1, 2. ¿Imakunamantan kaypi yachasunchis?

TUKUKUY p’unchaykunapiñan kausashanchis. Pisi tiempollamantan Jehová Diosqa Jesucristopiwan chinkachinqa llapa gobiernokunata. Ichaqa manaraq chay pasashaqtinmi wichay ladomanta reyqa, uray ladomanta kaq reywan maqanakushallanqaku, qatikachashallanqakun Jehová Diospa llaqtantapas.

² Kaypin yachasunchis Daniel 11:40-12:1 willasqanmanta. Chaypin willashan pichus kay tiemponchispi uray ladomanta rey kasqanta. Chaykunata yachaymi yanapawasun mana manchakuspa jamuq tiempopi sasachakuyta aguantananchispaq.

3, 4. ¿Pin wichay ladomanta rey kay tiemponchispi? ¿Imaynapin chayta yachanchis?

³ “Unión Soviética” nisqaqa 1991 watapin chinkapuran, chay qhepamanqa mana piqpa qatikachasqallanmi iñiqmasinchiskunaqa Diosta serviranku (Dan. 11:34). Manaña qatikachasqa kasqankuraykun iñiqmasinchiskunaqa Diosmanta willaspa chay nacionkunapi askha runakunata yanaparanku. Ichaqa pisi-pisimantan Rusia nacionqa yanapaqninkunapiwan wichay ladomanta reyman tukupuran. Ñaupaq yachachikuypi yachasqanchisman jina, wichay ladomanta pichus rey kasqanta yachananchispaqqa kay kinsa ruwaykunatan junt’anan: Ñaupaqta, tukuy yuyayninta Diospa llaqtanpi churanan. Iskaypi, Jehová Diosta, llaqtantapas cheqnikunan. Kinsapitaq, chay reyqa guerrapi sayarinan uray ladomanta kaq reywan.

 ⁴ ¿Imaraykun nisunman “Rusia nacionmi yanapaqninkunapiwan wichay ladomanta reyqa kanku” nispa? Ñaupaqta, Rusia nacionqa Diospa llaqtanpin yuyayninta churaran, chaymi mana munanchu Diospa gobiernonmanta willakuykuna aparikunanta. Jinaspapas askha iñiqmasinchiskunatan qatikachashanku. Iskaypi, chay ruwasqankuwanmi rikuchinku Jehová Diosta llaqtantapas cheqnikusqankuta. Kinsapi, Rusia nacionqa uray ladomanta reywanmi atipanakushan, chay uray ladomanta reyqa Gran Bretaña, Estados Unidospiwanmi kanku. Chaykunamantan astawan yachasun.

5. ¿Jayk’aqmantapachan Daniel 11:40-43 profeciakuna junt’akushan? ¿Ima pasananmantan chaypi willakushan?

⁵ (Leey Daniel 11:40-43). Daniel 11:40-43 profeciakunan willashan tukukuy p’unchaykunamanta. Willashallantaqmi wichay ladomanta reyqa uray ladomanta reywan ch’aqwanankuta. Danielmi niran: “P’uchukay tiempotataq Egipto [wichay ladomanta] suyu reyqa Siria [uray ladomanta] suyu reywan ch’aqwanqa”, nispa (Dan. 11:40).

6. ¿Imaynapin yachanchis chay iskay reykuna ch’aqwapi kasqankuta?

