-taq explicasqa mana chaykunapi participasqanta. Chaysi phiñakuq hermanaqa disculpata mañakapusqa. Kunanqa paykunapas kusisqan Diosta servishanku.

Mateo 5:23, 24 textopin nishan: “Sichus altarman ofrendaykita apashanki, chaypitaq yuyarinki wayqeyki qanpaq phiñasqa kashasqanta chayqa, altarpa ñaupanpi ofrendaykita saqeykuy, jinaspa phaway wayqeykiwanraq allipunamuy”, nispa. Chay consejotan Jesús qoran orqo patapi yachachishaspa. Chayta rikuspan Michaelqa sinchita llakikusqa. Payqa thajpi kausaytan munasharan, chaymi chay ofendesqan hermanomanta perdonta mañakapuran. ¿Perdonaranchu chay hermano? Michaelmi nin: “Hermanoyqa sonqomantan perdonawan”, nispa. Chhaynapin paykunaqa thajpi kausapuranku.

Colosenses 3:12-14 textopin nishan: “Qankunapura paciencianakuychis, perdonanakuychis razonwanña pipaqpas phiñasqa kashankichis chaypas”, nispa. ¿Yuyashanki rimamusqanchis iskay precursorakunata? Paykunatan juj umalliq yanapasqa. Imayna kasqankuwan juj hermanokuna sintisqa kasqankutan reparachisqa. Chaymantapas “congregacionpi thaj kausay kananpaqqa paciencianakunaykichismi” nispan nisqa. Chay hermanakunaqa kasukusqakun chay consejota. Kunanqa sumaqtan kausashanku, kuskataqmi Diosmanta willaspa purishanku.

Mayninpiqa yaqapaschá pipas ofendewasun, chaypipas yanapawasunmanmi Colosenses 3: 12-14 textokunaqa. Chaypaqmi ichaqa humilde kana, chhaynapin facilta pitapas perdonapusunchis. Ichaqa sasa perdonay kaqtinqa Mateo 18:15 textoq nisqanman jinan ruwananchis. Jatun jucha kaqtin imachus ruwanamantaña chaypi Jesús rimashan chaypas, chay textoqa yanapawasunmanmi piwanpas phiñachinakuqtinchisqa. Chaypaqqa sumaqllatan piwanpas rimananchis, chhaynapin allichallasun ima sasachakuytapas.

Bibliapiqa imaymanapaqmi consejokuna kan, chay consejokunata kasukunapaqmi ichaqa santo espirituq rurunta noqanchispi ruruchinanchis. “Munakuyta, kusikuyta, thaj kausayta,  pacienciakuyta, sumaq sonqo kayta, allin sonqo kayta, iñiyta, llamp’u sonqo kayta, cuerpo kamachiq kayta ima” (Gál. 5:22, 23). Chaykunaqa aceite jinan. Imaynan aceiteqa máquina allinta funcionananpaq servin, chhaynatan espirituq rurunkunapas yanapawasun jujkunawan sumaqta kausananchispaq.

Sapankanchismi jujniray kanchis, manan igualtachu piensanchispas. Chaykuna kasqanwanmi Diospa llaqtanpiqa munay imapas. Ichaqa chhayna jujniray kasqanchismi mayninpiqa phiñanachiyta jatarichinman. Juj allin experienciayoq umalliqmi nin: “Juj manchali runaqa manapaschá allinchu sientekunqa juj rimaysapa runaq ladonpiqa. ‘Imataq pasanmanri’ nisunmanpaschá, ichaqa nishu sasachakuytan mayninpiqa qallarichinman”, nispa. Chhaynaqa, ¿manapunichu allin kankuman jujniray genioyoq runakuna? Chaypaq piensasun iskay apostolkunapi, paykunan kanku Pedrowan Juanwan. Pedroqa comuntan mayninpiqa imatapas rimaq, manataqmi imatapas manchakuqchu. Juanmi ichaqa allin yuyaywan imatapas ruwaq. Chhaynaña karanku chaypas kuskan Diospaq llank’aranku (Hech. 8:14; Gál. 2:9). ¿Imatan paykunamanta yachasunman? Imayna clase runaña kanchis chaypas atisunmanmi kuska llank’ayta.

