1, 2. ¿Imakunatan tapukunanchis Mateo 24:14 textopi Jesuspa kamachikusqanmanta?

JESUSMI willaran tukukuy p’unchaykunapi Diospa gobiernonmanta allin willakuykuna pachantinpi willakunanta (Mat. 24:14). Chaymi Jehová Diospa testigonkuna pachantinpi predicashanchis. Yaqa llapa runakunan chaytaqa yachanku. Wakinqa sumaqtan uyarikunku wakintaq mana. Ichaqa, ¿imaynapin yachanchis Jesuspa willasqan noqanchispi junt’akusqanta?

² Askha religionkunan ninku: “Jesuspa nisqanman jinan predicayku”, nispa. Paykunaqa iglesiankupi yachachisqankuta, televisionpi otaq internetpi rimamusqankuta, otaq Jesuspi iñisqankumanta willakusqankutan ninku: “Predicación”, nispa. Wakinqa wajcha runakunata hospitalkunapi jampisqankuta otaq escuelakunapi yachachisqankutan predicayta jina qhawarinku. Ichaqa, ¿chhayna predicanamantachu Jesús rimasharan?

3. ¿Ima tawa ruwaykunatan Jesús qatikuqninkunaman kamachiran?

 ³ Jesusmi kausarimpusqan qhepaman askha qatikuqninkuna juñunasqa kashaqtin kamachiran: “Rispa llapa suyu runakunata yachachimuychis, yachachisqaykuna kanankupaq, jinaspa [...] bautizamuychis. Qankunaman lliu kamachisqaykunata paykunaman yachachimuychis kasukunankupaq”, nispa (Mat. 28:19, 20). Chaypin Jesusqa kamachisharan rispa runakunata maskhamunankupaq. Bibliamanta yachaq runan nin: “Jesuspa kamachikusqantaqa sapanka cristianon junt’anan karan. Chaypaqqa callen-callentan rinanku karan, lamar-qochatan chimpananku karan”, nispa. Chaymantapas kinsa ruwaykunatawanmi kamachiran: Discipulokunatan ruwananku karan, bautizamunankun karan, yachachimunankutaqmi karan (Mat. 10:7; Luc. 10:3).

4. ¿Imayna predicanankutan Jesús qatikuqninkunaman kamachiran?

⁴ ¿Imayna predicanankutan Jesús kamachiran? ¿Sapankanku munasqankuman jina predicanankutachu icha llapallanku allinta organizakuspa predicanankutachu? Jesusqa predicaytan rijch’anachiran challwaywan. Ichaqa manan ansuelowan challwaq runawanchu rijch’anachiran, aswanpas askha runakuna jatun mallapi challwasqankuwanmi. Mallawan challwanapaqqa askha runakunan necesitakun, allintan organizakunanku, llapallankutaqmi kallpachakunanku juj nisqalla allinta llank’anankupaq (Luc. 5:1-11). Chhaynata ‘runakunata challwanankupaqmi’ Jesusqa kamachiran (leey Mateo 4:18-22).

5. a) ¿Ima tapuykunatan kay estudiopi kutichikunqa? b) ¿Imapin yanapawasun chay tapuykunamanta yachasqanchis?

⁵ ¿Pikunan Jesuspa kamachikusqanman jina predicashanku? Chayta yachanapaq kay tawa tapuykunata kutichisun:

• ¿Ima willakuytan predicananchis?

• ¿Imaraykun predicanchis?

• ¿Imaynatan predicananchis?

• ¿Maykaman predicasunchis, jayk’aqkama?

Chay tapuykunata kutichispan yachasun pikunan Jesuspa kamachikusqanta junt’ashanku chayta. Jinaspapas kallpachawasunmi mana pisipaspa predicananchispaq (1 Tim. 4:16).

6. ¿Imaynapin yachanchis Testigokunalla Diospa gobiernonmanta predicasqanchista?

⁶ Jesusqa Diospa ‘qhapaqsuyunmanta [otaq gobiernonmanta] allin willakuykunatan’ llapa runaman willaran (leey Lucas 4:43). Chaytan qatikuqninkunapas ruwaranku. Kunanri, ¿pikunan chay willakuyta willashanku? Jehová Diospa testigonkunan. Chaytaqa cheqnikuwaqninchis runakunapas yachankun. Juj kutinmi  juj sacerdote juj iñiqmasinchista niran: “Noqaqa askha nacionkunapin tiyarani, sapanka nacionpi tupasqay Testigokunatan tapurani: ‘¿Imamantataq predicankichisri?’ nispa. Jinan sonso jina llapallanku niwaranku: ‘Diospa gobiernonmanta allin willakuykunatan’”, nispa. Chay iñiqmasikunaqa manan “sonso” kaypichu chayta niranku, aswanpas juj jinalla kasqanchistan rikuchisharanku (1 Cor. 1:10). Chaymantan Qhawaq revistanchispas willan, titulonpunin nin Qhawaq. Jehová Diospa Gobiernonmanta Willashan nispa. Chay revistaqa 254 simikunapin kashan, sapa revistamantataq 59 millón jina copiakunata ruwakamun. ¡Manan ima qelqapas kay revista jinaqa lloqsimunchu!