⁶ Wichay ladomanta reypas uray ladomanta reypas pachantinpi llapa nacionkunatan kamachiyta munanku. Chaymi Segunda Guerra Mundial pasayta “Unión Soviética” nisqa yanapaqninkunapiwan Europa ladopi nacionkunata kamachiyta qallariranku. Chayta rikuspan uray ladomanta reypas juj nacionkunapiwan “OTAN” nisqata jatarichiranku guerra kaqtin yanapanakunankupaq. Chay iskay reykunaqa allin armakunayoq kaytan munaranku, chaymi chaykunapi askha qolqeta gastaranku. Chaymantapas paykunaqa atiyniyoq kasqankutan rikuchinku guerrapi tarikuq nacionkunata yanapaspa, chaytan ruwaranku África, Asia, América Latina ladopi tarikuq nacionkunawan. Chaymantapas chay iskay reykunaqa atipanakushallankun aswan atiyniyoq, aswan qhapaq kanankupaq. Jinaspapas Danielpa profetizasqan jina wichay ladomanta reyqa qatikachashallanmi Diospa llaqtanta (Dan. 11:41).

7. ¿Iman ‘munayllaña kaq allpa’?

⁷ Daniel 11:41 qelqapin willashan wichay ladomanta reyqa ‘munayllaña kaq allpaman’ phawaykunanmanta. Chay munayllaña kaq allpaqa Israel llaqtan karan, ‘llapa suyukunamantapas aswan allin’ kasqanrayku (Ezeq. 20:6). ¿Imaraykun munayllaña Israel allpa karan? Chaypi Jehová Diosta yupaychasqankurayku. Ichaqa 33 wata Pentecostés fiestamantapachaqa manañan Israel llaqtapiñachu Diosta yupaychakun, kunanqa Jehová Diosta yupaqchaqkunaqa pachantinpin kashanku. Chhaynaqa, kay tiempopi ‘munayllaña kaq allpaqa’ Jehová Diosta yupaychasqanchismi. Chaytan ruwanchis juñunakuykunaman rispa, Jehová Diosmanta runakunaman willaspa ima.

8. ¿Imaynatan wichay ladomanta rey phawaykuran ‘munayllaña kaq allpaman’?

⁸ Kay tukukuy p’unchaykunapipas wichay ladomanta reyqa ‘munayllaña kaq allpamanmi’ phawaykushan. Chaytan ruwaran Alemania nación wichay ladomanta rey kashaspa. Paymi “Segunda Guerra Mundial” nisqapi, ‘munayllaña kaq allpaman’ phawaykuran Diospa llaqtanta qatikachaspa  Diospa serviqninkunatapas wañuchispa ima. Chaymantapas Segunda Guerra Mundial pasayllatan “Unión Soviética” nisqaqa wichay ladomanta rey kapuran, paykunapas ‘munayllaña kaq allpamanmi’ phawaykuranku Jehová Diospa serviqninkunata qatiykachaspa, llaqtankumanta qarqospa ima.

9. ¿Imaynatan Rusia nación yanapaqninkunapiwan Diospa llaqtanman phawaykushanku?

⁹ Kay pisi watakunallapin Rusia nacionqa yanapaqninkunapiwan ‘munayllaña kaq allpaman’ phawaykuranku. ¿Imaynapin chayta yachanchis? 2017 watapin wichay ladomanta reyqa jark’aran Diosmanta willananchista, chaymantapas askha iñiqmasinchiskunatan carcelman wisq’achiran. Jinaspapas jark’arankun qelqanchiskunata, Diospa Palabran Bibliatapas rakinanchista. Chaymantapas Rusia nacionqa qechupuwaranchismi juñunakunanchis wasikunata, asambleakuna aparinanchis wasikunata, Betel wasikunata ima. Llapa chaykuna ruwasqankuwanmi umalliq t’aqa iñiqmasinchiskunaqa yacharanku wichay ladomanta reyqa Rusia nación yanapaqninkunapiwan kasqankuta. Chhaynaña kaqtinpas Diospa llaqtanqa manan mayqen gobiernokunawanpas maqanakunchischu. Aswanpas Diosmantan mañakushanchis llapa ‘reykunapaq llapa kamachikuqkunapaqwan’, chhaynapi mana jark’asqalla Diosta servinanchispaq (1 Tim. 2:1, 2).

10. ¿Atipanqachu wichay ladomanta rey uray ladomanta kaq reyta? ¿Imaraykun chayta yachanchis?