Yaqapaschá congregacionpi mayqen iñiqmasipas sintichiwaranchis. Ichaqa yachasqanchis jina Cristoqa payraykun wañuran, chaymi paytaqa munakunanchis (Juan 13:34, 35; Rom. 5:6-8). Chaymantapas manan ninanchischu “paywanqa manan jayk’aqpas amigo kaymanchu” nispaqa, chhaynata piensashanamantaqa aswanmi tapukunanchis: “¿Diospa simin contrachu chay hermano  imatapas ruwashan? ¿Cheqnipakuwashanchu icha jujnirayllachu kayku? ¿Imatan paymanta yachayman?”, nispa.

Yaqapaschá mayqen hermanopas rimaysapa kanman noqanchistaq juj chikan manchali kasunman. Chhayna kaqtinqa, paypaqqa facilpaschá piwanpas rimay; chayrayku paymanta malta piensashananchismantaqa, paywan kuska predicasun. Chayta ruwasun chayqa yaqapaschá imaymanata paymanta yachasunchis. Chaymantapas noqanchismanta aswan qoykukuqpaschá; kuraqkunatapas onqosqakunatapas sumaqtapaschá qhawarin. Chaykunataqa yachasun paywan purispallan; chhaynapin noqanchispas qoykukuq kayta yachasunchis. Chhaynaqa manaña jujkunawan igualchu kanchis chaypas, kallpachakunanchismi imapichá ejemplo kanku chaypi yuyayninchista churananchispaq. Manapaschá chay hermanoqa amigonchispunichu kapunqa, ichaqa kallpachakunanchismi paywan sumaqta kausananchispaq. Chhaynapin sonqonchis thaj kanqa. Congregacionpipas sumaq kausaymi kanqa.

Apostolkunaq tiemponpi Evodiapas Sintiquepas manapaschá kaq genioyoqchu karanku. Chaywanpas ‘juj yuyayllan Señorta servinanku karan’, chayta ruwanankupaqmi apóstol Pablo paykunata kamachiran (Filip. 4:2). Kaqtan noqanchispas ruwananchis. Kallpachakunanchismi congregacionpi thaj kausay kananpaq.

Huertapi mana allin qorata mana saphinmantachu t’irasunman chayqa kaqllan wiñashanman. Chhaynan kanman sintipakuywanpas, manachus sonqonchismanta t’irasun chayqa kaqllan wiñashanqa, chhaynapitaq congregacionpi t’aqanakuyta jatarichinqa. Chaymi kallpachakunanchis jujkunawan thajpi kausananchispaq, chhaynapin  rikuchisunchis Jehová Diosta iñiqmasinchiskunatapas munakusqanchista.

Sichus kallpachakusun phiñachinakusqanchista allichapunanchispaq chayqa, sumaqtan jujkunawan kausasun. Chaypaq juj hermanamanta yachasun, paymi nin: “Juj hermanan sapa kutin erqeta jina tratawaq, chaywanmi sinchita coleraq kani. Chaymi noqaqa ‘manataq respetawanchu chayqa imaynapitaq noqari respetayman’ nispa, mana respetowan payta trataq kani”, nispa.

Chaymantan ichaqa imakunachus ruwasqanpi allinta piensasqa. Paymi nillantaq: “P’enqasqan kasharani; ‘imatataq kaytari ruwashani’ nispan nisharani. Chaymi Diosmanta mañakurani cambianaypaq. Chaymantataq juj regalota rantirani, juj cartatapas qelqarani chaypin disculpata mañakurani mana respetowan tratasqaymanta. Payqa disculpawaranmi; chaypin fuerteta abrazanakurayku. Chaymantapachan manaña ima problemaykupas kanchu”, nispa.

Lliu runan thajpi kausayta munan, ichaqa manan sumaqtachu jujkunawan kausanku. Arí, kay pacha runakunaqa imaymana problemallapin kausanku. Jehová Diosta serviqkunan ichaqa mana chhaynachu kanku. Dios kikinmi apóstol Pablowan qelqachiran: “Qankunatan valekuykichis imapaqchus wajasqa karankichis chayman jina kausanaykichispaq, jinallataq tukuy k’umuykukuywan, llamp’u sonqo kaywan, pacienciakuywan, munakuywan aguantanakuspa ima kausanaykichispaqwan. Chaymantapas jujkuna-jujkunawan sumaqta kausaychis, tukuy atisqaykichistataq ruwaychis jujllachasqalla kashanaykichispaq, chay jujllachasqa kaytaqa santo espirituraykun chaskirankichis”, nispa (Efes. 4:1-3). Chaypi nisqan jina, llapanchismi kallpachakunanchis jujkuna-jujkunawan sumaqta kausananchispaq; chaymi ima phiñachinakuyña kaqtinpas apuraylla chayta allichapunanchis.