7. ¿Imaraykun religionpi umallikuna mana Diospa gobiernonmantachu predicanku?

⁷ “Cristianon kayku” niq religionkunapi umallikunaqa manan Diospa gobiernonmantachu predicanku. Paykunaqa ninkun: “Diospa gobiernonqa cristianokunaq sonqonpin kashan”, nispa (Luc. 17:21). Paykunaqa manan yachankuchu Diospa gobiernon janaq pachapi kasqanta, chaypi Jesús kamachikushasqanta, pisi tiempomanta millay runakunata llapa sasachakuykunatapas chinkachipunanta. Chaymi mana chaykunata yachachinkuchu (Apo. 19:11-21). Navidad otaq semana santa fiestakuna chayamullaqtinmi Jesusmanta rimanku. Arí, paykunaqa manan Jesuspa willasqan willakuymantachu predicanku, manataqmi yachankuchu imarayku predicakunan kasqantapas.

8. ¿Imaraykullan yaqa llapa religionkunapi umallikuna predicanku?

⁸ Cheqaq cristianokunaqa manan qolqeta juñunankuraykuchu nitaq ancha sumaq wasikunata ruwanankuraykuchu predicananku. Jesusmi niran: “Gratisllan chaskirankichis, gratisllataqmi qonkichispas”, nispa (Mat. 10:8). Cristianokunaqa manan Diospa siminwan negociota ruwanankuchu (2 Cor. 2:17). Predicaqkunaqa manan sueldoyoqchu kananku (leey Hechos 20:33-35). Jesuspa kamachikusqanqa sut’in kashan, chaywanpas yaqa llapa iglesiakunapin qolqeta mañanku, chaywantaqmi wakinqa kausanku. Chay qolqewanmi pastorkunaman, sacerdotekunaman, yanapakuqkunamanpas paganku. Chaymi wakinqa sinchi qhapaq kashanku (Apo. 17:4, 5).

9. ¿Imaraykun Testigokuna predicanchis?

⁹ Jehová Diospa testigonkunari, ¿imaraykun predicanchis? Jehová Diosta runamasinchistapas munakusqanchisraykun. Chaymi ima gastokuna ruwasqanchispas donación churasqanchiswan pagakun (2 Cor. 9:7). Manan juñunakuna wasipi nitaq asambleakunapipas qolqetaqa  mañanchischu. Qayna watan yaqa 2.000 millón horakunata predicaranchis, isqon millón más runakunamantaq sapa killa estudiokunata qoranchis. Chaykunataqa tukuy sonqowanmi ruwaranchis, manataqmi pimantapas qolqetaqa mañaranchischu. Juj investigaq runan Testigokunamanta niran: “Paykunapaqqa predicaymi yachachiymi aswan importante [...]. Umallinkunaqa manan sueldoyoqchu kanku”, nispa. Arí, Testigokunapin Salmo 110:3 (leey) textoq nisqan junt’akushan.

10. ¿Imaynatan Jesuspas discipulonkunapas predicaranku?

¹⁰ ¿Imaynatan predicaranku Jesuspas discipulonkunapas? Runakunaq may tarikusqankupin predicaqku. Paykunaqa predicaqkun plazakunapi, mercadokunapi, wasin-wasinta ima (Mat. 10:11; Luc. 8:1; Hech. 20:20). Ichaqa wasin-wasinta predicaspan astawanqa llapa runakunaman allin willakuykunata willaqku.

11, 12. ¿Imapin jujniray Testigonkunaq predicasqan “cristianon kayku” niq umallikunaq predicasqanwan?

¹¹ “Cristianon kayku” niq religionkunari, ¿Jesús jinachu predicanku? Chay religionkunapi runakunan ninkun: “Pastorkunan otaq sacerdotekunan predicananku”, nispa. Chaywanpas umallinkuqa “challwasqanku” runakunallapin interesakunku. Mayninqa runankutan tanqanku predicanankupaq, ichaqa manan kasukunkuchu. 2001 watapin papa Juan Pablo II juj cartata apachiran religionninman,  chaypin niran: “Askha kutitañan kay watapi ‘valekuraykichis’ Evangeliomanta predicanaykichispaq. Chaytan kunan yapamanta yuyarichishaykichis [...]. Apóstol Pablo jinan tukuy sonqowan predicananchis, paymi niran: ‘¡Ay, noqamanta, manachus Evangeliomanta willayman chayqa!’”, nispa. Chay qhepamanmi niran: “Chaytaqa manan ‘allin yachaqkunallachu’ willananku, aswanpas Diospa llaqtanpi llapa iñiqkunan willananku”, nispa. Chay kamachikuytaqa pisillan kasukuranku.