¹⁰ Daniel 11:40-45 profeciapin willashan wichay ladomanta kaq reyqa uray ladomanta kaq reyman phawaykunanta. Chhaynaqa, ¿atinqachu atipayta wichay ladomanta rey uray ladomanta kaq reyta? Manan. Biblian willan uray ladomanta reyqa Armagedón tiempokama kananta (Apo. 19:20). Arí, Armagedón guerrapiñan Jehová Diosqa uray ladomanta kaq reyta chinkachipunqa, jinallataq llapa gobiernokunatapas. Chaymanta astawan entiendenapaq qhawasunchis Daniel qelqapi Apocalipsis qelqapiwan profeciakunaq nisqanta.

11. ¿Imamantan willashan Daniel 2:43-45 nisqanpi? (Tapanpi kaq dibujota qhaway.)

¹¹ (Leey Daniel 2:43-45). Profeta Danielmi willaran jatunkaray runaman rijch’akuq estatuamanta, chay estatuaqa imaymana fierrokunawanmi ruwasqa kasqa. Chay estatuaq sapanka partenkunaqa juj gobiernon, chay gobiernokunaqa Diospa llaqtan contran kashanku. Chay estatuaq chakinkunaqa fierromanta t’urumantawanmi kasqa, chaymi tupan Gran Bretaña Estados Unidos nacionpiwan jujllachasqa kasqankuta. Bibliaq nisqan jina chay gobiernokunaqa Diospa gobiernon jamunankaman kashallanqaku, chaypiñan ch’usaqyachisqa kanqaku.

12. ¿Pin manchay phiña animalpa qanchis kaq uman? ¿Imatawanmi Juan willaran?

¹² Apóstol Juanpas willaranmi atiyniyoq nacionkuna Diospa llaqtan contra sayarinankuta. Chay willasqanpin chay nacionkunata rijch’anachin qanchis umayoq manchay phiña animalman, chay animalpa qanchis kaq umanqa Gran Bretaña, Estados Unidospiwanmi kanku. Chaymantapas Juanqa willanmi qanchis kaq umaqa Jesucristo jamunankama kamachikushanallanta, chaypin qanchis kaq umaqa llapa gobiernokunapiwan  kuska Armagedonpi ch’usaqyachisqa kanqaku (Apo. 13:1, 2; 17:13, 14). *

13, 14. ¿Pin ‘Magog suyu ladomanta rey Gog’? ¿Imaraykun yaqapas Diospa llaqtanta chinkachiyta munanqa?

¹³ Ezequiel libropin willashallantaq imachus pasanqa tukukuy p’unchaykunapi wichay ladomanta kaq reywan, uray ladomanta kaq reywanpas chayta. Ezequiel 38:10-23; Daniel 2:43-45; 11:44-12:1 chaymantapas Apocalipsis 16:13-16, 21 qelqakunapi nisqanqa kaq tiempollamantan rimashan. Chaykunamantan astawan yachasun.

¹⁴ Manchay ñak’ariy tiempo qallarishaqtinmi “allpa pachapi llapa reykunaqa” juñukunqaku (Apo. 16:13, 14; 19:19). Chay juñunasqa gobiernokunataqa ‘Magog suyu ladomanta rey Gog’ nispan sutichakun (Ezeq. 38:2). Chay juñunasqa gobiernokunan Diospa llaqtanta chinkachiyta munanqaku, ¿imarayku? Apóstol Juanpa willasqan jina cielomanta jatun chijchikuna chayamusqanrayku. Chay chayamuq chijchikunaqa yaqapaschá kanman Diospa juicionmanta runakunaman willasqanchis. Chay willasqanchisraykupaschá Magog allpamanta Gog reyqa Diospa llaqtanta chinkachiyta munanqa (Apo. 16:21).