¹² Jehová Diospa testigonkunari, ¿predicanchischu? Arí, Testigokunallan willashanchis 1914 watapi Jesús janaq pachapi kamachikuy qallarisqanta. Jesuspa kamachikusqanta kasukuspan predicayta ancha importante llank’aypaq qhawarinchis (Mar. 13:10). Juj libron predicasqanchismanta nin: “Jehová Diospa testigonkunapaqqa predicaymi aswan importante. [...] Pitapas yarqaypi, llakisqata otaq onqosqata tarispaqa yanapankun, [...] ichaqa kay pachaq tukupunanmanta, salvakunamanta willakuykunatan astawanqa willanku”, nispa (Pillars of Faith—American Congregations and Their Partners). Arí, Testigokunallan Jesuspa predicasqanta jina predicashanchis.

13. ¿Maykaman allin willakuykuna willasqa kanan?

¹³ Jesusmi discipulonkunaman willaran allin willakuykuna “kay pachantinpi willasqa” kananta. Chaymi niran: “Llapa suyu runakunata yachachimuychis”, nispa (Mat. 24:14; 28:19, 20). Arí, Jesuspa nisqan jina, allin willakuykunaqa pachantinpin willasqa kanan.

14, 15. ¿Imaynapin yachanchis Jesuspa willasqan profecía Testigokunapi junt’akusqanta? (9 paginapi fotota qhaway.)

¹⁴ ¿Imaynapi yachanchis Jesuspa willasqan profecía Testigokunapi junt’akusqanta? Kaypi reparasun: Estados Unidos nacionpin llapa religionkunamanta 600.000 umallikuna kan, Testigokunataq 1.200.000 jina chay nacionpi predicashanku. Pachantinpin católica religionpi 400.000 jina sacerdotekuna kan, Testigokunataq 8 millón más kanchis, 240 nacionkunapitaqmi predicashanchis. Chhaynata predicaspan Jehová Diosninchista jatunchashanchis (Sal. 34:1; 51:15).

¹⁵ Tukukuy p’unchaymi qayllaykamushanña, chaymi llapa runakunaman predicayta munanchis. Chaypaqmi askha qelqakunata ruwakushan askha simikunamantaqmi t’ijrakushan. 700 más simikunapin millonninpi librokuna, revistakuna, tratadokuna, invitacionkuna ima ruwakushan. Traducción del Nuevo Mundo Bibliapas 130 simikunapin kashan, 200 millón jinatañan copiakunatapas ruwakun. Qayna watallan 4.500 millón qelqakunata ruwakuran. Internetpi direccionninchispas 750 más simikunapin kashan. ¡Manan mayqen religionpas chaykunataqa ruwanchu!

16. ¿Imaynapi yachanchis Testigokunallata Diospa santo espiritun yanapasqanta?

¹⁶ ¿Jayk’aqkaman predicasun? Jesusmi willaran ‘p’uchukay chayamunankama’  predicakunan kasqanta. ¿Pikunan kay p’uchukay tiempokunapi predicashanku? Testigokunallan, ichaqa Jehová Diospa santo espirituq yanapayninwanmi chaytaqa ruwashanchis (Hech. 1:8; 1 Ped. 4:14). Wakin runakunan ninku: “Noqaykuqa Diospa santo espirituntan chaskiyku”, nispa. Ichaqa, ¿predicashankuchu kay tukukuy tiempopi? Wakin religionkunaqa noqanchis jinan predicayta munanku, ichaqa manan atinkuchu. Wakinqa juj llaqtakunatan rinku predicaq, ichaqa pisi tiempollamantan wasinkuman kutipunku. Wakinqa wasin-wasintan predicanku, ichaqa manan Diospa gobiernonmantachu willanku. Chhaynaqa, ¿junt’ashankuchu Jesuspa kamachikusqanta?

17, 18. a) ¿Imaynapin yachanchis Testigokunalla allin willakuykuna predicasqanchista? b) ¿Pin yanapawashanchis chay llank’ayta junt’anapaq?

¹⁷ Chhaynaqa, ¿pikunan Diospa gobiernonmanta allin willakuykunata predicashanku? Sut’itan rikunchis Testigokunalla predicasqankuta. Arí, Testigokunallan Jesús jina Diospa gobiernonmanta willashanchis. Chay willakuyta willanapaqmi runakunaq may tarikusqankuman rishanchis. Jinaspapas Diosta runamasinchistawan munakusqanchisraykun willashanchis. Chay willakuytaqa pachantinpin predicashanchis, jinaspapas tukukuy p’unchay chayamunankaman mana p’itiyta predicasun.

¹⁸ ¡Ancha admiranapaqmi Diospa llaqtan allin willakuykunata imayna predicasqankuqa! Ichaqa, ¿pin yanapawashanchis chaykunata ruwanapaq? Apóstol Pablon niran: “[Diosmi] allin munayninman jina allin kaq ruwayta munachisunkichis jinaspa ruwachisunkichis”, nispa (Filip. 2:13). Chayrayku, Diosninchismanta kallpata mañakushallasun llank’ana chaskisqanchista allinta junt’anapaq (2 Tim. 4:5).