15, 16. a) ¿Imamantan rimashanman Daniel 11:44, 45 qelqapi? b) ¿Iman pasanqa wichay ladomanta reywan, Magog allpamanta Gogwanpas?

¹⁵ Yaqachus jina Ezequielpa willasqanqa rimashanman Daniel 11:44, 45 (leey) willasqan tiempollamantataq. Danielmi willaran wichay ladomanta reyqa ‘inti lloqsimuy ladomanta, wichay ladomanta chayamuq willakuykunawan mancharikunanta, jinaspa k’araqta phiñakuspa askhata wañuchiyta munaspa purinanta’. Daniel qelqapi “askhata” nispaqa yaqachus jina rimashanman Jehová Diosta serviqkunamanta. Rimashallanmantaqmi gobiernokuna Jehová Diospa llaqtanta ch’usaqyachiyta munaspa phawaykunankumantawan. *

 ¹⁶ Wichay ladomanta reyqa yanapaqninkunapiwanmi Jehová Diospa llaqtaman phawaykunqaku, Jehová Diosmi ichaqa k’araqta phiñakunqa jinaspa “Armagedón” guerrata jatarichinqa (Apo. 16:14, 16). Chay phiñakuynin p’unchaypin Jehová Diosqa wichay ladomanta reyta ch’usaqman tukuchipunqa, ‘manan pipas yanapaytaqa atinqachu’ (Dan. 11:45). Chaytan ruwallanqataq Magog allpamanta Gog llapa juñunasqa gobiernokunawanpas.

17. a) ¿Pin “jatun kamachikuq Miguel”? b) Daniel 12:1 nisqan jina, ¿imatan ruwanqa?

¹⁷ Danielmi willashan imaynatas Jehová Dios chinkachinqa wichay ladomanta reyta jinallataq llapa yanapaqninkunatapas chayta. Willallantaqmi imaynatas llaqtanta libranqa chaytapas (leey Daniel 12:1). Bibliaq nisqan jina Miguel sutiqa Jesuspa juj kaq sutinmi. Paymi 1914 watamantapacha janaq pachapi kamachikushan, Diospa llaqtantapas ‘amachashan’. Jesusqa pisi tiempollamantan Armagedón guerrapi “sayarinqa”, jinaspa llapa Dios contra kaqkunata ch’usaqman tukuchipunqa. Danielmi willaran ‘khuyay llaki-phutiy p’unchaykunaqa’ Armagedón guerrapi tukupunanta. Apóstol Juanpas kaqllatan willaran. Willaranmi chay “manchay ñak’ariy tiempoqa” Armagedón guerrapi tukunanta (Apo. 6:2; 7:14).

18. ¿Imaraykun mana manchakuspa jamuq tiempota suyakunanchis?

¹⁸ Danielpas Juanpas willarankun Diosta serviqkunaqa “manchay ñak’ariy” tiempopi salvakunanchista, chaytan kusisqa suyakushanchis. Danielqa willallarantaqmi “Diospa qelqanpi llapa qelqasqa kaqkuna” salvakunankuta (Dan. 12:1). Chhaynaqa, ¿imatan ruwananchis Diospa qelqanpi sutinchis qelqasqa kananpaq? Chaypaqqa Jesuspin iñinanchis (Juan 1:29). Jinaspapas Diosmanmi qokunanchis jinaspa bautizakunanchis (1 Ped. 3:21). Chaymantapas Diospa gobiernonmantan willamunanchis yachachimunanchis ima.

19. ¿Imatan kunanmantapacha ruwananchis, imarayku?

¹⁹ Chhaynaqa, kunanmi kallpachakunanchis Jehová Diospi llaqtanpipas astawan iñinanchispaq. Chaymantapas Diospa gobiernontan ñaupaqman kausayninchispi churananchis. Chaykunata ruwasun chayqa salvakusunmi wichay ladomanta rey uray ladomanta reytawan Jehová Dios ch’usaqman tukuchipuqtin.